Kodi imwepo mwawerenga bwino-bwino nkhani za gole lino mu Ntsanza ya Mulindiri? Penu mun’ti inde, yezerani kutawira mibvunzo iri m’nyantsiyi:

Kodi n’citsimikizo ciponi comwe tingakhale naco pa mafala yakugumanika pa Tiyago 5:11 yakuti Yahova “ngwalufoyi cairo” na “wantsisi”?

Timbadziwa kuti Yahova, ambatilekerera tikaphonya thangwe rakuti iye ngwa ntsisi. Cinembo ca Tiyago 5:11 cimbatitsimikizira kuti iye ambabzipereka na mtima wace wentse kuti atithandize. Ifepano tin’funika kumutewezera.—w21.01, tsa. 21.

Thangwe ranyi Yahova adakhazikisa utsogoleri?

Iye adacita bzimwebzi thangwe ra lufoyi. Makonzedwe yamweya yambacitisa kuti banja lace lakukhulupirika licite bzinthu mwa mtendere na mwakulinganizika. Munthu ali-wentse wa m’banja limweri omwe ambacita bzinthu mwakubverana na makonzedwe yamweya ambadziwa kuti mbani omwe ana ugo bwakumalizira bwakucita cakusankhula na kuteweza bzomwe bzasankhulidwabzo.—w21.02, tsa. 3.

Thangwe ranyi Akristau an’funika kusamala pa kuphatisa basa mbuto zakutumizirana mensaje za pa interneti?

Munthu akasankhula kuphatisa basa mbuto zimwezi zakutumizirana mensaje za pa interneti, iye an’funika kusankhula bwino wanthu omwe an’funa kumbaceza nawo. Bzimwebzi bzingakhale bzakunesa iye akakhala akuphatisa basa mbuto zakutumizirana mensaje zomwe zina wanthu azinji kwene-kwene. (1 Timotio 5:13) Pana ngozi pomwe ya kumwaza nkhani zomwe tiribe nazo umboni na kuphatisa basa njira zomwe abale adakonza kuti ticitire bzinthu bzauzimu ticiziphatisa basa lakucitira malonda.—w21.03, tsa. 31.

Kodi ni mathangwe manango yaponi yomwe yadacitisa Mulungu kulekerera kuti Jezu abonere na kufa?

Thangwe libodzi ndakuti kukhomereredwa kwa Jezu pa muti, kudacitisa kuti Adjuda alekereredwe pikado zawo. (Agalatiya 3:10, 13) Caciwiri n’cakuti Yahova akhakonzekeresa Jezu kuti adzakhale Mkulu wa Antsembe. Ndipo thangwe lacitatu ndakuti kukhulupirika kwa Jezu mpaka infa kudalatiza kuti wanthu angakwanise kukhala wakukhulupirika napo acigumana na mayezo makulu kwene-kwene. (Djobi 1:9-11)—w21.04, matsa. 16-17.

Kodi n’ciyani comwe mungacite penu mukukwanisa lini kugumana wanthu mu utumiki?

Imwepo mungayezere kuwagumana pa nthawe yomwe angakhale ali pa mui. Imwepo mungayezerembo kupalizira mbuto zakusiyana-siyana. Ndipo mungayezerembo njira zinango za kapaliziridwe, ninga kucita kunemba tsamba.—w21.05, matsa. 15-16.

Kodi Paulo akhathandauza ciyani pomwe adalewa kuti: “Thangwe ra lamulo, ndidafa kuti nditeweze lamulolo”? (Agalatiya 2:19)

Lamulo la Mozeji lidalatiza kuti wanthu wentse ana pikado ndipo lidafikisa Ajirayeri kuna Kristu. (Agalatiya 3:19, 24) Bzimwebzi bzidacitisa Paulo kubvuma Kristu. Mwakucita bzimwebzi, Paulo “adafa mu lamulo”; iye akhali lini pomwe wakumangiriridwa mu lamulo.—w21.06, tsa. 31.

Kodi Yahova ambatipasa tani ciratizo cabwino pa nkhani ya kupirira?

Yahova ambapirira kunyozedwa kwa dzina lace, kunyozedwa kwa utongi bwace, kupanduka kwa wana wace winango, magunkha ya Sathani, kubonera kwa atumiki wace omwe ambawafuna, cisuwo na axamwali wace omwe adafa, kubonera kwa wanthu pa dziko la pantsi na kudzongeka kwa bzinthu bzomwe iye adalenga.—w21.07, matsa. 9-12.

Kodi ni ciratizo cabwino ciponi comwe Zuze adapereka pa nkhani ya kupirira?

Iye adapirira bzinthu bzakusaya cirungamo bzomwe abale wace adamucitira. Bzimwebzi bzidacitisa kuti iye akanamiziridwe na kuikhidwa m’kawoko ku Edjipito magole mazinji.—w21.08, tsa. 12.

Kodi Hagai 2:6-9, 20-22 ambalewa bza kutekenyesa kwakuyezezera kuponi?

Mitundu ya wanthu imbakomedwa lini na mafala ya Umambo, koma wanthu azinji akubvuma cadidi. Tsapanopali mitundu ya wanthu in’dzatekenyesedwa pomwe in’dzapfudzidwa.—w21.09, matsa. 15-19.

Thangwe ranyi tin’funika lini kubwerera m’mbuyo pakucita utumiki bwathu?

Yahova ambawona nyongo yathu, ndipo ambakomedwa na bzomwe timbacita. Tikasaya kuneta ayai kubwerera m’mbuyo, tin’dzatambira moyo wakusaya kumala.—w21.10, matsa. 25-26.

Kodi Mwambo kapitulo 19 ambatithandiza tani kuphatisa basa malango yakuti: “Khalanimbo wakucena m’bzicito bzanu bzentse”? (1 Pedru 1:15)

Bzikuwoneka kuti mafala ya vesi limweri yadacokera pa Mwambo 19:2. Kapitulo 19 imbalatiza bzinthu bzizinji bzomwe tingacite pa kuphatisa basa nfundo ya pa 1 Pedru 1:15 pa moyo wathu wa ntsiku na ntsiku.—w21.12, matsa. 3-4.