Utifundze ngekucophelela yini tihloko letiku-Sicongosekulindza salomnyaka? Buka kutsi ungakhona yini kuphendvula lemibuto lelandzelako:

Jakobe 5:11 usicinisekisa njani nawutsi Jehova “unelutsandvo lolukhulu” futsi “unemusa”?

Ngenca yekutsi Jehova unemusa, siyati kutsi ukulungele kusitsetselela emaphutsa etfu. Jakobe 5:11 uphindze usicinisekise ngekutsi ufuna kusisita. Kufanele simlingise.—w21.01, likh. 21.

Kungani Jehova asungula lilungiselelo lebunhloko?

Loko wakwenta ngenca yekutsi unelutsandvo. Lelilungiselelo lenta kutsi umndeni wakhe ube nekuthula futsi uhleleke. Lilunga ngalinye lemndeni wasemhlabeni lelibambisana nalelilungiselelo liyati kutsi ngubani lokufanele ente sincumo futsi aciniseke kutsi kuyentiwa loko lokuncunyiwe.—w21.02, likh. 3.

Kungani emaKhristu kufanele acaphele nakasebentisa ema-application ekutfumelelana imilayeto?

Nangabe umuntfu ancuma kuwasebentisa lama-application, kufanele akhetse kutsi utihlanganisa nabobani. Loko kumatima kukwenta nangabe ukuma-group lanebantfu labanyenti. (1 Thim. 5:13) Kuphindze kube nebungoti bekusakata imibiko lengakacinisekiswa kanye nekusebentisa tinombolo tebazalwane nabodzadze ngetinjongo tebhizinisi.—w21.03, likh. 31.

Ngutiphi letinye tetizatfu letenta Nkulunkulu wavumela Jesu kutsi ahlupheke futsi afe?

Sizatfu sekucala kutsi, ngenca yekutsi Jesu walengiswa elugodvweni, emaJuda besekangakhululeka esicalekisweni. (Gal. 3:10, 13) Sizatfu sesibili kutsi Jehova bekaceceshela Jesu kuba nguMphristi Lophakeme. Sizatfu sesitsatfu kutsi kwetsembeka kwaJesu kuze kube sekufeni kwakhombisa kutsi bantfu bangetsembeka ngisho babhekene neluvivinyo lolumatima. (Jobe 1:9-11)—w21.04, emakh. 16-17.

Yini longayenta nangabe kumatima kutfola bantfu emsebentini wekushumayela?

Ungetama kubavakashela ngesikhatsi lokungenteka ubatfole ngaso ekhaya. Ungetama nekushumayela kulenye indzawo. Ungetama naletinye tindlela tekushumayela, njengekubhala tincwadzi.—w21.05, emakh. 15-16.

Umphostoli Pawula bekasho kutsini nakatsi: “Ngemtsetfo ngafa emtsetfweni”? (Gal. 2:19)

UMtsetfo waMosi wakwenta kwacaca kutsi bantfu banesono futsi wacondzisa ema-Israyeli kuKhristu. (Gal. 3:19, 24) Loko kwenta Pawula wemukela Khristu. Ngekwenta njalo, Pawula ‘wafa emtsetfweni’; bekangasekho ngephansi kwawo.—w21.06, likh. 31.

Jehova usibekele njani sibonelo nakutiwa endzabeni yekucinisela?

Jehova ubeketelele kuhlanjalatwa kwelibito lakhe, kuphikiswa kwebukhosi bakhe, kuvukela kwalabanye bebantfwabakhe, emanga lachubekako aSathane, kuhlupheka kwetikhonti takhe, kwehlukaniswa nebangani bakhe lasebafile, kucindzetelwa kwebantfu kanye nekuphatfwa kabi kwendalo yakhe.—w21.07, emakh. 9-12.

Ngusiphi sibonelo lesihle Josefa lasibekela sona mayelana nekubeketela?

Wabeketelela kuphatfwa kabi banakabo. Ngemuva kwaloko, wabekwa licala lelingemanga futsi waboshwa eGibhithe iminyaka.—w21.08, likh. 12.

Hagayi 2:6-9, 20-22 ukhuluma ngakuphi kunyakatiswa?

Tive letinyenti atiwemukeli umlayeto weMbuso lesiwushumayelako, kodvwa labanye bantfu bayalemukela liciniso. Ngekushesha tive titawunyakatiswa natibhujiswa.—w21.09, emakh. 15-19.

Kungani kungakafaneli siphelelwe ngemandla nasenta umsebenti wekushumayela?

Jehova uyayibona imetamo yetfu, futsi uyajabula ngayo. Nangabe singadzinwa futsi singapheli emandla, sitawutfola kuphila lokuphakadze.—w21.10, emakh. 25-26.

Levithikhusi sehluko 19 ungasisita njani kutsi sisebentise seluleko lesitsi: “Banini ngcwele kuko konkhe kutiphatsa kwenu”? (1 Phet. 1:15)

Kungenteka lelivesi lacashunwa kuLevithikhusi 19:2. Sehluko 19 sisinika tibonelo letinyenti tendlela lesingasebentisa ngayo 1 Phetro 1:15 ekuphileni kwetfu.—w21.12, emakh. 3-4.