Mo diko a-article ti Tour ti Ba Ndo so asigi ade ti ninga ape so nzoni? Bâ wala mo lingbi ti kiri tënë na ahundango ndo so ge:

So Jacques 5:11 atene Nzapa ayeke “tâ na ndoye mingi” nga lo yeke “sara nzoni bê na zo” adë bê ti e tongana nyen?

E hinga so na nzoni bê Jéhovah ayeke pardonné afaute so e sara. Jacques 5:11 atene so lo ye ti mû maboko na e na ndoye. A yeke nzoni e sara ye tongana lo.—w21.01, l. 21.

Ngbanga ti nyen la Jéhovah amû komandema na ambeni zo?

Ndoye la apusu lo ti sara ni. Ye so lo leke amû lege na azo ti sewa ti lo so ayeke be-ta-zo ti duti na siriri nga ti tene aye atambela na lege ni. Zo oko oko ti sewa ni so ayeke sara ye alingbi na ye so a leke so ahinga zo so ayeke mû ndangba desizion nga so ayeke bâ si a sara ye alingbi na ni. —w21.02, l. 3.

Ngbanga ti nyen la a lingbi aChrétien asara hange na ngoi so ala yeke sara kua na aye so a sigi na ni ti tokua na message?

Tongana mbeni zo amû desizion ti sara kua na aye so, lo doit ti soro sorongo azo so lo na ala ayeke tokua message na mba. A yeke ngangu ti sara ni tongana lo yeke na yâ ti mbeni groupe so azo ayeke gbani na yâ ni (1 Tim. 5:13). Lo doit ti sara hange si lo kangbi pëpe asango so lo hinga ye dä nzoni ape wala ti gi ti kä ye na aita.—w21.03, l. 31.

Ambeni raison wa la ndali ni Nzapa azia si Jésus abâ pasi na akui?

Mbeni raison ni ayeke so, a lingbi a kanga lani Jésus na ndö ti mbeni keke ti zi aJuif na gbe ti mbeni deba (aGal. 3:10, 13). Use ni ayeke so Jéhovah ayeke leke lani Jésus ndali ti kua so lo yeke sara ande tongana Kota Prêtre. Nga ota ni, so Jésus angbâ be-ta-zo juska na kuâ lo fa so azo apeut ti ngbâ be-ta-zo na Jéhovah même tongana a tara ala ngangu (Job 1:9-11).—w21.04, l. 16-17.

Nyen la mo peut ti sara tongana a yeke ngangu ti wara azo na fango tënë?

Mo peut ti gi ti wara ala na mbeni ngoi so peut-être ala yeke na yanga-da. Mo peut ti gi nga ti fa tënë na mbeni ndo nde. Mo peut ti tara mbeni kode nde, na tapande ti sara lettre.—w21.05, l. 15-16.

So bazengele Paul atene: “Na batango ndia, mbi kui awe tongana a ngbâ gï ndia ni,” lo ye ti tene nyen la? (aGal. 2:19)

Ndia ti Moïse asara si azo ti Israël ahinga polele so ala yeke mbilimbili-kue ape nga ayeke gue na ala na Christ (aGal. 3:19, 24). Ye so ague na Paul ti yeda na Christ. Na sarango tongaso, Paul ‘akui awe tongana a ngbâ gï ndia’; lo yeke na gbe ti ndia encore ape.—w21.06, l. 31.

Tapande wa la Jéhovah azia na e na ndö ti kangango bê?

Jéhovah akanga bê na zonga so a bi na ndö ti iri ti lo, na azo mingi so ake lo nga na komandema ti lo, na ambeni molenge ti lo so asara kpengba-li na lo, na amvene so Satan atene, na pasi ti awakua ti lo, na kuâ so akangbi popo ti lo na akamarade ti lo, na aye ti ngangu so asioni zo asara na azo, na azo so asara lango-sioni mingi nga na bubango aye so lo créé.—w21.07, l. 9-12.

Pendere tapande ti gbungo ngangu wa la Joseph azia na e?

Lo gbu ngangu na yâ ti ye so aita ti lo asara na lo na lege ni ape. Ye so asara si a tene mvene na ndö ti lo nga a kanga lo teti angu mingi na Égypte.—w21.08, l. 12.

Mara ti yengingo ye wa la a sara tënë ni Aggée 2:6-9, 20-22?

Azo ti dunia ayeda na fango tënë ti Royaume ape, me azo mingi ayeke ga na yâ ti tâ tënë. Fafadeso a yeke yengi amara ti ndangba ni na lege so a yeke futi ala ande.—w21.09, l. 15-19.

Ngbanga ti nyen la a yeke nzoni e découragé ape na yâ ti kua ti fango tënë ti e?

Jéhovah ayeke bâ angangu so e yeke sara na azia ngia na bê ti lo. Tongana e fatigué ape wala e découragé ape, e yeke wara fini ti lakue lakue.—w21.10, l. 25-26.

Tongana nyen la Lévitique chapitre 19 a-aidé e ti sara ye alingbi na wango so atene: ‘Ala aga azo so ayeke nzoni-kue na yâ ti sarango ye ti ala kue’? (1 Pi. 1:15).

Versê so ayeke peut-être tënë so a yeke na Lévitique 19:2. Chapitre 19 ti Lévitique afa na e gbâ ti aye so e peut ti sara, ti sara ye alingbi na 1 Pierre 1:15 na yâ ti fini ti e ti lâ oko oko.—w21.12, l. 3-4.