Ana aŵalasile mwakusamala magasini ga Sanja ja Mlonda ga chaka achino? Kwende alole, naga chakombole kwanga yiwusyo yakuyichisyayi:

Ana lilemba lya Yakobo 5:11, likutusimichisya yamtuli palikusala kuti Yehofa ali ‘jwachanasa’ soni ‘jwakusalala mtima’?

Tukusamanyililaga kuti ligongo lya chanasa, Yehofa akusaŵa jwakusachilila kutukululuchla yakulemwa yetu. Lilemba lya Yakobo 5:11 likusatusimichisyasoni kuti jwalakwe ali jwakoseka kutukamuchsya. Mpaka tutende chenene kumsyasya jwalakwe.—w21.01, p. 21.

Ligongo chichi Yehofa ŵasagwile ŵandu ŵane kuti aŵe ŵakulongolela?

Jwalakwe jwatesile yeleyi ligongo lya chinonyelo. Yeleyi yikusatendekasya kuti gulu jakwe jakulupichika jitendeje yindu mwamtendele soni mwadongosolo. Jwakutumichila jwakwe jwalijose jwakusatenda yindu mwakamulana ni dongosoloji akusamanyilila ŵakwete udindo wakulongolela nambosoni wakusagula yakutenda.—w21.02, p. 3.

Ligongo chichi abale ni alongo akusosekwa kuŵa ŵakusamala pakukamulichisya masengo matala gakutumichisyana mameseji?

Naga mundu akusagula kamulichisya masengo malo gakunguluchila ga pa intaneti, akusosekwa kusagula chenene ŵandu ŵakunguluka nawo. Yeleyi mpaka yiŵe yakusawusya naga mundu akukunguluka m’magulu ga ŵandu ŵajinji. (1 Tim. 5:13) Yikusaŵa yakogoyasoni kuwandisya ngani syangali maumboni nambosoni kwakamulichisya masengo abale ni alongo pakusaka kupata mbiya.—w21.03, p. 31.

Ana ni magongo gane gapi gagamtendekasisye Mlungu kunda kuti Yesu alaje soni kuwulajidwa?

Ligongo lyandanda lili lyakuti ŵasakaga kwagopola Ayuda ku malweso gawo. (Aga. 3:10, 13) Ligongo lyaŵili lili lyakuti Yehofa ŵamkosechelesyaga Yesu udindo wakwe wamsogolo wakuŵa Jwamkulungwa Jwambopesi. Soni lyatatu lili lyakuti kulupichika kwa Yesu mpaka chiwa chakwe kwalosisye kuti ŵandu mpaka akombole kuŵape ŵakulupichika kwa Mlungu pakusimana ni yakusawusya. (Yob. 1:9-11)—w21.04, pp. 16-17.

Ana mpaka atende chichi naga yili yakusawusya kwapata ŵandu pakulalichila?

Alinjeje kwajendela ŵanduŵa pandaŵi jampaka ŵasimane pamlango. Alinjejesoni kulalichila kudela jine. Mpaka alinjesoni matala gane gakulalichilila mpela kwalembela yikalata ŵandu ŵangakusasimanikwa panyumba.—w21.05, pp. 15-16.

Ana Paulo jwagopolelaga chichi pajwaŵechete kuti, “Kupitila mu chilamusi une naliji jwam’we ku chilamusi”?​—Agal. 2:19, NWT.

Chilamusi cha Mose chatendekasisye kuti ungali umlama wa ŵandu uwonechele soni chalongolele Aisalaeli kwa Klistu. (Aga. 3:19, 24) Yeleyi yamtendekasisye Paulo kuti aŵe Mklistu. Mwakutenda yeleyi Paulo “jwaliji jwam’we ku chilamusi,” soni jwalakwe nganaŵa pasi pa chilamusichi.—w21.06, p. 31.

Ana Yehofa atupele chisyasyo chamtuli pangani ja kupilila?

Yehofa aŵele ali mkupilila ligongo lyakuti, ŵandu ŵane ngakusalichimbichisya lina lyakwe, ŵandu ŵajinji akusasisya ulamusi wakwe, ŵane mwa ŵanache ŵakwe ŵamjimuchile. Akusapililasoni unami wa Satana, yakusawusya yakusimana nayo ŵakutumichila ŵakwe, chiwa cha ŵakutumichila ŵakwe. Jwalakwe akusapililasoni ligongo lyakuti ŵakusakala akusiŵatendela ngasa ŵandu ŵane, ŵandu akutenda ndamo syakunyalaya, soni ligongo lyakuti ŵandu akonanga yindu yachilengedwe.—w21.07, pp. 9-12.

Ana Yosefe jwatupele chisyasyo chamtuli pangani ja kuwusimana mtima?

Jwalakwe jwapilile yindu yangali chilungamo yaŵamtendele ŵachibale ŵakwe. Yangali chilungamoyi yatendekasisye kuti amlambuchisye magambo ni kumŵika mu ukayidi kwa yaka yejinji ku Iguputo.—w21.08, p. 12.

Ana pa Hagai 2:6-9, 20-22 pakusasala ya kutenganya kwamtuli?

Mitundu ja ŵandu jakanile utenga wa Uchimwene, nambo ŵandu ŵajinji atandite kumtumichila Mlungu. Pachangakaŵa mitundu ja ŵandu chachijitenganya kakumalisya pachachijijonanga.—w21.09, pp. 15-19.

Ligongo chichi ngatukusosekwa kuwujila munyuma patukutenda utumiki wetu?

Yehofa akusalola kulimbichila kwetu soni akusasangalala ni yeleyo. Naga ngatukupela soni kuwujila munyuma tuchipata umi wangamala.—w21.10, pp. 25-26.

Ana buku ja Lefitiko chaputala 19 mpaka jitukamuchisye chamtuli kamulichisya masengo malangiso gakuti, “Mŵeje ŵaswela mtima mu yosope yimkusatenda”? (1 Pet. 1:15)

Maloŵe ga pandimeji gatyochele pa Lefitiko 19:2. Chaputala 19 chikusasala yindu yejinji yampaka yitukamuchisye ndaŵi syosope kamulichisya masengo mfundo ja pa 1 Petulo 1:15.—w21.12, pp. 3-4.