Wɔgenga Ɛzinzalɛ Arane mɔɔ ɛra ɛvolɛ ɛhye anu la kpalɛ ɔ? Nea saa ɛbahola wɔabua kpuya ɛhye mɔ a:

Anwodozo boni a edwɛkɛ mɔɔ wɔ Gyemise 5:11 mɔɔ se Gyihova “lɛ ahunluyelɛyelalɛ” yɛɛ “ɔse anwunvɔne” la maa yɛnyia a?

Yɛze kɛ kɛmɔ Gyihova se anwunvɔne la ati, ɔlɛ ɛhulolɛ kɛ ɔbava yɛ ɛtane yeahyɛ yɛ. Gyemise 5:11 maa yɛnyia anwodozo kɛ eza ɔlɛ ɛhulolɛ kɛ ɔbaboa yɛ. Ɔwɔ kɛ yɛbɔ mɔdenle yɛsukoa ye.​—w21.01, m. 21.

Duzu ati a Gyihova yɛle tileyɛlɛ nwo ngyehyɛleɛ ne a?

Ɔkulo yɛ la ati a ɔyɛle ye zɔ a. Tileyɛlɛ nwo ngyehyɛleɛ ne maa debie biala kɔ zo pɛpɛɛpɛ wɔ anzodwolɛ nu wɔ ye abusua ne anu. Awie biala mɔɔ wɔ abusua ne anu mɔɔ di ngyehyɛleɛ ɛhye azo la ze awie mɔɔ ɔwɔ kɛ ɔsi kpɔkɛ wɔ abusua ne anu nee awie mɔɔ ɔwɔ kɛ ɔnea ɔmaa bɛdi kpɔkɛzilɛ ne anwo gyima la.​—w21.02, m. 3.

Duzu ati a ɔwɔ kɛ Kilisienema nea boɛ wɔ ɛlɛtɔlɔneke ninyɛne mɔɔ bɛfa bɛdi adwelie la anwo a?

Saa awie kulo kɛ ɔfa ninyɛne ɛhye mɔ ɔdi gyima a, ɔhyia kɛ ɔnea menli mɔɔ ɔ nee bɛ bali adwelie la boɛ. Ɛhye ɛyɛlɛ ɛnla aze, titili saa menli mɔɔ wɔ nu la anwo zonle a. (1 Tim. 5:13) Esiane bieko mɔɔ wɔ nu la a le kɛ ɔmaa edwɛkɛ mɔɔ ɛnle nɔhalɛ la salo yɛɛ awie mɔ dua zo nee mediema di gua.​—w21.03, m. 31.

Duzu ati a Nyamenle maanle adenle maanle Gyisɛse nwunle amaneɛ na ɔwule a?

Mɔɔ limoa, ɛnee ɔwɔ kɛ bɛkenda Gyisɛse wɔ baka zo amaa yealie Dwuuma yeavi munzule anzɛɛ amowa bie abo. (Gal. 3:10, 13) Mɔɔ tɔ zo nwiɔ, ɛnee ɔlɛtete Gyisɛse yeamaa gyima mɔɔ ɔbayɛ ye kenle bie kɛ Ɛsɔfo Kpanyinli la. Yɛɛ mɔɔ tɔ zo nsa, nɔhalɛ mɔɔ Gyisɛse lile hɔle ewule nu la maa ɔda ali kɛ alesama bahola ali nɔhalɛ amaa Nyamenle wɔ mekɛ mɔɔ bɛlɛyia sɔnea mɔɔ anu yɛ se bɔbɔ la. (Dwobu 1:9-11)​—w21.04, m. 16-17.

Saa ɔyɛ se kɛ ɛbado menli wɔ bɛ azua nu wɔali bɛ daselɛ a, duzu a ɛbahola wɔayɛ a?

