1. ¿Mbaʼéichapa rakaʼe Santiago família?

 SANTIAGO okakuaa vaʼekue peteĩ família ojerovia mbaretévape. Por ehémplo, ituakuéra José ha María, ohayhueterei vaʼekue Jehovápe ha omeʼẽse chupe la iporãvéva. Ha upéva ári jey, iñermáno majór haʼe vaʼekue pe Mesías. * ¡Eñeimahinamíntena! ¡Haʼe okakuaa vaʼekue pe Mesíandi! Ajépa tuichaite priviléhio oreko Santiago okakuaávo peichagua famíliape.

2. ¿Mbaʼe mbaʼérepa Santiago ikatu kuri omombaʼe iñermánope?

² Posívlemente Santiago omombaʼéne raʼe iñermáno majórpe (Mat. 13:55). ¿Mbaʼérepa jaʼe upéva? Pórke Jesús oikuaa porã vaʼekue Ñandejára Ñeʼẽ. Por ehémplo, haʼe orekórõ guare 12 áño ha oho oñemongeta umi ansiáno Jerusalenguándi, haʼekuéra opyta oñesorprendepa (Luc. 2:46, 47). Santiago oiméne ombaʼapo raʼe avei Jesúndi karpinteríape. Oimérõ upéicha, ojokuaa porãvéne raʼe hikuái ombaʼapóvo oñondive. Ermáno Nathan Knorr heʼími vaʼerã voi: “Heta mbaʼe reaprendéta peteĩ persónagui embaʼapórõ hendive”. * Upévare Santiago oiméne ohecha raʼe mbaʼéichapa iñermáno “okakuaa ha iñaranduve ohóvo”, ha Ñandejára ha umi hénte ‘osegiha oguerohory chupe’ (Luc. 2:52). Opa koʼã mbaʼére ikatu voi jaʼe Santiago raẽvete ojeroviataha iñermánore, péro jaikuaaháicha ndahaʼéi upéva la oiko vaʼekue.

3. ¿Mbaʼépa Santiago opensa vaʼekue iñermánore oĩrõ guare ko yvy ape ári?

³ Jesús oĩrõ guare ko yvy ape ári, Santiago ndahaʼéi vaʼekue  idisípulo (Juan 7:3-5). Ha ikatu voi oime Santiago heʼi raʼe hese itavyraiha, ojapo haguéicha umi ótro ihentekuéra (Mar. 3:21). La Biblia ndeʼiriete avei Santiago oĩ hague isýndi, Jesúspe oñemosaingórõ guare pe yvyráre (Juan 19:25-27).

4. ¿Mbaʼépa jahecháta ko artíkulope?

⁴ Tiémpo rire Santiago oñepyrũ ojerovia Jesúsre ha oiko chugui peteĩ ansiáno ojerrespetaitereíva. Ko artíkulope jahecháta mokõi mbaʼe ikatúva ñaaprende Santiágogui: 1) ¿Mbaʼéichapa ikatu ñaneumildeve? Ha 2) ¿mbaʼéichapa ikatu ñaporomboʼe porãve?

5. ¿Mbaʼépa ojapo raʼe Santiago Jesús ojechauka rire chupe?

⁵ ¿Arakaʼe guivépa Santiágogui oiko Jesús disípulo? Jesús orresusita rire, haʼe “ojechauka Santiágope ha upe rire enterove umi apóstolpe” (1 Cor. 15:7). Upe oiko vaʼekue okambiaite kuri Santiágope, ha upe guive oikóma chugui Jesús disípulo. Haʼe oĩ vaʼekue avei umi apostolkuérandi oñembyatýrõ guare hikuái Jerusalénpe orresivi hag̃ua pe espíritu sánto (Hech. 1:13, 14). Ha upe rire, Santiago oĩ voi kuri pe Kuérpo Governántepe (Hech. 15:6, 13-22; Gál. 2:9). Áño 62 mboyvemi, pe espíritu sánto omomýi Santiágope oskrivi hag̃ua peteĩ kárta umi unhídope. Ha upéva upe kárta, koʼag̃aite peve ideprovécho ñandéve, tahaʼe jahátarõ yvágape térã nahániri (Sant. 1:1). Pe istoriadór Josefo oñeʼẽ vaʼekue avei Santiágore. Haʼe omombeʼu pe súmo saserdóte Ananías (Anás raʼy), omanda hague ojejuka hag̃ua Santiágope. Santiago ifiél vaʼekue Jehovápe omohuʼã meve iservísio ko yvy ape ári.

