¿Mi akʼupinoj skʼelel Li Jkʼel-osil ta toyol ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

¿Kʼuxi tspat koʼontontik Santiago 5:11 kʼalal chal ti «snaʼ xkʼanvan xchiʼuk chkʼuxubinvan li Jeovae»?

Jnaʼojtik ti chakʼutik ta perton Jeova ta skoj ti oy xkʼuxul yoʼontone. Li Santiago 5:11 xtoke chal ti ta slekil yoʼonton tskoltautike. Lek me ti jechuk jchanbetik stalelale (w21.01, paj. 21).

¿Kʼu yuʼun oy buchʼutik yakʼojbe yabtel li Jeovae?

Jaʼ ta skoj ti chkʼanvane. Jaʼ jun matanal ti jech la spase, yuʼun jaʼ sventa oyuk noʼox smelolal xchiʼuk lekuk xchapet skotol kʼusi tspasik li yutsʼ yalale. Li utsʼ alaliletik ti chichʼik ta mukʼ li kʼusi xchapanoj Diose snaʼojik buchʼu chchʼunbeik smantal kʼalal jelel li kʼusi chichʼ nopele xchiʼuk buchʼu junukal tspas li kʼusi kʼot ta nopele (w21.02, paj. 3).

¿Kʼu yuʼun skʼan oyuk jpʼijiltik kʼalal ta jtunestik li aplikasionetik sventa mensajeetike?

Mi oy buchʼu tskʼan tstunes li aplikasionetik taje, skʼan skʼel lek buchʼutik te tikʼajtik li ta grupoe. Taje mu kʼunuk ta pasel mi te tikʼilutik ta jun grupo ti ep buchʼutik te oyike (1 Tim. 5:13). Jech xtok, xibal sba ti oy kʼusi xichʼ albel skʼoplal ti mu stak’ naʼel mi jech ta melele xchiʼuk xibal sba ti oyuk kʼusi xichʼ pasel sventa jlokʼesbetik takʼin li ermanoetike (w21.03, paj. 31).

¿Kʼu yuʼun laj yakʼ permiso Dios ti akʼo xil svokol xchiʼuk xcham li Jesuse?

Baʼyel, li Jesuse skʼan xichʼ jokʼanel ta jtel teʼ sventa spoj lokʼel li judaetik ta skoj ti yichʼojik chopol kʼoptaele (Gal. 3:10, 13). Xchibal, la xchapan Xnichʼon sventa lekuk chapal mi kʼot ta mero Bankilal Palee. Yoxibal, kʼalal tukʼ laj yakʼ sba li Jesuse, laj yakʼ ta ilel ti xuʼ tukʼ xakʼ sba li jun krixchano akʼo mi tsots tajek chil svokol (Job 1:9-11) (w21.04, paj. 16, 17).

¿Kʼusi xuʼ jpastik mi vokol chkaʼitik stael ta snaik li krixchanoetike?

Xuʼ jaʼo jcholtik mantal kʼalal te xa ox van oyik li ta snaike. Xuʼ jeltik xtok ti bu ta jcholtik mantale. Jech xtok, oyuk kʼusi yan jpastik, jech kʼuchaʼal ti jtsʼibatik kartaetike (w21.05, paj. 15, 16).

¿Kʼusi skʼan xal kʼalal xi laj yal li jtakbol Pabloe: «Chamemun ta stojolal li mantale»? (Gal. 2:19).

Li Smantal Moisese jamal chakʼ ta ilel ti jpasmulilutik noʼoxe xchiʼuk ti jaʼ la sbeiltas batel li j˗israeletik ta stojolal li Kristoe (Gal. 3:19, 24). Li Pabloe laj yakʼ xchʼunel yoʼonton ta stojolal Jesus koliyal li kʼusi chal Mantale. Jaʼ yuʼun, cham xkaltik «ta stojolal li mantale», jaʼ xkaltik, ti muʼyuk xa ventainate (w21.06, paj. 31).

¿Kʼusitik kuchem tal yuʼun li Jeovae?

Li Jeovae kuchem tal yuʼun ti yichʼoj chopol kʼoptabel li sbie, ti albil ti muʼyuk lek ti kʼu yelan ch˗ajvalilaje, ti stoyoj sbaik junantik xnichʼnabtake, li jutbil kʼopetik chal Diabloe, k’alal chil ti oy svokoltak li yajtuneltake, kʼalal chcham li yamigotake, kʼalal ch˗ilbajinvanik li chopol krixchanoetike xchiʼuk ti yakal tsokesik li balumile (w21.07, paj. 9-12).

¿Kʼuxi laj yakʼ kiltik Jose ti skʼan oyuk smalael kuʼuntike?

Li Josee tsʼik yuʼun li kʼusi chopol pasbat yuʼun sbankiltake. Epal jabil laj yichʼ tikʼel ta chukel ta skoj ti laj yichʼ jutbel smule (w21.08, paj. 12).

¿Kʼusi laj yichʼ alel ta Ajeo 2:6-9 xchiʼuk 20-22 ti chkʼot ta pasele?

Li mukʼtik lumetike mu skʼan xchikintaik li aʼyej sventa Ajvalilale, pe ep buchʼutik lek chaʼiik li mantale. Poʼot xa xichʼik nikesel ta slajeb velta li mukʼtik lumetike, jaʼ xkaltik, ti chichʼik lajesele (w21.09, paj. 15-19).

¿Kʼu yuʼun skʼan mu xijlubtsaj li ta cholmantale?

Li Jeovae jaʼ tskʼel ti chkakʼtik persae xchiʼuk xmuyubaj˗o kuʼuntik. Mi muʼyuk chkikta-o jbatik ta cholmantale, ta jtatik kuxlejal sbatel osil (w21.10, paj. 25, 26).

¿Kʼuxi tskoltautik Levitiko 19 sventa jchʼuntik li tojobtasel liʼe: «Lekuk chʼul skotol atalelalik»? (1 Ped. 1:15).

Li versikulo liʼe te van lokʼem talel ta Levitiko 19:2. Li kapitulo 19 chakʼ kiltik kʼuxi xuʼ xkakʼ ta jkuxlejaltik jujun kʼakʼal li kʼusi chal ta 1 Pedro 1:15 (w21.12, paj. 3, 4).