1. Piav seb Yakaunpaus tsev neeg zoo li cas tiag.

 YAKAUNPAUS loj hlob hauv ib tse neeg uas ntseeg Yehauvas heev. * Nws niam thiab nws txiv nkawv yeej muab lub siab lub ntsws khi rau ntawm Yehauvas tag nrho thiab teev tiam Yehauvas kawg nkaus nkawv rab peevxwm. Yeej yog ib qho zoo kawg li tias Yakaunpaus yug los nyob rau ib tse neeg zoo li no thiab nws tus tijlaug los haj tseem yog tus Mexiyas.

2. Vim li cas Yakaunpaus tsim nyog saib taus Yexus?

² Thaum peb zaum tsaws xav txog Yakaunpaus lub neej, yeej tsim nyog nws ua Yexus ib tug thwjtim thiab saib taus Yexus. (Mathais 13:55) Thaum Yexus muaj 12 lub xyoos xwb, nws twb nkag siab Vajtswv Txojlus zoo heev lawm. Nws ua rau tej xibhwb hauv lub nroog Yeluxalees yoob tag tsis pom qab xav rau zaj twg. (Lukas 2:46, 47) Tej zaum Yexus thiab Yakaunpaus nkawv los kuj yog kws ntoo ces nkawv ob kwvtij ib leeg yeej paub ib leeg zoo heev. Muaj ib tug kwvtij npe hu ua Nathas Nuas (Nathan Knorr) tau hais tias: “Tus neeg yus ua haujlwm nrog mas yus yeej sib paub dua.” * Tsis tas li ntawd, Yakaunpaus pom tias “Yexus loj hlob zoo, muaj tswvyim, nws ua haum Vajtswv siab thiab haum neeg siab.” (Lukas 2:52) Txawm Yakaunpaus paub txog tej no los nws haj tseem tsis kam qees ua Yexus ib tug thwjtim.

3. Thaum Yexus ua Yehauvas tes haujlwm, Yakaunpaus coj li cas xwb?

³ Yakaunpaus tsis kam ua Yexus ib tug thwjtim thaum Yexus pib ua Yehauvas tes haujlwm. (Yauhas 7:3-5) Tej zaum Yakaunpaus  kuj yog ib tug uas hais tias “Yexus vwm lawm!” (Malakaus 3:21) Tsis tas li ntawd, tsis muaj ib nqe Vajlugkub qhia rau qhovtwg hais tias Yakaunpaus nyob ntawm nws niam ib sab thaum Yexus dai rau saum tus ncej ntoo.​—Yauhas 19:25-27, NWT.

4. Nyob rau zaj kawm no, peb yuav piav txog 2 yam twg?

⁴ Tom qab no, Yakaunpaus mam li rais los ua Yexus ib tug thwjtim thiab ua ib tug txwj laus nyob rau hauv pawg ntseeg. Hauv zaj kawm no, peb yuav piav txog ob yam uas peb xyaum tau ntawm Yakaunpaus. Yam 1 yog ua neeg txo hwjchim thiab yam 2 yog txawj qhia Vajtswv Txojlus.

