Kua tatau meitaki ainei koe i te au makatini Te Punanga Tiaki o teia mataiti? Akara, me ka kite koe i te pau i teia au uianga:

Eaa ta Iakobo 5:11 e akapapu maira i te na ko anga e “kua ki te Atu [ko Iehova] i te aroa e te takinga-meitaki maata”?

Kua kite tatou e no to Iehova tu takinga meitaki, ka akakore mai aia i ta tatou ara. Te akapapu maira a Iakobo 5:11, e ka tauturu aroa mai aia ia tatou. Ka tau tatou kia aru iaia.—w21.01, kapi 21.

Eaa a Iehova i akanoo ei i te taoonga upoko?

No tona inangaro i tona ngutuare. Kua akanooia teia kia akaaere meitakiia te ngutuare o Iehova ma te ‘au. Me angaanga kapiti te au mema o te ngutuare tangata ki teia akanoonooanga, ka kite ratou e naai e tuku i te au ikianga openga e naai e arataki i te angaanga tei tukuia.—w21.02, kapi 3.

Eaa ra te au Kerititiano ka matakite ei me taangaanga i te apinga tuku karere?

Me taangaanga koe i te apinga tuku karere, e iki meitaki i toou au oa. E ngata i te rave i te reira me tuku karere ki tetai pupu tangata. (1 Timo. 5:13) Ka tupu katoa te kino me akatotoa i te au tua maani ua e te nuti papu kore e te taangaanga i to tatou au taeake no te kimi puapinga.—w21.03, kapi 31.

Eaa ra te Atua i akatika ai ia Iesu kia takinokinoia e kia tamateia?

Tetai tumu, ka anoanoia a Iesu kia riia ki runga i te rakau no te akamatara i te ngati Iuda mei tetai taumaa anga. (Gala. 3:10, 13) Te rua, te tereni ra a Iehova ia Iesu no tana tuanga ei Taunga Maata. E te toru, akapapu mai to Iesu tu tiratiratu e te matenga e ka rauka rai i te tangata te vai tiratiratu kia Iehova me timata pakariia ratou. (Iobu 1:9-11)—w21.04, kapi 16-17.

Eaa taau ka rave me e ngatā tikai i te aravei i te tangata i to ratou kainga?

Tamata i te tutu aere i tetai tuatau tei te kainga te tangata. Tamata i te tutu aere i tetai ngai ke, me kore tamata i tetai ravenga ke mei te tata reta.—w21.05, kapi 15-16.

Eaa te aiteanga o te tuatua a te apotetoro ko Paulo: “No te ture, kua mate ïa au i te ture”? (Gala. 2:19)

Kua akaari mai te Ture a Mose i te tu ara o te tangata e kua arataki i te ngati Iseraela ki te Mesia. (Gala. 3:19, 24) No reira i āriki ei a Paulo i te Mesia e ‘kua mate ïa i te ture’; kare o te Ture mana ki rungao iaia.—w21.06, kapi 31.

Eaa ta Iehova e akakoromaki nei?

Kua akakinoia tona ingoa, patoiia tona turanga ngateitei, te tu meameaau o tetai o tana au tamariki, au akakinoanga a te Tiaporo, tu mamae o tona au tavini akaperepere, akatakakeanga mei tona au oa tiratiratu tei mate, te tangata e takinokinoia ra e te aronga rave kino, e te enua e takinokinoia ra.—w21.07, kapi 9-12.

Eaa te akaraanga meitaki ta Iosepha i akanoo no te akakoromaki?

Kua takinokinoia a Iosepha e tona uaorai au tuakana. Tei tupu, kua akaapa pikikaaia aia e kua tiria ki roto i te are auri i Aiphiti no tetai tuatau roa.—w21.08, kapi 12.

Ia Hagai 2:6-9, 20-22, eaa te akangaueue anga tei totouia no to tatou tuatau?

Kua patoi te maataanga o te ao nei i te karere a te Patireia e tutu aereia nei, inara, e manganui e ariu nei ki te tuatua mou. Ka takore takiri teia akangaueue anga i te au patireia o teianei ao.—w21.09, kapi 15-19.

Eaa ra tatou ka akakoromaki i te rave tamou i te tutu aere?

Te akara maira a Iehova i ta tatou tautaanga e te mareka maira ia tatou. Me akakoromaki tatou i te rave tamou i te angaanga tutu aere, ka rauka te ora mutu kore.—w21.10, kapi 25-26.

Akapeea a Levitiku pene 19 te tauturu anga ia tatou kia akono i te akoanga: “Kia tapu katoa kotou i ta kotou tuatua ravarai”? (1 Pete. 1:15)

Kua taikuia teia irava mei ia Levitiku 19:2. Te akakite maira te pene 19 i te au akaraanga akapeea tatou me taangaanga ia 1 Petero 1:15 i roto i te oraanga i te au rā.—w21.12, kapi 3-4.