Uzifundisise kuhle na iinThala zomnyaka lo? Linga ukuphendula imibuzo elandelako:

Umtlolo kaJakopo 5:11 usinikela siphi isiqinisekiso nawuthi uJehova ‘usithanda khulu begodu unesirhawu?’

Siyazi ukuthi indlela uJehova atjengisa ngayo ukuthi uyasirhawukela kukuthi asilibalele nasenze imitjhapho. UJakopo 5:11 uyasiqinisekisa ukuthi uJehova ufuna ukusisiza. Sizokwenza kuhle nasimlingisako.—w21.01, k. 21.

Kubayini uJehova enze ukuthi kube nobuhloko?

Kungebanga lokuthi uyasithanda. Ubuhloko benza umndeni kaJehova ube ngohlelekileko begodu ube nokuthula. Ilunga ngalinye lomndeni nalikhambisana nelungiselelweli kuzokwaziwa ukuthi ngubani ekufuze athathe iinqunto begodu ngubani ozokudosa phambili ekufezekiseni iinquntwezo.​—w21.02, k. 3.

Kubayini amaKrestu kufuze atjheje nakasebenzisa zokuthintana?

Nange umuntu akhetha ukusebenzisa zokuthintana, kufuze atjheje abantu azihlanganisa nabo. Lokhu kungaba budisi ukukwenza, khulukhulu nasikhuluma nabantu abanengi. (1 Thim. 5:13) Kunezinye iingozi ezingaba khona ngokurhatjha iindaba ezingakaqinisekiswa nokusebenzisa iinomboro zabantu esilotjha nabo ukuthi sibathengisele.​—w21.03, k. 31.

Kubayini uZimu avuma bona uJesu ahlunguphazwe abe afe?

UJesu kwakufuze aphanyekwe esigodweni ukuze akwazi ukutjhaphulula amaJuda ekuqalekisweni. (Gal. 3:10, 13) Ibanga lesibili kukuthi uJehova bekabandula uJesu bona azokudlala indima yokuba mPhristi oPhakemeko. Kwesithathu, uJehova wavumela uJesu bona ahlunguphazwe kabuhlungu ukuze kuphenduleke umbuzo othi abantu bangahlala bathembekile na ngitjho nanyana balingwa kabuhlungu. (Job. 1:9-11)​——w21.04, kk. 16-17.

Khuyini ongayenza nangabe kubudisi ukufumana abantu esimini?

Linga ukuya ebantwini ngeenkhathi ezingafaniko. Ungalinga ukutjhumayela eendaweni ezihlukahlukeneko. Ungalinga iindlela ezihlukileko zokutjhumayela, njengokutlola iincwadi.​—w21.05, kk. 15-16.

Bekatjho ukuthini umpostoli uPowula nakathi: “Ngomthetho ngafa ngokuphathelene nomthetho”? (Gal. 2:19)

UmThetho kaMosi waveza ukuba nesono kwabantu bewadosela ama-Israyeli kuKrestu. (Gal. 3:19, 24) Lokhu kwabangela uPowula ukuthi amukele uKrestu. Ngokwenza njalo, uPowula ‘wafa ngokuphathelene nomthetho’ begodu besele aphumile ngaphasi komthetho.​—w21.06, k. 31.

UJehova usibekele njani isibonelo sokukghodlhelela?

UJehova ukghodlhelelele ihlazo elilethwe egameni lakhe, ukuphikiswa kobukhosi bakhe, ukuhlubuka kwabanye babantwana bakhe, amala kaDeveli angapheliko, ukuhlunguphazwa kweenkhonzi zakhe azithandako, ukuhlukana nabangani bakhe abahlongakalako, ukugandelelwa babantu abakhohlakeleko, ukwehliswa isithunzi komndeni wabantu nokonakaliswa kwendalwakhe.​—w21.07, kk. 9-12.

UJosefa usibekele siphi isibonelo esihle sokukghodlhelela?

Wakghodlhelelela ukuphathwa kumbi bafowabo. Lokho kwabangela bona asolelwe ngamanga abe abotjhwe iminyaka eminengi eGibhide.​—w21.08, k. 12.

UHagayi 2:6-9, 20-22 ukhuluma ngakuphi ukusikinyeka okungokomfanekiso?

Iintjhaba aziwuthabeli umlayezo womBuso esiwutjhumayelako, kodwana abantu abanengi balamukele iqiniso. Ingasikade iintjhaba zizokusikinywa kwamaswaphela la zizokutjhatjalaliswa khona.​—w21.09, kk. 15-19.

Kubayini kufuze singapheli amandla emsebenzini wokutjhumayela?

UJehova uyayibona imizamwethu begodu uyayithabela. Nasingalahli itewu ekutjhumayeleni, sizokutlonyeliswa ngokuphila okungapheliko.​—w21.10, kk. 25-26.

ULevitikusi isahluko 19 usisiza njani ukuthi sisebenzise iseluleko esithi: “Cwengekani kikho koke ukuziphatha kwenu”? (1 Pit. 1:15)

Iveseli kungenzeka lidzujulwe kuLevitikusi 19:2. Isahluko 19 sineembonelo ezingasisiza ukuthi sisebenzise yoku-1 kaPitrosi 1:15 ekuphileni kwethu kwaqobe langa.​—w21.12, kk. 3-4.