1. Kyebhi kiweji jimbulula o mwiji wa Tiyaku?

TIYAKU, phange ya Jezú wakudila ku mwiiji wexile ni ukamba wambote ni Jihova. * O jitata jê, Zuze ni Madiya azolele kyavulu Jihova, exile mubhanga yoso ni yoso phala kumusidivila. O dibesá dyamukwa dyatambula Tiyaku, o kwijiya kwila o kota dyê mwene wexile o Mexiya amukanene. Sé phata, ujitu wadikota wexile nawu Tiyaku, kubhanga mbandu ya mwiji yú!

2. Ima yahi yejibhangesa Tiyaku kuxila kota dyê?

² Tiyaku wexile ni ima yavulu yejimubhangesa kuxila kota dyê. (Mat. 13:55) Mukifika, Jezú wejidile kyambote o Mikanda Ikôla, mukitala kya 12 kya mivu, mwene wabhangesa o alongexi a Jeluzaleme kudiwana kyavulu ni kwijiya kwê. (Luka 2:46, 47) Nange Tiyaku wakalakala kala kalupindelu ni Jezú. Mu kiki, mwene wejitena kwijiya dingi kyambote phang’yê. Phange Nathan H. Knorr wambe: “Eye udilonga kyavulu ni muthu kyoso ki ukalakala né kumoxi.” * Nange Tiyaku wamono we o kidi kiki: “Jezú anga u kala mù kula mu kitala ni mu kuvula o kwijiya, o mu ima yoso anga enda ni ku mu wabhela kwala Nzambi ni athu.” (Luka 2:52) Kyenyiki, nange tutena kubanza kwila Tiyaku mwéne wa dyanga kukituka dixibulu dya Jezú. Maji kikyene kyabhiti.

3. Kibanzelu kyahi kyexile nakyu Tiyaku kyoso Jezú kyamateka o ukunji wê?

³ Mu kithangana kya ukunji wa Jezú mu ixi, Tiyaku kakitukile hanji dixibulu dyê. (Nzwá 7:3-5) Mu kidi, nange Tiyaku wexile bhukaxi kajindandu abanzele kwila Jezú “wa tekuka.” (Mál. 3:21) Seku kima mu Bibidya kilondekesa kwila Tiyaku  wexile kumoxi ni manyâ, Madiya, kyoso Jezú kyafu kutaka.—Nzwá 19:25-27.

4. Madisá ebhi utwandadilonga?

⁴ Mukusuluka Tiyaku waxikana Jezú, exile kumuxila we kyavulu mu kilunga kya Jikidistá. Mu milongi yiyi twandamona madisá ayadi ututena kudilonga kuphangu ya Tiyaku: (1) Mukonda dyahi twatokala kusuluka mu kukala tu athu alenduka ni (2) kyebhi kitutena kukala tu alongexi ambote.

5. Ihi yabhange Tiyaku, kyamutukulukila Jezú kyoso mwene kyafukunuka?

⁵ Kithangana kyebhi Tiyaku kyakituka dixibulu dya fiyele dya Jezú? Kyoso Jezú kyamufukununa mwalunga, ‘wa tukulukila Tiyaku, anga u tukulukila jipoxolo joso.’ (1 Kol. 15:7) Kyazubha kudisanga ni Jezú, Tiyaku wakituka dixibulu dyê. Mwene wexile we mu dixilu, kyoso o jipoxolo kyexile mukingila o kikanenu kya kutambula o nzumbi ikôla, mu Jeluzaleme. (Ika. 1:13, 14) Mukubhita kithangana, Tiyaku wasangulukile mukusidivila mu kibuka kya utuminu mu hama ya dyanga. (Ika. 15:6, 13-22; Nga. 2:9) Tu ithangana ande dya muvu wa 62 K.K., bhukaxi ka nzumbi ikôla mwene wasoneka mukanda phala o Jikidistá a a undu. Kikale se o kidyelelu kyetu kya kutambula mwenyu ku dyulu mba mu ixi, etwenyoso tutena kukatula mbote mu mukanda yú. (Tiya. 1:1) O mukwa musoso Josefo, wambe kwila o Mukunji Wadikota, Ananiya, o Munzangala, mwene watumina kujibha Tiyaku. Tiyaku wakolokota mu ufiyele we kwa Jihova katé kyafu.