6. ¿Mbaʼérepa jaʼekuaa Santiago idiferentete hague umi líder rrelihiósogui?

⁶ Santiago iñumílde vaʼekue. ¿Mbaʼérepa jaʼe upéva? Pórke haʼe idiferentete vaʼekue umi líder rrelihióso itiémpope guarégui. Santiago ohechárõ guare umi pruéva ohechaukáva Jesús haʼeha pe Mesías, haʼe iñumílde ha ojeroviáma iñermánore. Péro umi saserdóte prinsipál Jerusalengua katu ndaupeichaiete. Por ehémplo, haʼekuéra ndaikatúi kuri onega Jesús omoingove jey hague Lázarope. Péro oguerovia rangue hikuái Jesús haʼeha pe Mesías Ñandejára omboúva, haʼekuéra ojukase Jesúspe ha Lázarope (Juan 11:53; 12:9-11). Ha upéi, Jesús voi orresusitárõ guare, haʼekuéra oñehaʼãmbaite ani hag̃ua la hénte opilla upéva (Mat. 28:11-15). Umi líder rrelihióso ijorgullosoiterei rupi, ndojeroviái pe Mesíasre.

7. ¿Mbaʼérepa ndovaléi ñandeorgullóso?

 ⁷ Mbaʼépa ñaaprende: Ani ñandeorgullóso, ha jaheja Jehovápe tañanemboʼe. Ñanderasýrõ del korasón, ijetuʼúta ñane korasõme ombaʼapo porã hag̃ua. Ha ñandeorgullósorõ, ijetuʼúta ñaneñeʼẽrendu hag̃ua Jehovápe. Umi fariséo oñemohatã vaʼekue la haʼekuéra heʼívapente, ha upévare norrekonoseséi Jesús haʼeha Ñandejára raʼy ni ojapoha umi milágro espíritu sánto rupive (Juan 12:37-40). Péro haʼekuéra okambia vaʼerã kuri oikosérõ pára siémpre (Mat. 23:13, 33). Upévare iñimportanteterei jaheja Jehovápe tañandegia Iñeʼẽ rupive ha ijespíritu rupive. Oipurúvo koʼã mokõi mbaʼe, haʼe ikatu ñanepytyvõ jadesidi porã hag̃ua, ha ñakambia hag̃ua jaiko lája ha ñapensa lája (Sant. 3:17). Santiago iñumílde rupi, oheja vaʼekue Jehovápe tomboʼe chupe. Ha jahechataháicha hína upe rire, haʼe iñumílde rupi oporomboʼekuaaiterei vaʼekue.

8. ¿Mbaʼépa ñanepytyvõta ñaporomboʼe porã hag̃ua?

⁸ Santiago ningo ndaijestudioyvatéi vaʼekue, ha umi líder rrelihióso itiempopegua oiméne opensa raʼe hese la opensáva avei Pedro ha Juánre. Hesekuéra ojeʼe vaʼekue “ilápi mbykyha” ha avave ‘nomombaʼéi chupekuéra’ (Hech. 4:13). Péro Santiago oporomboʼekuaaiterei vaʼekue, ha upéva ojekuaa porã pe kárta oskrivi vaʼekuére. Ikatu oime ñande ñandeeskuelaʼi avei, péro ikatúnte avei ñaporomboʼe porã Jehová ñanepytyvõ rupi ijespíritu ha iñorganisasión rupive. Koʼág̃a ñaanalisamíta mbaʼéichapa Santiago oporomboʼe vaʼekue, ha mbaʼépa ikatu ñaaprende chugui.

