1. Bas keluarga si uga nge Jakup ipebelin?

 JAKUP adek Jesus ipebelin bas keluarga si paguh kinitekenna. * Orang tuana eme Jusup ras Maria. Keleng kel ate kalak e Jahwe janah layani kalak e Ia alu bulat ukur. Selain si e, abang Jakup eme Mesias si ijanjiken. Jelas me, istimewa kel keluarga Jakup e. Enda pasti jadi pasu-pasu si luar biasa man Jakup!

2. Kai saja usihen arah Jesus si banci idah Jakup?

² Banci idah Jakup melala usihen arah abangna, Jesus. (Mat. 13:55) Contohna, sanga umur Jesus 12 tahun, enggo angkaina kel isi Kitap si Badia. Emaka, mamang ate guru-guru agama bas Jerusalem sanga begikenna Jesus ngerana. (Luk. 2:46, 47) Banci saja Jakup pe enggo kerja sama ras Jesus jadi tukang kayu. Adi memang kin bage, pasti enggo tuhu-tuhu tandaina abangna e. Bali bagi si rusur ikataken Nathan H. Knorr maka “banci reh bagesna sitandai sekalak jelma adi kerja sama kita ras ia.” * Selain si e, banci ka idah Jakup maka “Jesus terus reh belinna ras reh bagesna kepentarenna janah reh ngenana ate Dibata ras manusia man bana.” (Luk. 2:52) Emaka, banci saja siakap Jakup me si jadi salah sada murid Jesus si pertama. Tapi, kepeken la bage si terjadi.

3. Sedekah pelayanen Jesus i doni, enggo nge Jakup jadi muridna?

 ³ Sedekah pelayanen Jesus i doni, Jakup labo jadi murid Jesus. (Joh. 7:3-5) Banci saja, Jakup salah sada anggota keluarga Jesus si erpengakap maka Jesus “enggo adon.” (Mrk. 3:21) Selain si e, sanga Jesus ihukum mate i tiang siksan, banci saja Jakup labo lit i je nemani Maria, mamak kalak e.​—Joh. 19:25-27.

4. Kai kari sibahas bas artikel enda?

⁴ Bas pudi wari, erkiniteken Jakup man Jesus janah ia jadi salah sada pertua si penting tanggung jawapna bas runggun Kristen. Bas artikel enda, sibahas kari dua pelajaren si banci sidat arah Jakup: (1) Engkai maka kita arus tetap meteruk ukur? (2) Uga carana gelah banci kita jadi guru si beluh ngajar?

5. Kenca Jesus ipekeke, jumpaina Jakup. Uga nge tanggapen Jakup?

⁵ Uga nge ceritana maka Jakup banci jadi pengikut Jesus si setia? Kenca Jesus ipekeke, ‘cidahkenna dirina man Jakup, jenari man kerina rasul-rasul.’ (1 Kor. 15:7) Perjumpan e me si ngubah kegeluhen Jakup. Mulai paksa si e, jadi murid Jesus ia. Sanga rasul-rasul pulung bas loteng i Jerusalem guna ngaloken kesah si badia, Jakup pe lit i je. (Perb. 1:13, 14) Bas pudi wari, dat Jakup sada hak istimewa jadi anggota badan pinpinen bas abad pertama. (Perb. 15:6, 13-22; Gal. 2:9) Selain si e, sope tahun 62 M, itegu-tegu kesah si badia ia nulisken sada surat man kalak Kristen si erpengarapen ku surga. Suratna e erguna man banta gundari, la soal arapenta nggeluh i surga ntah i doni. (Jak. 1:1) Sekalak ahli sejarah si gelarna Yosefus ngataken maka Jakup ihukum mate perban perentah sekalak imam si mbelin Jahudi eme Ananias si Terngudan. Jakup tetap setia man Jahwe seh ngasa lanai ia nggeluh i doni enda.

