1. Padahka pasal ruang bilik James.

 JAMES, iya nya menyadi Jesus, dibesaika ba ruang bilik ti tetap ati ngagai Jehovah. Apai indai iya, Josep enggau Maria, amat rinduka Jehovah lalu seduai iya enggau naka ulih nyembah Jehovah. James bisi siti agi berekat. Menyadi iya ke tuai deka mansang besai lalu nyadi Messiah ti disemaya. Nya endang basa ti besai ba James laban iya sebagi ari ruang bilik nya!

2. Nama utai ke ngasuh James bebasaka menyadi tuai iya?

² James bisi mayuh kebuah bebasaka menyadi tuai iya. (Mat. 13:55) Ambika chunto, lebuh Jesus beumur 12 taun, iya nemu Jaku Petara enggau manah nyentukka bala pengajar ba Jerusalem balat alit ati enggau iya. (Luk. 2:46, 47) James engka bisi ngereja pengawa betukang kayu enggau Jesus. Ketegal nya, iya bisi peluang ngelala menyadi tuai iya enggau manah agi. Nathan H. Knorr suah madah, “Nuan deka ngelala seseiku orang enggau manah agi lebuh nuan gawa enggau iya.” * James mega meda ‘Jesus mansang besai sereta bepenemu-dalam, lalu dikerinduka Petara enggau mensia.’ (Luk. 2:52) Nya alai, kitai engka ngumbai James deka nyadi seiku ari bala murid Jesus ti keterubah. Tang ukai nya ke nyadi.

3. Nama digaga James lebuh Jesus berengkah ngereja pengawa nginjil?

 ³ Lebuh Jesus ngereja pengawa nginjil, James bedau nyadi murid iya. (Jhn. 7:3-5) Kebendar iya, James engka seiku ari sida Jesus sebilik ke ngumbai Jesus “nyau udah gila!” (Mrk. 3:21) Lalu nadai bukti ti nunjukka James bisi enggau indai sida, Maria, lebuh Jesus dipantang ba tiang perinsa.—Jhn. 19:25-27.

4. Nama deka dipelajarka kitai?

⁴ Nyau kelama, James arapka Jesus lalu iya nyadi seiku ari tuai gempuru ti dipebasa ba eklisia Kristian. Ba artikel tu, kitai deka bejuraika dua iti pekara ke ulih dipelajarka kitai ari James: (1) kebuah kitai patut mengkang baruh ati sereta (2) baka ni kitai tau nyadi pengajar ti landik.

5. Nama digaga James lebuh Jesus pegari di mua iya pengudah Jesus diangkatka idup baru?

⁵ Kemaya James berengkah nyadi murid Jesus? Pengudah Jesus diangkatka idup baru, ‘iya pegari di mua James, lalu udah nya, di mua semua sida rasul.’ (1 Kor. 15:7) Pengudah nya nyadi, nya baru James nyadi seiku ari murid Jesus. James bisi enggau bala rasul ke bukai lebuh sida nganti roh kudus ti disemayaka Jesus ba siti sadau di Jerusalem. (SKR. 1:13, 14) Udah nya, James bisi peluang nyadi seiku ari raban ti ngiring ba abad keterubah. (SKR. 15:6, 13-22; Gal. 2:9) Lalu kira-kira sebedau 62 Masihi, Jehovah milih James nulis surat ngagai bala orang Kristian ke dipilih ke serega. Enda ngira enti pengadang kitai idup ba serega tauka ba dunya, semua kitai tau bulih penguntung ari surat ke ditulis James. (Jas. 1:1) Nitihka Josephus, seiku pakar sejarah ba abad keterubah, imam besai orang Judah iya nya Ananias anak Anas ngasuh James diukum bunuh. James mengkang tetap ati ngagai Jehovah nyentukka ujung.

