1. Ka nou pé di asi fanmi a Jak ?

JAK, frè a Jézi *, lévé adan on fanmi ki té fidèl a Jéova. Manman-y é Pap’a-y, Mari é Jozèf, té enmé Jéova toubònman é yo té ka sèvi-y èvè tout tchè a yo. Anplisdisa, granfrè a Jak té kay vin Mési-la. Lèfètkè Jak té ka viv adan on fanmi konsa, sé té on bèl lonnè toubònman !

2. Pou ki rézon Jak té’é pé pòté gran frè a-y anlè ?

² Jak té ni onlo rézon pou pòté granfrè a-y anlè (Mat. 13:55). Pa ègzanp, lè Jézi té ni 12 an, tèlman i té ja konnèt lézékriti byen, sé ansyen-la a Jérizalèm rété èstèbèkwè lè yo kouté-y, alòskè sé té dé grangrèk (Lik 2:46, 47). Anplisdisa, pétèt Jak travay ansanm èvè Jézi antankè chawpantyé. Si sé sa, sèten i té konnèt frè a-y byen menm. Ni on ti pawòl Frè Nathan Knorr * té byen enmé di : « Lè ou ka travay èvè on moun, ou ka vin dékouvè onlo biten asi-y. » Ondòt biten ankò, sé kè Jak té oblijé rann-li kont kè « Jézi té ka kontinyé ni plis sajès é [kè] i té ka kontinyé grandi. É pi i té ka grandi, pi Bondyé té enmé-y é lézòm osi » (Lik 2:52). Kifè, on moun fasil a di kè Jak dwèt té pawmi prèmyé disip a Jézi. Men olasa !

3. Lè Jézi té ka préché, kijan Jak réyaji ?

 ³ Lè Jézi té ka préché asi latè, Jak pa vin disip a-y (Jan 7:3-5). Pétèt i té jous adan sé moun a fanmi a-y la ki té ka di kè ‘tèt a Jézi pati’ (Mawk 3:21). Dayè pou yonn, i ka sanm sa i pa té owa manman-y, Mari, lè yo tchouyé Jézi asi on poto-siplis (Jan 19:25-27).

4. Ka nou ké vwè adan awtik-lasa ?

⁴ Plita, Jak fin pa ni fwa an Jézi, é i vin on moun toutmoun té ka rèspèkté adan lasanblé krétyèn la. Adan awtik-lasa, nou ké vwè 2 biten i pé aprann-nou : 1) poukwa fò-nou toujou montré-nou toupiti é 2) kijan nou pé anségné lézòt on mannyè ki éfikas.

5. Jézi parèt douvan Jak apré i té résisité. Kijan Jak réyaji ?

⁵ Kitan Jak vin on disip a Jézi ? Apré i résisité, Jézi « parèt douvan Jak, é aprésa i parèt douvan tout sé apòt-la » (1 Kor. 15:7). Lè i jwenn Jézi jou-lasa, vi a Jak chanjé bout-pou-bout. Enn gadé : lè sé apòt-la té ka atann lèspri sen la Jézi té pwomèt-yo la, yo réini-yo adan on pyès anho a on kaz a Jérizalèm é Jak té la èvè yo (Akt 1:13, 14). Plita, i té kontan fè pawti a Komité santral la, o 1^é syèk (Akt 15:6, 13-22 ; Gal. 2:9). É tibwen tan avan 62 a épòk an nou, Bondyé enspiré-y pou i té maké on lèt pou sé krétyen wen la. Jousalè, lèt-lasa itil pou nou, ki nou ni lèspwa dè ay viv an syèl-la, ki nou ni lèspwa dè viv asi latè pou touttan (Jak 1:1). Flavius Josèphe, on nonm ki étidyé Listwa, èspliké kè yo tchouyé Jak pas sé sa gran prèt-la, on dénonmé Àn (oben Anàn) ki té gason a Àn té mandé. Jak rété fidèl a Jéova toutotan i té vivan asi latè.

