Eba, waakisoma wapoozeleko maano ma kazeeti a Lupungu Lwakue Kamwenenena a onu muaka? Kine ni evio, ale asuka beebi biipuzio bili paapa:

Lileembo lya Yakobo 5:11 lyasininkizia ki musita lulyalanda nangue Yehova “alambaleele saana mu ntono” kabili “ali ni luse”?

Tumanine nangue Yehova aleengele kweleela bilubo byetu kupitila luse lwakue. Lileembo lya Yakobo 5:11, lyatusininkiziizia kabili nangue ali watukwasia kupitila ntono yakue. Tupalile kumupala.​—w21.01, lub. 21.

Juu ya ki Yehova waapaangile kuye kwali ni mupaango wa bumutue?

Yehova waakitile evio paantu waasonseziiziwe na ntono. Ozo mupaango uli wakwasia lupua lwakue Yehova lwa kisinka luye lwabomba mu mutende kabili mu nzila ipaangilue buino. Kila muntu wa mu lupua ali wabomba wakoonkele ozo mupaango, amanine olia apalile kukwata bupinguzi bwa kupeleezia kabili naani apalile kutungulula eevi kufikilizia bupinguzi bobo.​—w21.02, lub. 3.

Juu ya ki Bakristu bapalile kuya bakengeele musita ubali babombia ma aplikasio ali akwasia kutuma ni kupokelela mpunda ya kielekronike?

Kine muntu watona kubombia azo ma aplikasio, apalile kusaakula kine wakaba kuya walondolola na bantu ba musango ki. Kili kyasaangua kyakolele kukita evio, kine mpunda ituminue mu kikundi kya bantu. (1 Tim. 5:13) Kabili kuli ni maavia ange ali afuma mu kusalanghania mpunda isili na busininkizio ni kubombia adrese ya mu kuteania palua bintu bya busulu.​—w21.03, lub. 31.

Juu ya ki Leeza waalekeleele Yesu akyuziiwe ni kufikiila kwipaiwa?

Kya mambo, Yesu waakoonkomeenue pa kimuti eevi kufumia Bayuda mu ntiipo. (Bag. 3:10, 13) Kya bubili, waali wamubeelezia Yesu palua miilo yakue ya musita uli waiza ya kubomba wali Koani Mukulu. Ni kya butatu, Yesu lwaasiele wali wa kisinka mpaka kufikiila kufua, waalangiliile nangue bantu kunti baviinda kusiala bali ba kisinka anzia baye baali mu meezio akata. (Yob. 1:9-11)​—w21.04, lub. 16-17.

Kunti wakita siani kine kikolele kupata bantu mu miilo ya kusimikila?

Kunti waikwinda kusimikila pa musita upalile saana kubasaanga ku masesi abo. Ezia kusimikila mu fuasi ipusene-puseene. Kabili, ezia kusimikila mu nzila ipusene-puseene, nga evelia kuleemba mikanda.​—w21.05, lub. 15-16.

Paulo waali wakeba kulanda ki musita lwaalandile eevi: “Kupitila muzilo naafuile ku muzilo”? (Bag. 2:19, NWT)

Muzilo wakue Musa waalangiliile paswetele kusipuililika kwa bantu, kabili waabatunguluile Baisraeli kuli Kristu. (Bag. 3:19, 24) Keekio i kyaalengiizie Paulo amwitabile Kristu. Lwaakitile evio, Paulo ‘waafuile ku muzilo’; muzilo te waali kabili na buviinde pali weene.​—w21.06, lub. 31.

Yehova atubikiile mufuano ki palua kulangilila mibeele ya kusipikizia?

Yehova ali mukusipikizia kukoosiiziwa mukinzi kwa liina lyakue, kupingua kwa nsaambu yakue ya kuteeka, kusanguka kwa baana bamo pakati ka baana bakue, bufi bwakue Sataana, kwema kwa babombi bakue, kusiana ni babibuza bakue baafuile, kutitikilua kwa bantu na babiifi, kwinoonua kwa kyalo kyaabumbile.​—w21.07, lub. 9-12.

Yosefu waatusiliile mufuano ki uweeme wa kupembelela?

Waasipikiziizie kukitilua bintu bila nsaambu na balupua bakue. Keekio kyaalengiizie asitaakue bya bufi ni kukakua miaka ingi mu Misri.​—w21.08, lub. 12.

Mu lileembo lya Hagai 2:6-9, 20-22, muli bukabika palua kutensiiwa kwa siani?

Ntundu ili mukukaana mpunda ya Bukolo, inzi bantu bengi bali mukwitabila kisinka. Leenusie ntundu yakaba kutensiiwa lya kupeleezia musita luyakaba kwinoonua.​—w21.09, lub. 15-19.

Juu ya ki te tupalile kulekela miilo yeetu ya kusimikila?

Yehova ali wamona vituli twaikwinda, kabili ali wasekelela. Kine te tutopele ao kulekela, twakaba kupata bukose bwa muyayaya.​—w21.10, lub. 25-26.

Lileembo lya Balawi katue ka 19 lyatukwasia siani kubombia musoko ulandile eevi: “Aluke batakatiifu mwe beene mu lwendo lwenu loonse”? (1 Pet. 1:15, NWT)

Kipalile ozu mulongo uzimbuile milandu ili mu Balawi 19:2. Katue ka 19 kalimo mifuano ingi ilangiliile vituli kuviinda kubombia mu buikazi bwetu bwa kila busiku lileembo lya 1 Petro 1:15.​—w21.12, lub. 3-4.