Waswe, iu tingim yet samfala gud point from olketa Wastaoa blo disfala year? Trae ansarem olketa kwestin hia:

Wanem nao iumi lanem from James 5:11 abaotem hao “Jehovah hem lovem man” and “showimaot mercy” lo hem?

From Jehovah showimaot mercy hem laek for forgivim olketa sin blo iumi. James 5:11 sei tu from Jehovah lovem iumi hem laek for helpem iumi. Iumi tu laek for followim example blo hem.​—w21.01, p. 21.

Why nao Jehovah markem samfala for hed blo olketa narawan?

Hem duim olsem bikos hem lovem famili blo hem. Datfala arrangement mekem evriwan organize and stap gud. Evri famili member wea followim disfala arrangement savve hu nao shud disaedem samting, and hu nao shud organizem samting wea olketa disaedem.​—w21.02, p. 3.

Wanem nao olketa Christian need for savve abaotem olketa messaging app?

Sapos iumi disaed for iusim olketa messaging app, iumi mas careful lo hu nao iumi associate witim. Datwan bae no isi sapos iumi joinim grup wea garem staka pipol insaed. (1 Tim. 5:13) Iumi shud no iusim olketa messaging app for olketa samting wea no stret tu, olsem for spredim eni kokonat nius and olketa laea story, or for contactim olketa brata and sista for duim bisnis.​—w21.03, p. 31.

Why nao God letem Jesus for safa and dae?

Firstfala reason, Jesus mas hange lo post for dae for finisim wanfala panis wea mekem olketa Jew fit for dae. Mek-tu reason, God trainim Jesus for duim waka blo Hae Priest lo heven. Mek-thri reason, from Jesus faithful kasem taem hem dae, datwan showimaot olketa man savve gohed faithful lo God nomata lo olketa bigfala test. (Job 1:9-11)​—w21.04, p. 16-17.

Wanem nao iu savve duim sapos pipol no stap lo haos taem iu duim preaching waka?

Iu savve trae for preach lo taem wea pipol stap lo haos. Iu savve traem tu for preach lo olketa difren ples. And iu savve iusim olketa difren wei for preach, olsem for raetem leta.​—w21.05, p. 15-16.

Wanem nao aposol Paul minim taem hem sei: “Bikos lo law mi dae”? (Gal. 2:19)

Law blo Moses showimaot klia olketa Jew sin and needim Christ for dae for olketa. (Gal. 3:19, 24) Diswan mekem Paul for acceptim Christ. So Paul savve sei “bikos lo law mi dae,” from hem finis for followim Law blo Moses.​—w21.06, p. 31.

Wanem nao olketa nogud samting wea Jehovah deal witim, and hao nao datwan helpem iumi for no givap?

Jehovah deal witim staka pipol wea spoelem nem blo hem, olketa wea againstim rul blo hem, samfala lo famili blo hem wea bighed, laea wea Satan talem abaotem hem, olketa wea hem lovem wea safa, staka fren blo hem wea dae, nogud pipol wea spoelem olketa narawan, and pipol wea spoelem earth.​—w21.07, p. 9-12.

Wanem nao iumi savve lanem from example blo Joseph for patient?

Hem no givap nomata olketa brata blo hem barava treatim hem nogud. Gogo samwan talem laea samting abaotem hem and hem stap lo prison lo Egypt for staka year.​—w21.08, p. 12.

Olsem Hagae 2:6-9, 20-22 storyim, taem Jehovah sekem olketa kantri, wanem nao kamaot from datwan?

Staka pipol no acceptim message abaotem Kingdom, bat samfala joinim pipol blo Jehovah for worshipim hem. Klosap nao Jehovah bae sekem olketa kantri for finisim pipol wea rejectim rul blo hem.​—w21.09, p. 15-19.

Why nao iumi shud no givap for duim ministry?

Jehovah luksavve iumi waka hard and hem hapi iumi duim best blo iumi. Sapos iumi no givap bae iumi kasem laef olowe.​—w21.10, p. 25-26.

Hao nao Levitikas chapter 19 helpem iumi for followim disfala kaonsel: “Iufala mas holy long evri samting wea iufala duim”? (1 Pet. 1:15)

Maet disfala toktok hem kam from Levitikas 19:1, 2. Chapter 19 storyim staka example lo hao for followim kaonsel lo 1 Peter 1:15 lo laef blo iumi.​—w21.12, p. 3-4.