ʼE Kei Kotou Manatuʼi Koa?
Neʼe kua kotou lau fakalelei koa te ʼu Tule Leʼo ʼo te taʼu ʼaeni? Kapau koia, kotou ʼahiʼahi tali ki te ʼu fehuʼi ʼaeni:
ʼE ui ia Sakopo 5:11 “ko Sehova ʼe ʼofa mamahi pea mo manavaʼofa.” He koʼe ʼe fakalotomalohi te manatu ʼaia?
ʼE tou iloʼi ko Sehova ʼe ko he ʼAtua manavaʼofa, pea ʼe lotofakamolemole gafua ki ʼatatou hala. ʼE fakalotomalohi kia tatou ia Sakopo 5:11 he ʼe tou mahino ai ki te ʼofa pea mo te fia tokoni mai ʼa Sehova. Pea ʼe tou fia faʼifaʼitakiʼi ia ia.—w21.01, p. 21.
He koʼe neʼe fakatuʼutuʼu e Sehova ke ʼi ai he pule famili?
ʼE ʼofa ia tatou. Ka ʼi ai he pule famili pea ʼe maʼuli tokalelei te famili pea mo fakatuʼutuʼu lelei. Ka fakaʼapaʼapa te ʼu famili fuli ki te fakatuʼutuʼu ʼaia, pea ʼe natou iloʼi pe ko ai ʼe tonu ke ina toʼo te ʼu tonu fakamuli pea mo tokaga ke mulimuli te famili ki ai.—w21.02, p. 3.
He koʼe ʼe tonu ke tokakaga te kau Kilisitiano moka natou fakaʼaogaʼi te ʼu meʼa fakafelogoi ʼi te neti?
Kapau ʼe fakatuʼutuʼu he tahi ke ina fakaʼaogaʼi te ʼu meʼa fakafelogoi ʼaia, ʼe tonu ke tokaga pe ko ai ʼae ka felogoi mo ia. ʼE mole faigafua anai moka kotou felogoi mo he ʼu kiʼi kutuga. (1 Tim. 5:13) ʼE fakatupu tuʼutamaki te vaevae ʼo he ʼu logo ʼe heʼeki tou iloʼi papau pe ʼe moʼoni pea mo te fakafelogoi ki ʼotatou tehina mo tuagaʼane ʼe kita fakatau he meʼa.—w21.03, p. 31.
He koʼe neʼe fakafealagia e Sehova ke mamahi pea mo mate ia Sesu?
ʼUluaki, neʼe ina fakafealagia te faʼahi ʼaia ke fakaʼateainaʼi ai te kau Sutea mai he malaʼia. (Kal. 3:10, 13) Pea lua, neʼe loto e Sehova ke tokalelei ia Sesu ki tana gaue ʼi tona ʼuhiga Pelepitelo Lahi. Pea tolu leva, neʼe fakaha e Sesu ʼaki tana nofo agatonu ʼo kaku ki te mate ʼe feala ke nofo agatonu te hahaʼi ki te ʼAtua moka natou tau mo ni ʼahiʼahi faigataʼa. (Sopo 1:9-11)—w21.04, p. 16-17.
Kotea ʼe feala ke kotou fai moka ʼe faigataʼa takotou maʼu he tahi ʼi te faifakamafola?
E feala ke kotou toe liliu kio natou ʼi he tahi hage temi ʼe kotou maʼu ai natou ʼi tonatou loto fale. ʼE mole la kovi takotou hiki atu ki he tahi koga meʼa ʼo faifakamafola ai. Pea ʼe feala hakotou toe faitohi kia natou.—w21.05, p. 15-16.
Kotea te fakaʼuhiga ʼo te ʼu palalau ʼaeni ʼa te apositolo ko Paulo: “Kua au mate ʼo ʼuhiga mo te Lao ʼuhi ko te Lao”? (Kal. 2:19)
Neʼe ʼaoga te Lao ʼa Mosese ke iloʼi e te tagata tona ʼuhiga agahala pea neʼe taki ai te kau Iselaele ki te Mesia. (Kal. 3:19, 24) Koia neʼe tali ai e Paulo ia Kilisito. Ko te tupuʼaga la ʼaia ʼo te ui e Paulo “kua au mate ʼo ʼuhiga mo te Lao.” Neʼe kua ʼateaina mai te Lao ʼa Moisese.—w21.06, p. 31.
ʼE fakaha feafeaʼi mai e Sehova ia te faʼa kataki?
Neʼe katakiʼi e Sehova te ʼulihi ʼo tona huafa, mo te fakafeagai ki tona ʼuhiga pule, mo te agatuʼu ʼa ʼihi ʼo ʼana fanau, mo te ʼu loi ʼa Satana, mo te mamahi ʼo ʼana kaugana, mo te mate ʼo ʼona kaumeʼa, mo te mamahi ʼa te hahaʼi pea mo te ʼulihi ʼo te kele.—w21.07, p. 9-12.
Kotea te ako neʼe tuku mai e Sosefo ʼo ʼuhiga mo te faʼa kataki?
Neʼe gaohi koviʼi e ʼona tehina. Neʼe tukugakoviʼi hala ia ia kae neʼe mole ina fai hina meʼa ʼe kovi pea neʼe pilisoniʼi ʼi Esipito ʼi ni ʼu taʼu.—w21.08, p. 12.
Kotea ʼae neʼe fakakikite e Sehova ia Akeseo 2:6-9, 20-22?
ʼE fakafisi anai te ʼu puleʼaga fakatagata ki te fakamafola ʼo te Puleʼaga ʼo te ʼAtua, kae tokolahi ʼe ʼomai anai ki te moʼoni. Kua vave luluʼi te ʼu puleʼaga ʼaia moka fakaʼauha natou.—w21.09, p. 15-19.
He koʼe ʼe tonu ke hoko atu tatatou faifakamafola?
ʼE sio Sehova ki ʼatatou faiga pea ʼe fiafia. Kapau ʼe tou faifakamafola tuʼumaʼu pea ʼe tou maʼu anai te maʼuli heʼe gata.—w21.10, p. 25-26.
ʼE tokoni feafeaʼi mai ia Levitiko kapite 19 ke tou ‘liliu ʼo maʼoniʼoni ʼi tatatou aga katoa’? (1 Pet. 1:15)
Neʼe toʼo te vaega ʼaeni mai ia Levitiko 19:2. ʼE lahi te ʼu aluʼaga ʼe tou maʼu ʼi te kapite 19 ʼe feala ai ke tou maʼuliʼi ia 1 Petelo 1:15 ʼi totatou maʼuli.—w21.12, p. 3-4.