Nyuwo moohaasoma nnenesene a Nwehereri ootheene a eyaakha ela? Vano, mweerere waakhula makoho ala enittharelana:

Va Yakobe 5:11 ninsoma weera Yahvéh ti a “ikharari ni òlekela onyonyiwa” ni “òsareya otthuna”?

Mwaha wa omoriwa ikharari, Yehova onnitthuna vantxipale onilevelela soottheka sahu, ni mwaha wa nsivelo nawe. Yakobe 5:11 onnaniwexexiha weera owo ori oolikaneene weera anikhavihere. Onnitthuneya weera nimutakiheke yoowo.—w21.01-MHS, epaax. 21.

Yehova ohelenle heeni nlamulo na ohoolela?

Mwaha wooweera owo onnanisivela. Mwaha woohela nlamulo nna, mweemusini kapena mmarehereroni mwa Yehova itthu sinneetta ni murettele, moomaaleleya ni mwa nnenesene. Wahaakhanle ohoolela itthu saaheereke oxupa ni khaakela osuwanyeyaka taani eera uulumeke nsu noomalihera ni ovareliwa muteko.—w21.02-MHS, epaax. 3.

Heeni makristu eekhaikhai antthuneyaaya wiikosoopa yanviyariki imensagem mwa aplicativu?

Wakhala weera mutthu ontthuna onvarihela muteko aplicativo a imensagem, onnitthuneya othanla nnene taani ontthekulanaawe, vantxipalexa wakhala weera egrupu ya atthu awo yohaattiwa. (1 Tim. 5:13) Opwaha mwa yeeyo, onnitthuneya okhala ootxentxera ohimwaramwara mitthenka soohiroromeleya naari ovarihela muteko manummero aasinna weera mumpake nakoso.—w21.03-MHS, epaax. 31.

Mwaha wa heeni Yehova aakhulenlaawe weera Yesu ahaawe mpaka okhwa?

Yoopatxera, Yesu aakhwenle vamwirini wa nihaaxero weera awoopole aYuda ni atthu ootheene yuulumeliwe mwaha wa yoottheka ya Adamu. (Agal. 3:10, 13) Etthu yanaaveeli yaamweerinhe Yehova omuhiya mwanawe ohaawa mooteene yoole, yaari yoowera owo aatthuna omutxentxeriha Yesu weera awere muritti wa onamakeya muhoolo. Ni etthu yanaararu yaamweerinhe Yehova omuhiya mwanawe ohaawa mooteene yoole, weera awere oviriha yooweeha yoovila ni weera aakhule yoovanyiha yootepa otthuneya. (Yobi 1:9-11)—w21.04-MHS, ipaax. 16-17.

Eheeni eneera enikhavihere weera niwere waaphwanya atthu enxupa waaphwanya wuulaleerani?

Etthu eneera enikhavihere ori olaleera ihuhu soovirikana emaara yeeyo atthu enkhalaaya mmawannyaya naari olaleera mapuro oohiyana-hiyana. Hiyo pooti otxentxa moota woolaleera, akina naalepelaka ikaratta.—w21.05-MHS, ipaax. 15-16.

Paulo aatthuna ohima eheeni ni masu ooweera: “Vekhaikhai kòhokhwa wa ikano niwoko na ikano”? (Agal. 2:19)

Nlamulo na Mose naahima mooluluwanya weera atthu eyariwe ni yoottheka nave yannitthuneya woopoliwa Nlamulo nno tho nanaakeliha atthu wa Kristu. (Agal. 3:19, 24) Mwaha wa yeeyo, Paulo aamwaakhulela Kristu nave mwaha woopaka eyo, Paulo ‘aahookhwa wa ikano niwoko na ikano,’ neera haale nlamulo khanaakhalanne owera mwa Paulo.—w21.06-MHS, epaax. 31.

Ntakihero heeni noovilela Yehova onnivahaawe?

Yehova onnavirelela ovilela mwaha wa wootheriwa nsinanawe, ovanyihiwa wa olamulelo awe, mwaha woohimwiiwelela malaika makina, mwaha wa Diabo ovirelela wootha, mwaha wa ohaawa wa arumeyi awe onaasivelaawe, okhwa wa asinthamwene awe, nihasu naalopwana akina oowuuma murima, atthu akina mwaha woohiiwelela malamulo awe ni ohononiwa wa itthu opattunxaawe.—w21.07-MHS, ipaax. 9-12.

Ntakihero heeni nooreera Yosefe oonihenraawe?

Yosefe aavilela ni opixa murima nnaamweera owo aathokororinweene moohixariya ni asunnawe. Yosefe aahootheriwa opaka etthu ahaapankaawe ni aawaleliwa mukalipooso iyaakha sintxipale oXipitu.—w21.08-MHS, epaax. 12.

Eprofesia heeni eri va Hagayo 2:6-9, 20-22 aahimmaawe yaakela weereya?

Atthu khenaakhelela nnenehe mitthenka sooreera sa Omwene. Nto nnaamweera vareene hiiho, atthu antxipale ennaakhulela ekhaikhai. Moohipisa, atthu amulaponi enkela othukumela yaanyaanyiwaka vale.—w21.09-MHS, ipaax. 15-19.

Mwaha wa heeni nihintthuneyaahu weemexera olaleera?

Yehova onnoona wiilipihera wahu nave onnihakalala vantxipale mwaha wa muteko owo nnivarelaahu. Naahikhulumuwa vale, nnootthuveliwa nave wakhela ekumi yoohimala.— w21.10-MHS, ipaax. 25-26.

Moota heeni Onamakeya ekapiitulu 19 onnikhaviheraawe ovarihela muteko miruku: “Mukhale nyuwo òttela mmakhaleloni mwanyu mothene”? (1 Ped. 1:15)

Masu a eversu ela woonawene ekuxiwe va Onamakeya 19:2. Ekapiitulu 19 onuuluma sa moota hiyo nneeraahu nivariheleke muteko mweekumini mwahu masu eri va 1 Pedru 1:15.—w21.12-MHS, ipaax. 3-4.