1. Yakobus iba ro kina ḇemnis rariso?

 YAKOBUS Yesus kasun ḇyedi iba ro kina ḇesambraḇ ro rurya. * Sinan ḇyesuya, Yusuf ma Maria, suswar kaku Yahwe I, ma sufarmyan ḇe Yahwe kuker sne ḇesiper. Osower ido, Yakobus eba ḇyedine iso Mesias ḇeḇeasas ya. Inja, Yakobus nya kina ḇepyum syadi. Inema barakas ḇeba kaku rirya!

2. Roi ḇepyum risai monda Yakobus myam ro Yesus i?

² Yakobus bisa myam roi ḇepyum nabor ro eba ḇyedine. (Mat. 13:55) Imnis ra, rofyor Yesus insape ḇyeumur taun ri 12, ifawi pyum kaku Allah Wos Sren ḇyedi kwar inja guru agama ḇero Yerusalem smanen kaku fyor srower wos ḇyena. (Luk. 2:46, 47) Yakobus imbude ikako fyararur ḇe sukan ai kuker Yesus i. Kaku rarirya ido, na myambir kaku eba ḇyedine. Raris Nathan H. Knorr ikofen ker doḇe ”bisa komambir snonggaku oso fyor kofararur kayam kuker i”. * Osower ido, Yakobus bisa myam snar ”Yesus imakma iba fasaw ma ifawi nanemkaku, inja Allah ma snonkaku sya siswar I”. (Luk. 2:52) Inja, imbude kokara snar Yakobus iso na ḇepon ro Yesus manfamyan ḇerandak ḇyedi. Ḇape, kakuya rarirya ḇa.

3. Yakobus ḇye Yesus manfamyan ḇyedi fyor Yesus ifarmyan ro supswan kaker ke?

 ³ Fafisu Yesus ifarmyan ro supswan, Yakobus ḇye Yesus manfamyan ḇyedi ḇaim. (Yoh. 7:3-5) Ḇape, Yakobus imbude iso oser ro kina Yesus ḇekara snar Yesus ”swar user ḇyena namnis ḇa kwar”. (Mrk. 3:21) Ma rofyor Yesus ismai samamyai marmar ro ai kandera, ḇape rya Yakobus isya rodia ḇa kuker snari, Maria i.​—Yoh. 19:25-27.

4. Rosai nari kawos ro farkarkor ine?

⁴ Ḇarpurya, Yakobus ikyar faro Yesus ma dakḇe penatua ma nya fakamaman ro sidang Kristen. Ro farkarkor ine, nari kawos roi risuru kofarkor ro Yakobus i: (1) roi ḇefnai fa fandun fa kofasnai sne ḇerun pdef (2) nyan fa bisa koḇeguru ḇekir syadi.

5. Rofyor Yesus ḇyawes ma fyasnai manggundi, rariso ine nawyae Yakobus i rai?

⁵ Moḇsa Yakobus ḇyemanfamyan ḇesouser ḇe Yesus i? Rofyor Yesus ḇyeḇebawes kwar fyasnai manggundi faro ”Yakobus ma ḇarpurya faro manwawansya kam”. (1 Kor. 15:7) Sarawrow ani ine iso ḇefadwer kankenem Yakobus ḇyena. Ro fafisu ani, ḇye Yesus manfamyan ḇyedi. Rofyor manfamyan siryur ro Yerusalem fa sismai rur ḇesren, Yakobus ikako isya rodia. (Kis. 1:13, 14) Ḇarpurya, Yakobus ismai syowi fa ḇye oser ro raryur naek ḇefarkin ro abad randak. (Kis. 15:6, 13-22; Gal. 2:9) Ma ro taun 62 M ḇaim, Allah fyarkin i fa fyas ḇe snonggaku Kristen ḇeḇeramrem sya. Syapram ani nbuk payamyum faro ko kaker ro kirine, ḇekenem ro nanggi ke ḇaido ro supswan. (Yak. 1:1) Yosefus, ahli sejarah oso ro abad randak, ikofen ḇo doḇe snar parenta ro imam ḇeba Yahudi oso isoine Ananias, Hanas roma ḇyedi Yakobus ismai samamyai marmar ya. Yakobus isouser pdef faro Yahwe isof ro kankenem ḇyedi imnai ro supswan.

