Kai faitau faka‵lei koe ki lōmiga o Te Faleleoleo Maluga o te tausaga tenei? Onoono aka me e mafai o tali mai ne koe a fesili konei:

Se a te fakatalitonuga e tuku mai i te Iakopo 5:11 me e “lasi ‵ki te alofa atafai” mo te “alofa fakamagalo” o Ieova?

E iloa ne tatou me e toka a Ieova o fakamagalo ‵tou mea ‵se ona ko tena alofa fakamagalo. E fakatalitonu mai te Iakopo 5:11 me e toka a ia o fesoasoani mai ki a tatou mo te alofa. Se mea ‵lei ke fakaakoako tatou ki a ia.—w21.01, itu. 21.

Kaia ne fakatoka ei ne Ieova ke isi se ulu i te kāiga?

Ne fai ne ia te mea tenā ona ko te alofa. A te fakatokaga tenei ne fai ei ke teletele ‵lei te kāiga i se auala filemu kae tokagamalie. A tino o te kāiga kolā e fakaga‵lue ne latou a te fakatokaga tenei, e ‵tau o iloa ne latou a te tino e ‵tau o fai ne ia a fakaikuga mo te takitakiga i te faiga o mea konā.—w21.02, itu. 3.

Kaia e ‵tau ei mo Kelisiano o fakaeteete i te fakaaogaga o polokalame aveave fekau i tivasi?

Kafai e fakaiku aka ne se tino ke fakaaoga a polokalame penā, e ‵tau o filifili faka‵lei ne ia ana taugasoa. E faigata te mea tenā māfai e tokouke a tino e aofia i ei. (1 Timo. 5:13) E isi foki ne mea fakama‵taku kolā e aofia i ei a te fakasalalauga o tala sē mautinoa mo te fakaaogaga o fakatuatusi a te fakapotopotoga mō mea fakapisinisi.—w21.03, itu. 31.

Ne a nisi pogai ne talia ei ne te Atua ke logo‵mae kae mate a Iesu?

E tasi te pogai me i te fakatautauga o Iesu i luga i se pou, ne fai ei ke fakasaoloto a tino Iutaia mai te malaia. (Kala. 3:10, 13) A te lua, ne akoako ne Ieova a Iesu mō tena tiute e pelā me se Faitaulaga Sili. Kae ko te tolu, ne fakatalitonu atu ne te fakamaoni o Iesu me e mafai eiloa o tumau a tino i te fakamaoni faitalia a tofotofoga faiga‵ta. (Iopu 1:9-11)—w21.04, itu. 16-17.

Ne a au mea e mafai o fai māfai e faigata ke maua a tino i te galuega talai?

E mafai o asi atu koe ki a latou i taimi kolā ko ‵nofo ei latou i olotou fale. E mafai foki ne koe o talai i koga kese‵kese. Kae e mafai foki ne koe o fakaaoga a te suā auala, e pelā mo te tusiatuga o tusi.—w21.05, itu. 15-16.

Se a te mea ne fakauiga a te apositolo ki ei i ana pati: “E auala i te tulafono ne mate au mō te tulafono”? (Kala. 2:19)

A te Tulafono faka-Mose ne fakaasi faka‵sau mai i ei a te tulaga sē ‵lei katoatoa o tino kae takitaki ei a tino Isalaelu ki te Keliso. (Kala. 3:19, 24) Ne fai ne te mea tenei ke talia ne Paulo a te Keliso. Mai te faiga penā, ne “mate [Paulo] mō te tulafono”; tela la, ko se ola a ia mai lalo i ei.—w21.06, itu. 31.

Ne tuku mai pefea ne Ieova se fakaakoakoga mō tatou i te fakaasiatuga o te kufaki?

Ne kufaki ne Ieova a fakamaseiga ne fai ki tena igoa, te ‵tekeatuga ki tena pulega, te sē faka‵logo o ana nisi tama‵liki, i loi e uke a Satani, te logo‵mae o ana tavini, te ‵galo atu o taugasoa i te mate, te olaga puapuaga o tino, mo te fakamaseiga o ana mea ne faite.—w21.07, itu. 9-12.

Se a te fakaakoakoga ‵lei o te kufaki ne fakaasi mai ne Iosefa?

Ne kufaki ne ia a faifaiga sē ‵lei mai i ana taina. Ne iku atu i ei ki ‵losiga ‵se ne fai ki a ia kae ‵pei ki te falepuipui i Aikupito mō tausaga e uke.—w21.08, itu. 12.

Se a te lūlūga fakatusa ne ‵valo mai i te Hakai 2:6-9, 20-22?

Ne ‵teke atu a atufenua ki te talaiga o te Malo, kae e tokouke a tino ne fia‵fia ki te munatonu. Ko pili o lūlū a atufenua māfai ko fakaseai atu latou.—w21.09, itu. 15-19.

Kaia e se ‵tau ei mo tatou o ‵fiu i te faiga o ‵tou galuega talai?

E lavea ne Ieova ‵tou taumafaiga kae fiafia ki ei. Kafai e se fi‵ta io me ‵fiu tatou, ka maua ne tatou te ola se-gata-mai.—w21.10, itu. 25-26.

E fesoasoani mai faeloa te Levitiko mataupu 19 ke fakagalue ne tatou a pati fakatonutonu: “Ke tapu koutou i otou amioga katoa”? (1 Pe. 1:15)

A te fuaiupu tenā kāti ne siki mai i te Levitiko 19:2. E maua i te mataupu 19 a fakaakoakoga e uke ki te auala ke fakagalue a pati i te 1 Petelu 1:15 i ‵tou olaga i aso takitasi.—w21.12, itu. 3-4.