6. Poukwa nou pé di kè Jak pa té kon sé chèf a rélijyon la ki té la an tan a-y ?

⁶Jak té plen imilité. Ka ki ka fè-nou di sa ? Alòskè onlo chèf a rèlijyon pa aksèpté Jézi antankè Mési, li Jak, i fin pa aksèpté-y. Lè i vwè déotwa prèv séryé, i admèt èvè onlo imilité kè Jézi sé té Gason a Bondyé. Men a pa té pou sé chèf a sé prèt-la ki té Jérizalèm ! Enn gadé kijan yo rèfizé admèt kè sé Jéova ki té voyé Jézi alòskè toutmoun té dakò pou di kè Jézi té résisité Laza. Okontrè, yo jous chèché a tchouyé ki li, ki Laza (Jan 11:53 ; 12:9-11). Plita, lèwvwè Jézi limenm résisité, yo monté konplo pou  pèp-la pa té konnèt lavérité (Mat. 28:11-15). Tèlman yo té ni òwgèy, yo pa aksèpté Mési-la.

7. Poukwa fò pa nou ni òwgèy ?

⁷Ka sa ka aprann-nou ? Fò pa ou ni òwgèy é fò ou toujou lésé Jéova anségné-w. Menmjan on maladi pé anpéché tchè a on moun fonksyonné byen, sé menmjan-la osi si nou ni òwgèy, sa pé anpéché-nou kouté sé konsèy-la Jéova ka ban-nou la. Tèlman sé farizyen-la té lésé tchè a yo vin rèd, é magré sé prèv-la té klè, yo rèfizé admèt kè Jézi sé té Gason a Bondyé, é kè lèspri sen té ka aji asi-y (Jan 12:37-40). Lèfètkè yo aji konsa, sa té danjéré ba yo pas sa té kay anpéché-yo ni lavi étèwnèl (Mat. 23:13, 33). Mi sé pousa sa enpòwtan toubònman kè nou lésé Pawòl a Bondyé é lèspri sen a-y chanjé pèwsonalité an nou, aji asi mantalité an nou é aji asi désizyon nou ka pran ! (Jak 3:17). Difètkè Jak té plen imilité, i lésé Jéova anségné-y. Sé grasa kalité-lasa osi si i vin on bon anségnan toubònman. Sé sa nou kay vwè aprézan.

8. Ka ki ké édé-nou anségné pibyen ?

⁸ Jak pa té on grangrèk ki té fè onlo lékòl. Sé chef a rèlijyon la ki té ka viv an tan a-y la, té ka mété-y adan menm sak ki Pyè é Jan. Pou yo, sé té dé nonm « ki pa té fè gran lékòl é [ki] pa té dé gwotchak » (Akt 4:13). Men Jak vin on bon anségnan menm, é sé sa nou ka konstaté lè nou ka li liv-la ki ka pòté non a-y la. Pétèt nou menmjan ki-y, kivédi nou pa fè gran lékòl, men nou osi nou pé anségné byen toubònman, pas Jéova ka ban-nou lèspri sen a-y, é òwganizasyon a-y ka ban-nou on fòwmasyon ki vréman éfikas. An-nou vwè kijan Jak té ka anségné, é ka sa ka aprann-nou.

9. Kijan Jak té ka fè lè i té ka anségné ?

⁹Sé mo-la Jak té ka itilizé la té senp, é èsplikasyon a-y pa té rèd a konprann. Sé pousa lè yo té ka li lèt a-y, sé moun-la té ka konprann tousuit ka pou yo té fè é kijan pou yo fè-y. Pa ègzanp, i èspliké kè fò sé krétyen-la té paré a andiré biten yo  té’é fè-yo ki pa té jis é kè fò pa yo té’é ni ponmoun asi tchè a yo akòz dè sa. I èspliké-yo sa on mannyè tou senp. Mi sa i maké : « Pou nou, moun ki andiré ni tchè-kontan. Zò tann palé dè andirans a Jòb é zò vwè jan Jéova fè sa fin pou-y. É zò konstaté kè Jéova enmé-nou èvè tandrès é kè i plen mizérikòd » (Jak 5:11). Ou vwè kijan Jak koré sa i di asi Lézékriti ? I sèvi èvè Pawòl a Bondyé pou édé lèktè a-y konprann kè Jéova toujou ka rékonpansé moun ki fidèl a-y, kon Jòb. Sé mo-la i itilizé la, é sé èsplikasyon-la i ba-y la té senp. Kifè i pa chèché a fè-yo poté-y anlè, men sé Jéova i mèt prèmyé douvan.