6. Nama kebuah kitai ngumbai James enda sama enggau bala tuai pengarap ba jeman nya?

⁶ James orang ke baruh ati. Nama kebuah kitai ulih ngumbai baka nya? Lebuh James meda bukti ti terang ke nunjukka Jesus nya Anak Petara, iya nerima nya enggau baruh ati. Tang bala tuai imam ba Jerusalem enda baka nya. Ambika chunto, sida nemu Jesus udah ngangkatka Lasarus idup baru. Tang ari ke nerima Jesus nya pengari Jehovah, sida  nguji deka munuh Jesus enggau Lasarus. (Jhn. 11:53; 12:9-11) Udah nya lebuh Jesus diangkatka idup baru, sida nguji deka ngelalaika pekara nya ari orang mayuh. (Mat. 28:11-15) Kati ulih nuan meda bida entara James enggau bala tuai pengarap tu? James orang ke baruh ati, tang bala tuai pengarap nya sumbung. Ketegal penyumbung sida, sida nulak Messiah.

7. Nama kebuah kitai enda tau sumbung?

⁷ Nama utai ke ulih dipelajarka kitai? Anang sumbung, tang nejuka Jehovah ngajar kitai. Baka penyakit ke ulih ngasuh jantung tusah gawa enggau manah, penyumbung ulih ngasuh kitai tusah deka ngasika iring Jehovah. Orang Parisi nejuka ati sida balat kieh. Ketegal nya, sida enggai nerima bukti ti nunjukka Jesus nya Anak Petara lalu iya bisi roh kudus Petara. (Jhn. 12:37-40) Penyumbung sida tau ngenusahka sida laban nya nagang sida ari bulih pengidup ti meruan. (Mat. 23:13, 33) Nya alai, kitai enda tau enda nejuka Jaku Petara sereta roh kudus Iya nulung kitai ngaga ubah ba ulah sereta runding kitai. Enggau nya, kitai ulih ngaga pemutus ti manah! (Jas. 3:17) Ketegal James baruh ati, iya nejuka Jehovah ngajar iya. Lalu, baka ke deka dikerandauka kitai lagi, iya ulih nyadi pengajar ti landik ketegal pemaruh ati iya.

8. Nama ulih nulung kitai nyadi pengajar ti landik?

⁸ James ukai orang ke bisi pelajar tinggi. Bala tuai pengarap engka ngumbai iya “ukai orang ke bepelajar, tang orang ke sengapa” baka rasul Peter enggau John. (SKR. 4:13) Tang James belajar nyadi pengajar ti landik. Kitai ulih meda nya lebuh kitai macha bup James ke ditulis iya. Baka James, kitai mega engka ukai orang ke bepelajar tinggi. Taja pia, enggau tulung ari roh kudus Jehovah sereta latih ke diterima ari gerempung Iya, kitai ulih nyadi pengajar ti landik. Aram kitai meresa chara James ngajar sereta utai ke ulih dipelajarka kitai ari iya.

9. Baka ni chara James ngajar?

⁹ James enda ngena leka jaku tauka penerang ke tusah dimeretika. Ketegal nya, orang  nemu nama patut digaga sida sereta chara ngereja nya. Peratika chara James nerangka ngagai orang Kristian kebuah sida patut natka ulah ti enda lurus lalu enda bedendam. Iya nulis: ‘Kitai ngumbai sida ke ngayanka ati ti tan nya beberekat. Kita udah ninga pasal Jop ke tan ati, lalu kita udah meda juluk ati Jehovah, pasal Jehovah ke penuh laban penyiru enggau pengasih.’ (Jas. 5:11) Ulih nuan beratika chara James ngajar? Iya bepanggai ba Jaku Petara. Iya ngena Jaku Petara nulung bala menyadi Kristian nemu Jehovah seruran ngupah orang ke tetap ati ngagai Iya, baka Iya ke udah ngupah Jop. James ngenataika poin iya ngena leka jaku sereta penerang ti senang dimeretika. Enggau chara nya, iya nulung orang nemu, ajar nya datai ari Jehovah, ukai ari iya.

