Ke wadekala mwahu Kahn Iroir pwukat? Kitail kilang ma ke kak sapengala peidek kan me kileldi pah:

Dahme Seims 5:11 kamehlelehiong kitail ni eh mahsanih me Siohwa kin ketin “diren limpoak” oh “kadek kalahngan”?

Kitail ese me pwehki sapwellime kadek kalahngan, Siohwa kin ketin kupwurki mahkohng atail sapwung kan. Seims 5:11 kamehlelehiong kitail me e pil kin ketin kupwurperenki sewese kitail. Kitail kin men kahlemengih ih.—w21.01, pali 21.

Dahme kahrehda Siohwa ketin wiahda koasoandi en tapwi?

E ketin wiahda met pwehki sapwellime limpoak. Koasoandi wet kahrehiong sapwellime peneinei me kin loalopwoat ong ih en kak doadoahk ni meleilei oh soandi mwahu. Emenemen tohn peneinei me kin idawehn koasoandi wet ese ihs me kin pwukoahki kamanahla koasoandi kan oh ihs me pahn tiengla mwowe pwehn kapwaiada koasoandi ko.​—w21.02, pali 3.

Dahme kahrehda Kristian kan anahne kanahieng ni arail kin doadoahngki soangen apps kan pwehn kadar de ale text?

Ma emen pilada en doadoahngki soangen apps pwukat, e anahne pilada mwahu ihs me e pahn kin werekiong. Met apwal en wia ma e iang pwihn laud kan textpene. (1 Tim. 5:13) Pil ehu, mie keperpen kihseli ripoht kan me sohte mie mehn kadehde ma mehlel, oh pil en isaneki riatail Kristian kan pwehn wiahda mwohni.​—w21.03, pali 31.

Ia ekei kahrepe kan me Koht ketin mweidohng Sises en lokolok oh pwoula?

Kahrepe keieu iei me ni Sises eh pwoula ni tuhkehn kalokoloko, met kasaledekihala mehn Suhs ko sang keria ehu. (Kal. 3:10, 13) Keriau, Siohwa ketin kaiakaiahne Sises ong pwukoahn Samworo Lapalap. Kesiluh, pwehki Sises ketin loalopwoat lao e pwoula, met kadehdehda me aramas kak lelepekte ong Koht mendahki kasongosong laud kan. (Sohp 1:9-11)​—w21.04, pali 16-17.

Dahme ke kak wia ma e apwal en tuhwong tohnihmw kan nan kalohk?

Ke kak song en kalohkla rehrail ni ahnsou me irail kakete mi ni imwarail kan. Ke pil kak song en kalohk ni ehu wasahn kalohk tohrohr. Oh ke kak song doadoahngki ehu wiepen kalohk, duwehte nting kisinlikou.​—w21.05, pali 15-16.

Ia wehwehn ahn wahnpoaron Pohl koasoio ni eh nda: “Nin duwen kosonnedo, I melahr ong kosonnedo”? (Kal. 2:19)

Kosonned en Moseso kasansalehda soh unsek en aramas oh kahluwahla mehn Israel ko ong Krais. (Kal. 3:19, 24) Met kahrehda Pohl en pwungki oh pwosonla Krais. Sang ni eh wia met, Pohl “melahr ong kosonnedo”; e sohla mi pahn kosonnedo.​—w21.06, pali 31.

Ia duwen Siohwa eh ketikihda mehn kahlemeng ong kitail duwen en dadaurete?

Siohwa ketin dadaur pahn mwekid en lahlahwe me kohwong mwareo, uhwong me lelohng sapwellime pwuhng en kaunda, uhwong sang ekei sapwellime kan, likamw kan me Tepil kin doadoahngki, lokolok en sapwellime ladu kesempwal kan, tohrohrasang kompoakepah kan me melahr, aramas suwed ar wiakauwe meteikan, oh ohlahn sapwellime kepikipik kan.​—w21.07, pali 9-12.

Ia duwen Sosep eh wiahda mehn kahlemeng mwahu en kanengamah?

E dadaur pahn wiewia sapahrek me rie pwutangko wiahiong ih. Met pil kahrehiong en lelohng karaun likamw oh selidi nan Isip erein sounpar tohto.​—w21.08, pali 12.

Itihtda dahieu me Akkai 2:6-9, 20-22 kohpada duwe?

Wehi kan sohte kin pwungki doadoahk en kalohki Wehio, ahpw aramas tohto kin pwungki padahk mehlel. Ahnsou keren, wehi kan pahn itihtda ni arail pahn kasohrala.​—w21.09, pali 15-19.

Dahme kahrehda kitail en dehr uhdihsang kapwaiada atail doadoahk en kalohk?

Siohwa kin ketin mwahngih duwen atail nannanti, oh e kin ketin kupwurperenkihda met. Ma kitail sohte pwangada de uhdi, kitail pahn alehdi mour soutuk.​—w21.10, pali 25-26.

Ia duwen Lipai irelaud 19 eh sewese kitail en kapwaiada kaweido: “Kumwail sarawihla ni amwail wiewia kan koaros”? (1 Pit. 1:15)

Iretikitik wet ele kohsang nan Lipai 19:2. Lipai irelaud 19 kin kihda mehn kahlemeng tohto duwen atail kak kapwaiada 1 Piter 1:15 nan atail mour ehuehu rahn.​—w21.12, pali 3-4.