6. Mu ukexilu webhi Tiyaku kadifwanganene ni atwameni a jingeleja mu izuwa yê?

⁶ Tiyaku walendukile. Mukonda dyahi twamba kiki? Tala kyebhi o ukexilu wadivu Tiyaku kyoso Jezú kya mutudila o njimbu kiwadifwile ni wa atwameni avulu ajingeleja. Kyoso Tiyaku kyatendela kwila Jezú mwene wexile o Mon’â Nzambi, mwene ni kulenduka kwoso waxikina o kidi kiki. Maji o mutwameni wa akunji mu Jeluzaleme kikyene kyabhange. Mukifika, ene kaxikinine kwila Jezú wafukunwine Lazalu mwalunga. Kaxikinine we kwila Jezú amutumikisa kwala Jihova. Muveji dya kiki asoto ndunge phala kujibha Jezú ni Lazalu. (Nzwá 11:53; 12:9-11) Kupholo, kyoso Jezú kyamufukununa mwalunga, ene asoto kusweka o kidi kiki ku athu. (Mat. 28:11-15) O lwimbi lwa atwameni ajingeleja lwa abhangesa kudituna Jezú kala Mexiya.

7. Kyebhi kitutena kulenga o lwimbi?

 ⁷ Disá: Kana kukala umukwa lwimbi, kala polondo phala kudilonga ni Jihova. Kala o tumixibha twa xiti tutena kufidisa o kutitila kwa phumbulu ya muthu, kyene kimoxi we, o lwimbi lutena kutufidisa kubelesela o itendelesu ya Jihova. Kuma o lwimbi lwa Jifalizewu lwavudile kyavulu, ene aditunu kuxikina o kidi kya kwila, Jezú wexile ni nzumbi ikôla ya Nzambi ni kwila mwene wexile Mon’â Nzambi. (Nzwá 12:37-40) O lwimbi lulu, lwa afidisa kutambula o kidyelelu kya mwenyu wakalelaku. (Mat. 23:13, 33) Mukiki, kima kyambote etu kusuluka mu kwehela o Mak’â Nzambi ni nzumbi yê ikôla kulungulula o ukexilu wetu ni kufwinyisa o ixinganeku yetu ni ima itusola! (Tiya. 3:17) Kuma Tiyaku walendukile mwene wehela Jihova kumulonga. Kala kitwandamona, mukonda dya kulenduka kwê mwene wakituka hete mukulonga.

8. Ihi yandatukwatekesa kukituka alongexi ambote?

⁸ Tiyaku kadilongo kyavulu mu xikola. Sé phata atwameni ajingeleja a izuwa yê akexile mumona Tiyaku kala kyexile mutala o jipoxolo Phetele ni Nzwá, kala athu “ka zubha ku dilonga.” (Ika. 4:13) Maji Tiyaku wadilongo kukala mulongexi wa hete kala kitumona mudivulu dyambata o dijina dyê. Kala Tiyaku, etu nange kitwadilongo kyavulu mu xikola. Né kiki, ni kikwatekesu kya nzumbi ikôla ya Jihova, ni milongi itutambula mu kilunga kyê, tutena we kukituka tu alongexi ambote. Twandadilonga o phangu ya tuxila Tiyaku kala mulongexi wambote, ni kumona se madisá ahi ututena kudilonga.

