1. Aini sowtu osufamii Yakowbesi kiya?

 YAKOWBESI be kiya aini wan osufamii di be e dini Yehofa. En mma anga en dda, Maliya anga Yowsefu be lobi Yehofa anga den hii ati. Boiti dati, neen gaan baala Yesesi be o toon a Mesiyas di Gadu be paamisi a foluku fi en. * A be wan gaandi fu goo kon bigi aini sowan osufamii.

2. Saide Yakowbesi be sa waka neen baala baka?

² Te i luku a fasi fa Yesesi be e du sani, da Yakowbesi be sa waka neen baka (Mat. 13:55). A pisiten di Yesesi be abi 12 yali, a be sabi a Wowtu fu Gadu te, neen den leliman a Yelusalem be e foondoo fu den sani di a be sabi (Luk. 2:46, 47). U sabi taki a tembeewooko Yesesi be e du. Efu Yakowbesi be e wooko makandaa anga en baala, a be musu sabi en bun. Nathan Knorr be lobi taki: ‘A moo bun fasi fu sabi wan sama, a te yu e wooko makandaa anga en.’ * Di den be e goo kon bigi, Yakowbesi be musu e si taki ‘o moo Yesesi be e bigi o moo a be e koni. A be e si tu taki Gadu anga libisama be e moo lobi Yesesi’ (Luk. 2:52). Te i luku ala den sani ya, da kande i be o denki taki Yakowbesi be o de wan fu den fosi sama di be o toon Yesesi bakaman, ma a ná so sani waka.

3. San Yakowbesi du di Yesesi bigin a wooko fi en a goontapu ya?

³ A pisiten di Yesesi be e du a wooko fi en a goontapu ya, Yakowbesi á be toon wan bakaman fi en ete (Yoh. 7:3-5). Kande en a be wan fu den famii di be e taki ‘Yesesi ede nai  wooko bun moo’ (Malik. 3:21). Nawan peesi aini Beibel wi e leisi taki Yakowbesi be kon holibaka gi en mma Maliya di sama be sipikii Yesesi a wan ponsu.​—Yoh. 19:25-27.

4. San wi o luku aini a artikel ya?

⁴ Bakaten Yakowbesi be e biibi taki Yesesi na a Mesiyas di Gadu be o sende kon a goontapu, neen meke a toon wan Kelesten. Den baala anga sisa fu a ten de be e lesipeki en. Aini a artikel ya wi o luku tu sani di u sa leli fu Yakowbesi: (1) Saide u mu abi sakafasi ala yuu? (2) Fa u sa toon wan bun leliman?

5. San Yakowbesi du di Yesesi kon neen di a weki baka?

⁵ On ten Yakowbesi toon wan bakaman fu Yesesi? Beibel taki di Yesesi weki baka ‘a meke Yakowbesi si en, baka dati a meke ala den apostel si en tu’ (1 Kor. 15:7). Na a sani ya meke Yakowbesi kengi a fasi fa a be e denki, neen a toon wan bakaman fu Yesesi. Di den taa apostel be de a Yelusalem e wakiti a santa yeye di Yesesi be paamisi den, Yakowbesi seefi be de ape tu (Toli 1:13, 14). Bakaten Yakowbesi toon wan fu den baala di be e tii a wooko na a pisiten de (Toli 15:6, 13-22; Gal. 2:9). A pisiten fu a yali 62, santa yeye be meke Yakowbesi sikiifi wan biifi gi den salufu Kelesten. Ala sama di e dini Yehofa sa fende wini fu a biifi ya, winsi den o go a hemel efuso o tan aini wan paladeisi a goontapu ya (Yak. 1:1). Wan koniman di e ondoosuku sani fu fositen taki na a Gaan pilisite Ananiyas be meke sama kii Yakowbesi. Ma Yakowbesi dini Yehofa anga en hii ati te enke a dede.

