Ua taio maitai anei outou i te mau tumu parau i roto i Te Pare Tiairaa? E hiˈo anaˈe e nafea outou ia pahono i teie mau uiraa:

Eaha te haapapuraa ta te Iakobo 5:11 e horoa ra no nia ia Iehova a faahiti ai i to ˈna “here rahi” e to ˈna “aroha hamani maitai”?

No to ˈna aroha hamani maitai, e faaore Iehova i ta tatou mau hara. Te haapapu ra te Iakobo 5:11 e tauturu oia ia tatou i roto i te mau fifi ta tatou e faaruru. E pee anaˈe i to ˈna hiˈoraa.—w21.01 api 21.

No te aha Iehova i rave ai i te hoê faanahoraa no te tiaau i te utuafare?

No to ˈna here, ua rave Iehova i te hoê faanahoraa no te tiaau maite i to ˈna utuafare ia ravehia te mau mea atoa ma te hau e te naho maitai. Mai te peu e pee-maitai-hia teie faanahoraa, e ite te mau utuafare tataitahi na vai e rave i te faaotiraa hopea e na vai atoa e ara ia haapao-maite-hia te reira.—w21.02 api 3.

No te aha ia ara te mau Kerisetiano i ta ratou huru faaohiparaa i te mau ravea apî?

Mea faufaa roa ia haapao maitai tatou o vai ta tatou e tauaparau ra, i roto iho â râ i te hoê pǔpǔ tauaparauraa rarahi. (Tim. 1, 5:13) Mea atâta ia haaparare i te parau ta tatou i ore i papu e ia faaohipa i te ravea tauaparauraa no te hoo atu i te tahi mea i to tatou mau taeae e tuahine.—w21.03 api 31.

Eaha te tahi mau tumu i vaiiho ai te Atua ia mauiui e ia pohe Iesu?

Te tumu matamua, ua titauhia ia patitihia Iesu i nia i te hoê pou no te faaora i te mau ati Iuda i te hoê faaino. (Gal. 3:10, 13) Te piti, ua hinaaro Iehova e faaineine ia Iesu no to ˈna toroa ei Tahuˈa Rahi. E te toru o te tumu, aita Iesu i taiva ia Iehova e tae roa ˈtu i te hopea. Haapapuraa ïa te reira e nehenehe te hoê taata e vai taiva ore noa ˈtu te haavîraa uˈana. (Ioba 1:9-11)—w21.04 api 16-17.

Eaha te rave mea fifi anaˈe ia farerei i te taata a poro ai tatou?

E farerei tatou i te taata ia poro tatou i te taime tei te fare ratou, i te tahi atu mau vahi e na roto e rave rau ravea, mai te papairaa i te rata.—w21.05 api 15-16.

Eaha te aposetolo Paulo i parau ai: “Na roto hoi i to ˈu haapaoraa i te ture i pohe ai au no te ture”? (Gal. 2:19)

Ua faaite maitai te ture a Mose eita e haere i te taata tia ore ia haapao i te Ture ma te tia roa, e aratai atoa te reira ia Iseraela i te Mesia. (Gal. 3:19, 24). Maoti te Ture Paulo i farii e i tiaturi ai ia Iesu. Mea na reira to Paulo poheraa “no te ture,” e ere faahou ïa o ˈna i raro aˈe i te Ture.—w21.06 api 31.

E nafea tatou e pee ai i te faaoromai tamau o Iehova?

Ua faaoromai tamau Iehova i te faainoraahia to ˈna iˈoa, i te patoiraahia to ˈna tiaraa Arii hau ê, i te orure-hau-raa vetahi o ta ˈna mau tamarii e i te mau haavare a Satani. Ua faaoromai tamau atoa Iehova i to ˈna iteraa i te mauiui o ta ˈna mau tavini, i te poheraa o to ˈna mau hoa, i te haavîraa a te feia ino e i te tuinoraahia te mau mea ta ˈna i poiete.—w21.07 api 9-12.

Mea nafea Iosepha i te faaiteraa i te faaoromai?

Ua hamani-ino-hia Iosepha na to ˈna mau tuaane. I Aiphiti, ua pari-haavare-hia e ua tuuhia o ˈna i roto i te fare tapearaa e rave rahi matahiti.—w21.08 api 12.

Eaha te aueueraa tohuhia i roto i te Hagai 2:6-9, 20-22?

Eita te mau nunaa e farii i te poroi o te Faatereraa arii a te Atua, e rave rahi râ taata tei ite i te parau mau. Fatata roa te mau nunaa e faaaueuehia i te taime e haamouhia ˈi ratou.—w21.09 api 15-19.

No te aha eiaha tatou e faaea i te poro?

Te ite e te mauruuru ra Iehova i te mau tutavaraa atoa ta tatou e rave nei. Eita anaˈe tatou e faaea i te poro, e fanaˈo tatou i te ora mure ore.—w21.10 api 25-26.

E nafea te Levitiko pene 19 e tauturu ai ia tatou ia pee i teie aˈoraa: “Ia moˈa outou i roto i to outou haerea atoa”? (Pet. 1, 1:15)

A taio ai i teie parau, e manaˈo paha tatou i te Levitiko 19:2. I roto i te pene 19, te faaitehia ra e nafea ia faaohipa i te Petero 1, 1:15 i roto i to tatou oraraa.—w21.12 api 3-4.