6. Mamam eḇese risai Yakobus kuker manfarkin ḇebor ro fafisu ani snana?

⁶ Yakobus fyasnai sne ḇerun. Ro diso kofawi roi ine rai? Mam pan mamam ḇese ro Yakobus kuker manfarkin agama ḇebor ro fafisu ani. Rofyor Yakobus myam roi ḇefasnai wos snar Yesus ima rumgun Allah Ḇyedi, kuker sne ḇerun imarisen dakḇe manfamyan ḇe Yesus i.  Ḇape, imam ḇebukor ro Yerusalem sifrur rarirya ḇa. Imnis ra, sfamyun snar Yesus ḇyawes Lazarus i kwar, simewer sikofen snar Yesus ima Allah ḇewan i. Ḇape sna wos oser fa smun Yesus i ma Lazarus i kako. (Yoh. 11:53; 12:9-11) Ḇarpurya, fafisu Yesus manggundi ḇyawes, sḇensewar fa siyokef roi ani. (Mat. 28:11-15) Snar sararer si, spampum Mesias ḇeḇeasas ya.

7. Rosai ḇefnai fa kopok kararer awer?

⁷ Farkarkor ya: Kopok kararer awer, ma komarisen kaku Yahwe fyarkor ko. Dafduf oso bisa nafrur pembuluh darah ro jantung koḇedi pyakrek inja jantung koḇedi fyararur kuker pyum ḇa. Imnis rarirya kako, ararer koḇedi bisa nafrur sne koḇena pyakrek inja kopampum Yahwe farkarkor Ḇyena. Ine iso ḇeḇejadi kuker snonggaku Farisi sya. Snar sne sena npakrek kwar, simewer sor Yesus ima Rumgun Allah Ḇyediri ma ismai papoik ro rur ḇesren Allah. Imḇape, roi ḇefasnai na nasnai kaku kwar. (Yoh. 12:37-40) Ararer sena nun ḇe roi ḇepyum ḇa. Sismai kankenem fyoroḇa. (Mat. 23:13, 33) Inja, fandun fa kona sne ḇerun ya ḇesya kwar. Rarirya, Allah wos ḇyedi ma rur ḇesren ya bisa pyangkayum kenem koḇena ma nawyae nyan karkara koḇena ma snemuk kun na ḇaido snemuk koḇena. (Yak. 3:17) Snar Yakobus nya sne ḇerun, imarisen Yahwe fyarkor i. Ma imnis raris kawos na, ine iso ḇefrur fa ḇyeguru ḇepyum syadi.

8. Rosai bisa ḇefnoḇek ko fa koḇe guru ḇekir syadi?

⁸ Yakobus fyarkor kaki ḇa. Manfarkin agama ro fafisuya skara i ḇe ”snonkaku waworek befarkorḇa”, raris Manwawan Petrus ma Yohanes su. (Kis. 4:13, fasfas kasun) Ḇape, fyor kowasya syapram Yakobus fyas na, bisa komam ima guru ḇekir syadi. Raris Yakobus i, imbude kofarkor kaki ḇa. Rariryano, kuker fafnoḇek ro rur ḇesren Yahwe ḇyedi ma farkarkor ro organisasi Ḇyedi, bisa kakḇe guru ḇekir syadi kako. Kirine, mgorama kawos  nyan ḇepyum Yakobus ḇyedi ma rariso kosofarari i.

9. Imnis rariso nyan Yakobus byukifarkor ya?

⁹ Yakobus byuk wos ḇesamswen ḇa ḇaido wos ḇepyamdam. Bon ya, snonggaku ḇewasya syapram ḇyena sifawi rosai fandun fa sifrur na. Imnis ra, mam pan rariso Yakobus fyarkor snar snonggaku Kristen sekaḇaḇaḇ pdef fyor sifrur pyum si ḇa. Fyas ḇo doḇe, ”Nkap si ḇeḇeaski, isoine si ḇefarmku kwar; ma mkomnaf kwar ro Ayub farmku ḇyena ma mkofawi ro ḇarpurya rosai Manseren fyasos faro i kwar, snar Manseren saswar ḇyedi iba ma ifo kuker saneso.” (Yak. 5:11) Yakobus byuk Ayub fawar ḇyena ro Allah Wos Ḇyedi insama ḇewasya sya sifawi pyum snar Yahwe ḇyebarakas snonggaku ḇefarmku ḇesya kwar. Inja fyor byuk farkarkor, Yakobus byuk Allah Wos Ḇyena ḇesya kwar. Wos ḇyena nasnaibos ḇoi napyan kaku ma nsun ro swaruser. Inja, Yakobus ifrur ḇewasya ḇyesi smam faro manggundi ḇa, ḇape faro Yahwe I.

