Дали внимателно читинѓан о броја тари Стражарско кула акале бершеске? Дикх дали шај те одговорине ко акала пучиба:

Ко со уверинела амен о стихо таро Исаија 63:9 кеда вакерела кај о Јехова тано пхердо „мангипе“ хем „милост“?

Адалеске со тано милостиво, о Јехова простинела амаре гревија. О стихо таро Исаија 63:9 исто аѓаар уверинела амен кај ов спремно мангела те поможинел аменге. Кераја шукар ако постапинаја сар о Јехова (w21.01, стр. 21).

Соске о Јехова воспоставинѓа о поглаварство?

Адава керѓа ле таро мангипе. Акава начело поможинела е фамилијаке те функциониринел ко мирно начин хем те овел ла редо. Секоја фамилија со икерела пе ко акава џанела кој тано одговорно ко крајо те анел о одлуке хем кој ваљани те керел адава со одлучинѓа пе (w21.02, стр. 3).

Соске о христијања ваљани те овен внимателна кеда користинена апликацие башо пишибе пораке?

Ако некој одлучинела те користинел асавке апликацие, ваљани шукар те биринел пле амален, посебно кеда тане ко баре групе пишибаске (1. Тимотеј 5:13). Исто аѓаар, постојнела опасност те ширинен пе информацие со нане потврдиме хем те искористинел пе адала групе коте со иси пхраља хем пхења те шај те керел пе бизнис (w21.03, стр. 31).

Кола тане несаве причине соске о Девел дозволинѓа о Исус те цидел мукхе хем те мерел?

Јекх причина соске о Исус ваљани сине те овел обесимо ко стубо тани, те шај те ослободинел е Евреен тари јекх арман (Гал. 3:10, 13). И дујто причина тани кај о Јехова обучинѓа е Исусе те овел амаро Првосвештенико. Хем трито, адалеа со о Исус ачхило верно џи ко мерибе ов докажинѓа кај о мануша шај те ачховен верна иако иси лен пхаре искушенија (Јов 1:9-11; w21.04, стр. 16-17).

Со шај те кере ако тано пхаро те аракхе манушен ки служба?

Шај те роде лен ко време кеда најверојатно тане кхере. Исто аѓаар, шај те проповедине ко различна тхана. Или, шај те пробине те сведочине ко јекх јавер начин, сар на пример те пишине писмо (w21.05, стр. 15-16).

Со мислинѓа о апостол Павле кеда вакерѓа: „Преку о закони, муло сиум е законеске“? (Гал. 2:19)

Е Мојсеескоро закони јасно сикавѓа кај о мануша тане несовршена хем водинѓа е Израелцон џи ко Христос (Гал. 3:19, 24). Адава поможинѓа е Павле те прифатинел е Христосе. Адалеске шај те пхенел пе кај о Павле сине муло „е Законеске“, јавере лафенцар о Закони нашти сине више те влијајнел упри лесте (w21.06, стр. 31).

Соске о Јехова тано шукар пример баши истрајност?

О Јехова истрајнѓа иако случинѓе пе леске акала буќа: „Лескоро анав сине лаџакердо, бут џене тане против лескоро право те владинел, несаве таро лескере чхаве бунинѓе пе против лесте, о Сатана вакерела ховајба баши лесте, лескере мангле слуге мучинена пе, одвојмо тано пле амалендар со муле, о лошна мануша керена штета е јаверенге хем о мануша уништинена и Пхув која со ов створинѓа ла“ (w21.07, стр. 9-12).

Соске о Јосиф тано шукар пример баши стрпливост?

Ов доживинѓа неправда таро пле пхраља. Адава керѓа те овел неправедно обвинимо хем пханло ко Египет бершенцар (w21.08, стр. 12).

Саво симболично тресибе тано пророкујмо ко Агеј 2:6-9, 20-22?

О народија негативно реагиринѓе ко шукар хабери со проповединаја ле, ама бут џене прифатинѓе о чачипе. Панда хари, башо последно пути, ка овен тресиме о народија кеда ка овен уништиме засекогаш (w21.09, стр. 15-19).

Соске на ваљани те откажина амен те кера амари служба?

О Јехова дикхела амаро трудо хем бахтало тано башо адава. Ако на уморинаја амен хем на откажинаја амен, ка добина вечно живото (w21.10, стр. 25-26).

Сар шај о 19 поглавје тари 3. Мојсеева те поможинел амен те применина акава совет: „Овен света ко са со керена“? (1. Пет. 1:15)

Акава стихо најверојатно тано цитиримо тари 3. Мојсеева 19:2. Ко 19 поглавје иси бут примерија башо адава сар шај ко секојдневно живото те применина о стихо таро 1. Петрово 1:15 (w21.12, стр. 3-4).