5. Piav seb tom qab Yexus los tshwm rau Yakaunpaus pom, nws lub neej zoo li cas.

⁵ Thaum twg Yakaunpaus mam li rais los ua Yexus ib tug thwjtim? Yog thaum Vajtswv tsa Yexus sawv rov qab los ces nws mus “tshwm rau Yakaunpaus pom, thiab tom qab ntawd nws los tshwm rau cov timthawj sawvdaws pom.” (1 Kauleethaus 15:7) Thaum Yakaunpaus pom li no thiaj hloov hlo nws lub neej lawm. Yog li ntawd, thaum nyob hauv lub nroog Yeluxalees ntawm ib cha tsev, thaum Vajtswv muab nws lub hwj huam dawb huv faib rau sawvdaws los Yakaunpaus kuj nyob rau ntawd thiab. (Tes Haujlwm 1:13, 14) Tom qab no uas yog thawj 100 xyoo, Yakaunpaus kuj yog ib tug ntawm pab uas ntaus thawj. (Tes Haujlwm 15:6, 13-22; Kalatias 2:9) Tsis tas li ntawd, ua ntej xyoo 62 tom qab Yexus yug, Vajtswv tshoov Yakaunpaus sau tau ib tsab ntawv rau cov xaiv tseg. Niaj hnub niam no los Yakaunpaus tsab ntawv haj tseem txhawb tau peb sawvdaws tab txawm peb yuav yog cov nyob hauv ntiajteb no mus ib txhis lossis yog cov yuav mus saum ntuj ceeb tsheej. (Yakaunpaus 1:1) Muaj ib tug txivneej hu ua Ntsauxifa (Josephus) sau txog cov Yudais tej keeb kwm tau hais tias tus Pov Thawj Hlob Ananias uas yog Anas tus tub, coj Yakaunpaus mus kom ces Yakaunpaus thiaj tau lub txim tuag. Yog li ntawd, Yakaunpaus yeej teev tiam Yehauvas mus txog ntua hnub nws txojsia tu.

6. Yakaunpaus zoo tsis thooj li tej thawj coj li cas?

⁶ Yakaunpaus yeej txo hwjchim kawg nkaus lawm tiag. Nws tus cwj pwm yeej zoo tsis thooj li tej thawj coj rau lub caij lub nyoog ntawd. Thaum Yakaunpaus muaj puav pheej tias Yexus yeej yog Vajtswv tus Tub tiag, nws txo hwjchim thiab hloov siab los ntseeg. Tiamsis nyob hauv lub nroog Yeluxalees, cov  ua thawj ntawm tej pov thawj tsis coj li ntawd. Lawv twb pom kiag Yexus tsa Laxalus sawv rov qab los muaj sia dua los lawv haj tseem ua ntsej muag lag dig tsis kam lees tias Yehauvas txib Yexus los. Lawv tseem tuav hauv ua phem yuav muab Yexus thiab Laxalus nkawv tua pov tseg. (Yauhas 11:53; 12:9-11) Tsis tas li ntawd, lawv tseem npog quj qees tsis pub leejtwg paub tias Yexus sawv hauv qhov tuag rov qab los lawm. (Mathais 28:11-15) Vim lawv lub siab tawv cuag pob zeb, lawv thiaj tsis lees yuav Yexus ua tus Mexiyas.

7. Vim li cas peb yuav tau txhob ua neeg khav theeb?

⁷ Peb khaws tau li cas tiag? Tsis txhob ua neeg khav theeb, Yehauvas thiaj cob qhia tau peb. Thaum ib tug neeg twg kis tau kab mob, nws lub plawv yuav tsis ntoj li qub lawm. Tib yam li ntawd, kev khav theeb zoo yam nkaus li tus kab mob ntawd ntag. Yog peb ua neeg khav theeb ces peb yuav tsis xav mloog thiab tsis xav coj raws li Yehauvas qhia. Cov Falixais lub siab ntsws tawv cuag pob zeb. Tab txawm lawv paub ntsoov tias Yexus yeej yog Vajtswv tus Tub thiab lub hwj huam dawb huv yeej nrog nraim nws los lawv yeej ua ntsej muag lag dig tsis paub qab tog hau xauv. (Yauhas 12:37-40) Lawv txojke khav theeb no ua rau lawv tsis tau txais txojsia ntev dhawv mus ib txhis. (Mathais 23:13, 33) Yog li ntawd, cia Vajtswv Txojlus thiab nws lub hwj huam dawb huv pab peb hloov peb tus cwjpwm, tej kev xav, thiab peb tej kev txiav txim siab. (Yakaunpaus 3:17) Nco ntsoov tias twb yog Yakaunpaus txo hwjchim thiab cia Yehauvas cob qhia, nws thiaj li txawj ntuas thiab txawj qhia lwm tus.