Bɔ mɔdenle kɛ ɛbali daselɛ wɔ mekɛ mɔɔ menli wɔ sua nu la. Eza ɛbahola wɔali daselɛ wɔ ɛleka gyɛne. Yɛɛ ɛbahola wɔabɔ mɔdenle wɔalua ndenle ngakyile zo wɔali daselɛ, bie a le kɛlata ɛhɛlɛlɛ.​—w21.05, m. 15-16.

Mɔɔ ɛzoanvolɛ Pɔɔlo hanle kɛ: “Ɔlua mɛla zo menwule memaanle mɛla” la, duzu a ɛnee ɔlɛkile a? (Gal. 2:19)

Mosisi Mɛla ne maanle ɔlale ali kɛ alesama ɛnli munli na ɔhilele Yizilayɛma adenle ɔmaanle bɛnwunle Kelaese ne. (Gal. 3:19, 24) Ɛhye maanle Pɔɔlo liele Kelaese lile. Ɛhye ati, Pɔɔlo ‘wule maanle mɛla’; ɛnee Mɛla ne ɛnlɛ ɔ nwo zo tumi bieko.​—w21.06, m. 31.

Kɛzi bɛda kpundiigyinlanlɛ ali la anwo neazo boni a Gyihova ɛyɛ ɛmaa yɛ a?

Gyihova ɛgyinla ye duma ne mɔɔ bɛzɛkye ye, ye tumililɛ ne mɔɔ bɛdwazo bɛtia ye, ɔ mra bie mɔ mɔɔ ɛdwazo ɛtia ye, adalɛ mɔɔ Abɔnsam bɔ ye dahuu, ye azonvolɛ mɔɔ ɛlɛnwu amaneɛ, ɔ gɔnwo mɔ mɔɔ ɛwu, alesama mɔɔ amumuyɛma ɛlɛsisi bɛ, alesama mɔɔ bɛ ɛbɛla ɛkpɔlɔ yɛɛ ye abɔdeɛ mɔɔ bɛlɛsɛkye ye la anloa.​—w21.07, m. 9-12.

Abotanezilɛ nwo neazo kɛnlɛma boni a Dwosefi yɛle a?

Ɔ mediema ne mɔ nee ye anli ye boɛ ɛdeɛ noko ɔgyinlanle ɔ nloa. Ɛhye maanle bɛdole ye ɛzonle na bɛdole ye efiade ɛvolɛ dɔɔnwo wɔ Yigyibiti.​—w21.08, m. 11.

Sɛkɛlɛneɛ adenle zo ɛkpusulɛ boni a Hagae 2:6-9, 20-22 hanle nwolɛ edwɛkɛ a?

Maanle maanle ne mɔ anye ɛnlie Belemgbunlililɛ edwɛkɛhanlɛ gyima ne anwo, noko menli dɔɔnwo ɛra nɔhalɛ ne anu. Ɔnrɛhyɛ, bɛbakpusu maanle maanle ne mɔ bɔkɔɔ wɔ mekɛ mɔɔ bɛbazɛkye bɛ la.​—w21.09, m. 15-19.

Duzu ati a ɔnle kɛ yɛmaa yɛ sa nu to wɔ yɛ ɛzonlenlɛ gyima ne anu a?

Gyihova nwu mɔdenle mɔɔ yɛlɛbɔ la, na ɔ nye die nwolɛ. Saa yɛammaa yɛ sa nu ando a, yɛbanyia dahuu ngoane.​—w21.10, m. 25-26.

Kɛzi Lɛvitikɔso tile 19 baboa yɛ yeamaa yɛava folɛdulɛ mɔɔ se, “Bɛdabɛ noko bɛyɛ nwuanzanwuanza wɔ bɛ nyɛleɛ muala anu” la yɛali gyima ɛ? (1 Pita 1:15)

Ɔbayɛ kɛ Pita yele edwɛkɛ ɛhye vile Lɛvitikɔso 19:2. Lɛvitikɔso tile 19 maa yɛnwu kɛzi yɛbava 1 Pita 1:15 yɛali gyima alehyenlɛ biala la anwo neazo dɔɔnwo.​—w21.12, m. 3-4.