9. ¿Mbaʼéichapa oporomboʼe vaʼekue Santiago?

⁹ Santiago oporomboʼe lája ndahasýi vaʼekue ñantende hag̃ua. Upévare umi ohendúva chupe pyaʼe ontende mbaʼépa ojapo vaʼerã. Por ehémplo, haʼe omboʼe vaʼekue kristianokuéra oaguanta vaʼerãha umi inhustísia ha ndovaleiha opyta ipyʼaro. Péro la heʼi lája upéva ifasileterei ñantende hag̃ua. Haʼe heʼi: “Ñande jaʼe ovyʼaitereiha umi oaguanta vaʼekuére heta mbaʼe ijetuʼúva. Peẽ ningo pehendúma Job oaguanta hague heta mbaʼe, ha peikuaa avei Jehová ovendesi hague chupe, upéva rupive peẽ pehechakuaa Jehová oporombyasy ha oporoporiahuverekoha” (Sant. 5:11). Jahechaháicha,  Santiago oipuru vaʼekue Ñandejára Ñeʼẽ oporomboʼe hag̃ua. Haʼe oipuru Job ehémplo ohechauka hag̃ua umi ermánope Jehová siémpre opremiaha umi ifiélvape chupe. Santiago ndoipurúi vaʼekue umi palávra hasýva ñantende hag̃ua, upévare ndaipóri vaʼekue voi la nontendéiva chupe. Péicha ojapo rupi, la hénte imanduʼa Jehováre, ha ndahaʼéi hese.

10. ¿Mbaʼéichapa ikatu jakopia Santiago oporomboʼe lája?

¹⁰ Mbaʼépa ñaaprende: Ñaporomboʼe lája ifásil vaʼerã oñentende hag̃ua ha jaipuru vaʼerã Ñandejára Ñeʼẽ. Ñande ñaporomboʼe jave, jaipota la hénte ohechakuaa Jehová iñaranduha ha ojepyʼapyha hesekuéra. Ñande ndajaipotái haʼekuéra opensa ñande ñandevaletereiha (Rom. 11:33). Upévare ñaporomboʼéta jave, siémpre jaipuru vaʼerã Ñandejára Ñeʼẽ. Por ehémplo, jaʼe rangue ñane estudiántepe mbaʼépa ñande jajapóta peteĩ situasiónpe, jahechauka vaʼerã chupe umi ehémplo oĩva la Bíbliape ohechakuaa hag̃ua mbaʼéichapa Jehová opensa ha oñeñandu. Péicha ñane estudiánte oñehaʼãta ombovyʼa hag̃ua Jehovápe, ndahaʼéi ñanembovyʼa hag̃ua ñandéve.

11. ¿Mbaʼépa ijetuʼu vaʼekue algúno kristiánope, ha mbaʼe konséhopa Santiago omeʼẽ chupekuéra? (Santiago 5:13-15).

¹¹ Santiago oikuaa vaʼekue mbaʼépa ijetuʼu iñermanokuérape. Pe kárta oskrivi vaʼekuépe Santiago, ojekuaa haʼe oikuaa hague mbaʼe provlémapa ohasa hína umi ermáno, upévare omeʼẽ chupekuéra umi konsého ideprovéchotava chupekuéra. Por ehémplo algúno ermánope ijetuʼu vaʼekue ojapo hag̃ua la ojeʼéva chupekuéra (Sant. 1:22). Ótro katu omombaʼeve umi iplátavape (Sant. 2:1-3). Ha algúnope katu ijetuʼu ojoko hag̃ua ijuru (Sant. 3:8-10). Koʼã kristiáno oho vaíma hína kuri hese, péro Santiago nopensái hesekuéra ndaikatumoʼãveimaha okambia. Haʼe mborayhúpe oakonseha chupekuéra, péro heʼi porã avei chupekuéra mbaʼépepa okambia vaʼerã. Ha upéi heʼi ijetuʼúrõ algúnope okambia hag̃ua toñemboja umi ansiánore (elee Santiago 5:13-15).

