¿Akʼumanta maʼ lek ja tsaʼanikxta número bʼa Ja Juʼun Cholumani? Ila ta oj bʼobʼa jakʼ ja sjobʼjelik it:

¿Jas skʼapjelal wa xyakitik ja Santiago 5:11 yajni wa xyala ke ja Jyoba «jel xyajtani» sok jel «syajulal skʼujol»?

Wani xnaʼatik ke ja Jyoba, yuja syajulal skʼujoli, jelni puesto ay bʼa oj yaʼotik perdon yuja jastik mi lek wa xkʼulantiki. Ja Santiago 5:11 cha wa skʼapakitik bʼa ojni skoltayotik sok yajal kʼujolal. Jelni lek oj jnochtik ja sjejel wa xyaʼa (w21.01, slam 21).

¿Jas yuj ja Jyoba ya kujlajuk ja rason bʼa olomal?

Jani yuja syajal kʼujoli. Stsʼakatal ja jaw, ja spamilya bʼa kʼuʼabʼal ay soka Jyoba lamani wa x-ajyiye sok chapan lek ja jastik wa skʼulane. Ja bʼa pamilyaʼiki, yajni spetsanile wa skisawe ja rason it wani snaʼawe machunkiluk mero oj yal yajni ay jas wa stsaxi skʼulajel sok machunkiluk bʼajtan bʼej wa x-ajyi bʼa skʼulajel (w21.02, slam 3).

¿Jas yuj ja yaʼtijumik Dyos tʼilan oj jtalnay jbʼajtik ja yajni xkatik makunuk aplikasyonik bʼa mensajeʼik?

Ta ay maʼ wa stsaʼa yajel makunuk ja aplikasyonik jaw, tʼilani oj stsaʼ lek jas tikʼe kristyano oj ajyukyuj ja tiw. Ja it mini pasiluk skʼulajel yajni kʼotel jun niwan grupo bʼa wa xjekxi mensaje (1 Tim. 5:13). Cha xiwelani sbʼaj bʼa spukjel rasonik bʼa mi xnaxi ta meran sok yajel makunuk ja hermanoʼik bʼa stajel takʼin (w21.03, slam 31).

¿Jas rasonik ajyi yuja Jyoba yaʼakan bʼa ayi wokol sok achamuk ja Yunin?

Bʼajtan, yajni aji kʼe lokan bʼa jun teʼ, ja Jesús bʼobʼ ya el libre ja judíoʼik ja bʼa skastigoʼe (Gál. 3:10, 13). Xchabʼil, ja Jyoba wani xchapjel ja Jesús bʼa oj yiʼ ja xchol jastal Olomal Sacerdote. Sok yoxil, ja jastal toj ajyi ja Jesús xchiktes ke ja kristyanoʼiki wani xbʼobʼ ajyuke toj asta ja bʼa wokolik mas tsatsi (Job 1:9-11) (w21.04, slam 16 sok 17).

¿Jasa oj bʼobʼ jkʼuluktik ta mi xtaʼatik ja kristyanoʼik ja bʼa snaje?

Ojni bʼobʼ jkʼultik probar xcholjel ja bʼa oraʼik bʼa bʼobʼta mas oj jtatik ja bʼa snaje. Cha ojni bʼobʼ jkʼultik probar xcholjel bʼa tuktukil lugar. Cha ojni bʼobʼ jtukbʼestik ja jastal modo wa xcholotiki, jastal stsʼijbʼajel kartaʼik (w21.05, slam 15 sok 16).

¿Jas maʼ kʼan yal ja jekabʼanum Pablo yajni yala: «Yuja jkʼuʼan ja leyi, elyonta libre ja bʼa leyi»? (Gál. 2:19).

Ja Ley bʼa Moisés xchiktes ke mulanume ja kristyanoʼiki sok stojo ja Israel man jul ja Kristo (Gál. 3:19, 24). Sok jani koltaji ja Pablo bʼa oj skʼuʼuk bʼa Jesús. Sok jachuk kʼot eluk «libre ja bʼa ley»; ja it mixani ayiʼoj ipal bʼa yeʼna (w21.06, slam 31).

¿Jastik sjejel bʼa kuchelyuj wa sjeʼakitik ja Jyoba?

Ja Jyoba kuchelyuj ja akʼubʼal kuxbʼuk ja sbʼiʼili, ja iljel kontra ja derecho yiʼoj bʼa yajel mandar, ja skʼokowe abʼal jujuntik ja yuntikili, ja abʼalik tikʼanxta wa sleʼa ja Satanás, ja wokol wa xyiʼaje ja yaʼtijumik, ja yajni wa xcham ja yamigoʼiki, yajni ja matik malo wa syajbʼes ja tuki sok ja wan jomjel ja jastik skʼuluneji (w21.07, slam 9 man 12).

¿Jasa wa sjeʼakitik sbʼaja pasensya ja jas ekʼ sbʼaj ja José?

Ja José kuchyuj ja jastik mi stojoluk kʼulajiyi yuja yermanoʼik. Sok yuja jach kʼulajiyi, lom lejiyi smul sok lutji jitsan jabʼil ja bʼa Egipto (w21.08, slam 12).

¿Jastik stsijujel bʼa kechan wa senyaʼan yalakan oj ekʼuk ja Ageo 2:6-9, 20-22?

Ja chonabʼiki mini tʼun xkʼan smaklaye ja rasonik bʼa sGobyerno ja Dyosi, pe jitsan kristyano nikubʼale bʼa oj skʼuʼuke ja smeranili. Mojanxa oj tsijuke tsaʼanxta ekʼele ja chonabʼik, yajni xchʼayji snajele (w21.09, slam 15 man 19).

¿Jas yuj jel tʼilan mok el jganatik ja bʼa kaʼteltik bʼa xcholjeli?

Ja Jyoba wa xyila ja janekʼ wa xkʼujolantiki sok wani xkatik gustoʼaxuk. Ta mi la axwitik sok mi x-el jganatik, oj jtaʼtik sakʼanil bʼa tolabida (w21.10, slam 25 sok 26).

¿Jastal wa skoltayotik ja Levítico 19 bʼa skʼuʼajel ja rason it: «Ajyanik sak bʼa yibʼanal jawa modoʼexi»? (1 Ped. 1:15).

Bʼobʼta ja bersikulo it jani wan yaljel ja jas wa xyala ja Levítico 19:2. Ja kapitulo 19 wa xyaʼa jitsan sjejel bʼa jastal oj katik makunuk ja 1 Pedro 1:15 ja bʼa jsakʼaniltiki (w21.12, slam 3 sok 4).