Бо чылдың «Таңныыл суургазын» кичээнгейлиг номчаан силер бе? Адаанда айтырыгларга харыылап шыдаар силер бе, хынап көрүңер.

Исайя 63:9-та бижээни дег, Иегованы «ынакшылдыг болгаш ээ-хайыралдыг» деп билири чүге оожургал эккээр?

Иегова ээ-хайыралы-биле бистиң частырыгларывысты өршээп турар. Исайя 63:9-та сөстер Ол бисти кээргеп, биске дузалаарынга белен деп бүзүредип турар. Бис база улуска ындыг хамаарылгалыг боор болзувусса эки (w21.01, ар. 21).

Иегова башкарылга дүрүмүн чүге тургусканыл?

Чүге дизе Ол ажы-төлүнге ынак. Башкарылга дүрүмүнүң ачызында Иегованың шынчы бараалгакчыларының аразында амыр-тайбың биле корум-чурум тергиидеп турар. Өг-бүлениң кежигүннери Бурганның тургускан чурумун деткиир болза, чугула шиитпирлерни кым хүлээр эргелиг база ону кым күүседир ужурлуг дээн айтырыглар турбас (w21.02, ар. 3).

Христианнар мессенджерлерни чүге оваарымчалыг ажыглаар ужурлуг?

Кымнар-биле аралажып турарывысты (интернет таварыштыр база) эки хынаар болзувусса эки. Ынчалза-даа хөй киржикчилерлиг бөлүктерге ону кылыры берге (1 Тим. 5:13). База бир айыыл — мессенджерлер таварыштыр хынаттынмаан медээлерни улус бо-ла тарадыр. Бурганның бараалгакчызы мессенджерлерни садыг-саарылгага ажыглап тургаш, акы-угбаларны акша ажылдап аар арга кылдыр көрбес ужурлуг (w21.03, ар. 31).

Бурган Иисустуң хилинчектенип өлүрүн чүге чөпшээрээнил?

Бирээде, Иисус чагыга өлгеш, еврей чонну каргыштан адырып болур турган (Гал. 3:10, 13). Ийиде, Иегова Иисусту Дээди бараалгакчы болурунга белеткеп турган. Үште, Иисус өлүмүнге чедир шынчы арткаш, өске улус база аар-берге шенелделер үезинде Бурганга шынчы артып шыдаар деп чүүлдү бадыткаан (Иов 1:9—11) (w21.04, ар. 16—17).

Суртаалга эвээш улуска таваржып турар болзуңарза, чүнү канчап болур?

Улус бажыңнарынга турда, суртаалдаарын кызыңар. Оон чүгле участоктарга эвес, а өске-даа черлерге суртаалдаңар. Ол ышкаш аңгы-аңгы аргаларны ажыглаңар, чижээ, чагааларны бижиңер (w21.05, ар. 15—16).

Павел кандыг уткалыг «Ыдыктыг хоойлуга хамаарыштыр» өлгенил? (Гал. 2:19).

Бачыттыг улус Бурганның негелделеринге долузу-биле дүгжүп шыдавас деп Моисейниң хоойлузунуң ачызында билдингир апарган. Оон ол Хоойлу израильчилерни Христосту хүлээринге белеткеп турган. Ону билгеш, Павел Иисусту Мессия кылдыр хүлээп алган (Гал. 3:19, 24). Павел Моисейниң хоойлузунга моон соңгаар чагыртпас апарган болгаш, хоойлуга хамаарыштыр «өлген мен» деп чугаалаан (w21.06, ар. 31).

Иегова Бурган — туруштуг чоруктуң эң-не эки дээн үлегери деп чүге чугаалап болур?

Иегова адының карартынып турарын, дээди эрге-чагыргазынга удурланыышкынны, ажы-төлүнүң үймээн үндүргенин, Эрликтиң төнчү чок мегезин, эргим бараалгакчыларының хилинчек-човалаңын, чоок өңнүктери-биле чарлырын, делегейде нептерээн күчүлелди, улустуң мөзү-шынар талазы-биле кудулаанын болгаш Черниң узуткаттынып турарын туруштуг шыдажып чоруур (w21.07, ар. 9—12).

Иосиф чүнү ажып эрткен?

Ооң кады төрээн акылары ону чөптүг эвес аажылап, аңаа хөй хилинчек-човалаңны чедирген. А Египетке Иосифти актыг черге нүгүлдээш, күштээшкинге меге буруудаткаш, кара-бажыңче хөй чыл ишти олуртуп каан (w21.08, ар. 12).

Аггей 2:6—9, 20—22-ден алырга, Иегова амгы үеде чүнү «силгип» турар база келир үеде чүнү «силгиир»?

Бо хүннерде Иегова чоннарны Чагырга дугайында медээ таварыштыр «силгип» турар. Улустуң хөй кезии ону дыңнаар хөңнү чок-даа болза, ону өөрүшкүлүг хүлээп турар улус эвээш эвес. Удавас Иегова черни болгаш дээрни «силгиир» азы Аңаа чагыртырын күзевес чоннарны узуткаар (w21.09, ар. 15—19).

Чүге суртаалдаарын соксатпас ужурлуг бис?

Иегова бистиң кызып суртаалдап турарывысты көргеш, өөрүп турар. Дүжүп бербес болзувусса, ол биске мөңге чурттаар арганы бээр (w21.10, ар. 25—26).

Левит 19-ку эге биле 1 Пётр 1:15-те: «Бодуңарны бүгү-ле чүүлдерге ыдыктыы-биле ап чоруңар» деп сүме аразында кандыг харылзаалыг?

Пётр Левит 19:2-ни катаптаан. Левит номундан ол эгени номчааш, 1 Пётр 1:15-тен сүмени каяа ажыглап болурун билип ап болур бис (w21.12, ар. 3).