10. Rariso kosofarari nyan Yakobus byukifarkor rai?

¹⁰ Farkarkor ya: Fandun fa kobuk farkarkor kuker nyan ḇepyandam ma kobuk Allah Wos Ḇyena. Rofyor kobuk farkarkor, fandun yaiso insama snonggaku smanen ko ḇa, ḇape insa sfawi Yahwe ima ifawinanem kaku ma iswar kaku si. (Rm. 11:33) Inja, fandun fa koḇepake Refo ḇesya kwar. Imnis ra, na kofnoḇek ḇefarkor Refo koḇedi imbranuser rosai fyarkor kwar na, kopok kokofen awer, ’Yamnis au ido, nari . . . ’ Imbape, wafnoḇek i fa kyarauser farfyar ḇero Refo na kuker moḇsa fyawi pyum mamam ma sneḇaḇir Yahwe Ḇyedi. Rarirya ido, fyor imbranuser rosai ifarkor na, nari ifrur na kukro imbe ifrur Yahwe imarisen, ḇape ko ḇa.

11. Rosai Yakobus ifawi kuker min Kristen ḇyesi, ma anun risai byuk na? (Yakobus 5:13-15)

¹¹ Yakobus ifo kuker fawawi. Roro syap ḇyedi, bisa komam snar Yakobus ifawi min Kristen ḇyesi ḇaḇeraryar ḇa sena, ma byuk anun ḇesnaibos fa ifnoḇek si. Imnis ra, snonggaku Kristen ḇeḇeso sifrur ḇeri ḇa anun sismai na. (Yak. 1:22) Sia kako smam rarwas ma sesyowi syadi snonggaku ḇenana sya. (Yak. 2:1-3) Ḇesesya wer samswen fa sfara ramar sena. (Yak. 3:8-10) Nanekam iso ḇaḇeraryar ḇa ḇeba nairi, ḇape Yakobus ikyar kaku snar bisa sifrur fararwei. Danun bos ḇe si ḇoi kuker pyum kaku. Ma, danun si fa sor fafnoḇek roro penatua sya fyor sḇaḇir samswen fa sifrur fararwei.​—Wasya Yakobus 5:13-15.

12. Rosai ḇefnai fa kopok kokara awer snar ḇefarkor Refo koḇedi imbude ifrur fararwei ḇa?

¹² Farkarkor ya: Fandun fa kona fawawi ḇape kokyar pdef snar ḇefarkor Refo koḇedi bisa ifrur fararwei. Ḇefarkor Refo koḇedi imbude samswen fa imbranuser wos farkin ḇero Refo. (Yak. 4:1-4) Imbude ifandun swaf fa imnai ifrur roi ḇeḇyeḇa ma fyasnai rari-rari ḇepyum. Raris Yakobus i, fandun fa koḇebri fa kokofenḇair ḇefarkor Refo koḇedi rosai fandun fa ḇyensewar kaku ya. Ro fafisu anya kako, kopok kokara awer snar na jadifa ifrur fararwei ḇa. Koswarepen Yahwe dun snonggaku ḇena sne ḇerun faro I ma ifnoḇek si fa sifrur fararwei.​—Yak. 4:10.

13. Ro Yakobus 3:2, rosai Yakobus ikofen ya?

¹³ Yakobus demir ḇyaḇir ḇa ipyum syadi ro snonggaku ḇesesya. Ima Yesus ḇedar kasun ḇyedi ma ismai fararur ḇefandun  kaku, imbape kyara ḇaḇeri ima ipyum syadi ro min Kristen ḇyesi. Dap siḇe ’naek srar iswar kaku’. (Yak. 1:16, 19; 2:5) Yakobus fyasnai ḇa ima inapes kaku. Mboi, ikofen, ”Kokam kosasar ro roi nabor.”​—Wasya Yakobus 3:2.

14. Rosai ḇefnai fandun fa kokofenḇair snar manggunko ḇardi fyorno ido samswen fa koso wos farkin ḇero Refo?

¹⁴ Farkarkor ya: Fandun fa koswarepen snar kokam konapes ḇa. Kopok kokara awer snar kopyum syadi ro ḇefarkor Refo koḇedi. Rosai ḇefnai i? Kukro fyor kofasnai snar koma kakfrur sasar ḇaḇeri ido, ḇefarkor Refo koḇedi imbude kyara na ipok fa dakḇe Saksi Yahwe ḇa. Inja, fandun fa kokofenḇair snar manggunko fyorno ido samswen fa koso mnis wos farkin ro Refo ma kofrur fararwei. Ramnai, kofawar moḇsa Yahwe ifnoḇek ko. Rarirya, ḇefarkor Refo koḇedi nari ifawi snar i kako bisa dakfarmyan ḇe Yahwe I.