8. Muaj tej twg pab tau peb txawj qhia Vajtswv Txojlus?

⁸ Tej zaum Yakaunpaus yuav tsis kawm ntawv siab li luag. Cov thawj coj thiaj suav nws tam li Petus thiab Yauhas nkawv uas “tsis tau kawm ntawv.” (Tes Haujlwm 4:13) Txawm li ntawd los, Yakaunpaus yeej rau siab ntso kawm tsis tseg tsis tu kom nws thiaj pab tau lwm tus paub txog Yehauvas. Yog peb ua tib zoo mus nyeem phau ntawv Yakaunpaus ces peb yuav pom tias nws txawj qhia heev. Tab txawm peb tsis kawm ntawv siab cuag li luag los peb yeej muaj Yehauvas lub koom  haum thiab lub hwj huam dawb huv pab kom peb txawj ntse mus qhia nws Txojlus. Cia peb mus kawm ntxiv seb Yakaunpaus txawj qhia npaum li cas tiag xwv peb thiaj txawj qhia ib yam li nws.

9. Yakaunpaus txawj qhia npaum li cas?

⁹ Yakaunpaus piav thiab siv tej lus uas neeg nkag siab. Yog li ntawd, cov tibneeg uas mloog nws qhia thiaj txais raug lub ntsiab thiab khaws tau coj mus siv rau hauv lawv lub neej. Cia peb mus piav txog ib qho mentsis. Yakaunpaus qhia rau cov ntseeg tias vim li cas lawv yuav tau ua siab ntev nyiaj tej kev tsis ncaj ncees thiab tsis txhob cib nyeej. Nws sau tseg tias: “Cov neeg uas ua siab ntev nyiaj tej kev tsimtxom, peb hu lawv ua cov uas tau koob hmoov. Nej twb hnov lawm hais tias Yauj yog tus uas ua siab ntev, thiab nej twb paub lawm hais tias [Yehauvas] npaj txhua yam rau Yauj thaum kawg. Rau qhov [Yehauvas] muaj lub siab hlub thiab hmov tshua.” (Yakaunpaus 5:11) Raws li nqe no, nws tsuas siv tej lus uas neeg ib txwm nkag siab coj los qhia. Nws piav tias yog lawv nrog nraim Yehauvas yam nkaus li Yauj ces Yehauvas yuav pub nqi zog rau lawv. Thaum Yakaunpaus piav tej no, nws tsis yog hais raws li nws lub tswvyim rau luag qhuas tiamsis nws siv Yehauvas lub tswvyim kom luag thiaj qhuas Yehauvas.

10. Yakaunpaus pab kom peb txawj qhia Vajtswv Txojlus li cas?

¹⁰ Peb khaws tau li cas tiag? Nco ntsoov siv tej lus kom neeg nkag siab thiab muab Vajtswv Txojlus los qhia. Thaum peb mus qhia tibneeg txog Vajtswv, peb tsis txhob piav tej niag phab tej niag pheev kom ua rau luag qhuas tias peb txawj txawj qhia Vajtswv. Peb lub ntsiab lus yog kom lawv paub tias Yehauvas muaj tswvyim thiab hlub tshua lawv npaum li cas. (Loos 11:33) Qhov yuav pab peb ua tau li no yog peb nco ntsoov muab Vajtswv Txojlus los nyeem rau lawv mloog. Xws li, thaum ib tug peb qhia Vajlugkub rau nug txog ib yam dabtsi twg, tsis txhob maj nrawm nroos teb nws raws li tej peb xav. Peb yuav tau mus nyeem tej yam ntxwv hauv Vajtswv Txojlus rau lawv mloog thiab piav seb Yehauvas coj li cas. Ua li no, lawv thiaj coj tau tej yam ntxim Yehauvas siab.