9. Kyebhi kiweji jimbulula o ukexilu wakulonga wa Tiyaku?

⁹ Tiyaku kexile mutumbula izwelu yabhonzele ku itendela. Mukonda dyakiki o jingivwidi jê ejidile kyambote ihi yatokalele o kubhanga ni kyebhi kyatokalele o kubhanga. Mukifika, tala o ukexilu wabhebhuluka wa Tiyaku wakulonga kwila o Jikidistá atokala kukala polondo phala kutala hadi mu kwa atalatala sé kuyuka, maji se kubhaka phonzo. Mwene wasoneka: “Talesenu kuma etu twa amono kuzediwa, mukonda dya kukolokota kwâ. O kukolokota kwa Jobe mwa kwivwa, mwejiya we o disukilu dyê kyoso Nzambi kya mu zediwisa. Mbata o  Ngana wa vula o kukwatela henda ni kulendukila.” (Tiya. 5:11) Tala kuma o ima yexile mulonga Tiyaku yexile mutunda mu Mikanda Ikôla. Bhukaxi ka Mak’â Nzambi mwene wakwatekesa o jingivwidi jê kwijiya kwila, Jihova ubesowala yó alondekesa o ufiyele kwa Mwene kala kyabhangele Jobe. Tiyaku walongo o maka yá mukutumbula izwelu ki ibhonzo ku itendela. M’ukexilu yú, mwene kadisotela fuma, maji wabhana o kijingu kwa Jihova.

10. Ukexilu webhi dingi ututena kukayela o phangu ya Tiyaku kyoso kitwamulonga?

¹⁰ Disá: Bhebhulukisa o milongi yé, longa bhukaxi ka Mak’â Nzambi. Kyoso kitulonga akwetu, kitutokala kudilondekesa kwila twejiya ima yavulu, maji tulondekesa kwila Jihova mwene wala ni kwijiya kwavulu ni kyebhi mwene wabekota mukwa langa. (Loma 11:33) Etu we tutena kubhanga jinga kiki se tulonga bhukaxi ka Mikanda Ikôla. Mukifika, muveji dya kutangela ku maxibulu metu a Bibidya ihi itwejibhanga mu kididi kyâ, twatokala kwa akwatekesa kutendela o ixinganeku ya Jihova bhukaxi ka phangu ya Bibidya ni kyebhi mwene kyadivwa. Kyenyiki ene andakumbidila o ima yadilongo mukonda amesena kusangulukisa Jihova, kana etu.

11. Ibhidi yebhi yadibhana nayu o Jikidistá mu izuwa ya Tiyaku ni kitendelesu kyebhi kyatubhana mwene? (Tiyaku 5:13-15)

¹¹ Tiyaku wexile mukwa kuzwela o kidi. Mu mukanda wasoneka tutena kumona kwila Tiyaku wejidile o ibhidi yexile mubhita nayu o jiphange ni akwa, yu wabhana itendelesu yalungu ni kyebhi kyatokalele o kubhanga phala kutolola o ibhidi. Mukifika, sayi Jikidistá exile mulaleka kukumbidila o itendelesu yexile mutambula. (Tiya. 1:22) O amukwa exile mulondekesa katombo ku jingadyama. (Tiya. 2:1-3) O amukwa hanji kya abhonzele kulanga o dimi mba o izwelu yâ. (Tiya. 3:8-10) O Jikidistá jojo exile ni ibhidi yavulu, maji Tiyaku wadyelele kuma ene ejilungulula o idifwa yâ. Mwene wabhana itendelesu ni henda yoso maji se kubhana jihonda, yu waswinisa we yó abhingile kusota o tufunga phala kwa akwatekesa kulungulula o ukexilu wâ.—Tanga Tiyaku 5:13-15.

12. Kyebhi kitutena kusuluka mukukala ni kixinganeku kyambote kyalungu ni maxibulu metu a Bibidya?

¹² Disá: Kala umukwa kidi, maji sota kukala ni kibanzelu kyambote. Avulu utudilonga nawu o Bibidya nange kya abhonza kukumbidila o itendelesu. (Tiya. 4:1-4) Nange kubhinga thembu phala o muthu kweha o idifwa yayibha n’a kale ni idifwa yambote. Kala Tiyaku, kubhinga kuswina phala kuzwela ku maxibulu metu se idifwa yebhi yabhingi kulungulula. Etu we twabhingi kukala ni kibanzelu kyambote, ni kudyelela kwila Jihova wandasunga kwa mwene o athu alenduka ni kwabhana o kutena phala kulungulula o ima ku mwenyu wâ.—Tiya. 4:10.

