U gondzile zvi buvha a marevhista A Murindzeli ma ha hi ku hundzako? Loku zvi hi tano, zama ku hlamula a zviwutiso lezvi zvi landzelako:

Jakobe 5:11 i hi tiyisekisa yini loku aku Jehovha i na ni “tipswalo ta hombe” ni “wuxinji”?

Ha zvi tiva ku hi kota ya tipswalo takwe, Jehovha i tshama na a longile ku hi tsetselela zviwonho zva hina. Jakobe 5:11 i hi tiyisekisa ku Jehovha i tshama na a longile ku hi tsetselela futsi niku i tlhela a hi vhuna hi lirandzo. Zvi nene nguvhu loku hi mu pimanyisa. — w21.01, paj. 21.

Hikuyini Jehovha a nga maha malulamiselo ya ku kuva ni vokari va rangelako?

I mahile lezvo hi ku hi randza. A lulamiselo legi gi vhuna ku a zvilo laha ngangweni wakwe wo tsumbeka zvi famba hi fanelo ni nayo ni kurula. Ni wihi laha ka ngango wu landzelako a lulamiselo legi wa zvi tiva ku hi mani a nga ni fanelo yo maha ciboho co gumesa ni ku maha lezvi zvi nga bohiwa. — w21.02, paj. 3.

Hikuyini a maKristu ma faneleko ku ti wonela laha ma tirisako a tiprograma ta ku rumelana timesaji?

Loku a munhu a hlawula ku tirisa tiprograma leto, i fanele ku tiva ku hlawula lava a bhulako navo. Lezvo zva karata lomu ka grupo ya vanhu vo tala. (1 Tim. 5:13) Ahandle ka lezvo, ku na ni mhango ya ku haxa mahungu yo kala ma nga hi lisine khwatsi ni ku londzowota vamakabye kasi ku maha mabhindzu. — w21.03, paj. 31.

Hi zvihi zvigelo zvokari zvi nga maha ku Jehovha a vhumela ku tsika Jesu a xaniseka?

A cin’we ca zvona hi ku lezvi Jesu a nga hayekiwa laha mhandzeni, zvi kotekile ku a vaJudha va tlhatlhiswa ka ciruko va nga hi naco. (Gal. 3:10, 13) Ca wumbiri, Jehovha i wo gondzisa Jesu kasi a tira kota Mupristi wa Hombe. Ca wunharu, a kuva Jesu a tsumbekile kala afa zvi kombile lezvaku a vanhu va nga zvi kota ku tsumbeka hambu vo xaniseka zvo kota kwihi. (Joba 1:9-11) — w21.04, paj. 16-17.

Zvini u nga mahako loku zvi karata ku kuma vanhu kuchumayeleni?

U nga zama ku va lavetela hi cikhati leci va tolovelako kuva laha kaya. U nga zama ku chumayela ka matshamu man’wani. U nga zama ku chumayela hi tindlela tin’wani kambe, to kota ku tsala mapapilo. — w21.05, paj. 15-16.

Mupostoli Pawule i wa lava ku wula yini a cikhati a ngaku: “Hi kota ya Nayo ndzi file hi ka Nayo”? (Gal. 2:19)

A Nayo wa Mosi wu kombile vanhu lezvaku a va mbhelelangi wu tlhela wu rangela vaIzrayeli kala ka Kristu. (Gal. 3:19, 24) Lezvo zvi mahile ku Pawule a vhumela Kristu. Hi ndlela leyo, Pawule i nofa “hi kota ya Nayo”. Ka ciyimo leco, i wa nga ha bohekangi ku hanya hi Nayo wa Mosi. — w21.06, paj. 31.

Jehovha i hi vekelisa kuyini cikombiso mhakeni ya ku timisela?

I timisela kuchakisiwa ka vito gakwe, kuvhukelwa ka fanelo yakwe ya ku fuma, ku nga ingisi ka vana vo kari, mawunwa ya Sathani, ku wona malandza yakwe a ma randzako na ma xaniseka, ku xuva a vanghana vakwe va fileko, ku wona vanhu na va xanisa van’wani, mahanyela yo nyenyeza hi tlhelo ga masango, ni zvivangwa zvakwe zvi wonhiwako. — w21.07, paj. 9-12.

Josefa i hi vekele cikombiso muni mhakeni ya ku kombisa lihlazva-mbilu?

I xanisilwe hi vamakabye vakwe a timisela. Lezvo zvi mahile ku aya lumbetiwa a tlhela a vhalelwa malembe yo tala lomu paxweni le Gibhite. — w21.08, paj. 12.

Kutsekatseka muni ko fananisa ku phrofetilweko ka Hagai 2:6-9, 20-22?

A matiko a ma xalali hi ntiro wo chumayela Mufumo wa Nungungulu. Kanilezvi ku ni vanhu vo tala va nghenako lisineni. Zvezvanyana a matiko ma ta tsekatsekiswa a cikhati ma to lovisiwa. — w21.09, paj. 15-19.

Hikuyini hi nga faneliko ku karala hi tsika ku chumayela?

Jehovha wa ku wona a kutikarata ka hina, niku wa tsaka hi lezvi hi mahako. Loku hi nga karali hi zvi tsika, hi ta kuma wutomi ga pindzukelwa. — w21.10, paj. 25-26.

Levi cipimo 19 a nga hi vhunisa kuyini ku tirisa wusungukati legi gaku: “Basani mahanyeleni ya n’wina wontlhe”? (1 Ped. 1:15)

Zvi wonekisa ku ka 1 Pedro 1:15, ku tshahiwa Levi 19:2. Ka Levi cipimo 19, hi kuma zvikombiso zvo tala zvi hi vhunako ku wona lezvi hi nga mu tirisisako zvona 1 Pedro 1:15 wutomini ga hina. — w21.12, paj. 3-4.