Аци анзи «Гъӕуайгӕнӕн мӕсуг»-и ци статьятӕ адтӕй, уони лӕмбунӕг кастӕ? Цума дӕ бон исуодзӕй аци фарстатӕбӕл дзуапп раттун?

Иакови 5:11 финст ӕй, «Йеговӕ фӕлмӕн уарзтӕй ке уарзуй ӕма фӕлмӕнзӕрдӕ ке ӕй». Е нин цӕбӕл дзорӕг ӕй?

Мах ӕй зонӕн, Йеговӕ фӕлмӕнзӕрдӕ ке ӕй, ӕма нин уомӕ гӕсгӕ нӕ тӕрегъӕдтӕ ке ниххатир кӕнуй. Иакови 5:11 финст дзурдтӕй бӕрӕг ӕй, Йеговӕ ма нин тӕрегъӕд ке кӕнуй ӕма ’й банхус кӕнун ке фӕффӕндуй. Ӕма мах дӕр гъӕуама иннетӕмӕ уӕхӕн зӕрдӕ дарӕн (w21.01, 21 ф.).

Йеговӕ кӕмӕндӕрти бартӕ цӕмӕн равардта?

Йеговӕ уотӕ уомӕн бакодта, ӕма нӕ уарзуй. Уой фӕрци ӕ бийнонти астӕу ес фарнӕ ӕма си алцидӕр ӕй уагӕ ӕма ӕгъдаубӕл. Йеговӕ ци ӕгъдау ӕрфедар кодта, уомӕ гӕсгӕ бийнонтӕй алкедӕр ку архайа, уӕд зондзӕнцӕ, цӕхуӕндӕр гъуддӕгти фӕдбӕл унаффӕ ка гъӕуама рахӕсса ӕма еци гъуддӕгтӕ кӕронмӕ ка гъӕуама искӕна, уой (w21.02, 3 ф.).

Мессенджертӕй пайда кӕнгӕй киристӕнттӕ лӕдӕргӕ цӕмӕн гъӕуама уонцӕ?

Адӕймаг мессенджертӕй ку пайда кӕна, уӕд гъӕуама лӕмбунӕг сагъӕс кӕна, кӕмӕ финсдзӕй, уобӕл, уӕлдайдӕр ба, мессенджерти ци устур къуӕрттӕ ’скӕнунцӕ, уоми ку уа, уӕд (1 Тим. 5:13). Удта си гъӕуама, бӕлвурд ке нӕ зона, уӕхӕн хабӕртти туххӕй ма финса ӕма ӕхецӕн хуӕртӕ ӕма ӕнсувӕртӕбӕл ӕхца ма коса (w21.03, 31 ф.).

Йеговӕ цӕмӕн бауагъта, цӕмӕй Йесо фӕгъгъезӕмарӕ кодтайдӕ ӕма рамардайдӕ?

Фиццаг: Йесо гъӕуама гъӕдӕбӕл рамардайдӕ, цӕмӕй дзиуиттӕгти ӕлгъистӕй иссӕребарӕ кодтайдӕ (Гал. 3:10, 13). Дуккаг: Йеговӕ Йесой цӕттӕ кодта Хестӕр Саугини ихӕстӕ ӕнхӕст кӕнунмӕ. Ӕртиккаг: Йесо уӕхӕн гъезӕмӕрттӕ ке бавзурста, уомӕй рабӕрӕг ӕй, адӕнӕн сӕ бон ке ӕй уӕззау фӕлварӕнти дӕр федарӕй байзайун (Иов 1:9–11) (w21.04, 16, 17 фф.).

Адӕни хӕдзари зин баййафӕн ку уа, уӕд дӕ бон ци ӕй кӕнун?