11. Cov ntseeg muaj tej teeb meem twg thiab Yakaunpaus ntuas lawv li cas? (Yakaunpaus 5:13-15)

¹¹ Yakaunpaus hais phua hlo rau cov ntseeg tsis zais. Thaum peb nyeem phau ntawv Yakaunpaus, peb yuav pom tias Yakaunpaus nkag siab tej teeb meem uas cov ntseeg muaj thiab nws qhia seb lawv yuav tau coj li cas. Xws li muaj ib txhia ntseeg, lam mloog Vajtswv Txojlus tag dawb tag do xwb, lawv tsis muab siv rau hauv lawv lub neej. (Yakaunpaus 1:22) Hos muaj ib txhia pheej xaiv ntsej xaiv muag thiab saib taus tej neeg nplua nuj xwb. (Yakaunpaus 2:1-3) Hos muaj dua lwm cov tswj tsis tau lawv tus nplaig. (Yakaunpaus 3:8-10) Txawm cov ntseeg coj zoo yam li no los Yakaunpaus haj tseem rub siab ntev pab lawv. Yakaunpaus ua tib zoo ntuas lawv thiab txhawb kom cov kev ntseeg yau mus cuag cov txwj laus.​—Nyeem Yakaunpaus 5:13-15.

12. Peb yuav tau nco ntsoov li cas txog cov peb qhia Vajlugkub rau, peb thiaj yuav xav qhov zoo?

¹² Peb khaws tau li cas tiag? Tsis txhob zais, ua tib zoo hais phua hlo rau luag lwm tus thiab xav mus rau qhov zoo. Tej zaum yuav laug mentsis sijhawm cov peb qhia Vajlugkub rau mam li hloov tau lawv lub neej. Peb yuav tau ua lub siab tawv qhia tib yam li Yakaunpaus rau lawv paub seb lawv yuav tau hloov tej twg. Tej zaum kuj yoojyim hais tiamsis tsis yoojyim mloog. (Yakaunpaus 4:1-4) Txawm li ntawd los, peb yuav tau xav mus rau  qhov zoo thiab nco ntsoov tias Yehauvas rub cov txo hwjchim los ntseeg nws xwb. Ntxiv ntawd, Yehauvas tseem yuav txhab ntxiv dag zog kom lawv maj mam ua tib zoo hloov tau lawv lub neej.​—Yakaunpaus 4:10.

13. Raws li Yakaunpaus 3:2, Yakaunpaus coj li cas?

¹³ Yakaunpaus tsis tsab hlob txawm nws yuav yog Yexus tus kwv thiab muaj ntau teg haujlwm ua rau Yehauvas. Peb paub tseeb li no vim nws muab cov ntseeg hu ua “cov kwvtij uas kuv hlub.” (Yakaunpaus 1:16, 19; 2:5) Ntxiv ntawd, Yakaunpaus yeej tsis xav tias nws paub thiab txawj txhua yam. Nws thiaj hais tias: “Peb txhua tus pheej ib sij ua yuam kev ib zaug.”​—Nyeem Yakaunpaus 3:2.

14. Vim li cas zoo rau peb qhia rau cov kawm Vajlugkub tias peb txawj ua yuam kev tib yam nkaus?

¹⁴ Peb khaws tau li cas tiag? Nco ntsoov tias peb yog noob txaug neeg txhaum. Peb yuav tau txhob tsab ua loj rau cov peb qhia Vajlugkub pom. Peb tsis txhob ua rau lawv xav tias peb tsis txawj ua yuam kev. Yog peb ua rau lawv xav li ntawd ces lawv yuav tsis tuaj zog thiab xav tias lawv ua tsis tau haum Vajtswv siab. Yog li ntawd, peb yuav tau qhia phua hlo rau lawv tias muaj qee lub caij yeej nyuaj rau peb coj raws li tej hauv paus ntsiab lus hauv phau Vajlugkub. Tiamsis nco ntsoov tias tus uas pab tau peb yog Yehauvas. Yog peb piav li no rau lawv ces lawv yuav pom tias yeej tsis nyuaj teev tiam Yehauvas ua luaj twg.

15. Yakaunpaus puas siv tej lus piv txwv tob tob? (Yakaunpaus 3:2-6, 10-12)

¹⁵ Yakaunpaus txawj siv tej lus piv txwv kom raug neeg siab. Twb yog Vajtswv muab nws lub hwj huam dawb huv pab Yakaunpaus thiab Yakaunpaus kuj ua tib zoo kawm Yexus tej lus piv txwv. Nws thiaj txawj siv tej lus piv txwv yooj yooj yim coj los siv rau hauv nws tsab ntawv. Thaum neeg nyeem los lawv thiaj nthos nkaus tau lub ntsiab lus.​—Nyeem Yakaunpaus 3:2-6, 10-12.

