You don take time read this year Watchtower them? Try whether you go fit answer this questions:

As James 5:11 talk say the “love wey Jehovah get really deep” and say “e get pity,” wetin this one make us dey sure of?

We know say Jehovah go forgive our sins because e get pity. James 5:11 make us believe say God still get strong feeling to help us. Na fine thing if we de do like Jehovah.—w21.01, p. 21.

Why Jehovah arrange make some people be head?

Jehovah do this one because of love. This arrangement make-am dey possible for peace to dey e family and for things to arrange well. When each family member follow this arrangement well, they go know who go de make final decision for the family, and who suppose make sure say the decision happen.—w21.02, p. 3.

Why Christians need to dey careful when them de use program for computer or phone de send or receive message?

If person decide to use this kind program them, e need to choose e friends well. This one go hard to do when the person dey for big group wey them de talk with text message. (1 Tim. 5:13) Dangers still dey when people de spread story wey they no dey sure about and de use phone numbers of brothers and sisters as opportunity to do business.—w21.03, p. 31.

Wetin be some reasons why God allow Jesus to suffer and die?

One reason na say, as Jesus die ontop pole, this one make-am dey possible for Jew people to dey free from one curse. (Gal. 3:10, 13) The second reason na say, Jehovah de train Jesus for the work wey e go do as High Priest. And the third reason na say, as Jesus dey faithful till e die, this one show say people fit remain tight with Jehovah, even when they face serious test. (Job 1:9-11)—w21.04, pp. 16-17.

Wetin you fit do if e de hard you to see people talk with for your preaching work?

You fit try de preach for different time when people go fit dey for house. You fit still try to preach for different place. And you fit try different style. For example, you fit write letter.—w21.05, pp. 15-16.

Wetin apostle Paul mean when e talk say: “I don die because of law for things about law”? (Gal. 2:19)

The Law wey Jehovah use Moses give Israel people make the sin wey people get for their body to show, and e guide Israel people to Christ. (Gal. 3:19, 24) Because of this one, Paul accept Christ. As Paul do this one, e ‘die for things about law’; e no come dey under the Law again.—w21.06, p. 31.

How the way Jehovah de endure de show us better example?

Jehovah don endure things. For example, they don spoil e name, they no support God as King, some of e children no gree obey, the lies wey Devil de talk, the suffer wey servants of God de suffer, e de miss e friends wey don die, the trouble wey wicked people de cause for other people, and man de spoil the earth wey God don make.—w21.07, pp. 9-12.

Which better example Joseph show as e dey patient?

Even though say Joseph brothers treat Joseph for bad way, e endure-am. As time de go, person lie against Joseph and e go prison for Egypt for some years.—w21.08, p. 12.

Which shaking Haggai 2:6-9, 20-22 talk about?

The nations reject the Kingdom message wey we de preach, but Jehovah don draw plenty people come the truth. Small time, Jehovah go shake the nations for the last time when e go destroy them.—w21.09, pp. 15-19.

Why we no suppose tire as we de preach?

Jehovah de see our hard work and e like-am. If we no tire, we go live forever.—w21.10, pp. 25-26.

How Leviticus chapter 19 fit help us follow wetin Bible talk for 1 Peter 1:15 when e say: “Make wuna dey holy for all wuna character”?

E fit be say that verse na quote from Leviticus 19:2. Chapter 19 give us plenty examples of how we fit use wetin dey 1 Peter 1:15 for our everyday life. —w21.12, pp. 3-4.