1. ¿Sãwũãbasi Santiago mebẽrãra?

 SANTIAGO mebẽrãra kʼẽrẽpapanasi Jeowa ode. * Yi yibarira José akʉza Maríabara wãrĩnu kãgapanasi Jeowata, adewara iya nebiata aba erbasi: Jesura yi mebẽãra, Daizeze warrabasi. Iyira maʉ̃ kʼarea sobiabasibaibara.

2. ¿Kʼãrẽa bia akʉseabasi Santiagoba yi mebẽãra?

² Santiagobara Jesura biʼia akʉseabasi nebiata bio erbasi baera (Mat. 13:55). Bari jaraita, Jesubara biʼia ũdukʼawuabasi Daizeze Bedʼeadebemara wiña yiruiduba (Luc. 2:46, 47). Adewara, Santiagora Jesuʼʉ̃mera ãba trajapanasi baibara, maʉ̃ kʼarea biʼia ũdukʼawuabasi baibara yi mebẽã nããbemara. Nathan Knorrba jarasi: «Ẽbẽra abaʉ̃me ãba trajabʉbʉrʉ maʉ̃neba audre kʼawuaseabʉ». * Maʉ̃ kĩrãkʼa berabariseabasi Santiagoʉ̃me. Santiagoba ũdubasi Jesura audre wari wãne krĩcha bia erbasita akʉza Jeowaba adewara mebẽrãraba audre kãgabasita (Luc. 2:52). Mamina dayirãba krĩchaseabasi, Santiagora Jesu kʼaidubemabasita mesera, mamina mawũã berabari ẽ basi.

3. ¿Kʼãrẽta osi Santiagobara Jesuba nama egorode jaradiabasidera?

³ Jesuba naʉ̃ drʉade jaradiabasidera Santiagora iyi kʼaidubema ba ẽ basi (Juan 7:3-5). Adewara iyi  mebẽrãnebemara iyi basi jarabadara Jesura: «Kĩrãnemabʉta» (Mar. 3:21). Akʉza Jesu beisidera Santiagobara waidide ĩjã ẽ basi iyi ʉ̃rʉ, naʉ̃ne kʼawuaseapanʉ iyira yi papa kʼawa ba ẽ basita (Juan 19:25-27).

4. ¿Kʼãrẽta kʼawuadai naʉ̃ artikulodera?

⁴ Tẽãne Santiagobara Jesuta ĩjãsi akʉza zõrãrã kongregasionebema basi. Naʉ̃ artikulode Santiago yizadeba kʼawuadayi bedʼea ũme. Nããra, ¿kʼãrẽa edabʉta krĩchaibarata? Akʉza ¿Sãwũã biʼia jaradiaita?

5. ¿Kʼãrẽta osi Santiagobara Jesu jẽda piradrʉda tẽã iyaʼa yi ũdubiside?

⁵ ¿Sõbede Santiagora Jesu kʼaidubema ba jʉ̃drʉsi? Jesu jẽda piradrʉda tẽã, «Santiagoʼa iya yi ũdubisi, maʉ̃ tẽã iyi kʼaidubemara yi ũdubisi» (1 Cor. 15:7). Adewara Santiagora Jesu kʼaidubemarabawarabasi Jesuba jaure zarea diaside (Hech. 1:13, 14). Maʉ̃ tẽã iyira Zõrãrã Burubia siglo nããbemanebemabasi (Hech. 15:6, 13-22; Gál. 2:9). Akʉza, poaga 62 naena, Santiagoba bʉsi karta aba ungidoraita. Naʉ̃ kartara idibasidu biga bʉ ʉ̃ta wãiraita akʉza uda panʉraita (Sant. 1:1). Josefo nebʉrabari siglo nããradebema mejãcha kʼawuabʉba jarasi, Anánba beabisita Santiagora, mamina Santiagoba ũdubisi Jeowa are kʼẽrẽpabʉta iyi beiyeda.

6. ¿Kʼãrẽne awuarabasi Santiagora akʉza Daizeze ʉ̃rʉ ĩjãbʉa apanʉrabawarara?

