Naa no vhala thero dza magazini dza Tshiingamo dza uno ṅwaha? Kha ri vhone arali ni tshi nga fhindula mbudziso dzi tevhelaho:

Musi Yakobo 5:11 i tshi ri Yehova u na “lufuno luhulu” na “khathutshelo,” i vha i tshi khou ri khwaṱhisedza mini?

Ri a zwi ḓivha uri Yehova u a ri hangwela vhukhakhi hashu a tshi itiswa nga khathutshelo yawe. Yakobo 5:11 i ri khwaṱhisedza uri Yehova u ṱoḓa u ri thusa. Ri tea u mu edzisa.—w21.01, p. 21.

Ndi ngani Yehova o ita nzudzanyo ya uri hu vhe na ṱhoho?

O zwi ita ngauri u funa muṱa wawe. Yeneyi nzudzanyo i ita uri zwithu muṱani wa Yehova zwi tshimbile nga mulalo na nga nḓila yo dzudzanyeaho. Muraḓo muṅwe na muṅwe wa muṱa une wa tevhela yeneyi nzudzanyo u a ḓivha uri ndi nnyi ane a fanela u dzhia phetho na uri ndi nnyi ane a tea u ranga phanḓa kha u ita zwe zwa phethwa.—w21.02, p. 3.

Ndi ngani Vhakriste vha tshi fanela u vha na vhulondi musi vha tshi shumisa app dza u rumelana milaedza?

Arali muthu a nanga u shumisa app dzo raloho, u tea u nanga vhane a ḓo rumelana navho milaedza. Zwenezwo zwi a konḓa arali ni tshi khou rumelana milaedza na tshigwada tshi re na vhathu vhanzhi. (1 Tim. 5:13) Hu dovha ha vha na khombo ya u phaḓaladza mafhungo a si na vhuṱanzi na u shumisa vhahashu u bveledzisa mabindu ashu.—w21.03, p. 31.

Ndi zwiitisi zwifhio zwo itaho uri Mudzimu a tendele Yesu a tshi tambula na u fa?

Tshiitisi tsha u thoma ndi tsha uri Yesu o vha a tshi tea u fhahewa kha danda uri a vhofholole Vhayuda kha samba ḽa Mulayo. (Vhagal. 3:10, 13) Tshiitisi tsha vhuvhili ndi tsha uri o vha a tshi khou gudisa Yesu uri a nga ita hani mushumo wa u vha Tshifhe Muhulu. Tshiitisi tsha vhuraru ndi tsha uri u fhulufhedzea ha Yesu u swika lufuni ho sumbedza uri vhathu vha nga dzula vha tshi fhulufhedzea kha Yehova naho vha tshi khou sedzana na milingo i vhavhaho. (Yobo 1:9-11)—w21.04, pp. 16-17.

Ni nga ita mini musi ni sa wani vhathu mahayani musi ni vhuḓinḓani?

Ni nga lingedza u vha dalela nga tshifhinga tshine vha wanala ngatsho mahayani. Ni nga dovha na lingedza u huwelela huṅwe fhethu. Nahone ni nga dovha na lingedza u huwelela nga iṅwe nḓila, i ngaho u ṅwala marifhi.—w21.05, pp. 15-16.

Muapostola Paulo o vha a tshi khou amba mini musi a tshi ri: “Ndo fa siani ḽa mulayo ndi tshi itiswa nga wonoyo mulayo”? (Vhagal. 2:19)

Mulayo wo zwi bvisela khagala uri vhathu vha re na tshivhi vho vha vha nga si kone u tevhedza Mulayo nga ho fhelelaho nahone wo thusa vhathu uri vha ṱhogomele uri Yesu o vha e ene “ṅwana” o fhulufhedziswaho. (Vhagal. 3:19, 24) Paulo o dzhiiwa sa o lugaho ngauri Mulayo wo vha wo mu thusa uri a ṱanganedze Yesu na u vha na lutendo khae. Nga zwenezwo, Paulo o “fa siani ḽa mulayo” ngauri o vha a si tsha vha nga fhasi hawo.—w21.06, p. 31.

Yehova o ri vhetshela hani tsumbo ya u konḓelela?

Yehova u khou konḓelela dzina ḽawe ḽi tshi ḓodzwa matope, musi vhathu vhanzhi vha tshi ri ho ngo tewa nga u vhusa, u shandukelwa nga vhaṅwe vha vhana vhawe, mazwifhi a Saṱhane, u vhona vhashumeli vhawe vha tshi tambula, u lovhelwa nga khonani dzawe, u vhona vhathu vha tshi tsikeledzwa nga vhathu vhavhi na u vhona vhathu vha tshi tshinya ḽifhasi.—w21.07, pp. 9-12.

Yosefa o ri vhetshela tsumbo ifhio yavhuḓi ya u sa fhela mbilu?

O konḓelela u sa farwa zwavhuḓi nga vhakomana vhawe. Zwo ita uri a pomokiwe na u valelwa dzhele lwa miṅwaha minzhi ngei Egipita.—w21.08, p. 12.

Hagai 2:6-9, 20-22 i amba nga ha u dzinginyiswa hufhio ha pfanyisedzo?

Vhathu vhanzhi a vha ṱanganedzi mulaedza wa Muvhuso, fhedzi vhaṅwe vha a ḓa ngohoni. Hu si kale u dzinginyiswa ha dzitshaka hu ḓo amba u fheliswa hadzo.—w21.09, pp. 15-19.

Ndi ngani ri songo tea u neta, ra litsha mushumo washu wa u huwelela?

Yehova u a vhona vhuḓidini hashu nahone u a takalela mushumo washu. Arali ra konḓelela, ra sa nete kha mushumo washu wa u huwelela, ri ḓo wana vhutshilo vhu sa fheli.—w21.10, pp. 25-26.

Levitiko ndima ya 19 i nga ri thusa hani u tevhedza nyeletshedzo ine ya ri: “Ivhani vhakhethwa kha zwoṱhe zwine na ita”? (1 Pet. 1:15)

Yeneyo ndimana i nga vha yo redzwa i tshi bva kha Levitiko 19:2. Ndima ya 19 i ṋea tsumbo nnzhi dza nḓila ine ra nga shumisa ngayo 1 Petro 1:15 vhutshiloni hashu.—w21.12, pp. 3-4.