1. Tiangu kasemukine mu usoko wa mutapu uka?

TIANGU, mwanakwo ya Yesu, kasemukine mu usoko uze te akulemesa chinji yuma ya ku ufulielo. * Yisemi jenyi, Yosefwe ni Maria, te kakuzanga chinji Yehova nawa kapwile ni kusa tachi jinji hanga amulingile. Tiangu kapwile nawa ni chiwape chikwo—yayo te mapwa Mesaya yoze alakenyene. Tiangu kapwile ni chiwape chinene cha kusemukina mu usoko uno!

2. Yuma yika Tiangu atambile kukomoka kuli Yesu?

² Tiangu kamwene yuma yinji kuli yayo yize te muyimukomwesa. (Mateu 13:55) Chakutalilaho, muze Yesu apwile ni miaka 12, iye te kanyingika kanawa Yisoneko, chino yichikomwesa amwe alongeshi mu Yerusaleme. (Luka 2:46, 47) Tiangu kota kakalakalile hamwe ni Yesu mu mulimo wa kusonga mapaya. Nyi chenacho, iye te kanyingika kanawa Yesu. Ndumbu Nathan H. Knorr kapwile ni kwamba ngwenyi: “Mutu kalakala nenyi mba umunyingike kanawa.” * Tiangu kota kamwene pundu chize ‘Yesu wasenyene kulutwe ni mana ni chizundamo, nikuwana vumbi kumeso ja Zambi ni atu.’ (Luka 2:52) Hamukunda wa chino, mutuhasa kunyonga ngwetu kota Tiangu kapwile umwe wa kuli tumbaji atangu a Yesu, alioze kuyakalingiwile chocho.

3. Yika Tiangu anyongene hakutwala kuli Yesu muze aputukile kwambujola?

³ Muze Yesu apwile hano hashi ni kwambujola, Tiangu kakapwile kambaji kenyi. (Yoa. 7:3-5) Kwamba pundu, Tiangu  kota kali umwe wa kuli asoko ja Yesu waze anyongene ngwo “kanazaluka.” (Marku 3:21) Nawa chinasoloka ngwe muze ahachile Yesu ha mutondo wa lamba, Tiangu kakapwile hamuwika ni naye, Maria.—Yoa. 19:25-27.

4. Yika mutulilongesa ha mutwe uno?

⁴ Ha kupalika cha mashimbu, Tiangu yafuliela muli Yesu nawa yapwa mukulwana wa mu chikungulwila yoze wapwile ni yiteli yinji. Ha mutwe uno, mutumonaho yikuma yaali yize mutuhasa kulilongesa hali Tiangu: (1) chize twatamba kununga ni kupwa akwa-kulikehesa, nawa (2) chize mutuhasa kwashiwisa mutapu uze twakulongeselamo akwetu.

5. Yika Tiangu alingile muze Yesu asolokele kuli iye?

⁵ Ha mashimbu aka Tiangu apwile kambaji ka Yesu washishika? Muze Yesu amuhindwishile, iye yasoloka “kuli Tiangu; mba kulutwe nawa kuli apostolo eswe.” (1 Kori. 15:7) Hanyima lia chino, Tiangu yapwa umwe wa kuli tumbaji twa Yesu. Iye kapwile hamuwika ni apostolo ku Yerusaleme muze atambwile spiritu yisandu. (Yili. 1:13, 14) Ha kupalika cha mashimbu, Tiangu yawahilila ha kupwa umwe wa kuli mandumbu a mu Chizavu cha Tusongo. (Yili. 15:6, 13-22; Ngala. 2:9) Muze miaka 62 M.J., te kanda yikundama, Zambi yatuma Tiangu kusonekena akwa-Kristu akuwayisa umwe mukanda. Ni yetu musono, mutuhasa kulilongesa yuma yinji ha mukanda wacho, chipwe ngwe tuli ni kutalatala cha kupwa ni mwono wa mutolo mu malilu hanji hano hashi. (Tia. 1:1) Josefo, umwe Judeu yoze wakuhengwola sango ja shakulu, kasonekene ngwenyi, Sasendote wa Lutwe Ananiya wa kanuke mwe watumine kushiha Tiangu. Tiangu kanungine ni kushishika kuli Yehova ndo ku kufwa chenyi.

