Kay 2021 watamanta Torremanta Qhawaj revistasta leerqanki chayqa, kay tapuykunaman kutichiyta atiwaj.

¿Imatá Santiago 5:11 niwanchej Jehovaj munakuyninmanta khuyakuyninmantawan?

Jehovaqa khuyakuwasqanchejrayku juchasninchejta perdonawanchej. Santiago 5:11 niwanchej Jehová Diosqa llakiypi kashajtinchej yanapanawanchejta. Noqanchejpis Tatanchej Jehová jina ruwana (w21.01, página 21).

¿Imaraykutaj Jehová wakinman kamachinapaj atiyta qon?

Jehová Diosqa familianta munakusqanrayku, wakinman kamachinapaj atiyta qon. Chayrayku familiasqa allinpi kausakunku, nitaj chʼajwas kanchu. Sapa ujpis yachanku pichus familiapi kamachisqanta (w21.02, página 3).

¿Imaraykutaj Internetpi mensajesta apachinapaj allinta piensarinanchej tiyan?

Internetpi mensajesta apachinapaj aplicacionesta apaykachanchej chayqa, allinta piensarina pikunamanchus apachinata. Astawanraj jatuchaj grupospi kaspaqa (1 Tim. 5:13). Chantapis chaykunapeqa wakin willaykunasta yapasqata chayri llullasta muyuchinku. Wakinpitaj hermanosmanta valekuspa qolqeta orqhonku (w21.03, página 31).

¿Imaraykutaj Dios saqerqa Wawanta ñakʼarichinankuta, wañuchinankutataj?

Ñaupaj kaj, Jesusqa kʼaspiman warkhusqa karqa, judiosta uj maldicionmanta kacharichinanpaj (Gál. 3:10, 13). Iskay kaj, Jehovaqa Wawan ñakʼarichisqa kananta saqerqa, Kuraj kaj Sacerdote jina wakichisqa kananpaj. Kinsa kaj, Jehovaqa saqerqa Wawanta ñakʼarichinankuta, ajinamanta sutʼi yachakunanpaj runasqa sinchʼi llakiypi kaspapis Diosta sirvillaytapuni atisqankuta (Job 1:9-11) (w21.04, páginas 16, 17).

¿Imatá ruwasunman pisi runasllata wasisninkupi taripaspa?

Runas wasinkupi sayanku chay horaspi predicaspaqa, ashkha runaswan parlarisunman. Chantapis waj lugarespi predicasunman. Waj jinasmantapis predicallasunmantaj, ichá cartasta escribisunman (w21.05, páginas 15, 16).

“Leyta juntʼasqayrayku leypaj wañorqani” nispa, ¿imamantataj apóstol Pablo parlasharqa? (Gál. 2:19).

Moisespa Leynenqa sutʼita rikucherqa tukuy runas pantaj runas kasqankuta, israelitastataj Cristoman pusarqa (Gál. 3:19, 24). Pabloqa chayrayku Jesuspi creerqa. Ajinamanta payqa ‘leypaj wañorqa’, niñataj leypa kamachiyninpichu karqa (w21.06, página 31).

¿Imaynatá Jehová jina aguantallasunmanpuni?

Jehovaqa aguantarqa sutinta chʼichichasqankuta, kamachiyninman churanakusqankuta, wakin ángeles runaspis contranpi oqharikusqankuta, Kuraj Supaypa llullakusqanta, munasqa kamachisnin ñakʼarisqankuta, munasqa amigosnin wañupusqankuta, sajra runas kʼacha runasta llakichisqankuta, runas Jallpʼata pierdechishasqankuta ima (w21.07, páginas 9 al 12).

¿Imatataj José pacienciakusqanmanta yachakusunman?

Joseqa hermanosnin qhasimanta sufrichisqankuta aguantarqa. Egiptopitaj qhasimanta tumpasqa karqa, ashkha watastataj carcelpi wisqʼasqa karqa (w21.08, página 12).

Ageo 2:6-9, 20-22, ¿ima kharkatichiymantataj parlan?

Ashkha runasqa Diospa Gobiernonmanta willayta uyarispa phiñakunku. Jinapis ashkha runasqa chay willayta sumajta japʼikushanku. Tumpamantawantaj tukuy nacionesqa chinkachisqa kanqanku (w21.09, páginas 15 al 19).

¿Imajtintaj predicanallanchejpuni tiyan?

Jehovaqa kallpachakusqanchejta yachan, maytataj kusikun. Mana saykʼojtinchejqa Jehová wiñay kausayta qowasun (w21.10, páginas 25, 26).

¿Imaynatá Levítico 19 yanapawanchej kay yuyaychayta kasukunapaj: “Tukuy ima ruwasqaykichejpi llimphus kaychej”? (1 Ped. 1:15).

Kay versiculopi nisqanqa ichapis Levítico 19:2 versiculomanta orqhosqa kashan. Levítico 19 capituloqa yanapawanchej imaynasmantachus 1 Pedro 1:15 nisqanta kasukunapaj (w21.12, páginas 3, 4).