Kuó ke lau fakalelei ʻa e ngaahi ʻīsiu ʻo e Taua Leʻo ʻi he taʻú ni? Sai, sio angé pe ʻe lava ke ke tali ʻa e ngaahi fehuʻi ko ení:

Ko e hā ʻa e fakapapau ʻoku ʻomai ʻi he Sēmisi 5:11 ʻi heʻene pehē ko Sihová ʻoku “manavaʻofa loloto ʻaupito” mo “mohu meesi”?

ʻOku tau ʻiloʻi ko Sihova, ʻi heʻene mēsí, ʻokú ne hehema ke fakamolemoleʻi ʻetau ngaahi fehālaakí. ʻOku fakapapauʻi mai ʻe he Sēmisi 5:11 ʻokú ne toe holi mālohi ke tokoniʻi kitautolu. ʻOku lelei ke tau faʻifaʻitaki kiate ia.​—w21.01, p. 21.

Ko e hā naʻe fokotuʻu ai ʻe Sihova ʻa e tuʻunga-ʻulú?

Naʻá ne fai ia ʻo makatuʻunga ʻi heʻene ʻofá. Ko e fokotuʻutuʻu ko ení ʻokú ne ʻai ke malava ke ngāue hono fāmili mateakí ʻi ha founga melino mo maau. Ko e mēmipa taki taha ʻo e fāmilí ʻoku ngāue ʻo fehoanaki mo e fokotuʻutuʻu ko ení ʻoku nau ʻiloʻi ʻa e tokotaha ʻoku totonu ke ne fai ʻa e fili aofangatukú mo takimuʻa ʻi hono fakahoko iá.​—w21.02, p. 3.

Ko e hā ʻoku totonu ai ke tokanga ʻa e kau Kalisitiané fekauʻaki mo hono ngāueʻaki ʻo e ngaahi polokalama feʻaveʻaki pōpoaki fakaʻilekitulōniká?

Kapau ʻoku fili ha taha ke ngāueʻaki ʻa e ngaahi polokalama ko iá, ʻoku fiemaʻu ke ne filifili ʻa e faʻahinga ke feohi mo iá. ʻOku faingataʻa ke fai ia ʻi he ngaahi kulupu lalahí. (1 Tīm. 5:13) ʻOku toe ʻi ai mo e ngaahi fakatuʻutāmaki kehe ʻo kau ai hono fakamafola ʻa e ngaahi fakamatala ʻikai fakapapauʻi mo hono ngāueʻaki ʻo e ngaahi fetuʻutaki fakateokalatí ki ha ngāue fakakomēsiale.​—w21.03, p. 31.

Ko e hā ʻa e ngaahi ʻuhinga naʻe fakaʻatā ai ʻe he ʻOtuá ʻa Sīsū ke faingataʻaʻia pea pekiá?

Ko e ʻuhinga ʻe taha ʻi hono tautau ʻa Sīsū ʻi ha ʻakaú, naʻe ʻai ai ke malava ʻo fakatauʻatāinaʻi ʻa e kau Siú mei ha fakamalaʻia. (Kal. 3:10, 13) Ko hono uá naʻe akoʻi ai ʻe Sihova ʻa Sīsū ki hono ngafa ko ha Taulaʻeiki Lahí. Pea ko hono tolú ko e mateaki ʻa Sīsū ʻo aʻu ki heʻene pekiá naʻe fakamoʻoniʻi ai ko e faʻahinga ʻo e tangatá ʻe lava ke nau faitōnunga neongo ʻa e ʻahiʻahi kakahá. (Siope 1:9-11)​—w21.04, p. 16-17.

Ko e hā ʻe lava ke ke fai kapau ʻoku faingataʻa ke maʻu ʻa e kakaí ki ʻapi ʻi he ngāue fakafaifekaú?