6. Kalisa muka wapwile hali Tiangu ni mangana a mayingeleja a ha mashimbu jacho?

⁶Tiangu kapwile mukwa-kulikehesa. Mumu liaka mutuhasa kwamba chocho? Tutalenu kalisa wapwile hali Tiangu ni hali mangana a mayingeleja a ha mashimbu jacho. Muze Tiangu amwene yilayi yize yasolwele ngwo Yesu kali Mwana wa Zambi, ni kulikehesa cheswe yatayiza. Alioze, Asasendote a Lutwe mu Yerusaleme kakachilingile. Chakutalilaho, ayo te katambile kulituna ngwo Yesu kahindwishile Lazaru. Alioze shimbu atayize ngwo Yesu kamutumine kuli Yehova, ayo yafupa kushiha Yesu hamwe ni Lazaru. (Yoa.  11:53; 12:9-11) Ha kupalika cha amwe mashimbu, muze ahindwishile Yesu, ayo yafupa hanga atu achine kuchinyingika. (Mateu 28:11-15) Mangana wano kapwile ni kulizata chinji, kashika alitunyine Mesaya.

7. Mumu liaka kutwatambile kulizata?

⁷Yize twalilongesa: Kanda ulizata nawa echa Yehova hanga akulongese. Ngwe chizechene musongo muhasa kupihisa mbunge ya mutu, kulizata necho muchihasa kutwala mutu ahone kukaula usongwelo wa Yehova. Tutalenu yize yalingiwile kuli A-Fwariseu. Ayo kalizachile chinji chocho yalituna yilayi yize yasolwele pundu ngwo, Yesu kali Mwana wa Zambi. (Yoa. 12:37-40) Hamukunda wa chino, A-Fwariseu yatokesa uhashi wo wa kupwa ni mwono wa mutolo. (Mateu 23:13, 33) Kashika, chili chilemu kwecha Mbimbiliya ni spiritu yisandu yalumune utu wetu, mutapu uze twakunyonga ni kutukwasa hanga tukwate yiyulo yipema! (Tia. 3:17) Kulikehesa cha Tiangu chamukwashile hanga atayize fumbo lia Yehova. Nawa ngwe chize mutumona, kulikehesa chenyi che chamukwashile kupwa longeshi mupema.

8. Yika muyihasa kutukwasa kupwa alongeshi apema?

⁸ Tiangu kakalilongesele chinji ku shikola. Mangana a uwayilo wa A-Yunda ha mashimbu jacho, kapwile ni kumumona ngwe chize te akumona apostolo Petulu ni Yoano, ngwe atu waze “kajaminyine ha kulilongesa, kalongolokele ha masona.” (Yili. 4:13) Chipwe chocho, Tiangu kapwile longeshi mupema. Chino twakuchimona muze twakutanga mukanda uze asonekene. Chizechene ngwe Tiangu, hanji ni yetu kutwakalilongesele chinji ku shikola. Alioze, ni ukwaso wa spiritu yisandu ya Yehova, ni fumbo lize akutwaha mu ululikiso wenyi, mutuhasa kupwa alongeshi apema. Tutalenu yize yakwashile Tiangu kupwa longeshi mupema ni chize mutuhasa kumwimbulula.

9. Kuchi Tiangu te akulongesa?

⁹Tiangu te keshi kuzachisa maliji akalu hanji kukalisa malongeso. Ha mukunda wa chino, atu waze te akulongesa kapwile ni kunyingika yize anafupiwa kulinga ni chize mayilinga. Chakutalilaho, Tiangu kalongesele  mutapu washi uze unasolola ngwo, akwa-Kristu mahasa kwalinga yuma yipi, alioze kechi kutulika toto. Yasoneka ngwenyi: “Twakuavuluka ngwetu, akwa kuwaha, waze anyongonwene. Hinunevu ha kunyongonona cha Yombi. Hinunamono songo lia mwe Mwene, iye wa too ni vumbi ni keke.” (Tia. 5:11) Twamona ngwetu, Tiangu muze apwile ni kulongesa te kakuzachisa Yisoneko. Iye kazachishile Liji lia Zambi hanga akwase atu anyingike ngwo, Yehova nihindu kakuwahisa waze akushishika kuli iye chizechene ngwe Yombi. Tiangu kapwile ni kuzachisa maliji ashi, ni kulumbununa yuma mu jila yashi. Hachino, shimbu atu alihulikile hali iye, ayo te kakulihulikila hali Yehova.

