Ina u leride gwadi dzindrima nya Revhista Mukhedziseyi nya mwaga wowu? Abari kharato, zama gu hlamula siwudziso si landreyago:

Jakobe 5:11 a gu yeyedza gu khuye Jehovha “tade khu wuwadi ni wuhindzi.” Isoso sa gu hi ninga gitiyisegiso muni?

Khu kotani nya wuhindzi waye, Jehovha a ngu dzina ngudzu gu hi divaleya. Nigu Jakobe 5:11 a gu hi tiyisegisa gu khuye khu kotani nya lihaladzo laye nyo tumbege uye a ngu dzi ningedza gasi gu hi phasa. Hi yede gu pimedzeya giyeyedzo gyaye. — w21.01, paj. 21.

Khu ginani Jehovha a giridego malulamiselo nya wuthangeyi?

Khu gu uye a ngu hi haladza. Wuthangeyi wa gu gira gu ndranga ya Jehovha yi manega ni gurula ni gu sasamedzwa khu ndziya nya yadi. Nari khatshi wu diri mwalo wuthangeyi, si di hadzi garadza guti oyu a yedego gu hunga silo ni gu bwe si khathaledwa. — w21.02, paj. 3.

Khu ginani Makristo ma yedego gu dzi woneya avba nyo thumise dziaplikativhu nyo rumeye ni gu hakha dzimesaji?

Muthu a gu hatha gu thumisa dziaplikativhu nya gu trokari dzimesaji, yede gu hatha gwadi vathu a na bhulago navo, ngudzungudzu abari gu tsawa wakona wukhongolo ngudzu. (1 Thim. 5:13) Gu diga isoso, gwadi gu u dzi woneya gasi u si phalalegiseyi mahungu u si tiyisegigo gu khuwe lisine mwendro gu zama gu lukrari khavba ga vandriyathu. — w21.03, paj. 31.

Khu sevbini sighelo nyo khaguri si giridego Jehovha a dzumeleya gu khuye Jesu a songwa khu ndziya nya xapi?

Nyo pheye, si lombide gu Jesu afa avba nya simbo nya tshanisa gasi gu tshudzisa Vajudha avba nya givalo. (Gal. 3:10, 13) Nya wuvili, khu gu Jehovha a di gu trenari Jesu gasi gu khala Muphasi wathu nya khongolo nya mhamba. Nigu nya wuraru, gutumbega ga Jesu gu yeyedzide gu khugo vathu va nga simama gu tumbega ga Nungungulu ambari va gu ba va tshangana ni sigaradzo nya sikhongolo. (Joba 1:9-11) — w21.04, dzipaji. 16-17.

Ginani gi nga hi phasago gu tshumayela vathu si garadzago gu va mana ndrangani?

Ethu hi nga si kodza gu mana vathu nya vangi ha gu tshumayela khu dzitepo si vbevbugago gu va mana mudzindrangani mwendro gu tshumayela ga mambe malanga. Hi nga thumisa dzimbe dzindziya nya gutshumayele, nya nga gu lova makarta. — w21.05, dzipaji. 15-16.

A di gu vbweta gu khuye ginani Pawulo tepo a nga khuye: “Nyi fude khu kota nya Nayo”? — (Gal. 2:19)

Nayo wa Mosi wu di gu vega guagani gu khuwo vathu kha va vbeleya nigu va di gu vbweta gu dzegiswa. Uwo gambe wu di gu yisa vathu ga Kristo. (Gal. 3:19, 24) Esi si giride gu Pawulo a dzumeya Kristo. Khu kharato, Pawulo “fude khu kota nya Nayo,” si thulago gu khiso uye a diri mwalo gambe vbavbatshi nya Nayo wa Mosi. — w21.06, paj. 31.

Jehovha a gu hi ninga kharini giyeyedzo nya gyadi nya gu timiseye?

Jehovha a ngu timiseya gu nyenyeziswa nya lina laye, gu wugedwa nya Mufumo waye, gu mba engisa nya sanana saye, malipha ya Dhiyabhulosi, gu tshaniseka nya sithumi saye, gufa ga dzipari dzaye, vathu nyo vivbedwe khu monyo va tshanisago vambe ni gu ghohetedwa nya esi a si vangidego mafuni. — w21.07, dzipaji. 9-12.

Josefa a hi ningide giyeyedzo muni nya gu laphise monyo?

Josefa timisede tepo a nga pharwa khu ndziya nya mba yadi khu vandriyaye. Josefa a di singedzwa gilo nya gu kha gira a bwe a khotedwa khu myaga nya yingi Egipito. — w21.08, paj. 12.

Khu gwevbini gu tsekatsekiswa ogu Agewu 2:6-9, 20-22 a gu profetidego?

Vathu kha va ma tsakeyi mahungu nya Mufumo hi tshumayelago, ambari ulolo vathu nya vangi va nguta lisineni. Nya mba hweya, mayigo ma na tsekatseka tepo ma na fuviswago. — w21.09, dzipaji. 15-19.

Khu ginani hi si yeligo gu tsukula gutshumayela?

Jehovha a ngu wona mizamo yathu nigu a ngu tsaka khu isoso. Ha gu mba tsukula, hi na tshatshazedwa khu womi nya mba vbeya. — w21.10, dzipaji. 25-26.

Gipimo 19 gya libhuku la Levhi gya gu hi phasa kharini gu thumisa wusingalagadzi wu gu khuwo: “Vbelelani guaga ga satshavbo esi mu girago”? (1 Ped. 1:15)

Malito ma gomogo ga livhesi leli mo yeyedza gu khatshi ma ngu khumbhugwa omu ga Levhi 19:2. Gipimo 19 gi ngu ganeya khu siyeyedzo nya singi nya edzi hi nga thumisago libhuku la 1 Pedro 1:15 womini gwathu. — w21.12, dzipaji. 3-4.