6. Kai bedana Jakup ras enterem peminpin agama paksa si e?

⁶ Jakup meteruk ukur. Kai buktina? Cuba perdiateken kai bedana Jakup ras enterem peminpin agama paksa si e. Sanga idah Jakup bukti si jelas maka Jesus e anak Dibata, nggit ia ngalokenca alu meteruk ukur. Tapi imam-imam kepala bas Jerusalem la bage. Contohna, sanga idah kalak e bukti si jelas maka  Lasarus enggo ipekeke Jesus, lalap kalak e la nggit ngakuisa maka Jesus e iutus Dibata. Ersada ka arih kalak e guna munuh Jesus ras Lasarus. (Joh. 11:53; 12:9-11) Bas pudi wari, sanga Jesus ipekeke, usahaken kalak e gelah la iteh jelma si enterem kerna si e. (Mat. 28:11-15) Perban sombong kalak e, la kalak e nggit ngaloken Mesias si ijanjiken.

7. Kai akibatna adi sombong kita?

⁷ Pelajarenna: Ula min kita sombong, janah arus kita nggit lalap iajari Jahwe. Lit sada penakit si banci erban pembuluh dareh bas jantungta mekeng. Akibatna, jantungta lanai banci erdahin alu mehuli. Bage ka pe sipat si sombong, e banci erban pusuhta mekeng. Akibatna, lanai kita nggit megiken pengajaren arah Jahwe. E me si terjadi man kalak Parisi. Pusuh kalak e enggo seh kel mekengna. Emaka, amin pe enggo idah kalak e bukti-bukti si jelas, la kalak e nggit ngakuisa maka Jesus e anak Dibata ras si ndatken kuasa arah Dibata. (Joh. 12:37-40) Perban kalak e sombong, ngeri kel akibatna. La banci dat kalak e kegeluhen si rasa lalap. (Mat. 23:13, 33) Emaka arus lalap kita meteruk ukur. Alu bage, Kata Dibata ras kesah si badia banci lalap mbentuk sipat-sipatta ras mpengaruhi carata rukur bage pe keputusenta! (Jak. 3:17) Perban Jakup meteruk rukur, nggit ia iajari Jahwe. Bagi si nandangi sibahas, e me si erban ia banci jadi guru si beluh ngajar.

8. Kai si banci nampati kita gelah beluh ngajar?

⁸ Jakup la meganjang sekolahna. Emaka pasti ianggap peminpin-peminpin agama paksa si e Jakup e “rakyat biasa si la erpendidiken,” bali bagi Rasul Petrus ras Johanes. (Perb. 4:13) Tapi, adi sibaca buku si itulis Jakup bas Pustaka, banci siidah maka ia kalak si beluh ngajar. Bali bagi Jakup, banci saja kita pe labo meganjang sekolahta. Amin pe bage, alu penampat kesah si badia Jahwe ras pelatihen arah organisasiNa, kita pe banci jadi guru si beluh ngajar. Gundari, mari  sibahas usihen arah Jakup ras uga carata ngusihsa.

9. Uga cara Jakup ngajar?

⁹ La ipake Jakup kata-kata ras penjelasen si mesera ngangkaisa. Hasilna, kalak si mbaca suratna, tehna kai si perlu ilakokenna ras uga carana. Contohna, cuba perdiateken uga cara Jakup ngajarken maka kalak Kristen arus tetap sabar amin pe ngadapi perbahanen si la mehuli. Bagenda itulisna, “Kalak si megenggeng bas kesusahen sikataken ermeriah ukur. Enggo begi kena kerna Jop si megenggeng bas kesusahen janah idah kena pasu-pasu si bereken Jahwe man bana, alu bage teh kena maka lembut kel kekelengen Jahwe ras mbelin perkuah ateNa.” (Jak. 5:11, ctt.) Ipake Jakup contoh Jop si lit bas Pustaka guna nampati kalak si mbaca suratna gelah iangkana maka lalap nge ipasu-pasu Jahwe kalak si megenggeng. Emaka sanga ngajar Jakup, lalap pakena Kata Dibata janah penjelasenna nukah iangkai ras masuk akal. Alu bage, iban Jakup kalak si mbaca suratna ngukuri kerna Jahwe, labo kerna dirina.