10. Kuchi mutuhasa kwimbulula Tiangu muze tunalongesa akwetu?

¹⁰Yize twalilongesa: Longesa mu jila yashi nawa zachisa Mbimbiliya. Muze tunalongesa akwetu, nyonga lietu kuliatambile kupwa lia kusolola ngwetu tunanyingika yuma yinji, alioze twatamba kusolola ngwetu Yehova mwe unanyingika yuma yinji nawa kakutufunga. (Roma 11:33) Mutuhasa kuchilinga ha kuzachisa Mbimbiliya muze tunalongesa. Chakutalilaho, shimbu tulweze alongi jetu yize te mutulinga nyi tuli mu chihela cho, muchilita kwakwasa anyonge ha yilweza ya mu Mbimbiliya hanga ene amone chize Yehova akunyonga ni chize akwivwa ha chikuma chacho. Nyi twachilinga, mutwakwasa hanga amone ngwo chuma chilemu chili kuvwisa Yehova kuwaha hi yetu ko.

11. Ulelu uka akwa-Kristu amwe apwile nawo, nawa yika Tiangu aakolwezele kulinga? (Tiangu 5:13-15)

¹¹Tiangu kapwile ni nyonga lialita. Mukanda uze asonekene wakusolola pundu ngwo, iye te kanyingika kanawa ulelu wa mandumbu jenyi. Kashika aehele usongwelo uze te anafupiwa kukaula. Chakutalilaho, akwa-Kristu amwe, kakapwile ni kukaula yiyulo yimwe ni kawashi. (Tia. 1:22) Akwo te kakulemesa wika pichi. (Tia. 2:1-3) Eka te kakuhanjika kalusulusu. (Tia. 3:8-10) Yono kapwile kapinda munene, chipwe chocho Tiangu kanyingikine ngwenyi, ayo te mahasa kwalumuna yitanga yo. Iye katowezele mandumbu wano ni zango, alioze kakechele kwakwasa ha yize te anafupiwa kwalumuna ku mwono wo. Chikwo nawa, yakolweza mandumbu jacho hanga afupe ukwaso wa makulwana a mu chikungulwila mba ahase kwalumuna yitanga yo.—Tanga Tiangu 5:13-15.

12. Kuchi mutuhasa kupwa ni nyonga lialita muze tunakwase alongi jetu?

¹²Yize twalilongesa: Pwako ni nyonga lialita nawa kanda utokesa kutalatala. Muchihasa kupwa chikalu kuli atu anji waze twakulilongesa no Mbimbiliya kukaula yiyulo yamo. (Tia. 4:1-4) Ayo mahasa kumbata mashimbu mba eche yitanga yipi, ni kupwa ni yitanga ya akwa-Kristu. Chizechene ngwe Tiangu, ni yetu twatamba kupwa ni hamu lia kulweza alongi jetu a Mbimbiliya yize atamba kwalumuna ku mwono wo. Twatamba kupwa nawa ni nyonga lialita ha kufuliela ngwetu, Yehova makoka atu akulikehesa kuli iye, ni kwaha tachi jize anafupiwa hanga alumune yitanga yo.—Tia. 4:10.

13. Kulita ni mukanda wa Tiangu 3:2, yika Tiangu ambile?

¹³Tiangu te keshi kulimona ngwo kali mulemu kuhiana akwo. Iye kakanyongene ngwenyi, kali mulemu chinji kuhiana akwo mumu lia kupwa mwanakwo ya Yesu hanji mumu lia kupwa ni yiteli yinji. Kavulukile akwa-Kristu-ni-akwo ngwenyi, “mandumbu jami a zango.” (Tia. 1:16, 19; 2:5) Iye kakasolwele kuli akwo ngwo kali mungunu. Shimbu achilinge, muze te anakwase mandumbu jenyi, neye yalinjisamo ha kwamba ngwenyi: “Yetu  eswe twakutalinga mu yuma yinji.”—Tanga Tiangu 3:2.

14. Mumu liaka chili chilemu kulweza alongi jetu ngwetu ni yetu twakuhengesa?

¹⁴Yize twalilongesa: Iwuluka ngwe tulieswe tuli yihenge. Kutwatambile kulimona ngwetu tuli alemu chinji kuhiana alongi jetu. Mumu liaka? Mumu nyi twasolola kuli alongi jetu ngwetu kutushi kuhengesa, ayo mahasa kumona ngwe kechi kuhasa kulinga yize Zambi anatwite. Alioze nyi mutulweza alongi jetu ngwetu, hi chashi ko kuli yetu kukaula shimbi ja Zambi mashimbu eswe ni kwalumbunwina chize Yehova akutukwasa hanga tukumbe yipikalo, mutwakwasa hanga amone ngwo no mahasa kulingila Yehova.