15. Sarḇer ḇemnis rariso Yakobus ḇyepake na? (Yakobus 3:2-6, 10-12)

¹⁵ Yakobus byuk sarḇer ḇesun ro sne. Bisa ndarirya snar fafnoḇek ro rur ḇesren. Imbude fyarkor nabor kako ro sarḇer eḇa ḇyedi, Yesus i ḇyepake na. Ro syap ḇyedi, Yakobus ḇyepake sarḇer ḇepyamdam, ma ḇewasya syap ḇyedi sya sifawi pyum farkarkor ḇyena kuker snai kaku.​—Wasya Yakobus 3:2-6, 10-12.

16. Payamyum risai kosmai na fyor kobuk sarḇer ḇesrow kaku?

¹⁶ Farkarkor ya: Fandun fa kobuk sarḇer ḇesrow kaku. Fyor kobuk sarḇer ido, ḇerower konsya bisa siwasenkara rosai kofarkor na. Naiso ḇefnoḇek si fa siswarepen farkarkor ḇefandun kaku ro Refo. Yesus ḇyekir kaku fa byuk sarḇer, ma Yakobus iso nyan ḇyenane. Mgorama kawos oser ro sarḇer Yakobus byuk na ma rosai ḇefnai fa sarḇer ani ipyum kaku.

17. Rosai ḇefnai fa sarḇer ḇero Yakobus 1:22-25 ipyum kaku?

¹⁷ Wasya Yakobus 1:22-25. Rosai ḇefnai fa sarḇer Yakobus ḇyedi kuker fanin ipyum kaku? Roi ḇeḇeso nasya. Ḇepon ya, ifawi rosai imḇe fyarkor ro sarḇer ani: Fyor imbe kosmai payamyum ro Allah Wos Ḇyena ido, kowasya monda awer, ḇoi kombranuser na. Ḇesuru ya, roi Yakobus byukifasnai na napyan fa ḇewasya  sya siwasenkara na, isoine ḇekur snonggaku ḇefanin sya. Ḇekyor ya, farkarkor ro sarḇer byani nasnai: Fyor snonggaku oso fyanin i ma myam roi oso isya fandun fa ifrur mnis na, ḇape ifrur roi oso ḇa, ima snonggaku ḇefawi royoḇa. Inja, rofyor kowasya Allah Wos Ḇyena, ma fyor kofawi snar rari oso fandun fa kofadwer na, koḇefasis monda awer. Fandun fa kofrur fararwei.

18. Roi rikyor risai bisa kofarkor ro moḇ Yakobus byuk sarḇer na?

¹⁸ Roi rikyor bisa kofarkor ro moḇ Yakobus byuk sarḇer na: (1) Sarḇer koḇena fandun fa nasrow kuker rosai imbe kobuk farkor na. (2) Roi kobukifasnai na fandun fa napyan faro ḇerower konsya siwasenkara na. (3) Farkarkor ro sarḇer koḇena fandun fa nasnai kaku. Fyor kwara samswen fa wasrow sarḇer ḇesrow ido, bisa mam ro Indeks Publikasi Menara Pengawal, ro baḇ judul ”Perumpamaan”. Rodia, sarḇer nabor nasya bisa ḇepakena. Mboi waswarepen, ipyum ya sarḇer koḇena kobukna fa kobukifasnai roi ḇefandun kaku monda. Rosai ḇefnai i? Kukro sarḇer imnis ra mikrofon. Mikrofon bisa nafrur mgarem koḇena naba. Rarirya kako, sarḇer bisa nafrur ḇaido nfasnai kaku roi imbe kawos na. Inja, kobuk sarḇer nabor manggenem ido, ḇerower konsya nari sikmom kukro roi kobukifasnai nabor kaku. Kawos kwar fandun fa kofrur nabor syadi insama koḇekir syadi fa kobuk farkarkor. Ḇape, fandun koḇena insa snonggaku sya smanen ko ḇa. Imboi, komarisen kofnoḇek snonggaku ḇebor sya fa sakḇe Yahwe kina ḇeḇeaski Ḇyedi.

19. Rariso kofasnai koswar kina rohani koḇesya?

¹⁹ Koma kona eba ḇenapes raris Yesus i ḇa. Ḇape, kona kina rohani ḇeba kaku, ma kofarmyan ḇe Yahwe kayam kuker si. Kofasnai snar koswar si kuker koḇebati kayam kuker si, kofarkor ro si, ma kuker souser kobaryas ma kobuk farkarkor kayame. Fyor koḇensewar fa koso rari, kenem, ma moḇ Yakobus byuk farkarkor ido, nari kosandik Yahwe I. Bisa kofnoḇek kako snonggaku ḇenapes sya fa sakfanam kuker Kma ḇesaswar koḇedi.