Makanyasa kuerenga misoro ye Murindiri uye ne Mukai! ye gore rino here? Kana zviri izvona, onai kuti munokwanisa here kudaira mibvunzo dzinoteera:

Tiyago 5:11 rinogondesei parinobhuya kuti Djehovha “akadzara ne rudo rikuru?”

Tinozoiya kuti Djehovha, no usisi wake, ayena anotirekerera zvitema zvedu. Tiyago 5:11, nge upfawi, akagadzirira kutibetsera. Tinodikana kumuteedzerawo.—w21.01, mapaji. 20-21.

Ngei Djehovha akagadza misoro ye mhuri?

Ayena akazviita nge rudo. Urongwa iwona unoita, kuti mhuri yake yakagondeka ihambe nge gwanza rakarongeka uye no runyararo. Mhuri imwe na imwe painoseenzesa urongwa iwona, iyona inoziya kuti ndiyani ano ubaba we kuita cisananguro cekupedzesera uye kugara no ubaba.—w21.02, paji. 3.

Ngei aKristu ecidikana kungwarira pakuseenzesa ma aprikativho ekutumira ne e kutambira ma mesaji?

Kana munhu akasanangura kuseenzesa ma aprikativho aya, iyena unodikana kusanangura zvakanaka shamwari. Hino izvona zvingakwanisa kushupha kuzviita kana muri mu magrupu akakura. (1Ti. 5:13) Uyewo panonga pano ngozi yakakura maningi ye kubararisa masoko asiripi e zvirokwazvo uye kukhorovhera ukama watiinawo pa kuita bhizi.—w21.03, paji. 31.

Ngazvipi zvikonzero zvakaita kuti Mwari atendere kuti Mwana wake asongane no miedzo yakakura uye afe?

Cikonzero cekutanga nge cekuti, nge kuturikwa pa mutanda, zvakaita kuti Adjudha akwanise kununurhwa pa kutukwa. (Aga. 3:10, 13) Cecipiri nde cekuti, Djehovha wainga ecirowedza Djesu pa basa rake raaizomupasa hingana Mupristi Mukuru. Uye cikonzero cecitatu cainga cekuti, kugondeka ka Djesu dakara pa rufu kakapangidza kuti anhu anokwanisa kugara akagondeka, kunyazi no muyedzo yakakura. (Djo. 1:9-11)—w21.04, mapaji. 16-17.

Munodikana kuitei kana zvecimushuphirai kugumira anhu mu basa re kuparidzira?

Mungakwanisa kuwaparidzira pa nguwa yamunoona kuti mungakwakwanisa kuwagumira pa nyumba. Mungakwanisawo kuedza kuparidzira mu mbuto dzakasiyana-siyana. Uye, mungakwanisa kuedza mishobo imweni ye kuparidzira, yakadai hingana kutara tsamba.—w21.05, mapaji. 15-16.

Muphostori Pauro waida kureyei paakati: “Peciseenzeswa mutemo ndakafa kumutemo?” (Aga. 2:19)

Mutemo wa Mozesi wakapangidza kusakwana ke anhu uye wakatungamirira Aisraeri kuna Kristu. (Aga. 3:19, 24) Izvona zvakaita kuti atende muna Kristu. Nge kuita izvona, Pauro “akafa kumutemo,” iyena wainga asikacabatanidzwizve pa citema.—w21.06, paji. 31.

Ngei Djehovha i muezaniso wakanaka we kushingirira?

Djehovha akashingirira kusareremedzwa ke zina rake, kuzondwa ke ucangamire wake, kupanduka ke ana ake amweni, manyepo anogara eciizwa na Sathani, matambudziko e aseenzi ake aanoda, kusiiwa nge shamwari dzake dzakafa, kubzwinyirirhwa ke anhu ake nge akashata, kuparadzana ke mhuri dze anhu ese panyika, kuparadzwa ke zvisikwa zvake.—w21.07, mapaji. 9-12.

Zuzee wakasiya muezaniso upi wakanaka we kushingirira?

Zuzee wakabatwa zvisina unatsi nge hama dzake kamare. Uye cimwenizve, akaguma pa kupumhwa uye akakandwa mukaraboso mu Edjipitu ke makore akawanda.—w21.08, mapaji. 11-12.

Ajeu 2:6-9, 20-22 inoreketa nge zve kuzungunuka ke kufanikisira kere?

Madzinza aatambiri zvakanaka masoko atinoparidzira e Umambo, asi anhu akawanda ari kukweerhwa ku cokwadi. Mbai-mbai pano, madzinza acazungunuswa ke kupedzesera paacatsakatiswa.—w21.09, mapaji. 15-19.

Ngei tisikadikani kuremba pa kuita basa redu re kuparidzira?

Djehovha anoona kupeta masimba katinoita, uye anozvipfarira. Kana tikatama kuremba kana kuti kusiya, ticawina upenyu usikaperi.—w21.10, mapaji. 25-26.

Bhuku ra Revhitiko kapituro 19, ringatibetsera kudini kuseenzesa zano rinoti: “Garai akacena pa muhambiro wenyu wese?” (1Pe. 1:15)

Masoko ari pa vhesi iyi, pamweni akatorerhwa pana Revhitiko 19:2. Kapituro 19 inotipasa miezaniso yakahanda maningi yekuti tingaseenzesa kudini 1 Pedru 1:15 mu upenyu wedu.—w21.12, mapaji. 3-4.