10. Uga carata ngusih cara Jakup ngajar?

¹⁰ Pelajarenna: Kita arus ngajar alu cara si nukah iangkai janah sipake Kata Dibata. Sanga kita ngajar, tujunta labo gelah teh kalak uga buena pemetehta, tapi gelah teh kalak maka Jahwe seh kel pentarna ras ermediate kel Ia man kalak e. (Rom. 11:33) Guna ngelakoken si e, arus lalap sipake Pustaka. Contohna, sanga sisampati si erlajar Pustaka ndalanken kai si pelajarina, ula sikataken, ‘Bicara aku arah kam e, enggo kuban bagenda ntah enggo kuban bagah.’ Tapi, sisampatilah kalak e gelah ukurina contoh-contoh si lit bas Pustaka ras gelah angkaina uga perasan Jahwe ras perukurenNa. Alu bage, nggit kalak e ndalanken kai si ipelajarina, perban ibanna atena meriah ukur Jahwe, labo ukurta.

11. Kai si iteh Jakup kerna turang seninana, janah nasehat kai si berekenna? (Jakup 5:13-15)

¹¹ Jakup kalakna masuk akal. Arah suratna, banci siidah maka iteh Jakup nge kelemahen turang seninana, janah berekenna nasehat si jelas guna nampati kalak e. Contohna, lit piga-piga kalak Kristen si la mis dalankenna nasehat si enggo begina. (Jak. 1:22) Lit ka si mbeda-mbedaken kalak janah hamaten ia man kalak bayak. (Jak. 2:1-3) Si debanna, la terkuasaina dilahna. (Jak. 3:8-10) Kelemahen-kelemahen e serius kerina, tapi tek Jakup banci nge kalak e robah. Nasehat si berekenna man kalak e terus terang, tapi alu cara si perkuah. Selain si e, iahkenna kalak e gelah mindo penampat arah pertua adi mesera kapna robah.​—Baca Jakup 5:13-15.

12. Engkai maka banci kita tek maka kalak si erlajar Pustaka ras kita banci robah?

¹² Pelajarenna: Arus kita masuk akal ras tetap kita tek maka kalak si erlajar Pustaka ras kita banci robah. Banci saja kalak si erlajar Pustaka ras kita mesera kapna ndalanken prinsip Pustaka. (Jak. 4:1-4) Banci saja perlu waktu gelah banci pengadi kalak e kebiasanna si la mehuli ras gelah banci ipebelinna sipat-sipat si mehuli selaku kalak Kristen. Tapi bali bagi Jakup, arus kita pang ngataken kai si perlu ilakoken kalak si erlajar Pustaka ras kita. Selain si e, arus kita tek maka kalak si erlajar Pustaka ras kita banci robah. Siingetlah maka itarik Jahwe kalak si meteruk ukur man baNa ras isampatiNa kalak e robah.​—Jak. 4:10.

13. Kai si akui Jakup bas Jakup 3:2?

 ¹³ Labo akap Jakup pentingen ia asangken kalak si deban. Amin pe ia adek Jesus ras lit tanggung jawapna si penting, labo kapna ganjangen ia asangken turang seninana. Ilebuhna kalak e “turang senina si kukelengi.” (Jak. 1:16, 19; 2:5) Labo ka iban Jakup tempa-tempa ia sempurna. Tapi bagenda nina, “Kerina kita rusur erban salah.”​—Baca Jakup 3:2.

14. Engkai maka arus siakui maka kita pe mon-mon mesera siakap ndalanken prinsip Pustaka?

¹⁴ Pelajarenna: Arus siinget maka kita kerina la sempurna. Ula siakap kita ganjangen asangken kalak si erlajar Pustaka ras kita. Engkai? Perban adi siban tempa-tempa la pernah kita erban salah, kalak si erlajar Pustaka ras kita banci kari akapna la ia ngasup jadi sekalak Saksi Jahwe. Emaka, arus siakui kita pe mon-mon mesera siakap ndalanken prinsip Pustaka ras erban perubahen. Kenca si e, banci ka siceritaken uga cara Jahwe nampati kita. Alu bage, kalak si erlajar Pustaka ras kita banci tehna maka ia pe banci nge ngelayani Jahwe.