10. Kijan nou pé imité ègzanp a Jak lè nou ka anségné ?

¹⁰Ka sa ka aprann-nou ? Lè ou ka anségné, rété senp, é koré sa ou ka di asi Pawòl a Bondyé. Òbjèktif an nou, a pa dè montré étidyan an nou tousa nou konnèt, men sa nou vlé, sé montré-yo tousa Jéova konnèt é kijan i ka sousyé-y dè yo (Wom. 11:33). Pou nou rivé fè sa, fò-nou toujou bazé-nou asi sa Lézékriti ka di. Pa ègzanp, olyé nou di-yo sa nou té’é fè si nou té anplas a yo, pisimé nou pran ègzanp ki an Bib-la é kè nou édé-yo réfléchi asi sé ègzanp-lasa. Konsa, yo ké konprann sa Jéova ka pansé é sa i ka rèsanti. Aprésa, yo ké mèt sa yo ka aprann an pratik. Yo pé ké fè-y pou fè-nou plézi men yo ké fè-y pas yo vlé fè Jéova plézi.

11. a) Ki défo sèwten krétyen té ni an tan a Jak ? b) Sèlon Jak 5:13-15, ki konsèy Jak ba sé frè é sè-la adan lasanblé-la ?

¹¹Jak té ka gadé laréyalité anfas. Lèt a Jak ka montré-nou kè i té sav byen kè frè é sè a-y té ka goumé èvè défo a yo. Sé pousa i pran tan èspliké-yo byen ka pou yo té fè pou pwogrésé. Pa ègzanp, ni sèwten krétyen ki té ka tadé pou apliké sé konsèy-la yo té ka ba-yo la (Jak 1:22). Tin dòt ki té ka fè préférans pou moun ki té ni lajan (Jak 2:1-3). Ni dòt ankò ki pa té ka rivé métrizé lang a yo (Jak 3:8-10). Tousa té grav, men Jak té sèten kè frè é sè a-y té pé chanjé. I palé ba-yo èvè bonté, é i ba-yo konsèy ki té dirèk. Fwa a sèwten moun té fébli, kifè, i ankourajé-yo mandé sé ansyen-la édé-yo (li Jak 5:13-15).

12. Kijan nou pé rété pozitif lè nou ka étidyé Labib èvè on moun ?

¹²Ka sa ka aprann-nou ? Gadé laréyalité anfas, men toujou vwè lézòt on mannyè ki pozitif. Ni onlo moun ki ka étidyé Labib èvè nou, men ki ni dimal a apliké sé konsèy-la ki adan-y la (Jak 4:1-4). Pétèt yo ké bizwen tibwen tan pou rivé lagé vyé manni a yo é pou yo travay bèl kalité on krétyen dwèt ni. Kon Jak, fò-nou pran kouraj an nou a 2 men, é fò-nou di-yo adan ki domenn fò-yo pwogrésé. Men fò-nou rété pozitif osi, é fò-nou toujou ni konfyans kè Jéova ké fè moun ki ni imilité vin owa a-y é kè i ké ba-yo fòs-la yo bizwen la pou fè chanjman an vi a yo (Jak 4:10).

13. Dapré sa nou ka li an Jak 3:2, ka Jak té dakò pou di ?

¹³Jak pa té ka konpranndèdi i té plibon ki lézòt. Jak sé té frè a Jézi é i té ni rèsponsabilité adan lasanblé-la, men apapousa i té ka akwè-y. I té ka kriyé sélézòt krétyen-la « frè an mwen kè an enmé » (Jak 1:16, 19 ; 2:5). I pa té ka jen éséyé fè lézòt kwè kè i té pawfè. Dayè, enn gadé sa i maké : « Noutout, pli souvan ki rarman nou ka fè érè » (li Jak 3:2).

14. Poukwa fò-nou admèt kè nou osi nou ka fè érè ?

 ¹⁴Ka sa ka aprann-nou ? Toujou sonjé kè noutout ka péché. Fò pa nou konpranndèdi nou plibon ki étidyan an nou. Poukisa ? Si nou ka fè-y konprann kè nou pa jen ka fè érè, i ké fin pa dékourajé pas i ké pansé kè i pé’é jen rivé obéyi Jéova a san pou san. Men si nou ka admèt franchman kè, ni on lè, sa té rèd pou nou té suiv prensip ki adan Labib, é si nou ka èspliké-y kijan Jéova édé-nou janmbé difikilité an nou, i ké di kè li osi i pé rivé sèvi Jéova.