Байархайӕ, цӕмӕй адӕнмӕ ӕрбацӕуай, хӕдзари арӕхдӕр ци афони фӕуунцӕ, еци афони. Дӕ бон ма ӕй ӕндӕр рауӕнти дӕр игъосун кӕнун. Удта ма дӕ бон ӕй аллихузи мадзӕлтти фӕрци игъосун кӕнун, зӕгъӕн, финстӕгутӕ финсун (w21.05, 15, 16 фф.).

Апостол Павели аци дзурдтӕй ци зӕгъун фӕндадтӕй: «Закъон ӕхуӕдӕг ци дзоруй, уомӕ гӕсгӕ ӕз закъонӕн рамардтӕн»? (Гал. 2:19).

Моисеййи закъони фӕрци бӕрӕг адтӕй, тӕрегъӕдгун адӕнӕн сӕ бон ке нӕй, Хуцауи уагӕвӕрдтӕмӕ гӕсгӕ ӕнхӕстӕй цӕрун (Гал. 3:19, 24). Закъон адӕни кодта Киристемӕ. Павел баууӕндтӕй Киристебӕл. Уотемӕй «Закъонӕн рамардӕй», гъома Закъони дӕлбарӕ нӕбал адтӕй (w21.06, 31 ф.).

Йеговӕ цӕмӕнти бухсуй?

Ӕ ном ин ӕгадӕ кӕнунцӕ, ӕ хецаудзийнади нихмӕ цӕунцӕ, ӕ сувӕллӕнттӕй кадӕртӕ ӕ нихмӕ рацудӕнцӕ, Сайтан мӕнгӕттӕ парахат кӕнуй, ӕ лӕггадгӕнгутӕ гъезӕмӕрттӕ ӕвзарунцӕ, е ’мбӕлттӕй ка рамардӕй, уонӕбӕл ӕрхун кӕнуй, фудгӕнгутӕ адӕни ӕфхуӕрунцӕ, адӕн зӕнхӕ исафунцӕ (w21.07, 9–12 фф.).

Иосиф цӕхуӕн зиндзийнӕдтӕбӕл исӕмбалдӕй?

Е ’нсувӕртӕ ин устур мӕститӕ бавзарун кодтонцӕ. Уой фӕсте Египети, ке не ’скодта, еци гъуддаги фудгинбӕл нимад ӕрцудӕй ӕма берӕ ӕнзти дӕргъи ахӕстдони фӕббадтӕй (w21.08, 12 ф.).

Аггеййи 2:6–9, 20–22 финст ӕй, Йеговӕ адӕнти ке базмӕлун кӕндзӕй. Е куд лӕдӕргӕ ’й?

Адӕнӕн сӕ фулдӕри нӕ фӕндуй Хуцауи Паддзахади туххӕй хуарз хабармӕ игъосун. Фал уӕддӕр беретӕ рӕстдзийнадӕ зӕрдӕй райсунцӕ. Тагъд Хуцау адӕни фӕстаг хатт базмӕлун кӕндзӕй, гъома сӕ фесафдзӕй (w21.09, 15–19 фф.).

Игъосун кӕнгӕй нӕ нифс цӕмӕннӕ гъӕуама сӕтта?

Йеговӕ уинуй, куд зӕрдиагӕй архайӕн, уой ӕма ни боз ӕй. Нӕ нифс ку нӕ сӕтта ӕма идарддӕр дӕр ку игъосун кӕнӕн, уӕд ӕносон цардӕй исхайгин уодзиан (w21.10, 25, 26 фф.).

Левити 19 сӕр нин куд ӕнхус кӕнуй 1 Петури 1:15 финст фӕдзӕхстмӕ гӕсгӕ архайун: «Алли гъуддаги дӕр уотӕ сугъдӕг»?

Петур, ӕвӕдзи, ӕрхаста Левит 19:2 финст закъон. Левити 19 сӕрмӕ ку ’ркӕсӕн, уӕд ӕй базондзиан, нӕ бон куд ӕй 1 Петури 1:15 финст фӕдзӕхстмӕ гӕсгӕ архайун (w21.12, 3, 4 фф.).