12. ¿Mbaʼépa jareko vaʼerã enkuénta ñapensárõ ñane estudiánte ndaikatumoʼãiha okambia?

¹² Mbaʼépa ñaaprende: Jaikuaárõ jepe mbaʼépa ijetuʼu umi ótrope, nañapensái vaʼerã naipohãveimaha hikuái. Heta estudiántepe ikatu ijetuʼu ojapo hag̃ua la oaprendéva (Sant. 4:1-4). Ha ikatu voi oraha chupekuéra un tiémpo okambiaite hag̃ua ha oiko hag̃ua kristiáno teéicha. Santiago ojapo haguéicha, ñande avei tekotevẽ ñandepyʼaguasu ha jaʼe ñane estudiántepe mbaʼépepa tekotevẽ okambia. Péro jajerovia vaʼerã hesekuéra, ani ñapensa ndaikatumoʼãiha okambia hikuái. Jehová ningo omoag̃ui hína ijehe umi persóna iñumíldevape, ha haʼe voi oipytyvõ chupekuéra okambia hag̃ua tekotevẽhápe (Sant. 4:10).

13. Según Santiago 3:2, ¿mbaʼépa orrekonose vaʼekue Santiago?

¹³ Santiago nopensái vaʼekue iñimportanteveha ótrogui. Santiago nopensái vaʼekue upéicha, Jesús haʼéramo jepe iñermáno majór ha orekóramo jepe heta priviléhio kongregasiónpe. ¿Mbaʼérepa ikatu jaʼe upéva? Pórke oñeʼẽvo umi ótro kristiánope heʼi voi chupekuéra: “Che ermanokuéra pohayhuetéva” (Sant. 1:16, 19; 2:5). Santiago noñehaʼãi vaʼekue umi ótro opensa hag̃ua hese haʼe ndojavyiha voi. Upéva rangue haʼe heʼi: “Enterovéva ningo jajavy heta vése” (elee Santiago 3:2).

14. ¿Mbaʼérepa ñarrekonose vaʼerã ñande avei jajavyha?

¹⁴ Mbaʼépa ñaaprende: Ñanemanduʼa vaʼerã enterovéva jajavyha. Ndovaléi ñantendeka ñane estudiántepe ñande jahasaha chupe entéro mbaʼépe ha núnka nañanderupytymoʼãiha. ¿Mbaʼérepa? Pórke ñane estudiánte  opensárõ ñande ndajajavyiha voi, haʼe opensáta núnka ndaikatumoʼãiha oiko Jehová oipotaháicha. ¿Mbaʼéichapa ikatu ñaipytyvõ ñane estudiántepe ani hag̃ua opensa upéva? Ikatu jaʼe chupe ñandéve avei sapyʼánte ijetuʼuha jajapo hag̃ua la Biblia heʼíva, ha upéi ñamombeʼu chupe mbaʼéichapa Jehová ñanepytyvõ ñaneñeʼẽrendu hag̃ua chupe. Péicha jajapórõ ñane estudiánte opensáta si ikatutaha oservi Jehovápe.

15. ¿Mbaʼéichapa vaʼekue umi ehémplo oipurúva Santiago? (Santiago 3:2-6, 10-12).

¹⁵ Santiago oipuru vaʼekue umi ehémplo opokóva la hénte korasõre. Jaikuaángo pe espíritu sánto oipytyvõ hague chupe upearã, péro avei tuicha oipytyvõne raʼe chupe opensávo umi ehémplo oipuru vaʼekuére iñermáno majór Jesús. Umi ehémplo Santiago oipuru vaʼekue ikártape ifásil vaʼekue oñentende hag̃ua, upévare umi hénte pyaʼe opilla vaʼekue mbaʼépa ojapo vaʼerã (elee Santiago 3:2-6, 10-12).

16. ¿Mbaʼérepa iñimportantete jaipuru umi ehémplo?