10. Nama siti chara kitai tau nunda James lebuh ngajar?

¹⁰ Nama utai ke ulih dipelajarka kitai? Ngajar enggau chara ti mudah sereta bepelasarka Bup Kudus. Lebuh kitai ngajar orang, kitai ukai deka nunjukka pemayuh penemu kitai. Tang kitai deka sida nemu penalam penemu Jehovah sereta pengibuh Iya ke sida. (Rom. 11:33) Kitai ulih ngereja nya lebuh kitai seruran ngajar bepelasarka Bup Kudus. Ambika chunto, pemelajar Bup Kudus kitai engka napi sekeda penanggul. Tang ari ke madah ngagai sida utai ke deka digaga kitai, kitai ulih nulung sida berunding pasal chunto Bup Kudus sereta nemu asai ati enggau runding Jehovah bekaul enggau pekara nya. Udah nya, sida engka diperansang ngaga pemutus ketegal deka ngelantangka ati Jehovah, ukai kitai.

11. Nama penanggul ke ditapi orang Kristian maya jeman James, lalu nama jaku lalau ke diberi iya ngagai sida? (James 5:13-15)

¹¹ James nemu penanggul ke ditapi bala menyadi Kristian. Ari surat ke ditulis iya, James nemu penanggul ke ditapi bala menyadi Kristian. Ketegal nya, iya meri sida iring ngambika ulih mutarka penanggul sida. Ambika chunto, sekeda orang Kristian engka lubah nitihka jaku lalau. (Jas. 1:22) Sekeda bepilih mata. (Jas. 2:1-3) Ke bukai engka enda tetagangka jaku sida. (Jas. 3:8-10) Taja pan orang Kristian maya nya bisi pengelemi diri, tang James terus nulung sida. Iya meri jaku lalau enggau chara ti nelap, lalu enda ngelalaika utai ke patut digaga sida. Iya mega meransang sida ngiga tuai gempuru enti begunaka bantu kena ngaga ubah.—Bacha James 5:13-15.

12. Baka ni kitai ulih ngembuan runding ti positif lebuh nulung pemelajar Bup Kudus kitai?

¹² Nama utai ke ulih dipelajarka kitai? Ngembuan runding ti betul sereta positif pasal orang bukai. Mayuh ari pemelajar kitai engka tusah deka nitihka jaku lalau Bup Kudus. (Jas. 4:1-4) Sida engka begunaka awak ti panjai sebedau sida ulih muai ulah ti enda manah sereta ngemansangka sifat orang Kristian. Baka James, kitai enda tau enda berani madahka ngagai pemelajar kitai utai ke patut dikemansangka sida. Kitai mega patut mengkang positif. Kitai andal Jehovah mai orang ke baruh ati semak ngagai Iya lalu Iya mega deka meri sida pengering ngaga ubah ba pengidup.—Jas. 4:10.

13. Baka ke dipadah ba James 3:2, nama utai ditemu James?

¹³ James bisi runding ti betul pasal diri empu. James enda ngumbai diri penting agi ari bala menyadi Kristian ke bukai ketegal iya menyadi Jesus tauka iya megai tanggung pengawa ti spesial. Iya ngumbai bala menyadi Kristian nya “menyadi ke dikerinduka aku.” (Jas. 1:16, 19; 2:5) James  pan bisi pengelemi lalu iya enda ngelalaika nya. Iya madah: “Semua kitai bela ngereja mayuh macham penyalah.”—Bacha James 3:2.

14. Nama kebuah kitai patut sedia ngaku penyalah diri?

¹⁴ Nama utai ke ulih dipelajarka kitai? Semua kitai orang ke bedosa. Nama kebuah kitai enda patut ngumbai diri manah agi ari pemelajar Bup Kudus kitai? Enti pemelajar ngumbai kitai baka ke nadai kala ngereja penyalah, iya engka berasai asa ati lalu ngumbai diri enda ulih ngasika standard Petara. Nya alai, anang malu madahka ngagai pemelajar kekadang kitai pan tusah nitihka prinsip Bup Kudus. Kitai ulih nerangka baka ni Jehovah udah nulung kitai mutarka penanggul. Enggau nya, pemelajar kitai deka berasai diperansang, lalu iya mega deka nyembah Jehovah.

