I bi lesi dee Hei Wakitimawosu u di jaa aki ö? Wë luku ee i sa piki dee hakisi aki:

Unfa Jakobosi 5:11 ta lei u taa Jehovah abi „tjalihati fuu”?

U sabi taa Jehovah ta lei taa a abi tjalihati fuu, u di a ta da u paadon u dee föutu dee u ta mbei. Jakobosi 5:11 ta piki u taa a ta fii da u sö tee taa a ta dë kabakaba u heepi u. A dë wan gaan bunu soni te u ta djeesi Jehovah.​—w21.01, bld. 21.

Faandi mbei Jehovah seti soni, sö taa sëmbë sa ta tei fesi a soni?

Wë a du di soni aki, u di a lobi u. Di seti aki ta heepi dee sëmbë fëën u de an du soni fanjanfanjan, ma u de du soni tololoo a pasi. Hiniwan sëmbë u wan wosudendu di ta wooko ku di seti aki, sabi ambë abi di faantiwöutu u taki unfa soni musu waka, söseei ambë o du de.​—w21.02, bld. 3.

Faandi mbei Keesitu sëmbë musu ta köni ku di fasi fa de ta wooko ku dee app dee sa manda soni a Internet da sëmbë?

Ee wan sëmbë o wooko ku dee soni aki, a musu köni ku ambë a ta tei kuma mati. Di soni aki o möön taanga u du, ee u dë a wan kulupu ka hia sëmbë dë ta fan ku deseei a Internet (1 Tim. 5:13). De sa ta konda mindimindi woto a dee kulupu aki, nasö de sa ta suku u bai soni nasö u sei soni da baaa ku sisa.​—w21.03, bld. 31.

Andi da wantu soni di mbei Gadu bi da pasi taa Jesosi tja sitaafu u te a dëdë?

Wan u dee soni, hën da u di de pekëën a wan posu, mbei dee Dju bi sa ko dë bööböö u di wan fuuku bi dë a de liba (Gal. 3:10, 13). Di u tu soni, hën da Jehovah bi ta seeka Jesosi faa sa du di wooko fëën kuma gaan mindima. Nöö di u dii soni, hën da di hoi di Jesosi hoi dou te a dëdë, ta lei taa libisëmbë sa hoi deseei a Jehovah hii fa gaan hogi ta miti de (Jöpu 1:9-11).​—w21.04, bld. 16-17.

Andi i sa du ee a ta taanga fii feni sëmbë te i ta peleiki?

I sa pooba u go a sëmbë a di juu di i sabi taa de lo’ u dë a wosu. I sa pooba u peleiki a peipei kamian tu. Söseei i sa sikifi biifi manda da sëmbë.​—w21.05, bld. 15-16.

Andi apösutu Paulosu bi kë taki di a bi taki taa: „U di mi du andi di wëti taki, mbei mi dëdë te a nama a soni u di wëti”? (Gal. 2:19)

Di Wëti u Mosesi bi ta lei taa libisëmbë dë ku zöndu, nöö di Wëti aki bi ta heepi dee Isaëli sëmbë u de ko sabi ambë da di Keesitu (Gal. 3:19, 24). Di soni aki bi mbei Paulosu buta biibi a Keesitu. U di Paulosu du di soni aki, mbei a bi „dëdë te a nama a soni u di wëti”. An bi ta libi a di wëti dë basu möön.​—w21.06, bld. 31.

Unfa Jehovah lei u andi a kë taki u hoi dou?

Jehovah hoi dou hii fa sëmbë poi hën në, hii fa sëmbë an kë saka deseei a di tii fëën basu, hii fa so u dee mii fëën hopo fia ku ën, hii fa Saatan ta mindi soni dëën hii juu baka, hii fa dee dinima fëën ta tja sitaafu, hii fa dëdë paati hën ku dee mati fëën, hii fa sëmbë ta mbei wotowan ta tja sitaafu, ku hii fa sëmbë ta poi di goonliba.​—w21.07, bld. 9-12.

Andi u sa lei u Josëfu a di hoi di a bi hoi pasensi?

A bi hoi pasensi hii fa dee baaa fëën bi libi hogi ku ën. Di soni aki bi mbei taa sëmbë bi mindi soni dëën, nöö te u kaba fëën de bi söötö ën sömëni jaa longi a Egepiti.​—w21.08, bld. 12.

Andi da di seki di di goonliba bi o seki, di tjabukama woto u Hagai 2:6-9, 20-22 ta taki fëën?

Dee nasiönnasiön sëmbë an ta kë haika di bunu buka, ma tökuseei sömëni sëmbë ta ko a di tuutuu lei. Abiti möön de o seki dee nasiönnasiön sëmbë nöö de o kisi poi.​—w21.09, bld. 15-19.

Faandi mbei wa musu disa di peleikiwooko u du?

Jehovah ta si dee möiti dee u ta mbei, nöö a ta wai ku u. Ee wa ko wei sö tee taa u saka disa, nöö woo feni di libi u teego.​—w21.10, bld. 25-26.

Unfa Leifitiki kapitë 19 ta heepi u fuu fusutan di soni di sikifi a 1 Petuisi 1:15, di ta taki taa: „Un musu dë santa a hii futu”?

Di pisi u di tëkisi aki de kuma di pisi di dë a Leifitiki 19:2. Kapitë 19 ta lei u sömëni fasi fa u sa ta du dee soni dee sikifi a 1 Petuisi 1:15.​—w21.12, bld. 3-4.