Na o badile ka kelohloko dimakasine tša ngwaga wo tša Morokami? Bona ge e ba o ka kgona go araba dipotšišo tše di latelago:

Ge Jakobo 5:11 e re Jehofa “o na le lerato le legolo” e bile ke yo a “gaugelago” e ra gore’ng?

Re a tseba gore Jehofa o a re gaugela e bile o ikemišeditše go re lebalela. Jakobo 5:11 e re kgonthišetša gore o ikemišeditše le go re thuša ka gobane a re rata. Ge e ba re mo ekiša re tla be re dira gabotse kudu.​—w21.01, letl. 21.

Ke ka baka la eng Jehofa a neile ba bangwe maikarabelo a go etelela pele?

O dirile seo ka gobane a re rata. Tokišetšo ye e dira gore lapa la gagwe le šome ka khutšo le ka thulaganyo. Motho yo mongwe le yo mongwe yo a thekgago tokišetšo ye o a tseba gore ke mang yo a swanetšego go etelela pele ge go dirwa diphetho.​—w21.02, letl 3.

Ke ka baka la eng Bakriste ba swanetše go ba šedi ge ba diriša mananeo a go romelana melaetša ka difouno?

Ge e ba motho a diriša mananeo a itšego, o swanetše go kgetha gore o boledišana le batho ba mohuta mang. Eupša ka dinako tše dingwe go ka no se be bonolo ge re diriša mananeo ao a dirišwago ke batho ba bantši. (1 Tim. 5:13) Le gona go ka ba kotsi go botša batho dilo tšeo re sa tsebego ditaba ka botlalo ka tšona le go diriša diaterese tša mokgatlo go dira dilo tša kgwebo.​—w21.03, letl. 31.

Ke ka baka la eng Modimo a ile a dumelela gore Jesu a tlaišege le go hwa?

Sa pele, Jesu o ile a swanelwa ke go kokotelwa koteng ya tlhokofatšo e le gore a lokolle Bajuda ka ge ba be ba rogakilwe. (Bagal. 3:10, 13) Sa bobedi ke gore o be a tlwaetša Jesu gore a swanelege go tlo ba Moperisita yo a Phagamego. Sa boraro ke gore ge Jesu a be a botega go fihla a bolawa, o be a bontšha gore batho ba ka botegela Modimo le ge ba tlaišwa o šoro. (Jobo 1:9-11)​—w21.04, matl. 16-17.

O ka dira’ng ge e ba o sa hwetše batho gabonolo tšhemong?

O ka leka go ya go bona ka nako yeo ba hwetšagalago ka yona. Leka go bolela ditaba tše dibotse lefelong le lengwe. Le gona o ka leka mokgwa o mongwe o bjalo ka go ngwala mangwalo.—w21.05, matl. 15-16.

Moapostola Paulo o be a e ra go re’ng ge a be a re: “Gobane ka molao ke hwile mabapi le molao”? (Bagal. 2:19)

Molao wa Moshe o ile a dira gore batho bao ba nago le sebe ba fetoge le go thuša Baisiraele gore ba latele Kriste. (Bagal. 3:19, 24) Seo se ile sa dira gore Paulo le yena e be molatedi wa Kriste. Ka go dira seo, Paulo o be a “hwile mabapi le molao” le gona go be go se sa na seo se mo amago.​—w21.06, letl. 31.

Jehofa o re beetše bjang mohlala o mobotse wa go kgotlelela?

Jehofa o kgotleletše ge leina la gagwe le senywa, ge Mmušo wa gagwe o ganetšwa, ge bana ba bangwe ba gagwe ba be ba mo hlanogela, ge Sathane Diabolo a bolela maaka ka yena, ge bahlanka ba gagwe ba tlaišega, ge bahlanka ba gagwe bao ba botegago ba ehwa, ge batho ba babe ba tlaiša batho ba bangwe, le ge batho ba senya lefase leo a le bopilego.​—w21.07, matl. 9-12.

Josefa o re beetše mohlala ofe o mobotse wa go se fele pelo?

O ile a kgotlelela ge bana babo ba be ba mo swara gampe. Seo se ile sa dira gore a latofatšwe ka maaka gomme a golegwe ka mengwaga e mentši kua Egipita.​—w21.08, letl. 12.

Lengwalo la Hagai 2:6-9, 20-22 le boletše eng e sa le pele ka go šišinywa ga seswantšhetšo?

Batho ga ba re theetše ge re ba botša ditaba tše dibotse tša Mmušo wa Modimo, eupša ba bantši ba tla ka mokgatlong wa Jehofa. Go se go ye kae, ditšhaba di tla šišinywa la mafelelo ge di tla be di fedišwa.​—w21.09, matl. 15-19.

Ke ka baka la’ng re sa swanela go fela matla ge re le tšhemong?

Jehofa o bona maiteko a rena e bile o a thaba. Ge e ba re sa fele matla re tlo hwetša bophelo bjo bo sa felego.​—w21.10, matl. 25-26.

Lengwalo la Lefitiko 19 le ka re thuša bjang go latela keletšo yeo e rego: “Ebang ba bakgethwa boitshwarong bja lena ka moka”? (1 Pet. 1:15)

Mohlomongwe temana ye e ka ba e tsopotšwe go Lefitiko 19:2. Kgaolo 19 e re nea mehlala e mentši yeo e ka re thušago go diriša mantšu a a lego go Petro wa Pele 1:15 maphelong a rena.​—w21.12, matl. 3-4.