¹⁶ Mbaʼépa ñaaprende: Jaipuru umi ehémplo ideprovéchova. Oikoitéramo la ñane ehémplo umi hénte ikatúta oñeimahina la jaʼéva chupe, haʼetéta voi ohechapáva hína. Péicha jajapóramo umi hénte imanduʼáta umi enseñánsa bíblica iñimportantevévare. Jesús ivale vaʼekue oipuru hag̃ua la ehémplo, ha la iñehemplokuéra siémpre oikoite vaʼekue. Ha iñermáno Santiago osegi vaʼekue avei iñehémplo. Ñaanalisamína koʼág̃a peteĩva umi ehémplo Santiago oipuru vaʼekue ha jahecháta mbaʼérepa la oikoite raʼe.

17. ¿Mbaʼérepa oikoite pe ehémplo oipuru vaʼekue Santiago? (Santiago 1:22-25).

¹⁷ (Elee Santiago 1:22-25). Pe ehémplo oipuru vaʼekue Santiago oikoite kuri. ¿Mbaʼérepa jaʼe upéva? Santiago oipota kuri umi ermáno oikuaa ojapo vaʼerãha la oleéva Ñandejára Ñeʼẽme, péichamante ideprovéchota chupekuéra la oleéva. Ha upearã oipuru peteĩ ehémplo enterovéva ikatúva ontende. Haʼe oñeʼẽ peteĩ kuimbaʼe omañávare ijehe espéhope. Ko kuimbaʼe omaña ijehe ha ohecha tekotevẽha omoĩ porã álgo ipinta porãve hag̃ua, péro mbaʼeve jey ndojapói. ¡Reieténgo upéicharõ ko kuimbaʼe omaña la espéhope! ¿Ajépa? Ñande avei reiete jaleéta Ñandejára Ñeʼẽ, jahecháramo tekotevẽha ñakambia peteĩ mbaʼépe péro ndajajapói jey mbaʼeve.

18. ¿Mbaʼépa umi mbohapy mbaʼe jareko vaʼerã enkuénta jaipurúta jave umi ehémplo?

 ¹⁸ Jaipuru jave umi ehémplo jakopiakuaa Santiágope ha jajapo koʼã mbohapy mbaʼe: 1) Pe ehémplo jaipurúva ñanepytyvõ vaʼerã hesakã porãve hag̃ua la ñamboʼeséva, 2) ifásil vaʼerã oñentende hag̃ua, ha 3) jaexplika vaʼerã mbaʼépa la ñamboʼeséva pe ehémplo rupive. Ndajaikuaáiramo mbaʼe ehémplopa jaipurúta ikatu jaheka pe Índice de las publicaciones Watch Tówerpe oĩva españólpe. Upépe oĩ peteĩ párte hérava “Ejemplos”. Ko pártepe jatopáta heta ehémplo oikoitéva. Anínte ñanderesarái umi ehémplo ñanepytyvõ vaʼerãha ñamboʼe hag̃ua umi mbaʼe iñimportantevévante, pórke jaipurúramo hetaiterei ehémplo umi ñanerendúva ojesareapátama. Ñande ningo jaipota oiko ñandehegui peteĩ mboʼehára katupyry, péro ndahaʼéi umi hénte ñanemombaʼe hag̃ua síno ñaipytyvõ hag̃ua hetave héntepe oservi hag̃ua Jehovápe.

19. ¿Mbaʼéichapa jahechaukáta jahayhuha ñane ermanokuérape?

¹⁹ Santiago oreko vaʼekue peteĩ ermáno majór perfékto ha okakuaa vaʼekue hendive. Ñande ndajarekói upe priviléhio péro si jaservi Jehovápe ha jareko hetaiterei ermáno ha ermána. Péva peteĩ priviléhionte avei. ¿Mbaʼéichapa jahechaukáta jahayhuha ñane ermanokuérape? Jajeheʼávo hesekuéra, ñaaprendévo chuguikuéra ha japredika ha ñaporomboʼévo hendivekuéra. Ñañehaʼãramo jaiko, ñapensa ha ñaporomboʼe Santiágoicha, ñamombaʼeguasúta Jehovápe. Péicha umi hénte ipyʼaporãva oñemoag̃uiséta avei ñande Túa yvagapegua Jehováre.