Wa ta xokaj u revistailoʼob U Pʼíich Tulumil Kanan 2021, ¿jeʼel wa u páajtal a núukik le kʼáatchiʼobaʼ?

Le baʼax ku yaʼalik Santiago 5:11, ¿bix u yeʼesiktoʼon Jéeobaeʼ «jach nojoch u yaabilaj yéetel ku chʼaʼik óotsilil»?

Junpʼéel bix u yeʼesik Jéeoba ku chʼaʼiktoʼon óotsilileʼ letiʼe kéen u perdonart le baʼaloʼob maʼ maʼalobtak k-beetkoʼ. Santiago 5:11, ku yeʼesiktoʼon xaneʼ Jéeobaeʼ jach u yaabiltmoʼon le oʼolaleʼ kéen sufrirnakoʼoneʼ ku kaxtik bix u yáantkoʼon. Toʼoneʼ maʼalob xan ka k-beet jeʼex letiʼoʼ (w21.01, pág. 21).

¿Baʼaxten Jéeobaeʼ yaan tiʼ máaxoʼob u tsʼaamaj autoridad?

Jéeobaeʼ u yaabiltmaj le máaxoʼob u beetmoʼ, le oʼolal yaan tiʼ máaxoʼob tu tsʼáaj autoridad utiaʼal ka nuʼuktaʼakoʼob yéetel utiaʼal ka yanaktiʼob jeetsʼelil. Le familiaʼob ku respetarkoʼob le autoridad u tsʼaamaj Jéeobaoʼ u yojloʼob máax unaj u decidirtik baʼax kun beetbil, yéetel máax unaj u yilik ka beetaʼak (w21.02, pág. 3).

¿Baʼax unaj k-chʼaʼik en cuenta le kéen meyajnaktoʼon le aplicaciónoʼob utiaʼal u túuxtaʼal mensajeʼoboʼ?

Wa táan u tuklik máak u yokol teʼ grupoʼob tuʼux ku tsikbal yaʼab máakoʼoboʼ kʼaʼabéet u yéeyik tubeel yéetel máaxoʼob kun tsikbal. Lelaʼ maas difícil u beetaʼal wa le grupo tuʼux kun okol máakoʼ jach nojoch (1 Tim. 5:13). Tsʼoʼoleʼ wa ku yokol máak teʼ grupoʼob beyaʼ unaj u kanáantkuba utiaʼal maʼ u máan u tsikbalt baʼaloʼob maʼ jaajtakiʼ bey xan u kanáantik maʼ u usartik le sukuʼunoʼob utiaʼal u beetik negociooʼ (w21.03, pág. 31).

¿Baʼaxten tu chaʼaj Jéeoba u muʼyaj Jesús?

Yáaxeʼ Jesúseʼ kʼaʼabéetchaj u chʼuykíintaʼal tiʼ junpʼéel cheʼ utiaʼal u jáalkʼabtik le judíoʼob tiʼ le maldición ku yaʼalik le Leyoʼ (Gál. 3:10, 13). U kaʼapʼéel baʼax oʼolal chaʼab u muʼyajeʼ utiaʼal u béeytal u beetik le meyaj kʼubéentaʼantiʼ le kéen u beet u Maas Nojoch Sacerdoteiloʼ. Yéetel u yóoxpʼéeleʼ utiaʼal u yeʼesik juntúul máakeʼ jeʼel u chúukpajal u yóol u meyajt Dios kex jeʼel baʼalak ka beetaʼaktiʼeʼ (Job 1:9-11) (w21.04, pág. 16, 17).

¿Baʼax jeʼel u páajtal k-beetik wa maʼ kulaʼan le máakoʼob tu yotochoʼoboʼ?

Jeʼel u páajtal k-kʼexik u yorail k-kʼaʼaytajeʼ, k-kʼaʼaytaj jejeláas tuʼux bey xan k-kʼexik u formail k-kʼaʼaytaj. Maʼ xaaneʼ jeʼel u páajtal k-tsʼíibtik cartaʼobeʼ (w21.05, pág. 15, 16).

