Sena mwakazibala cakulomya zibalo zili mu Ngazi Yamulindizi yamwaka uuno? Amubone naa inga mwayiingula mibuzyo eeyi iitobela:

Ino lugwalo lwa Jakobo 5:11 lutupa cisyomezyo nzi kujatikizya ‘lubomba lupati’ lwa Jehova alimwi ‘aluse’ lwakwe?

Tulizyi kuti Jehova, muluse lwakwe, ulilibambilide kutulekelela zibi zyesu. Kuyungizya waawo, lugwalo lwa Jakobo 5:11 lutusyomezya kuti calubomba Jehova ulayanda kutugwasya. Aboobo tweelede kumwiiya.—w21.01, peeji 21.

Nkaambo nzi Jehova ncaakatalisya bubambe bwabusilutwe?

Wakacita oobo akaambo kaluyando. Bubambe oobu bupa kuti kakuli luumuno alimwi kakunyina manyongwe mumukwasyi wakwe uusyomeka. Munamukwasyi umwi aumwi uubutobela bubambe oobu ulizyi iweelede kukosola makani alimwi akubona kuti atobelwa.—w21.02, peeji 3.

Nkaambo nzi Banakristo ncobeelede kucenjela kujatikizya mapulogilamu aakulembelana tugwalo twaafooni naa akkompyuta?

Ikuti muntu wasala kubelesya mapulogilamu aaya, weelede kusala kabotu balongwe mbayanzana limwi. Eeci cilakatazya ikuti kamuli mutubunga muli bantu banji kapati. (1Tim. 5:13) Alimwi ntenda iimbi ijatikizya kumwaya makani aanyina bumboni alimwi akubelesya bunyina bwesu kusumpula makwebo.—w21.03, peeji 31.

Ntwaambo nzi tumwi twakapa Leza kuzumizya Jesu kuti apenge kapati akufwa?

Kakusaanguna nkakuti, kwiinda mukwaanzika Jesu acisamu, cakakonzyeka kwaangulula ba Juda kukusinganizyigwa. (Gal. 3:10, 13) Kaambo kabili nkakuti, Jehova wakali kuyiisya Jesu akaambo kamulimo ngwaakali kuyooba anguwo, wakuba Mupaizi Mupati. Mpoonya katatu nkakuti, kusyomeka kwa Jesu kusikila kulufwu kwakasinizya kuti bantu balakonzya kusyomeka nokuba kuti basunkwa citaambiki. (Job. 1:9-11)—w21.04, peeji 16-17.

Ncinzi ncomukonzya kucita kuti kacimukatazya kubajana bantu mumulimo wabukambausi?

Amusoleke kubasikila bantu aciindi nobalangilwa kujanika mumaanda. Amusoleke kukambaukila mubusena bwiindene. Alimwi amusoleke nzila iimbi, mbuli kulemba magwalo.—w21.05, peeji 15-16.

Ncinzi ncaakali kupandulula mwaapostolo Paulo naakaamba kuti: “Kwiinda mumulawo ndakafwa kumulawo”? (Gal. 2:19)

Mulawo wa Musa wakapa kuti kutalondoka kwabantu kulibonye alimwi akusololela bana Israyeli kuli Kristo. (Gal. 3:19, 24) Eeci cakapa kuti Paulo amuzumine Kristo. Kwiinda mukucita boobo, Paulo ‘wakafwa kumulawo’; mulawo wakacinyina nguzu alinguwe.—w21.06, peeji 31.

Mbuti Jehova mbwatupa cikozyanyo cibotu cakuliyumya?

Jehova waliyumya kumasampu aaletwa kuzina lyakwe, kukukazya nguzu zyakwe zyabweendelezi, kuzanga kwabana bakwe bamwi, kuzumanana kubejekezyegwa a Saatani, kupenga kwababelesi bakwe, kwaandaana abalongwe bakwe ibakafwa, kupenzyegwa kwabantu bakwe alimwi akunyonyoonwa kwazintu nzyaakalenga.—w21.07, peeji 9-12.

Ncikozyanyo nzi cibotu Josefa ncaakapa kujatikizya kukkazika moyo?

Wakacitilwa cakutalulama abanabokwabo. Alimwi wakapegwa mulandu ngwaatakacita akuwaalwa muntolongo ku Egepita kwamyaka minji.—w21.08, peeji 12.

Ino lugwalo lwa Hagai 2:6-9, 20-22 lwakasinsima kuzungaana kuli buti?

Masi tautambuli mulumbe wa Bwami, pele bantu banji bakwelwa kukasimpe. Lino-lino masi ayoozungaanizyigwa camamanino aakunyonyoonwa.—w21.09, peeji 15-19.

Nkaambo nzi ncotweelede kuzumanana kuliyumya mumulimo wesu?

Jehova ulakubona kusolekesya kwesu alimwi ulakukkomanina. Ikuti naa twazumanana mumulimo wesu, tuyooba abuumi butamani.—w21.10, peeji 25-26.

Mbuti Levitiko caandaano 19 mboitugwasya kulutobela lulayo oolu lwakuti: “Amusalale mubukkale bwanu boonse”? (1Pet. 1:15)

Kulibonya kuti kapango aaka kakazubululwa ku Levitiko 19:2. Caandaano 19 cilaamba zikozyanyo zinji izitondezya mbotukonzya kulutobela lulayo lujanika kulugwalo lwa 1 Petro 1:15 mubuumi bwesu.—w21.12, peeji 3-4.