6. Fa Yakowbesi soi taki a á be de enke den keliki fesiman fu a ten de?

⁶ Yakowbesi be abi sakafasi. Saide u sa taki so? Yakowbesi á be de enke den keliki fesiman fu a ten de. Di a si kiin taki Yesesi na a Manpikin fu Gadu tuu, a á daaidaai fu toon wan bakaman fi en. Ma den fesiman fu den pilisite a Yelusalem á be du sani enke Yakowbesi. Den wonduu di Yesesi be e du be e soi kiin taki a Gadu sende en kon a goontapu. Wan fu den sani di a be du, na a weki di a be weki Lasalesi baka. Den á be poi sitee taki a sani ya á pasa tuu. Ma pe fu den toon en bakaman, a fasi den be e suku fu kii Yesesi anga Lasalesi (Yoh. 11:53; 12:9-11).  Bakaten, di Yehofa weki Yesesi baka, den keliki fesiman ya meke moiti fu kibii a taki (Mat. 28:11-15). Fu di den man ya be abi heimembee meke den á be wani aliki a Mesiyas di Gadu sende kon a goontapu.

7. Saide wi á mu abi heimembee?

⁷ San a sani ya e leli u: Yu á mu abi heimembee, meke moiti fu abi sakafasi ala yuu. Son siki sa meke den tetei fi yu ati kon taanga te da a nai wooko bun moo. A letiso heimembee sa meke a taanga gi u fu teke den leli di Yehofa e gi u. Den Faliseiman be abi heimembee, neen meke den be e tapu den ain gi den sani di be e soi kiin taki Yesesi a be a Manpikin fu Gadu (Yoh. 12:37-40). A wan don sani den du, bika a heimembee fu den meke den lasi a okasi fu go tii makandaa anga Yesesi a hemel (Mat. 23:13, 33). Wi á wani a miti wi enke den Faliseiman, neen meke ala yuu u mu de kabakaba fu kengi a fasi fa wi e denki te u kon fusutan wan toli aini Beibel moo bun (Yak. 3:17). A di Yakowbesi be abi sakafasi meke Yehofa be poi seeka en. Na a sani ya meke a be toon wan bun leliman tu.

8. San o yeepi u fu toon wan bun leliman?

⁸ Yakowbesi á be go a hei sikoo, neen meke den keliki fesiman fu a ten de á be e si en enke wan sama di be poi leli taawan sani. A so den be e si apostel Peitilisi anga Yohanisi tu (Toli 4:13). Toku te u luku a Beibel buku di Yakowbesi sikiifi, da wi e si taki en a be wan bun leliman. Kande leti enke Yakowbesi, yu á go a hei sikoo. Ma leti enke fa a santa yeye fu Yehofa be yeepi en fu toon wan bun leliman, a so a sa yeepi i tu. Boiti dati, a olikanisâsi fu Yehofa abi omen sani di e yeepi u fu toon moo bun leliman. Aini den paragraaf di e kon, wi o luku fa Yakowbesi be e du en wooko, anga fa u sa waka neen baka.

9. Fa Yakowbesi be e leli sama?

⁹ Yakowbesi á be e koboloiki omen kofaliki wowtu te a be e leli sama. Neen meke den sama di a be e taki anga den be e fusutan san a be wani leli den. Wan leisi, a be wani yeepi den Kelesten fu fusutan taki den mu e piisii winsi sama e libi ogii anga den. Fa a taigi den a sani ya? Aini a biifi di  a sende gi den a taigi den taki: ‘Wi e si den sama di holidoo enke koloku sama. U yee fa Yopu be holidoo. U si fa Yehofa meke en libi waka. U si taki Yehofa lobi sama tuutuu. A abi tyali-ati tu’ (Yak. 5:11). Di Yakowbesi taki anga den baala anga sisa ya, a koboloiki a Wowtu fu Gadu fu membee den taki Yehofa o belesi den sama di e holidoo, leti enke fa a be belesi Yopu. Di Yakowbesi taigi den a sani ya, a á koboloiki omen kofaliki wowtu. Ala sama be man fusutan kiin san a be wani leli den. Yakowbesi á be e taki sani fu meke sama gafa en, ma a be e soi den taki a Yehofa na a Sama di e poti wi a pasi.