¿Baʼax tu yóotaj u yaʼal Pablo le ka tu yaʼalaj: «Teneʼ kíimen tu yoʼolal le leyoʼ»? (Gál. 2:19).

U ley Moiséseʼ tu yeʼeseʼ wíinikeʼ maʼ tu páajtal u tsʼoʼokbesik tuláakal baʼax ku yaʼalik le Leyoʼ. Tsʼoʼoleʼ tu nuʼuktaj u kaajil Israel tu yiknal le Cristooʼ (Gál. 3:19, 24). Le oʼolal Pabloeʼ tu kʼamaj Cristo. Bey úuchik u kíimil Pablo tu yoʼolal le Leyoʼ, lelaʼ u kʼáat u yaʼaleʼ le Leyoʼ pʼáat minaʼan páajtalil tiʼ tu yóokʼol (w21.06, pág. 31).

¿Baʼaxoʼob tsʼoʼok u chúukpajal u yóol u aguantart Jéeoba?

Le maʼ u respetartaʼal u kʼaabaʼoʼ, u yaʼalaʼal maʼ letiʼ unaj u gobernariʼ, u tsʼáaikuba jujuntúul tiʼ u paalaloʼob tu contra, le baʼaloʼob maʼ jaajtak ku yaʼalik le Kʼaasilbaʼaloʼ, u muʼyaj máaxoʼob meyajtik, u kíimil u amigoʼob, le baʼaxoʼob ku beetik le máakoʼob kʼasaʼanoʼob tiʼ u maasiloʼ yéetel le u kʼaskúuntaʼal le Luʼumaʼ (w21.07, pág. 9-12).

¿Baʼax k-kanik tiʼ bix tu yeʼesil paciencia José?

Joséeʼ tu aguantartaj le baʼaloʼob maʼ maʼalobtak beetaʼabtiʼ tumen u sukuʼunoʼoboʼ. Yoʼolal le baʼax beetaʼabtiʼoʼ hasta oksaʼab cárcel tu luʼumil Egipto (w21.08, pág. 12).

¿Baʼax tu yaʼalaj Ageo 2:6-9, 20-22 kun úuchul teʼ kʼiinoʼobaʼ?

U maas yaʼabil le máakoʼoboʼ maʼ uts tu tʼaan u yuʼubikoʼob k-kʼaʼaytik le Reinooʼ, chéen baʼaleʼ yaʼab máak xaneʼ tsʼoʼok u káajal u adorarkoʼob Dios. Maʼ kun xáantaleʼ le kéen tsʼok tíitaʼak le Luʼumaʼ yaan u xuʼulsaʼal tiʼ le máaxoʼob maʼatech u reconocerkoʼob chéen Jéeoba unaj u gobernaroʼ (w21.09, pág. 15-19).

¿Baʼaxten maʼ unaj u lúubul k-óol wa maʼ tu kʼaʼamal le baʼax k-kʼaʼaytikoʼ?

Jéeobaeʼ ku yilik bix u chúukpajal k-óol teʼ kʼaʼaytajoʼ yéetel ku kiʼimaktal u yóol yoʼolal le meyaj k-beetkoʼ. Wa maʼ t-kaʼanal yéetel maʼ tu xuʼulul k-tsʼáaik k-óoleʼ Jéeobaeʼ yaan u tsʼáaiktoʼon kuxtal minaʼan u xuul (w21.10, pág. 25, 26).

¿Bix u yáantkoʼon Levítico capítulo 19 utiaʼal k-beetik le baʼax ku yaʼalik le Bibliaaʼ: «[Unaj] a pʼáatleʼex santoil tiʼ tuláakal baʼal»? (1 Ped. 1:15).

Maʼ xaaneʼ Pedroeʼ táan kaʼach u chʼaʼchiʼitik le baʼax ku yaʼalik Levítico 19:2. Le capítulo 19 tiʼ Levíticooʼ ku yeʼesik bix jeʼel u páajtal k-beetik le baʼax ku yaʼalik 1 Pedro 1:15 (w21.12, pág. 3, 4).