15. Perumpaman si uga nge si ipake Jakup? (Jakup 3:2-6, 10-12)

¹⁵ Ipake Jakup perumpaman si banci kena ku pusuh. Banci banna bage perban penampat kesah si badia. Selain si e, banci saja melala pelajaren si datna arah perumpaman si ipake abangna eme Jesus. Bas suratna, ipake Jakup perumpaman si nukah iangkai janah kalak si mbacasa banci jelas angkaina pelajarenna.​—Baca Jakup 3:2-6, 10-12.

16. Kai gunana adi sipake perumpaman si cocok?

¹⁶ Pelajarenna: Arus sipake perumpaman si cocok. Adi sipake perumpaman si cocok, kalak si megiken kita banci bayangkenna kai si sangana siajarken. Si e pe banci nampati kalak e nginget ajaren Pustaka si penting. Jesus seh kel beluhna nggunaken perumpaman janah iusih Jakup ia. Mari sibahas salah sada perumpaman si ipake Jakup ras engkai maka perumpaman e seh kel jilena.

17. Engkai maka perumpaman bas Jakup 1:22-25 seh kel jilena?

¹⁷ Baca Jakup 1:22-25. Engkai maka perumpaman Jakup kerna cermin seh kel  jilena? Lit piga-piga alasenna. Si pertama, perumpaman e cocok ras pelajaren si atena ipesehna eme adi erguna ateta Kata Dibata man banta, labo bias terjeng sibaca, tapi arus sidalanken. Selain si e, perumpaman si ipake Jakup kerna kalak si ercermin, nukah ibayangken kalak si mbacasa. Kai kin maksud perumpamanna e? Adi lit kalak si ercermin janah idahna lit si perlu ipekena, tapi la lakokenna kai pe, motu kap kalak si bage. Emaka, sanga sibaca Pustaka janah adi lit siidah sipatta si perlu iubah, mislah siubah.

18. Kai telu pelajaren si banci sidat arah cara Jakup nggunaken perumpaman?

¹⁸ Lit telu pelajaren si banci sidat arah cara Jakup nggunaken perumpaman: (1) Perumpamanta arus cocok ras pelajaren si ateta sipeseh. (2) Perumpamanta arus nukah ibayangken kalak si megiken kita. (3) Pelajaren arah perumpamanta arus jelas. Adi mesera siakap ndatken perumpaman si cocok, banci sibuka bas Indeks Publikasi Menara Pengawal bas judul “Perumpamaan.” I je, lit mbue perumpaman si banci sipake. Tapi ingetlah, perumpaman arusna ipake guna njelasken pelajaren si penting saja. Engkai? Perban bali bagi mikrofon banci erban sorata reh gangna, perumpaman banci erban reh jelasna pelajaren si ateta sipeseh. Emaka adi mbuesa perumpamanta, kalak si megiken kita banci bingung perban mbuesa pelajaren si iperjelas. Enggo sipelajari maka perlu kita reh beluhna i bas ngajar. Tapi silakoken si e, labo gelah iakap kalak kita pentar. Sebalikna, sisampati ateta enterem kalak gelah banci jadi bagin arah keluarga Jahwe si ermeriah ukur.

19. Uga carata mbuktikenca maka keleng ateta turang seninata?

¹⁹ Memang la lit abangta si sempurna bagi Jesus. Tapi, banci silayani Jahwe radu ras enterem turang seninata si bali bagi keluargata. Sibuktiken maka keleng ateta kalak e alu ergaul ras kalak e, siusih perbahanenna si mehuli, janah setia kita ras kalak e bas erberita ras ngajar. Adi siusahaken ngusih sipat Jakup, perbahanenna, ras carana ngajar, simuliaken me Jahwe Bapakta si perkeleng ras sisampati kalak si meteruk ukur rembak ras Ia.