15. Yilweza yika Tiangu te akuzachisa? (Tiangu 3:2-6, 10-12)

¹⁵Tiangu kapwile ni kuzachisa yilweza yize te yakukwata atu ku mbunge. Kwamba pundu, iye kapwile ni ukwaso wa spiritu yisandu; alioze, chinasoloka nawa ngwe kalilongesele yuma yinji ha yilweza yize Yesu apwile ni kuzachisa. Ha mukanda uze asonekene, Tiangu kazachishile yilweza yashi nawa yipema.—Tanga Tiangu 3:2-6, 10-12.

16. Yika yakulingiwa muze twakuzachisa yilweza yalita?

¹⁶Yize twalilongesa: Zachisa yilweza yize muyikwata atu ku mbunge. Nyi mutuzachisa yilweza yalita, muyikwasa atu amone yize tunambe kwalongesa. Kulinga chino, muchikwasa waze anakupanjika hanga iwuluke yikuma yilemu yize unaalongesa. Yesu kazachishile kanawa yilweza, chocho Tiangu yamwimbulula. Haliapwila tutalenu chilweza chimwe chize Tiangu azachishile ni kumona mumu liaka chapwile chipema.

17. Mumu liaka chilweza chili ha Tiangu 1:22-25 chinalite?

¹⁷ Tanga Tiangu 1:22-25. Chilweza chino cha katalilo chize Tiangu azachishile, chakukwata ha yuma yinji. Chitangu, Tiangu kanyingikine yize te anazange kulongesa. Ha chilweza chino, iye kazangile kulongesa ngwenyi, mba Liji lia Zambi lilinge mulimo walio mu mwono wetu, kutwatambile wika kulitanga, alioze twatamba kukaula yize tunatange. Tiangu kazachishile chilweza cha katalilo, chuma chize atu eswe te ananyingika. Yika alongesele? Nyi mutu malitala ha katalilo mamona ngwenyi katamba kululieka yimwe, alioze mecha kuchilinga, muchisolola  ngwo kahepuka. Chizechene nawa, nyi mututanga Mbimbiliya ni kumona ngwetu kuli yimwe yize twatamba kwalumuna ku mwono wetu, alioze mutwecha kuchilinga, chili uhepuke.

18. Yikuma yika yitatu twatamba kukaula mba tuzachise yilweza yalita?

¹⁸ Kuchi mutuhasa kwimbulula Tiangu ha kuzachisa yilweza yalita? Mutuhasa kuchilinga mu majila atatu: (1) Tusakulenu chilweza chashi chize muchikwasa mbunga hanga anyingike yize tunaalongesa. (2) Tuzachisenu yilweza ya yuma yize atu ananyingika kanawa. (3) Tusololenu kanawa longeso lize lili mu chilweza chacho. Mba nyi muchipwa chikalu kunyonga ha yilweza yize yalita? Mutuhasa kuwana yilweza mu mikanda yetu. (Índice das Publicações da Torre de Vigia.) Nyi twaya ha chikuma yilweza (Ilustrações), mutuwanaho yilweza yinji yize mutuhasa kuzachisa. Alioze twiwulukenu ngwetu, yilweza yapwa ngwe microfone, muze mutu akuhanjika ku microfone liji lienyi lie akwivwa chinji. Yilweza neyo yakulumbununa kanawa yize tunazange kulongesa. Kashika, twatamba kuzachisa wika yilweza ha yikuma yilemu. Tunazange kupwa alongeshi apema chakuhona kutwala atu hanga atulemese. Nawa tunazange kukwasa atu anji hanga apwe mu usoko wa Yehova.

19. Kuchi mutuhasa kusolola ngwetu, twakulemesa asoko jetu a ku ufulielo?

¹⁹ Kukushi niumwe wa kuli yetu yoze uli ni chiwape ngwe chize apwile nacho Tiangu, cha kukolela hamuwika ni yayo mungunu. Chipwe chocho, tuli ni chiwape cha kulingila Yehova hamuwika ni asoko jetu a ku ufulielo, mandumbu ni mapangi jetu akwa-Kristu. Twakusolola ngwetu twakulemesa mandumbu jetu muze twakupwa no hamuwika ni kulilongesa kuli ayo, ni muze twakwambujola no hamuwika. Nyi twasa tachi hanga twimbulule kanawa chilweza cha Tiangu, mutuhalisa Yehova nawa mutukwasa atu waze alikehesa hanga anyingike umwenemwene.