10. Fa u sa du sani enke Yakowbesi te wi e leli sama?

¹⁰ San a sani ya e leli u: Te yu e leli sama sani, taki a wan fasi di ala sama o fusutan. Den sani di yu e leli sama mu komoto aini a Wowtu fu Gadu. Wi á mu suku fu toon wan bun leliman fu di u wani sama gafa u, ma u mu meke moiti fu soi sama taki a Yehofa e leli u. U mu yeepi den tu fu fusutan taki Yehofa e booko en ede anga den (Rom. 11:33). Neen meke ala yuu u mu leli sama san sikiifi aini a Wowtu fu Gadu. Pe fi yu e taigi den Beibelsutudi fi i fa yu be o du son sani, a moo bun fu koboloiki Beibel fu yeepi den fu fusutan fa Yehofa e denki fu wan toli. Te den fusutan fa Yehofa e denki, da a sani ya o yeepi den fu du sani di e meke a piisii.

11. Sowtu swakifasi son wan fu den Kelesten fu a ten fu Yakowbesi be abi? Sowtu taanga-sikin Yakowbesi gi den? (Yakowbesi 5:13-15)

¹¹ Yakowbesi á be e suku fini tumisi. Te i luku a biifi di a sende gi den baala anga sisa, da yu e si taki a be sabi san a den polobelema efuso swakifasi di den be abi, neen meke a taigi den pilisisi san den be mu du. Sowtu swakifasi son wan fu den Kelesten fu a ten de be abi? A be e taanga gi son wan fu den fu aliki te den baala di be e teke fesi be e poti den a pasi (Yak. 1:22). Taawan be e paati bee. Den be e libi bun anga den guduman, da den be e fika den pootiman a wan se (Yak. 2:1-3). I be abi baala anga sisa tu di á be poi basi den tongo, a sani ya meke den be e taki sani di den á be mu taki (Yak. 3:8-10). Den swakifasi ya a ná be lawlaw sani, ma toku Yakowbesi á be e si den enke sama di á be poi kengi. Winsi fa a be e taigi den a tuu, toku a be e taki a wan switifasi ala yuu. A be e gi den taanga-sikin tu fu suku yeepi a den owluman.​—Leisi Yakowbesi 5:13-15.

12. Saide wi á mu e si enke den sutudi fu u ná o poi kengi?

¹² San a sani ya e leli u: Yu á mu e suku fini tumisi. Yu á mu e si enke sama á poi kengi tu. Ai taanga gi omen sama di e sutudeli Beibel fu bigin du den sani di den e leli (Yak. 4:1-4). Kande ai teke ten fosi den fika den takuu gwenti di den be abi fu bigin du sani enke fa Yehofa wani. Leti enke Yakowbesi, u mu e taigi den Beibelsutudi fu u kiin sowtu manii den mu kengi ete. Wi á mu e si enke den ná o poi kengi tu. U mu e biibi taki den sama di Yehofa hali kon aini a olikanisâsi fi en, a sama di a si taki abi sakafasi. U mu e biibi tu taki a o gi den a kaakiti fu du den sani di den e leli.​—Yak. 4:10.

13. Enke fa Yakowbesi 3:2 e soi, da san Yakowbesi be e holi a pakisei?

¹³ Yakowbesi á be e fii enke a bun moo taawan. A á be e si enke fu di en a be Yesesi pikin baala, da a be bun moo den taa baala anga sisa aini a kemeente. A gaandi di a be fende fu yeepi tii a wooko na a ten de, á be meke a bigin fii enseefi tu. A be e kai den taa Kelesten ‘en lobi baala’  (Yak. 1:16, 19; 2:5). Yakowbesi á be e du enke a nai meke fowtu tu. Aini wan fu den biifi di a be sende gi den kemeente, a be taki: ‘Ala wi e sondu omen leisi.’​—Leisi Yakowbesi 3:2.

14. Saide a bun fu e soi den sutudi fu u taki useefi e meke fowtu?

¹⁴ San a sani ya e leli u: Holi a pakisei taki ala wi a sondu sama. Noiti u mu e si enke u bun moo taawan. Saide? Efu wi e gi den Beibelsutudi fu wi a fii enke u bun moo den, efuso taki u nai meke fowtu, a sani de o meke a moo taanga gi den fu bigin dini Yehofa. Kande den o si enke noiti den o man libi enke fa Yehofa wani. Ma te wi e soi den kiin taki a be taanga gi useefi fu kengi son manii di u be abi, anga fa Yehofa yeepi u, da a sani de o yeepi den fu si taki denseefi poi dini Yehofa.