15. Baka ni gaya sempama ke dikena James? (James 3:2-6, 10-12)

¹⁵ James ngena sempama ke ulih negu ati orang. Taja pan James nerima tulung ari roh kudus, tang iya mega belajar ari sempama ke dikena menyadi tuai iya, Jesus. Sempama ke dikena James senang dimeretika lalu orang nemu utai ke patut digaga sida.—Bacha James 3:2-6, 10-12.

16. Nama kebuah kitai patut ngena sempama ke ulih negu ati?

¹⁶ Nama utai ke ulih dipelajarka kitai? Kena meh sempama ti negu ati. Lebuh nuan ngena sempama ti ngena, nuan nulung orang ngambarka utai ke diajar nuan. Lalu sida senang agi deka ingatka batang ajar Bup Kudus. Jesus landik ngena sempama, lalu menyadi iya James nunda teladan iya. Aram kitai berandauka siti ari sempama ke dikena James lalu meda kebuah sempama nya negu ati.

17. Nama kebuah sempama ke disebut ba James 1:22-25 amat negu ati?

¹⁷ Bacha James 1:22-25. Bisi mayuh kebuah sempama James pasal cheremin amat negu ati. Maya nya iya benung ngenataika poin tu: ngambika kitai tau bulih penguntung ari Jaku Petara, kitai ukai semina macha aja tang kitai patut ngaga ubah nitihka utai ke dibacha kitai. James milih sempama ke senang digambarka bala pemacha iya, iya nya orang ke meda gamal diri ba cheremin. Nama utai ke deka diajar iya? Enti seseiku orang meda gamal diri ba cheremin lalu meda utai ke patut  diubah iya tang iya nadai ngereja nya, ulah nya enda ulih mai penguntung ngagai iya. Sama mega, enti kitai macha Bup Kudus lalu nemu utai ke patut diubah tang nadai ngereja nama-nama, pengawa nya lebu ngapa.

18. Nama tiga iti pekara ke patut digaga kitai lebuh ngena sempama?

¹⁸ Lebuh ngena sempama, kitai tau nunda teladan James lebuh ngereja tiga iti pekara tu: (1) Tentuka sempama ke dikena nya ulih nulung nuan nerangka utai ke deka diajar nuan. (2) Kena meh sempama ke senang dimeretika orang. (3) Tentuka peninga nuan nemu utai ke patut digaga sida ari sempama nya. Enti nuan tusah deka ngiga sempama ti ngena, nuan tau ngiga ba Indeks Publikasi Menara Pengawal. * Dibaruh tajuk “Perumpamaan,” nuan deka tetemuka mayuh sempama ke ulih dikena nuan. Sempama tau disemaka enggau mikrofon. Baka mikrofon ke ngasuh nyawa kitai terang didinga, sempama mega tau ngasuh poin ke diajar kitai terang ba peninga kitai. Nya alai, uji meh ngena sempama lebuh nuan deka ngajar poin ti patut dikemeratka. Kingatka, kebuah ti pemadu beguna kitai deka ngemanahka chara kitai ngajar, iya nya deka nulung orang semak enggau Jehovah, ukai ngasuh orang muji pengelandik kitai.

19. Baka ni kitai nunjukka diri rinduka bala menyadi Kristian?

¹⁹ James bisi menyadi tuai ti sempurna, tang kitai nadai. Taja pia, kitai bisi basa ti besai nyembah Jehovah enggau bala menyadi Kristian kitai. Kitai nunjukka diri rinduka sida lebuh kitai begulai enggau sida, belajar ari sida sereta sama-sama nginjil enggau ngajar. Lebuh kitai enggau naka ulih nunda teladan James ba ulah sereta chara ngajar, kitai mai mulia ngagai Jehovah. Pia mega, kitai ulih nulung orang ke baruh ati semak enggau Apai kitai Jehovah.