⁶ Santiagoba eda bʉta ũdubisi. Santiagoba akʉza Daizeze ʉ̃rʉ ĩjãbʉ apanʉrabara ũdusida nekʼãrẽ nebia Jesuba odata ãyara ĩjãna ẽ basi. Santiagobara eda krĩchabʉta ũdubisi baera, maʉ̃ tẽã iya ũdusi Jesura Daizeze warrabasita, maʉ̃ kʼarea ĩjãsi mamina Daizeze ʉ̃rʉ ĩjãbʉ apanʉrabara ũdubisi baera ʉ̃ta krĩchabʉta ĩjãna ẽ basi Jesuta Daizeze warrata. Bari jaraita, Jesuba Lázaro piradrʉbiside ãya ĩjãikaʉde awuarabʉrʉ beakĩrãsida Jesuta akʉza Lázarota (Juan 11:53; 12:9-11). Ãyara kãga ẽ basi Jesu piradrʉda wuabema ẽbẽraba  kʼawuaita (Mat. 28:11-15). Ãyira ʉ̃ta krĩchabʉta erbasi baera ĩjãna ẽ basi dayirã Ẽdrʉbibarita.

7. ¿Kʼãrẽa ʉ̃ta krĩchabʉta erba ẽ baibara?

⁷ Kʼãrẽta kʼawuapanʉ: Ʉ̃ta krĩchabʉta ũdubirãra, awuarabʉrʉ Jeowa yi jaradiabira. Kayaba ãrĩbiseabʉ dayi sota, maʉ̃ba dayi wa bia wãbi ẽ dayi kakuade. Abarikabʉ daya ʉ̃ta krĩchabʉta erbʉbʉrʉ Jeowa bedʼea ũrĩkĩrã ẽ bayi. Pariseaoraba ʉ̃ta krĩchabʉta erbasi baera ãya Jesuba obʉ ũdubasimina akʉza Daizeze jaure zarea erbʉ ũdubasimina ĩjãna ẽ basi (Juan 12:37-40). Ãyira ʉ̃ta krĩchabʉta erbasi baera ẽjũã kĩrãwãreãnẽ ewari jõmaʉ̃nẽ babe ẽ (Mat. 23:13, 33). Dayirãra idi yi edebibara Daizeze Bedʼeaʼa akʉza iyi jaure zareaʼa, maʉ̃ra ũmeba kʼarebayi dayi bia krĩchaita adewara nekʼãre bia oita (Sant. 3:17). Santiagora eda krĩchabʉ erbasi baera iyira Jeowaba yi jaradiabisi. Atia akʉdayi Santiagoba eda krĩchabʉta erbasi baera sãwũã nejaradiabari yibia basita.

8. ¿Kʼãrẽba kʼarebayi nejaradiabari bia bʼaita?

⁸ Santiagora unibersidad wã ẽ basi baera Daizeze ĩjãbʉa apanʉrabara krĩchapanasi iyira nejaradiabari bia ba ẽ baita (Hech. 4:13). Mamina iyira nejaradiabari biabasi. Dayirãra Santiago kĩrãkʼa unibersidad wã ẽ basibʉrʉ, nejaradiabari bia baseabʉ Jeowa kʼarebadeba akʉza iyi organizasioneba. Akʉdadrʉ Santiago sãwũã nejaradiabari biabasita akʉza kʼãrẽta kʼawuapanʉ iyi yizadeba.

9. ¿Sãwũã jaradiasi Santiagobara wuabemaba ũrĩne?

⁹ Santiagobara zokʼa ẽ basi bedʼea zareabʉta. Maʉ̃ kʼarea ẽbẽra jõmaʉ̃ba kʼawuabasi kʼãrẽta oita akʉza sãwũã oita. Atia ũrĩnaña sãwũã Satiagoba jaradiasita, dayirã zʉbʉriabʉrʉdera  Jeowaʉ̃me kĩrʉ ẽ baibarata. Jarasi: «Akʉidua ãyira mejãcha sobiabʉ awuantaseabʉ baera. Marabara ũrĩbada Jobʼba awuantabadata akʉza ũdusida Jeowaba nebia diadata, adewara ũdusida Jeowaba so borekea akʉbʉta akʉza so zʉbʉria akʉbʉta» (Sant. 5:11). Nama Santiagobara zokʼasi Daizeze Bedʼeata ẽbẽrarã ũrĩbita yi kʼẽrẽpabʉra, Job kĩrãkʼa Jeowabara nebia diabʉta. Ẽbẽrarã naʉ̃ biʼia ũrĩbita, Santiagobara bedʼea zareachuta zokʼa ẽ basi akʉza ũdubisi Jeowabara ʉ̃ta kʼawuabʉta iyira.

10. ¿Sãwũã Santiagode kĩrãkʼa oseapanʉ jaradiabʉde?

