¿Akʼoponojbal ta lek te articuloetik yuʼun Te J-ilkʼinal ta toyol te mato jaluk slokʼelike? Ilawil teme ya xjuʼ ya awakʼbey sujtib te jojkʼoyeletik ini:

¿Bin ya yakʼ jnaʼtik te Santiago 5:11 kʼalal ya yal, «bayel ya xcʼuxultaywan soc ya snaʼbotic yoʼbolil jbahtic» te Jehová?

Te Jehová ya snaʼ yoʼbolil jbatik, jaʼ yuʼun ya spasbotik perdón. Ta Santiago 5:11 jaʼnix jich ya yalbotik te ya skoltayotik sok skʼuxul yoʼtan. Ya jpastik tulan te jichukotik-euk (w21.01, pág. 21).

¿Bin yuʼun la yakʼ Jehová te ay machʼa ya xwentainwan?

Jaʼ ta swenta te skʼuxul yoʼtan. Jaʼ yuʼun ta sfamilia te Jehová ay lamalkʼinal sok leknax chajpanbil. Ta familiaetik, teme jujuntul ya yichʼik ta mukʼ te mantalil ini, ya snaʼik machʼa ya sta ta nopel te bin ya yichʼ pasel (w21.02, pág. 3).

¿Bin yuʼun ya skʼan ya jtsajtay jbatik te kʼalal ya jtuuntestik te aplicacionetik?

Teme ay machʼa ya skʼan ya stuuntes te aplicacionetik, ya skʼan ya stsajtay te machʼa ya sjokin sba sok. Pero wokolniwan ya yaʼiy te jich ya spase, melel bayal machʼatik ayik ta grupo te ya stikunbey sbaik mensaje (1 Tim. 5:13). Jaʼnix jich ya skʼan ya stsajtay sbaik yuʼun maba ya spukbeyik skʼoplal te bin ma smeleliluk sok te maba ya stuuntesik te hermanoetik yuʼun ya staik stakʼinik-a (w21.03, pág. 31).

¿Bin yuʼun te Dios la yakʼ te kʼax swokol sok laj te Jesús?

Ta sbabial, te bitʼil la yichʼ jijpanel ta teʼ te Jesús, jaʼ yuʼun te la skoltaybey skʼoplal te judioetik (Gál. 3:10, 13). Schebal, te Jehová yak ta schajpanel te Jesús yuʼun ya yichʼ yaʼtel ta Mukʼul Sacerdote. Yoxebal, te bitʼil jun yoʼtan la yakʼ sba te Jesús, jich la yakʼ ta ilel te ya xjuʼ te jun yoʼtan ya yakʼ sba te ants winiketik ta stojol Jehová manchukme ya xkʼax tulan swokolik (Job 1:9-11) (w21.04, pág. 16, 17).

¿Bin ya xjuʼ ya jpastik teme ma jtatik te ants winiketik ta snaik?

Ya xjuʼ ya jcholtik skʼop Dios te kʼalal ayikix ta snaik-a te ants winiketik. Ya xbootik ta yan lugaretik sok te ya jtsʼibaytik cartaetik (w21.05, pág. 15, 16).

¿Bin la skʼan la yal te Pablo kʼalal jich la yal: «Ta scuenta te Ley chamenonix ta stojol te Ley»? (Gál. 2:19).

Te Ley yuʼun Moisés la yal ta jamal te jmulawil ants winikotik sok koltayotik te lum Israel ta stojol te Cristo (Gál. 3:19, 24). Jich te Pablo la yakʼ schʼuunel yoʼtan ta stojol te Jesús. Jich chamen kʼot «ta stojol te Ley», melel maʼyukix yuʼel ta stojol (w21.06, pág. 31).

¿Bin ejemplo yakʼojbotik te Jehová te kujchem yuʼun?

Te Jehová kujchem yuʼun te bolkʼoptaybil te sbiile, te kontrainbil te Wentainel yuʼun, te stoybail chaʼoxtul snichʼnab, te lotiletik yuʼun te Satanás, te wokoliletik ta stojol te j-abatetik yuʼun, te yamigotak te lajemik, te bintik ma lek ya yichʼ pasbeyel te ants winiketik sok te yakik ta sjinel te bintik spasoj ta Balumilal (w21.07, pág. 9-12).

¿Bin ya snojptesotik ta swenta te la snaʼ smaliyel te José?

Te José kujch yuʼun te bin ma stojiluk la yichʼ pasbeyel yuʼun te sbankiltak. Te bin kʼot ta stojol, jaʼ te la yichʼ lebeyel smul sok bayal jaʼbil la yichʼ otsesel ta cárcel ta Egipto (w21.08, pág. 12).

¿Bin albilkʼop te ay ta Hageo 2:6-9, 20-22 te ya xkʼot ta pasel?

Te nacionetik ma smulanik yaʼiyel te lek yachʼil kʼop yuʼun te Wentainel, pero ay ants winiketik te ya skʼan ya snopik te skʼop Dios. Nopol ya yichʼix lajinel te nacionetik (w21.09, pág. 15-19).

¿Bin yuʼun ma skʼan ya xlujbotik ta scholel skʼop Dios?

Te Jehová ya yil te ya jpastik tulan sok tseʼel yoʼtan yuʼun. Teme ma xlujbotik sok ma xchebaj koʼtantik ya jtatik jkuxlejaltik ta sbajtelkʼinal (w21.10, pág. 25, 26).

¿Bin-utʼil ya skoltayotik te Levítico 19 ta spasel te mantalil ini: «Chʼultesbiluquex ta spisil bintic yac apasic»? (1 Ped. 1:15).

Te versiculo-abi, teyniwan lokʼem tal ta Levítico 19:2. Ta capítulo 19 ya jtatik ejemploetik te bin-utʼil ya jpas ta jkuxlejaltik te 1 Pedro 1:15 (w21.12, pág. 3, 4).