15. Sowtu ageisitoli Yakowbesi be e koboloiki? (Yakowbesi 3:2-6, 10-12)

¹⁵ Yakowbesi be e koboloiki ageisitoli di be makiliki fu fusutan. A santa yeye fu Gadu be e yeepi en fu de wan bun leliman, ma a musu de tu taki a leli omen sani fu a fasi fa en gaan baala Yesesi be e koboloiki ageisitoli fu leli sama. Den ageisitoli di Yakowbesi sikiifi aini a biifi di a be sende gi den kemeente be makiliki fu fusutan.​—Leisi Yakowbesi 3:2-6, 10-12.

16. Saide u mu e koboloiki ageisitoli di makiliki fu fusutan?

¹⁶ San a sani ya e leli u: Koboloiki ageisitoli di makiliki fu fusutan. Te a ageisitoli fi i bun, a sama e man si a sani di yu e taki leti neen fesi. Na a sani ya o yeepi en fu a á feegete a sani di i wani leli en. Di Yesesi be de a goontapu, a soi u san na a moo bun fasi fa u sa koboloiki ageisitoli fu leli sama sani. En baala Yakowbesi be waka neen baka tu. Meke u poti pakisei a wan fu den ageisitoli fu Yakowbesi.

17. San u sa leli fu a ageisitoli di sikiifi a Yakowbesi 1:22-25?

¹⁷ Leisi Yakowbesi 1:22-25. A omen sani u sa leli fu a ageisitoli di Yakowbesi be gi fu wan sama di e luku enseefi aini wan sipikii. A be wani soi taki efu wan sama wani fende wini fu den sani di sikiifi aini Beibel, da a á mu e leisi en namo, ma a mu e du den sani di ai leli. A sani di a taki ya, a wan sani di ala sama aini a ten de be fusutan wantenwanten. San a be wani leli den? A be wani soi den taki efu wan kelekele  sama luku en fesi a sipikii neen a si wan sani di a mu seeka, noiti a o waka gwe sondee a seeka en. A letiso a de anga a Wowtu fu Gadu tu. Efi i leisi en, neen i si wan sani di i mu kengi, ma i nai meke moiti fu kengi en, da a sosokaali i lasi i ten leisi en.

18. Sowtu dii sani u mu holi a pakisei te u wani gi wan ageisitoli?

¹⁸ Te yu o gi wan ageisitoli, meke moiti fu du den dii sani di Yakowbesi be du: (1) A ageisitoli mu yeepi den sama di yu e taki anga den fu fusutan a sani di i wani leli den. (2) A ageisitoli mu makiliki fu fusutan. (3) Soi den sama san i wani leli den anga a ageisitoli. Efu ai taanga gi i fu fende ageisitoli, i sa luku a Saanantongo buku di den a kai ‘Ondrosuku Bijbel moro fini, gi Yehovah Kotoigi’. Suku a pisi di den e kai ‘Agersitori’, da yu o fende wantu moin wan di i sa koboloiki. Ma yu á mu feegete taki wan ageisitoli mu yeepi den sama fu fusutan a toli di i wani leli den moo bun, neen meke a ageisitoli fi yu á mu e go a omen se. A sama mu man fusutan wanten sowtu se yu e go anga a taki. Ala u wani toon moo bun leliman. U nai du a sani ya fu di u wani sama gafa u, ma a wani u wani yeepi sama fu kon aini a gaan osufamii fu Yehofa.

19. Fa wi o soi taki wi e teke en fu bigi taki u de aini a osufamii fu Yehofa?

¹⁹ Winsi fa wi á kiya aini wan osufamii anga wan gaan baala di ná abi sondu, toku ala wi abi a gaandi fu dini Yehofa makandaa anga den sama di a teke aini a osufamii fi en. Wi e soi taki u lobi ala den sama ya te wi e meke moiti fu kon sabi den moo bun, anga te wi e du a peleikiwooko makandaa anga den. U mu e meke moiti fu abi sakafasi enke Yakowbesi, u mu e meke moiti fu toon wan bun leliman enke en tu. Te wi e du den sani ya, da sama o gafa u Gadu Yehofa. Wi o poi yeepi sama tu di wani sabi a tuu fu toon wan mati fu u Dda di de a hemel.