15. Ki kalité ègzanp Jak té ka itilizé ? (Jak 3:2-6, 10-12).

¹⁵Jak té ka sèvi èvè ègzanp ki té ka touché tchè a moun. Sé vré, sé Bondyé ki enspiré Jak pou i té maké lèt a-y, men i aprann onlo biten lè i té ka kouté gran frè a-y Jézi ki té ka sèvi èvè ègzanp pou anségné. Chaklè Jak sèvi èvè on ègzanp adan lèt a-y, ègzanp-lasa senp, é lèson-la klè é fasil a konprann (li Jak 3:2-6, 10-12).

16. Lè on ègzanp éfikas, ki travay i pé fè ?

¹⁶Ka sa ka aprann-nou ? Fò-nou sèvi èvè ègzanp ki éfikas. Lè ou ka itilizé ègzanp é kè sé ègzanp-lasa an plas a yo, a pa kouté étidyan-la ké kouté-w tousèl men i ké vwè dè ki biten ou ka palé. Sa ké édé-y sonjé sé vérité-la i aprann la adan Bib-la. Jézi sé té on mèt-a-mannyòk adan domenn-lasa, é frè a-y Jak suiv ègzanp a-y. An-nou pran tan gadé on ègzanp ki adan lèt a-y, é an-nou vwè poukisa i té éfikas.

17. Poukwa ègzanp-la nou ka touvé an Jak 1:22-25 éfikas konsa ?

¹⁷ (Li Jak 1:22-25.) Lè Jak sèvi èvè ègzanp a miwa-la, poukwa sa té éfikas toubònman ? Jak té ni on lèson byen prési i té vlé anségné : pou bénéfisyé anplen dè Pawòl a Bondyé, apatoudi li-y ; fò ou mèt sa ki maké adan-y an pratik osi. Sé pousa i chwazi on ègzanp moun té’é rivé konprann : ègzanp a on nonm ki ka gadé figi a-y adan on glas. Ola i té vé ay èvè ègzanp-lasa ? Si nonm-lasa ka rann-li kont kè ni on biten ki pa k’ay lè i ka gadé-y adan glas-la, é kè magrésa i ka lésé sa konsa, sé on boug an kouyonnad. Menmjan-la, sa té’é tris si nou té ka li Pawòl  a Bondyé, kè nou té ka rann-nou kont kè nou ni chanjman a fè asi pèwsonalité an nou é kè nou pa té ka fè-yo.

18. A kibiten pou nou fè atansyon lè nou ka sèvi èvè on ègzanp ?

¹⁸ Lè nou ka sèvi èvè on ègzanp, fò nou imité Jak. Pousa, fò nou fè atansyon a 3 biten : 1) Fò ègzanp-la ka kolé byen èvè sa nou ka èspliké moun-la. 2) Fò pa i rèd a konprann. 3) Fò-nou pran tan èspliké byen kijan pou mété-y an pratik. Si ou ni dimal a touvé dé bon ti ègzanp, ou pé gadé adan Index des publications des Témoins de Jéhovah. Si ou ay adan « Exemples », ou ké touvé onpakèt ègzanp ou pé itilizé. Men toujou sonjé kè on ègzanp kon on mikro : i ka ba sa ou ka anségné la plis fòs kivédi, i ka mèt pwen-la ki pi enpòwtan la douvan. Alò nou pé’é sèvi èvè ègzanp toulongalé men nou ké fè sa enki lèwvwè sa ké nésésè. Nou ka tou konprann kè si nou vlé anségné pibyen, a pa pou fè moun vwè-nou, men sé pou édé on maksimòm dè moun rantré adan fanmi a Jéova.

19. Kijan nou pé montré frè é sè an nou jan nou enmé-yo ?

¹⁹ Nou ponyonn pa lévé èvè on granfrè ki té pawfè. Pawkont, lè nou ka sèvi Jéova, nou anmitan a on gran fanmi, é nou plen frè é sè. Chakfwa nou ka pasé on moman tan èvè yo, kè nou ka lésé-yo aprann-nou on biten, é kè nou ka kontinyé préché é anségné men-dan-lamen èvè yo, nou ka montré-yo jan nou enmé-yo. An-nou ni menm létadèspri ki Jak. An-nou aji é an-nou anségné menmjan ki-y. Si nou fè sa, nou ké onoré Pap’an nou ki an syèl-la é ki plen lanmou, é nou ké édé moun ki ni tchè sensè vin zanmi a-y !