Kansi mwapindula tyani poŵelenga Nsanja za Mulonda za caka cino? Onani ngati mungakwanishe kuyankha makonsho aŵa:

Kansi mau opezeka pa Yakobo 5:11 akuti Yehova ali na “cikondi cikulu” koma soti ni “wacifundo” otilimbikisha tyani?

Yehova otikhululukila macimo ŵasu cifukwa ni wacifundo. Molingana na Yakobo 5:11, yove otiyavya nthawi zonse cifukwa ali na cikondi cikulu. Nase tufunika kutolela cisanzo cake.—w21.01, peji 21.

Ndaŵa yanji Yehova enkhazikisha makonzedwe a umutu?

Yehova enkhazikisha makonzedwe a umutu cifukwa cokonda banja yake. Makonzedwe aŵa ni mphaso yofumila kwa yove. Umutu ucitisha kuti banja ya Yehova ikonkhala mwamtendele koma soti mwadongosolo. Banja iliyonse yamene yucita zinthu mokatizhyana na makonzedwe aŵa, yuziŵa munthu amene ali na udindo wopanga malamulo nooneshesha kuti yokonkhewa.—w21.02, peji 3.

Ndaŵa yanji Akhristu ofunika kusamala poseŵenzesha mapulogilamu otumilako mameseji a pa vipangizo valomba?

Ngati Mkhristu wasankha kuseŵenzesha mapulogilamu aŵa, ofunika kusankha mosamala ŵanthu otandala nao. Koma kucita izi kungankhale kovuta ngati otandala pa gulu ikulu. (1 Tim. 5:13) Ofunika soti kusamala cifukwa cingankhale covuta kupewa nkhani ziliye umboni. Kuyangizhyila apo, ofunika kupewa kuseŵenzesha mapulogilamu aŵa pocita zamalonda.—w21.03, peji 31.

Ndaŵa yanji Mulungu elola Yesu kuti avutike na kufwa?

Coyamba, Yesu epacikiwa pa cimuti conzunzikilapo kuti amasule Ayuda ku tembelelo. (Agal. 3:10, 13) Cifukwa caciŵili cecilolela Mulungu kuti Mwana wake avutike, n’cakuti enzomuphunzisa kuti akankhale Mkulu wa Ansembe msogolo. Cacitatu, kukhulupilika kwa Yesu mpaka imfwa kweonesha kuti n’zokwanishika ŵanthu kunkhala okhulupilika akakumana na mayeselo. (Yobu 1:9-11)—w21.04, mapeji 16-17.

Kansi tufunika kucitanji ngati ŵanthu opezeka lini pa ng’anda pa nthawi yatulalikila?

Tingafunike kucinja nthawi noyamba kulalikila pa nthawi yamene ŵanthu opezeka pa ng’anda. Tingafunike soti kucinja malo olalikilako. Kuyangizhyila apo tingafunike kuseŵenzesha njila ziyakine zolalikililamo monga ulaliki wa makalata.—w21.05, mapeji 15-16.

Kansi mtumwi Paulo etanthauzanji pecilaŵila kuti: “Mwa cilamulo, necifwa ku cilamulo”? (Agal. 2:19)

Cilamulo ca Mose cecitisha kuti macimo aonekele ndipo cesogolela Aisiraeli kwa Khristu. (Agal. 3:19, 24) Izi niye zeyavya Paulo kuti ankhale Mkhristu. Tetyo Paulo “ecifwa ku cilamulo”, kutanthauza kuti enze lini pansi pa cilamulo.—w21.06, peji 31.

Kansi Yehova waonesha tyani cisanzo ciweme pa nkhani yopilila?

Yehova wankhala opilila kunenezewa kwa zina yake, kusushiwa kwa ulamulilo wake, kupanduka kwa angelo na ŵanthu ayakine, wenye wa Satana, kuvutika kwa atumiki ŵake, imfwa ya ashamwali ŵake, kuvutishiwa kwa ŵanthu cifukwa ca ŵanthu ayakine aipa na kuonongewa kwa vinthu vecilenga.—w21.07, mapeji 9-12.

Kansi Yosefe eonesha tyani cisanzo ciweme pa nkhani yonkhala woleza mtima?

Yosefe epilila vinthu viliye cilungamo vecimucitila akwake. Pecigulisiwa ku Iguputo, epasiwa mlandu wawenye ndipo eikiwa m’jele kwa vyaka vinyinji.—w21.08, peji 12.

Kansi lemba ya Hagai 2:6-9, 20-22 yelosela za kugwendeza kotyani?

Ŵanthu ayakine okana kumvwishila uthenga wa Ufumu. Koma ayakine omvwishila ndipo izi zacitisha kuti awele m’gulu ya Yehova. Lombapano, Yehova akagwendeze mitundu yonse kosilizhyila pa nkhondo ya Aramagedo, ndipo ŵanthu aipa akaonongewe.—w21.09, mapeji 15-19.

Ndaŵa yanji tufunika lini kutaya mtima patulalikila?

Yehova osangalala akaona khama yatucita pa nchito yolalikila. Ndipo ngati tupilila nopitilizhya kucita nchito iyi, tikapeze moyo wosasila.—w21.10, mapeji 25-26.

Kansi Levitiko 19 yutiyavya tyani kumvwishisha malangizo akuti: “Nkhalani atuŵa m’zocita zanu zonse”? (1 Pet. 1:15)

Cuoneka kuti mtumwi Petulo ekata mau a pa Levitiko 19:2. Caputa 19 ca buku ya Levitiko cuonesha njila zosiyanasiyana zokhuza mwatingaseŵenzeshele mfundo zupezeka pa 1 Petulo 1:15 pa umoyo wasu.—w21.12, mapeji 3-4