Kasi mwaŵazga mwakupwelelera magazini gha Gongwe la Mulinda gha chaka chino? Yezgani kuzgora mafumbo agha:

Kasi lemba la Yakobe 5:11 likutisimikizgira vichi pakuyowoya kuti Yehova “ngwachitemwa chomene” ndiposo “ngwalusungu”?

Tikumanya kuti Yehova wakutigowokera maubudi ghithu chifukwa chakuti ngwalusungu. Lemba la Yakobe 5:11 likutisimikizgiraso kuti Yehova wakutovwira chifukwa chakuti ngwachitemwa chomene. Ntheura tingachita makora kuti timuyezge.—w21.01, p. 21.

Chifukwa wuli Yehova wakambiska ndondomeko yakuti ŵanyake ŵaŵenge na mazaza?

Wakachita nthena chifukwa cha chitemwa. Ndondomeko iyi yikovwira mbumba yake yakugomezgeka kuŵa pa mtende, kweniso kuti vinthu vichitikenge mundondomeko. Para waliyose mu mbumba wakuchita vinthu mwakukolerana na ndondomeko iyi, wakumanya uyo ngwakwenelera kupanga chakusankha chaumaliro mu mbumba, kweniso uyo wakwenera kudangilira kuti vinthu ivyo vifiskike.—w21.02, p. 3.

Chifukwa wuli Ŵakhristu ŵakwenera kuŵa maso na mapulogiramu agho ŵakugwiliskira ntchito kutumizgirapo na kupokerapo uthenga pa foni panji pa kompyuta?

Para munthu wasankha kugwiliskira ntchito mapulogiramu agha, wakwenera kusankha awo wachezgenge nawo. Ichi ntchakusuzga chomene usange pa gulu lakutumizgiranapo mameseji pali ŵanthu ŵanandi. (1 Tim. 5:13) Kweniso uheni unyake ngwakuti kanandi pa magulu ghanthena pakuthandazgika nkhani zambura ukaboni, kweniso kugwiliskira ntchito manambara gha gulu la Yehova na chilato cha kusonkheska ndalama.—w21.03, p. 31.

Kasi ni vifukwa wuli vinyake ivyo Chiuta wakazomerezgera Yesu kuti wasuzgike na kufwa?

Chifukwa chimoza ntchakuti, Yesu pakupayikika pa khuni lakusukuzgikirapo, vikapangiska kuti chiŵe chamachitko kuti Ŵayuda ŵafwatulike ku nthembo. (Gal. 3:10, 13) Chifukwa chachiŵiri ntchakuti Yehova wakasambizganga Yesu mulimo wake pakuŵa Wasembe Mukuru. Ndipo chachitatu ntchakuti, chifukwa chakuti Yesu wakagomezgeka m’paka nyifwa, vikalongora kuti ŵanthu ŵangaŵa ŵakugomezgeka nanga ŵangakumana na chiyezgo chikuru chomene. (Yobu 1:9-11)—w21.04, pp. 16-17.

Kasi mungachita wuli para ŵanthu ŵakusangika yayi pa nyumba kuti muŵapharazgire?

Mungaŵafikira ŵanthu pa nyengo izo mukuwona kuti ŵangasangika pa nyumba. Mungayezgaso kusintha malo ghakupharazgako. Ndipo mungayezgaso nthowa zinyake zakupharazgira, nga nkhulemba makalata.—w21.05, pp. 15-16.

Kasi mpositole Paulosi wakang’anamurangachi apo wakayowoya kuti: “Kwizira mu dango nkhafwa ku dango”? (Gal. 2:19)

Dango la Mozesi likapangiska kwananga kwa ŵanthu kuti kuwonekere, kweniso likalongozgera Ŵaisrayeli kwa Khristu. (Gal. 3:19, 24) Ichi chikapangiska Paulosi kuzomera Khristu. Pakuchita nthena, Paulosi ‘wakafwa ku dango’; wakaŵaso pasi pa dango yayi.—w21.06, p. 31.

Kasi Yehova walongora wuli chiyelezgero chiwemi kwa ise pa nkhani ya kuzizipizga?

Yehova wazizipizga vinthu vinandi. Wazizipizga vinthu nga nkhubinkhiskika kwa zina lake, kususkika kwa muwuso wake, kugaluka kwa ŵana ŵake ŵanyake, mautesi gha Satana, kusuzgika kwa ŵateŵeti ŵake, nyifwa ya ŵabwezi ŵake, nkharo zawakawaka izo ŵanthu ŵakuchita, ndiposo kunangika kwa chilengiwa.—w21.07, pp. 9-12.

Kasi Yosefe wakalongora chiyelezgero wuli chiwemi pa nkhani ya kuzikira?

Wakazizipizga apo ŵakuru ŵake ŵakamuchitira vinthu mwambura urunji. Ndipo ichi chikapangiska kuti ŵamupusikizgire vinthu vyakuti wandachitepo na kuŵikika mu jele ku Eguputo kwa vyaka vinandi.—w21.08, p. 12.

Kasi lemba la Hagayi 2:6-9, 20-22 likayowoyerathu za kusunkhunya wuli?

Mitundu yikususka uthenga wa Ufumu uwo tikupharazga, kweni ŵanthu ŵanandi ŵakupulikira ndipo ŵasambira unenesko. Sonosono apa mitundu yizamusunkhunyika apo yizamuparanyika.—w21.09, pp. 15-19.

Chifukwa wuli tikwenera kugongowa yayi kuchita uteŵeti withu?

Yehova wakuwona ivyo tikuyezgayezga kuchita, ndipo wakukondwa navyo. Para tikuwelera nyuma yayi tizamusanga umoyo wamuyirayira.—w21.10, pp. 25-26.

Kasi chaputara 19 cha Levitiko chikutovwira wuli kulondezga ulongozgi wakuti: “Muŵe ŵatuŵa mu makhaliro ghinu ghose”? (1 Pet. 1:15)

Vesi ili likulongora kuti mazgu ghake ghafuma pa Levitiko 19:2. Chaputara 19 chili na viyelezgero vinandi vya umo tingalondezgera ulongozgi wa pa 1 Petrosi 1:15 mu umoyo withu.—w21.12, pp. 3-4.