16. Vim li cas peb yuav tau xyaum kom txawj siv lus piv txwv?

¹⁶ Peb khaws tau li cas tiag? Peb yuav tau siv tej lus piv txwv kom raug neeg siab. Yog peb txawj siv lus piv txwv ces tus mloog yuav khaws raug lub ntsiab lus. Tsis tas li ntawd, lawv yuav khaws tau Vajtswv tej ntsiab lus nyob hauv phau Vajlugkub. Yexus yog ib tug uas txawj siv lus piv txwv tshaj plaws. Twb yog Yakaunpaus xyaum Yexus, nws thiaj txawj. Cia  peb mus piav txog Yakaunpaus ib zaj lus piv txwv seb hais txog dabtsi.

17. Raws li Yakaunpaus 1:22-25, ua cas zaj lus piv txwv no ho hais tau raug neeg siab?

¹⁷ Nyeem Yakaunpaus 1:22-25. Yakaunpaus xav kom cov ntseeg txhob muab Vajtswv Txojlus khaws noj xwb tiamsis yuav tau khaws coj. Vim tibneeg niaj hnub siv iav los tsom ntsej muag, Yakaunpaus thiaj muab daim iav los ua piv txwv lawv thiaj li nkag siab. Tus uas pom nws lub ntsej muag ceb hauv daim iav tiamsis tsis muab so ces nws yuav poob ntsej muag. Zoo tib yam li ntawd, tus uas nyeem Vajtswv Txojlus tag tiamsis tsis muab siv rau hauv lub neej ces yuav puas meej.

18. Thaum peb siv lus piv txwv, peb yuav tau nco ntsoov 3 yam twg?

¹⁸ Cia peb xyaum Yakaunpaus li no kom peb thiaj txawj siv lus piv txwv: (1) Zaj lus piv txwv yuav tau phim lub ntsiab peb qhia. (2) Siv zaj lus piv txwv kom raug neeg siab. (3) Piav seb yuav muab siv hauv lawv lub neej li cas. Nco ntsoov tias lub koom haum luam tau ntau yam ntaub ntawv uas muaj lus piv txwv zoo heev. * Xws li thaum peb ntxuav tais diav. Yog peb muab lub xwb kuab los ntxuav xwb los yeej huv. Tiamsis yog peb muaj cov tshuaj ntxuav tais diav los pab ntxuav ces yuav huab yam huv dua. Zoo tib yam li ntawd, peb yuav tau siv lus piv txwv kom neeg thiaj txais raug lub ntsiab peb qhia. Yog peb siv lus piv txwv los txhob muab piav ua phab ua pheev. Siv kom tsim nyog xwb. Nco ntsoov tias peb tsis yog hais rau neeg qhuas tiamsis yog pab kom lawv paub Yehauvas, lawv thiaj hloov tau los nrog Yehauvas tsev neeg.

19. Peb coj li cas thiaj qhia tau tias peb zoo siab muaj tej kwvtij nkauj muam ntseeg?

¹⁹ Peb tsis muaj ib tug tijlaug zoo li Yakaunpaus uas tsis yog noob txaug neeg txhaum. Tiamsis peb muaj cov kwvtij nkauj muam ntseeg thoob plaws ntiajteb nrog peb teev tiam Yehauvas ua ke. Peb yuav tau nrog txhua tus sib poog, ib leeg pab cob qhia ib leeg, thiab mus qhia Vajlugkub ua ke. Yog peb coj tau li no ces yuav qhia tias peb txawj sib hlub sib pab tiag. Tsis tas li ntawd, Yehauvas los haj tseem yuav tau koob meej yog peb xyaum coj raws li Yakaunpaus tus xeeb ceem, nws tej kev coj noj coj ua, thiab txawj cob qhia lwm tus. Ces thaum ntawd peb yuav pab tau cov xib nrhiav Yehauvas kom los nrog nws sib raug zoo.