¹⁰ Kʼãrẽta kʼawuapanʉ: Bedʼea zareata zokʼa ẽ baibara akʉza Daizeze Bedʼeadeba jaradiaibara. Dayirãba jaradiabʉrʉdera ũdubi ẽ baibara daya jõma kʼawuabʉta, awuarabʉrʉ ũdubibara Jeowabʉrʉ nekʼãre jõma kʼawuachuta, adewara ẽbẽrarã krĩchabʉta (Rom. 11:33). Mawũã oita jaradiabʉrʉdera Daizeze Bedʼeatrʉ zokʼaibara. Bari jaraita, dayi nekʼawuabariba ũrãgʼata widira daya krĩchabʉta jaradia ẽ baibara, awuarabʉrʉ jʉrʉibara yiza bia Daizeze Bedʼeadebʉta iyi kʼarebaita iya kʼãrẽ oita, mawũã ãya kʼawuabʉra odayi Jeowata sobiabikĩrãbʉ baera.

11. ¿Ʉ̃kʉrʉ kristianorãra kʼãrẽ bedʼea zromata erbasi akʉza Santiagoba kʼãrẽ ũrãgʼata diasi? (Sant. 5:13-15).

¹¹ Santiagobara kʼawuabasi ẽbẽrarã bedʼea zroma erbʉta. Santiagoba karta bʉdadera ũdubisi iyara kʼawuabasita mebẽrãra bedʼea zroma erbasita. Bari jaraita ʉ̃kʉrʉitara zarebasi ũrãgʼara ũrĩta (Sant. 1:22). Adewara ʉ̃kʉrʉbara bia edabasi yi platabarabʉtrʉ (Sant. 2:1-3). Akʉza ʉ̃kʉrʉra imitia bedʼeabasi wuabema ʉ̃rʉ (Sant. 3:8-10). Maʉ̃ kʼarea Santiagobara ũrãgʼa diasi kʼawuamarẽã ãya kʼãrẽta oibarata. Naʉ̃ra kristianora mawũã obasimina Santiagobara krĩchasi ãyira awuara baseabʉta, maʉ̃ kʼarea ũrãgʼa diasi akʉza kãgade wãrĩnuta jarasi ãya opanʉ ʉ̃rʉ (akʉra Santiago 5:13-15).

12. ¿Sãwũã krĩchaibara dayirã nekʼawuabari ʉ̃rʉra?

¹² Kʼãrẽta kʼawuapanʉ: Nekʼawuabariba nãã nemitia obadamina idʉbʉseabʉ. Edaʉde dayi nekʼawuabaritara, ãya nãã nemitia oda idʉbʉira adewara Jeowaba zokʼabʉ oita zare (Sant. 4:1-4). Mamina maʉ̃ kʼarea dayirãbara krĩchabe ẽ ãyira awuara babe ẽãta. Dayirãbara wãrĩnuta jaraibara ãya obʉra Santiagode kĩrãkʼa, adewara ĩjãibara Jeowabara iyima weita ẽbẽra eda krĩchabʉra akʉza iya nãã obada ibʉbʉita kʼarebaita (Sant. 4:10).

13. ¿Kʼãrẽta krĩcha ẽ basi Santiagobara iyi ʉ̃rʉ? (Sant. 3:2).

¹³ Santiagobara krĩcha ẽ basi iyikʉza audre yibiata. Krĩcha ẽ basi iyira Jesu mebẽã baera akʉza kongregasione trajo erbʉ baera iyira audre yibiata wuabemaraira, awuarabʉrʉ yi mebẽrã bedʼeabʉrʉdera jarabasi:  «Mebẽrã mʉ̃ ne kãgara» (Sant. 1:16, 19; 2:5). Santiagobara krĩcha ẽ basi iya jõma aripe obʉta, maʉ̃ kʼarea iya naʉ̃ bedʼea jaraside: «Jõmaʉ̃ta biode baebʉ», Iyisida edabʉta jarasi (akʉra Santiago 3:2).

14. ¿Kʼãrẽa krĩcha ẽ baibara jõma aripe obʉta?

¹⁴ Kʼãrẽta kʼawuapanʉ: Kĩrãbedaibara jõmaʉ̃ta nemitia omiata. Dayirãbara krĩcha ẽ baibara audre yibiata dayi nekʼawuabarira. ¿Kʼãrẽa? Dayirãbara ũdubipanʉbʉrʉ dayi nemitia okata mawũãra dayi nekʼawuabaribara krĩchayi Daizezeba zokʼabʉra obe ẽãta, mamina dayirãbara jara ũrĩbira dayirãitabida edaude zareabʉta Jeowaba zokʼabʉ oita akʉza sãwũã Jeowaba kʼarebabʉrʉta, naʉ̃ba kʼarebayi dayi nekʼawuabariba krĩchaita iyabida oseabʉta Jeowaba zokʼabʉra.

