کیہہ توانوں یاد اے؟
تُسی ضرور ایس سال دے مینارِنگہبانی رسالیاں نُوں دھیان نال پڑھیا ہوئے گا۔ کیہہ تُسی ایہناں سوالاں دے جواب دے سکدے او؟
یعقوب 5:11 چ لکھی ایس گل توں کہ ”یہوواہ بوہت ای شفیق تے رحیم اے“سانوں کیس گل دا یقین ہو جاندا اے؟
سانوں پتہ اے کہ یہوواہ رحم دی وجہ توں ساڈیاں غلطیاں معاف کر دیندا اے۔ پر یعقوب 5:11 چ سانوں ایس گل دا وی یقین دَوایا گیا اے کہ مصیبت دی گھڑی چ یہوواہ بڑے پیار نال ساڈی مدد کردا اے۔ سانوں وی اپنے اسمانی باپ دی مثال تے عمل کرنا چاہی دا اے۔—م21.01 ص. 21۔
یہوواہ نے سربراہی دا بندوبست کیوں کیتا اے؟
کیونکہ اوہ سانوں پیار کردا اے۔ ایس بندوبست دی وجہ توں یہوواہ دا خاندان چنگی طرحاں کم کردا اے تے ایہدے چ امن رہندا اے۔ جدوں خاندان دا ہر جی ایس بندوبست مطابق چلدا اے تے اوہنوں پتہ ہوندا اے کہ کسے معاملے بارے فیصلہ کرن تے ایہدے تے عمل کران دا اِختیار کدے کول اے۔—م21.02 ص. 3۔
مسیحیاں نُوں میسج کرن والیاں ایپس استمال کردے ویلے احتیاط کیوں کرنی چاہی دی اے؟
جیہڑا بندہ ایہہ ایپس استمال کردا اے، اوہنوں سوچ سمجھ کے ایہناں تے دوست بنانے چاہی دے نیں۔ پر ایہہ اوہدوں مشکل ہوندا اے جدوں اِک گروپ چ بوہت سارے لوک اِک دُوجے نُوں میسج کردے نیں۔ (1-تیمُتھیُس 5:13) ایہہ ایپس استمال کرن چ ایہہ خطرہ وی اے کہ ایہناں دے ذریعے سانوں ایہو جہیاں گلاں سنن نُوں مِلدیاں نیں جنہاں بارے سانوں پتہ نئیں ہوندا کہ اوہ سچیاں وی ہے نیں کہ نئیں۔ ایہناں ایپس دے ذریعے اِک مسیحی اپنے ہمایماناں نُوں نوکریاں تے چیزاں دی مشہوری کرن یاں اپنے کاروبار نُوں چمکان دے خطرے چ پے سکدا اے۔—م21.03 ص. 31۔
خدا نے یسوع نُوں تکلیفاں تے موت کیوں سہن دِتی؟
ایہدی پہلی وجہ ایہہ سی کہ یہودیاں نُوں لعنت توں آزاد کران لئی یسوع نُوں سُولی تے مرنا پیا۔ (گلتیوں 3:10، 13) دُوجی وجہ ایہہ سی کہ خدا یسوع دی تربیت کر رہیا سی تاکہ اوہ مستقبل چ ساڈا کاہنِ اعظم بن سکے۔ تے تیجی وجہ ایہہ سی کہ ایہہ ثابت ہو جائے کہ انسان ازمیشاں دے باوجود خدا دے وفادار رہ سکد نیں۔ (ایوب 1:9-11)—م21.04 ص. 16، 17۔
جدوں مُنادی کردے ویلے لوک سانوں گھراں چ نئیں مِلدے تے اَسی کیہہ کر سکنے آں؟
اَسی اوہناں کول اوس ویلے جا سکنے آں جدوں اوہ گھر مل سکدے نیں۔ اَسی گواہی دین دے فرق فرق طریقے استمال کر سکنے آں جیویں کہ خط لکھنا۔—م21.05 ص. 15، 16۔
پولُس دی ایس گل دا کیہہ مطلب سی کہ ”میں شریعت دے ذریعے شریعت دے لحاظ نال مر گیا“؟ (گلتیوں 2:19)
شریعت توں ظاہر ہویا کہ انسان گُناہگار اے تے ایہہ بنیاِسرائیل نُوں مسیح تک لے کے گئی۔ (گلتیوں 3: 19، 24) ایسے وجہ توں پولُس نے مسیح نُوں قبول کیتا۔ ایس طرحاں اوہ شریعت دے لحاظ نال مر گیا یعنی اوہ شریعت دا پابند نئیں رہیا۔—م06.21 ص. 31۔
یہوواہ نے صبر نال برداشت کرن دی ودھیا مثال کیویں قائم کیتی؟
یہوواہ صبر نال ایہناں گلاں نُوں برداشت کر رہیا اے: اوہدے پاک ناں نُوں بدنام کیتا جا رہیا اے؛ اوہدی حکمرانی دی مخالفت کیتی جا رہی اے؛ زمین تے اسمان اُتے اوہدی اولاد چوں کجھ نے اوہدے خلاف بغاوت کیتی اے؛ شیطان اوہدے بارے جھوٹھ پھیلا رہیا اے؛ اوہ ویکھ رہیا اے کہ اوہدے بندے تکلیفاں سہہ رہے نیں؛ اوہنوں بوہت دُکھ اے کہ اوہدے ہزاراں بندے فوت ہو گئے نیں؛ انسان وگڑ گئے نیں تے زمین نُوں تباہ کر رہے نیں۔—م21.07 ص. 9-12۔
یوسف نے صبر دی مثال کیویں قائم کیتی؟
یوسف نُوں اپنے بھراواں دے ہتھوں ناانصافی سہنی پئی۔ اوہدے تے جھوٹھے اِلزام لائے گئے تے اوہنوں کئی سالاں تک قید چ رہنا پیا۔—م21.08 ص. 12۔
حجی 2:6-9، 20-22 چ ہلائے جان دا کیہہ مطلب اے؟
بادشاہت دا پیغام قوماں لئی اِک بھیڑی خبر ثابت ہویا۔ ایس پیغام دی وجہ توں بوہت سارے لوکاں نے سچائی قبول کیتی اے۔ بوہت چھیتی قوماں نُوں ختم کرن لئی اوہناں نُوں آخری وار ہلایا جائے گا۔—م21.09 ص. 15-19۔
سانوں مُنادی دے کم چ ہمت کیوں نئیں ہارنی چاہی دی؟
کیونکہ یہوواہ ساڈے کم نُوں ویکھدا اے تے ایہدے توں خوش ہوندا اے۔ اگر اَسی ہمت نئیں ہاراں گے تے سانوں ہمیشاں دی زندگی ملے گی۔—م21.10 ص. 25، 26۔
احبار 19 باب توں ایس ہدیت تے عمل کرن چ سانوں مدد کیویں مِلدی اے: ”اپنے سارے چالچلن نُوں پاک کرو“؟ (1-پطرس 1:15)
1-پطرس 1:15 چ لکھی گل شاید احبار 19 باب توں لئی گئی اے۔ ایس باب چ ایہو جہیاں کئی مثالاں نیں جنہاں توں اَسی سکھ سکنے آں کہ اَسی 1-پطرس 1:15 چ لکھی گل تے ہر روز کیویں عمل کر سکنے آں۔—م21.12 ص. 3، 4۔
