Ngie wutengi buboti malongi ma Kibanga ki Nsungi ma mvu awuwu? Boti ngete, buna wulenda vana mimvutu mi biuvu binlanda:

Yakobi 5:11 yintuba ti Yave widi “nkua mamboti” ayi “nkua kiadi.” Lufiatu mbi tulenda ba mu mawu?

Mu kuba nkua kiadi, tuzebi ti Yave wunlemvukilanga zinzimbala zitu. Yakobi 5:11 yituvana lufiatu ti mu mamboti mandi, nandi wukivananga muingi ku tusadisa. Diawu buboti beni tulandakananga kifuani kiandi.—w21.01, tsielu. 21.

Kibila mbi Yave katsikikila thuadusulu yi kimfumu?

Nandi wuvangila mawu mu kibila ki luzolo ayi muingi kusadisa kimvuka kiandi kiba mu ndembama ayi kithuadi. Ayi kadika mutu va dikanda wunlandakana thuadusulu ayoyo, zebi nani fueti baka makani matsuka va dikanda.—w21.02, tsielu. 3.

Kibila mbi baklisto bafueti bela keba keba bo bansadila bisadulu bi kufilasana zimensage?

Mutu wunsadila bisadulu beni, kafueti sola buboti bakundi bandi. Tufueti ba keba keba mu kukota mu mangumba manneni ma bakundi. (1 Timo. 5:13) Kibila bawombo bansadilanga mawu muingi kusumbisa biuma ayi kuvanga mambu mankaka makhambulu nguizani na mbuongimini yi Yave.—w21.03, tsielu. 31.

Bibila mbi Nzambi kabikila Yesu katovuka ayi kafua?

Theti, vabe tombulu Yesu kabandu va dikunzi muingi kukula basi Yuda mu tsingulu batambula. (Ngala. 3:10, 13) Kimuadi, Yave waba kubika Yesu mu kiyeku ki kuba Mfumu yi Zinganga Nzambi. Ayi kintatu, lukuikumunu lu Yesu lumonisa ti batu balenda tatamana kusadila Yave kheti bo bamviokila mu ziphasi. (Yobi 1:9-11)—w21.04, tsielu. 16-17.

Mbi wulenda vanga boti phasi kudengana batu mu zinzo bo wunsamuna?

Ngie wulenda meka kukuenda mu bilokula bawu banluta banga mu zinzo. Mvandi wulenda samuna mu bibuangu biviakana. Ayi wulenda balula phila yi kuvanina kimbangi, dedi kusonika minkanda.—w21.05, tsielu. 15-16.

Mbi mvuala Polo kaba tomba kutuba bo katuba: “Mu kibila ki nsiku minu yifua.” (Ngala. 2:19)

Nandi waba tomba kutuba ti ni mutu kalendi ba ko wusonga mu kulandakana to minsiku mi Mose, vayi mu kuba kiminu mu Yesu Klisto. (Ngala. 3:19, 24) Diawu kakikinina Klisto. Ayi mu phila ayoyo, nandi “wufua mu matedi nsiku Mose.”—w21.06, tsielu. 31.

Buidi Yave ka tuvanina kifuani mu matedi kumonisa lukuikumunu?

Yave wumonisa lukuikumunu bo bavueza dizina diandi, bo bana bandi bankaka babalukila luyalu luandi, mu luvunu Nkadi’ampemba ka kumvuninanga, mu ziphasi bisadi biandi bammonanga, mu kiunda ki kuvasuka na bakundi bandi bafua, mu phila batu mu nza bama wadila kitsuza ayi matingu ayi mu phila badi mu kutuludila bivangu biandi.—w21.07, tsielu. 9-12.

Kifuani mbi Yosefi ka tubikila mu matedi kumonisa mvibudulu?

Nandi wuvibidila mu mambu makhambulu masonga zikhomba ziandi bamvangila. Mu kibila akiokio, bamvunina mambu ayi bantula mu buloku ku Ngipiti mu mimvu miwombo.—w21.08, tsielu. 12.

Ndikununu mbi yi zitsi babikula mu Hangai 2:6-9, 20-22?

Batu bawombo bavitikanga ko zitsangu tu balonga, vayi mvandi vadi bawombo bankikininanga. Mua nkadu to wunkhambu batu mu zitsi zioso bala nyikuka bo bela bungu.—w21.09, tsielu. 15-19.

Kibila mbi tulendi vongila ko kuvanga kisalu kitu ki kusamuna?

Yave wummonanga mangolo mitu ayi wunkuangalalanga. Befu manga kuvonga, tuala tambula luzingu lu mvu ka mvu.—w21.10, tsielu. 25-26.

Buidi dilongi didi mu Levitiku kapu 19 di tusadisila: “Kuba banlongo mu zikhadulu zitu zioso”? (1 Pete. 1:15)

Bikuma abiobio ḿba bibongulu mu Levitiku 19:2. Ayi mu kapu yoso 19 muidi bifuani biwombo bimmonisa phila tulenda sadila dilongi didi mu 1 Petelo 1:15 mu luzingu luitu.—w21.12, tsielu. 3-4.