Ita bele ka lae hatán ba pergunta sira tuirmai neʼebé bazeia ba Livru Haklaken 2021:

Tiago 5:11 hatete katak Jeová iha “domin neʼebé boot tebes” no “laran-sadiʼa”. Neʼe fó konfiansa saida ba ita kona-ba Jeová?

Ita hatene katak Jeová mak laran-sadiʼa no nia hakarak perdua ita. Tiago 5:11 fó konfiansa mai ita katak Jeová mós hakarak atu ajuda ita. Ita mós presiza banati-tuir nia.​—w21.01, p. 21.

Tanbasá Jeová halo arranju ulun nian?

Jeová halo ida-neʼe tanba domin. Arranju neʼe ajuda Jeová nia família atu iha dame no la runguranga. Ema ida-idak iha família neʼebé halo tuir arranju neʼe hatene ho klaru sé mak sei halo desizaun ikus no sé mak sei kumpre desizaun neʼe.​—w21.02, p. 3.

Tanbasá ema Kristaun presiza kuidadu bainhira uza aplikasaun atu haruka no simu mensajen?

Se ema ida hili atu uza aplikasaun sira-neʼe, nia presiza kuidadu tebes kona-ba nia atu liga ho sé. Susar liu atu halo nuneʼe bainhira uza group chat neʼebé iha ema barak. (1 Tim 5:13) Ita mós presiza kuidadu kona-ba informasaun la loos neʼebé ema fahe. No ita mós lakohi aproveita irmaun-irmán sira hodi manán osan.​—w21.03, p. 31.

Tanbasá mak Jeová husik Jesus hetan terus no mate?

Razaun primeiru mak Jesus presiza mate iha ai-riin atu halo livre ema Judeu husi malisan ida. (Gal 3:10, 13) Razaun segundu mak Jeová treinu Jesus atu serbí nuʼudar Amlulik Boot iha futuru. No razaun terseiru mak Jesus nia laran-metin toʼo mate prova katak ema bele nafatin laran-metin ba Jeová maski hasoru susar. (Job 1:9-11)​—w21.04, p. 16-17.

Saida mak Ita bele halo se susar atu hasoru ema iha uma?

Koko haklaken iha tempu neʼebé ema barak iha uma. Ita mós bele koko haklaken iha fatin seluk. No mós koko haklaken iha dalan seluk hanesan hakerek karta.​—w21.05, p. 15-16.

Apóstolu Paulo nia liafuan: “Liuhusi ukun-fuan, haʼu mate ona tuir ukun-fuan” katak sá? (Gal 2:19)

Moisés nia Ukun-Fuan hatudu sai ho klaru sala neʼebé ema halo no ajuda ema Izraél hatene sé mak Kristu. (Gal 3:19, 24) Liuhusi Moisés nia Ukun-Fuan, Paulo simu Kristu. Tan neʼe, Paulo “mate tuir ukun-fuan” no nia la presiza halo tuir tan ukun-fuan.​—w21.06, p. 31.

Jeová hatudu ezemplu saida kona-ba tahan?

Jeová tahan bainhira anju no ema hafoʼer ninia naran, kontra ninia direitu atu ukun, ninia oan balu kontra nia, Diabu fó sai lia-bosok, ninia atan sira hasoru susar, ninia belun sira mate, ema aat hanehan ema seluk no ema estraga mundu.​—w21.07, p. 9-12.

Oinsá José hatudu ezemplu diʼak kona-ba pasiénsia?

Ninia maun sira trata nia la ho justisa. Rezultadu mak ema duun nia no nia tama komarka durante tinan barak iha rai-Ejitu.​—w21.08, p. 12.

Ageu 2:6-9, 20-22 fó sai nanis kona-ba doko saida?

Nasaun sira lakohi simu mensajen neʼebé ita haklaken kona-ba Maromak nia Ukun, maibé ema barak simu lia-loos. Lakleur tan, Maromak sei doko nasaun sira ba dala ikus bainhira nia halakon sira.​—w21.09, p. 15-19.

Tanbasá ita labele rende an atu haklaken?

Jeová haree ita-nia hakaʼas an no kontente ho ita. Se ita la rende an, ita sei hetan moris ba nafatin.​—w21.10, p. 25-26.

Oinsá mak Levítico kapítulu 19 bele ajuda ita aplika konsellu: “Imi-nia hahalok hotu tenke santu”? (1 Ped 1:15)

Karik apóstolu Pedro foti liafuan sira-neʼe husi Levítico 19:2. Kapítulu 19 fó sai ezemplu oioin kona-ba oinsá ita bele aplika 1 Pedro 1:15.​—w21.12, p. 3-4.