Ko imwepo mwawerenga mosamala nkhani za mu Ntsanja za ulonda za gole ino? Peno nteno, wonani peno mungakwanise kudawira mibvunzo aya:

Ko lemba ya Yakobo 5:11 inkutitsimikizira chani pakufotokoza kuti Yahova ni ‘wachikondi chikulu’ na ‘wachifundo’?

Tinkudziwa kuti pakuti Yahova ni wachifundo, iye ni wokonzeka kutikhululukira vophonya vathu. Lemba ya Yakobo 5:11 inkutitsimikizira kuti iye achatithandiza mwachikondi. Isembo tichadekana kumutewedzera.—w21.01, tsa. 21.

Ndawa chani Yahova adakonza makonzedwe yakuti pambakhale msolo?

Iye adachita vimwevi ndawa ya chikondi. Makonzedwe mwaya yachathandiza kuti wanthu wa m’banja yake wokhulupirika ambachite vinthu mwantedere na mwadongosolo. Aliyese m’banja akambachita vinthu mobverana na makonzedwe mwaya, adziwa kuti nimbani anaudindo wosalula vochita na kutsogolera pabanja.—w21.02, tsa. 3.

Ndawa chani Akhrisitu achadekana kukhala wosamala akambaphatisa basa vipangizo vawo va manjeuno pakutumizirana mensaje?

Peno munthu wasalula kuti ambaviphatise basa vipangizo vimwevi, achadekana kusalula bwino wanthu wocheza nawo. Ndipo achadekana kukhala wosamala maninge makamaka akakhala kuti ankucheza na gulu ikulu ya wanthu. (1 Tim. 5:13) Pangakhale pomwe ngozi peno angatumize nkhani yokaikisa, panango kumbawona kuti ninjira yabwino yotsatsira malonda kwa Akhrisitu anzake.—w21.03, tsa. 31.

Ko ni vifukwa vinango viponi vomwe vidachitisa kuti Mulungu abvume kuti Yesu abonere na kufa?

Chifukwa chibodzi chomwe Yesu adamanikiriwa pamuti chenze chakuti awombole Ayuda. (Agal. 3:10, 13) Chifukwa chachiwiri chenze chakuti amukonzekerese Yesu pa udindo wodzakhala Nkulu wa antsembe. Chifukwa chachitatu, kukhulupirika komwe Yesu adawonesa mpakana impfa, kudawonesa kuti vingakwanisike wanthu kukhala wokhulupirika podiya kuti ankugumana na mabvuto. (Yobu 1:9-11)—w21.04, tsa. 16-17.

Ko mungachite tani peno wanthu ankugumanikalini m’mamiyi mwawo mukambalalikira?

Imwepo muchadekana kuwafikira panthawe yabwino yomwe achagumanika pamuyi. Mungambalalikire m’malo yosiyanasiyana. Ndipo mungachite bwino kuyesa ulaliki unango ninge kunemba kalata.—w21.05, tsa. 15-16.

Ko mtumi Paulo ambatanthawuza chani padalewa kuti: ‘Mwachilamulo ine nidafa muchilamulo’? (Agal. 2:19)

Chilamulo cha Mose chimbawadziwikisa wanthu kuti ni wochimwa ndipo chimbatsogolera Aizirayeli kwa Khrisitu. (Agal. 3:19, 24) Chilamulo chimwechi chidathandiza Paulo kuti abvume Khrisitu. Ndipo pakuchita vimwevi Paulo ‘adafa muchilamulo’ ndipo wenze womasuka muchilamulo chimwechi.—w21.06, tsa. 31.

Ko Yahova adatisiyira tani chitsanzo chabwino pankhani yopirira?

Yahova wakhala ankupirira kunyozewa kwa dzina yake, kutsutsiwa kwa ulamuliro wake, kupandukiriwa na wana wake anango, kunamiziriwa na Satana, kubonera kwa atumiki wake, kusiyana na azishamwali wake womwe adafa, wanthu woipa ankuboneresa anzawo ndipo wanthu ankucheneka dziko yomwe Mulungu adakonza.—w21.07, tsa. 9-12.

Ko Yosefe adatisiyira chitsanzo chabwino chiponi pankhani yoleza moyo?

Iye adapirira vinthu vosowa chilungamo vomwe azibale wake adamuchitira. Ndipo vimwevi vidachitisa kuti ayendesewe ku Iguputo komwe adakakhala kwa magole yazinji.—w21.08, tsa. 12.

Ko lemba ya Hagai 2:6-9, 20-22 idaleweratu va kugunduza kuponi?

Wanthu ankuikhiralini nzeru pa ntontholo wa Ufumu womwe unkulalikiriwa, koma anango ankubwera mu choonadi. Manjemanje, wanthu adzagunduziwe komalizira panthawe yomwe adzachenekewe.—w21.09, tsa. 15-19.

Ndawa chani tichadekanalini kufoka pa basa yathu yolalikira?

Yahova akondwa maninge akawona khama yathu. Tikapirira pa utumiki wathu tidzagumane moyo wosapera.—w21.10, tsa. 25-26.

Ko lemba ya Levitiko msolo 19 ingatithandize tani kuphatisa basa malangizo yakuti: ‘Khalani wochena m’makhalidwe yanu yose’? (1 Pet. 1:15)

Vinkuwoneka kuti vesi mweyi adaitenga pa Levitiko 19:2. Mu msolo wa 19 munavitsanzo vizinji va momwe tingaphatisire basa lemba ya 1 Petulo 1:15 pa moyo wathu wa ntsiku na ntsiku.—w21.12, tsa. 3-4.