¿Likgalhtawakganitata xaʼawatiya artículos xla Makatsinina? Kaʼakxilhti komo tlan nakgalhtiya umakgolh takgalhskinin:

¿Tuku kinkawaniyan Santiago 5:11 akxni wan pi Jehová «lu paxkinan» chu lakgalhamaninan?

Katsiyaw pi xlakata Jehová xalakgalhamanina, kinkatapatiyan kintalakgalhinkan. Santiago 5:11 kinkawaniyan pi na xatapaxuwan kinkamakgtayaputunan. Lu tlan nawan komo nastalaniyaw xliʼakxilhtit (w21.01, página 21).

¿Tuku xlakata Jehová wi tiku kamaxkinit limapakgsin?

Chuna tlawalh xlakata paxkinan. Xlakata uma, xkachikin makxtum wi chu kgalhi takaksni. Anta kfamilias, tiku maxki kakni uma limapakgsin katsi tiku lakgchan wi tuku nalaksaka chu nawili xaliʼakxilhtit (w21.02, página 3).

¿Tuku xlakata kstalaninanin Cristo kuenta kilitlawatkan akxni namaklakaskinaw aplicaciones xla mensajes?

Komo wi tiku namaklakaskin uma aplicación, kuenta xlitlawat tiku nakatachuwinan. Uma tlakg tuwa kitaxtu chuna tlawakan kʼakgtum grupo niku lhuwa latamanin makgtanumakgo (1 Tim. 5:13). Tlakg ni tuwa makgmalakgatumikan tamakatsin nema ni liwana katsikan komo xlikana lanit chu max kaj nalimaklakaskinkan xlakata nalitlajakan tumin (w21.03, página 31).

¿Tuku xlakata Dios mastalh talakaskin pi Jesús xpatinalh?

Pulaktum, akxni Jesús mawakaka kkgantum kiwi, kalakgmaxtulh judíos xlakata ni xpatikgolh tuku nitlan xkalakgchan (Gál. 3:10, 13). Xlipulaktiy, Dios mastalh talakaskin pi xKgawasa xpatinalh xlakata tlan xmakgantaxtilh taskujut nema xʼama lakgayawa chuna la sacerdote tiku tlakg kgalhi limapakgsin. Chu, xlipulaktutu, xlakata Jesús ni makgatsankgananilh Dios, limasiyalh pi latamanin tlan ni namakgatsankgananikgo Jehová asta maski napatikgo tuku lu tuwa (Job 1:9-11) (w21.04, páginas 16 chu 17).

¿Tuku tlan natlawayaw komo tuwa katekgsaw latamanin kxchikkan?

Tlan nalichuwinanaw Dios hora akxni latamanin max wilakgo kxchikkan. Na tlan ni lakatum niku nalichuwinanaw Dios. Chu tlan nalakgpaliyaw la tlawayaw, tlan natsokgaw cartas (w21.05, páginas 15 chu 16).

¿Tuku xwamputun apóstol Pablo akxni wa: «Kninit xlakata tuku wan limapakgsin»? (Gál. 2:19).

Limapakgsin nema xmaxkikanit Moisés limasiyalh pi putum latamanin makglakgalhinanin, chu pulalilh Israel asta akxni xchilh Cristo (Gál. 3:19, 24). Uma makgtayalh Pablo xlakata namakgamakglhtinan Jesús. Chu chuna xanin litaxtulh «xlakata tuku wan limapakgsin», tiku xmapakgsi wa Dios, nialh wa Limapakgsin nema xmaxkikanit Moisés (w21.06, página 31).

¿Tuku chuntiya tayaninit Jehová?

Jehová tayaninit la maxkajwikanit xtukuwani, la lakatakika chuna la mapakgsinan, la makgapitsi xkamanan lakatakikgolh, lhuwa xtaʼakgsanin Akgskgawini, xtapatinkan xlakskujnin tiku lu kapaxki, la nikgo xʼamigos, tuku nitlan katlawanikgo amakgapitsi latamanin tiku lixkajnit likatsikgo chu la malakgsputumaka Katiyatni nema malakatsukinit (w21.07, páginas 9 asta 12).

¿Tuku kinkamasiyaniyan xlakata kgalhkgalhinankan tuku titaxtulh José?

José tayanilh tuku nitlan tlawanikgolh xnatalan. Xlakata tuku xnatalan tlawanikgolh, xla limawakaka tuku nixlikana chu asta tamaknuka kpulachin anta kʼEgipto (w21.08, página 12).

¿Tuku talakchikit lichuwinankan kʼAgeo 2:6-9, 20-22?

Kachikinin ni kgaxmatputunkgo tamakatsinin xla Tamapakgsin, pero lhuwa latamanin katsiputunkgonit xaxlikana. Nialh makgas kachikinin xaʼawatiya nakalakchikikan akxni nakamalakgsputukan (w21.09, páginas 15 asta 19).

¿Tuku xlakata ni kilitaxlajwanitkan chuna la lichuwinanaw Dios?

Jehová akxilha la liskujaw chuna la lichuwinanaw xpalakata chu uma makgapaxuwa. Komo ni natlakgwanaw chu ni nataxlajwaniyaw, nakgalhiyaw latamat nema ni kgalhi xlisputni (w21.10, páginas 25 chu 26).

¿La kinkamakgtayayan Levítico 19 nastalaniyaw uma tastakyaw: «Xaskulunku kalitaxtutit kxliputum milatamatkan»? (1 Ped. 1:15).

Max uma versículo takilhtinit kLevítico 19:2. Capítulo 19 pulaklhuwa lichuwinan xlakata la nalilatamayaw 1 Pedro 1:15 (w21.12, páginas 3 chu 4).