ʻE lava ke tau feinga ke aʻu kiate kinautolu ʻi ha taimi ʻoku ngalingali te nau ʻi ʻapi aí. ʻE lava foki ke ke ʻahiʻahi malanga ʻi ha feituʻu kehe. Pea ʻe lava ke ke ʻahiʻahi ha founga malanga kehe, hangē ko e faitohí.​—w21.05, p. 15-16.

Ko e hā naʻe ʻuhinga ki ai ʻa Paula ʻi heʻene pehē: “Fakafou ʻi he laó naʻá ku mate ai ki he laó”? (Kal. 2:19)

Ko e Lao ʻa Mōsesé naʻá ne fakaeʻa ʻa e taʻehaohaoa ʻa e faʻahinga ʻo e tangatá pea tataki ʻa ʻIsileli ki he Kalaisí. (Kal. 3:19, 24) Naʻe taki atu heni ʻa Paula ke ne tali ʻa Kalaisi. ʻI hono fai iá, ko Paula naʻá ne “mate ai ki he laó”; naʻe ʻikai ke ne toe haʻisia ki he laó.​—w21.06, p. 31.

Kuo anga-fēfē hono fokotuʻu mai ʻe Sihova ʻa e faʻifaʻitakiʻanga ʻi hono fakahāhā ʻo e kātakí?

Kuo kātakiʻi ʻe Sihova ʻa e luma kuo fai ki hono huafá, ko e fakafepaki ki hono tuʻunga-haú, ko e angatuʻu ʻa e niʻihi ʻo ʻene fānaú, ko e ngaahi loi hokohoko ʻa Sētané, ko e faingataʻaʻia ʻene kau sevānití, ko e māvae mo e ngaahi kaumeʻa kuo nau maté, ko hono ngaohikovia ʻa e faʻahinga ʻo e tangatá pea mo hono fakaʻauha ʻene fakatupú.​—w21.07, p. 9-12.

Ko e hā ʻa e faʻifaʻitakiʻanga lelei ʻo e kātakí naʻe fokotuʻu ʻe Siosifá?

Naʻá ne kātekina ʻa e fakafeangai taʻetotonu mei hono fanga tokouá. Naʻe taki atu ia ki hono tukuakiʻi loi pea tuku pōpula ʻi ʻIsipite ʻi ha ngaahi taʻu.​—w21.08, p. 12.

Ko e hā ʻa e luluʻi fakaefakatātā ʻoku tomuʻa tala ʻi he Hākeai 2:6-9, 20-22?

ʻOku fakafeangai ʻikai lelei ʻa e ngaahi puleʻangá ki he malangá, ka ko e kakai tokolahi kuo tohoakiʻi ki he moʻoní. ʻOku vavé ni ke luluʻi fakaʻosi ʻa e ngaahi puleʻangá ʻi hono fakaʻauha kinautolú.​—w21.09, p. 15-19.

Ko e hā ʻoku ʻikai totonu ai ke tau foʻi ʻi hono fakahoko ʻetau ngāue fakafaifekaú?

ʻOku vakai mai ʻa Sihova ki heʻetau ngaahi feingá, pea ʻokú ne hōifua mai ki ai. Kapau heʻikai ke tau helaʻia pe foʻi, te tau maʻu ʻa e moʻui taʻengatá.​—w21.10, p. 25-26.

ʻE lava fēfē ke tokoniʻi kitautolu ʻe he Livitiko vahe 19 ke ngāueʻaki ʻa e faleʻi: “Mou hoko ʻo māʻoniʻoni ʻi hoʻomou tōʻonga kotoa pē”? (1 Pita 1:15)

Ko e veesi ko iá ʻoku ngalingali ko ha toʻo-lea mei he Livitiko 19:2. ʻI he vahe 19 ʻoku ʻomai ai ʻa e ngaahi fakatātā ʻo e founga ʻe lava ke tau ngāueʻaki ai ʻa e 1 Pita 1:15 ʻi heʻetau moʻui fakaʻahó.​—w21.12, p. 3-4.