15. ¿Sãwũãbasi Santiagoba yiza zokʼadara? (Santiago 3:2-6, 10-12).

¹⁵ Santiagoba yiza zokʼadara ẽbẽra soidu jʉ̃ẽsi. Santiagobara yiza biata zokʼabasi Daizeze jaure zareaba kʼarebasi baera, adewara kʼawuasi yi mebẽã Jesuba jaradiabadata. Santiagoba yiza iyi kartade bʉdara zare ẽ ũrĩta akʉza oũdubita (akʉra Santiago 3:2-6, 10-12).

16. ¿Kʼãrẽa yiza biadeba jaradiadaibara?

¹⁶ Kʼãrẽta kʼawuapanʉ: Yiza biadeba jaradiadadrʉ. Yiza bia zokʼabʉrʉdera kʼarebapanʉ nekʼawuabariba, mawũã bari ũrĩ ẽ marẽã awuarabʉrʉ biʼia ũrĩmarẽã dayirãba jaradiakĩrãpanʉta. Yiza biabara kʼarebabʉ Daizeze Bedʼeade eda jarabʉta ãyi burude bemarẽã akʉza tẽãne maʉ̃ta jẽda kĩrãbeita. Jesubara jaradia kʼawuabasi yiza biadeba akʉza yi mebẽã Santiagobida iyide kĩrãkʼa osi. Atia akʉdayi yiza Santiagoba zokʼadata akʉza kʼãrẽa yibiata maʉ̃ra.

17. ¿Kʼãrẽa yiza bia Santiago 1:22-25 bayeda jarabʉra?

¹⁷ (Akʉra Santiago 1:22-25). Espejo yizara yibia. Daizeze Bedʼeaba  kʼarebamarẽãbʉbʉrʉ bari lenʉmabe ẽ, awuarabʉrʉ odaibara iya jarabʉta. Santiagobara jidasi ẽbẽra jõmaʉ̃ba ũdukʼawuabʉta: Ẽbẽra abaʉba espedejode akʉbʉta, ¿naʉ̃ba kʼãrẽta jaradiakĩrãbasi? Ẽbẽra abaʉba espejode akʉ kʼãrãpe ũdura iya ara oibarata, ¿kʼãrẽta oibara? Ara oibara maʉ̃ra. Abarikabʉ, dayirãba ũdudara Daizeze Bedʼeade daya nekʼãrẽ ara oibarata, maʉ̃ra mesera ara oibara.

18. ¿Kʼãrẽta odaibara yiza bia zokʼaira?

¹⁸ Santiagode kĩrãkʼa yiza bia zokʼadaita akʉdadrʉ nekʼãrẽ ũbea: 1) Jʉrʉdaibara yiza dayirãbara jaradianʉmʉ ʉ̃rʉ. 2) Zokʼadadrʉ yiza jõmaʉba ũrĩseabʉta. 3) Biʼia jara ũrĩbira kʼãrẽta jaradiakĩrãbasita. Dayirãita zarebʉrʉ yiza bia zokʼaita jʉrʉdadrʉ Índice de las publicaciones Watch Tower. Bedʼea «Ejemplos» abʉmae nama ũdudayi yiza mejãcha dayirãba zokʼaseabʉta, mamina kĩrãbedadrʉ yiza biara zokʼaibarata dayi nekʼawuabari burude audre yibiata bemarẽã. Mawũã opanʉbʉrʉ biʼia jaradiadayi adewara kʼarebadayi ẽbẽra mejãchaʉta Daizeze ode bamarẽã.

19. ¿Sãwũã kãgata ũdubipanʉ mebẽrã kongregasionebemara?

¹⁹ Santiagobara erbasi yi mebẽã Jesuta iyi kʼarebaita. Nama egorode dayirãba Jesu erpanʉ ẽ mina, erpanʉ mebẽrã kongresionebemata. Mawũẽra dayirãba kãgata ũdubiseapanʉ ãyaʼa ãyibawara jaradia wãbʉrʉde, ãba panʉne akʉza ãyideba kʼawabʉde. Dayirã zarea opanʉbʉrʉ Santiagoba oda kĩrãkʼa dayirãba jaradiabʉrʉde akʉza obʉde, naʉba wawia ũdubibʉ Jeowaʼa, adewara kʼarebabʉ ẽbẽra mejãchaʉta Jeowa orradamarẽã.