13. Ihi yatonginina Tiyaku, kala kilondekesa o mukanda wa Tiyaku 3:2?

¹³ Tiyaku wexile ni kibanzelu kyambote kyalungu ni mwene. Tiyaku kexile muxinganeka kuma, mwene wabetele dingi kota o Jikidistá jamukwa ndenge mukonda dya kukala phange ya Jezú mba mukonda dya ikalakalu yakatunda yatambwile. Mwene wexana o Jikidistá kala ‘phange jê jakazola.’ (Tiya. 1:16, 19; 2:5) Mwene kadilondekesa kuma wexile muthu wayuka. Meveji dya kiki wazwela we yalungu ni mwene kyoso kyambe: “Etwene oso, twene mu tondajala mu ima yavulu.”—Tanga Tiyaku 3:2.

14. Mukonda dyahi twatokala kukala polondo phala kuxikina o itondalu yetu?

¹⁴ Disá: Lembalala kwila etwenyoso twa akwa ituxi. Kitutokala kuxinganeka kwila etu twa betakota o yó utwa mwalonga ndenge.  Mukonda dyahi kitwatokala kubanza kiki? Se tu bhangesa o maxibulu metu kuxinganeka kwila etu kitutondala, ene nange andazoza mukonda andaxinganeka kwila nuka andatena kubelesela ni kuyuka kwoso o itendelesu ya Jihova. Maji se tuxikina kwila etu we twene mubhanga ngunzu yavulu phala kukumbidila o itumu ya Jihova, ni kumujimbulula kyebhi Jihova kyene mutukwatekesa kulungulula o ima ku mwenyu wetu, twandakwatekesa o dixibulu dyetu kutendela kwila mwene we utena kusidivila Jihova.

15. Kyebhi ki utena kujimbulula o kifika kyate Tiyaku?

¹⁵ O kifika kyate Tiyaku kyatula ku mixima ya athu. Sé phata mwene amukwatekesa bhukaxi ka nzumbi ikôla, maji nange mwene wadilongo we kyavulu yalungu ni ifika yatele kota dyê, Jezú. O ifika yatumbula Tiyaku mu mukanda wê yabhebhuluka, kikubhonzo kutendela o madisá.—Tanga Tiyaku 3:2-6, 10-12.

16. Kyebhi kitutena kuta ifika itula ku mixima ya athu?

¹⁶ Disá: Sota kuta ifika itula ku mixima ya athu. Kyoso ki uta ifika yatokala, o athu kandakwivwa ngó o disá diwamwalonga, maji andatena kuxinganeka we mu ima iwamwalonga. O ifika yiyi yandakwatekesa o jingivwidi jé kulembalala o jipondo jabetakota jilonga o Bibidya. Jezú wexile mesene yakuta ifika itula ku mixima ya athu, o phangyê Tiyaku wakayela o phangu yê. Tutale kifika kimoxi kyatele Tiyaku, ni tumone se mukonda dyahi kyatula ku mixima ya athu.

17. Mukonda dyahi o kifika kitusanga mu mukanda wa Tiyaku 1:22-25 kitula mwene ku muxima?

¹⁷ Tanga Tiyaku 1:22-25. Sayi ima yavulu ibhangesa o kifika kya lumwenu, kyate Tiyaku, kutula mwene ku mixima ya athu. Mwene walongo disá dimoxi, kifwa, phala kukatula mbote mu Mak’â Nzambi, kitutokala ngó kutanga maji twatokala kukumbidila o ima itutanga. Tiyaku wasolo kifika kyeji kwatekesa o jingivwidi jê kutendela ni lusolo, o kifika kya diyala uditala mu lumwenu. Disá dyebhi dyalongo mwene? Kyeji kala wowa o diyala kuditala mu lumwenu, anga umona kwila bhupholo yê bhwala kama kabhingi kukatula, maji kabhange kima. Kyene we kimoxi, kyeji kala wowa kutanga o Mak’â Nzambi anga tumona kwila sayi maukexilu ni idifwa itwabhingi kulungulula maji kitubhangyetu kima phala kulungulula.

18. Ima yebhi itatu itwabhingi kubhanga kyoso kituta kifika?

 ¹⁸ Kyoso ki uta kifika utena kukayela o phangu ya Tiyaku mu kubhanga ima itatu: (1) Sota kwijiya se o kifika kiwandata kyandakukwatekesa kulonga o disá diwamesena. (2) Ta kifika kikwatekesa o jingivwidi jê kutendela ni lusolo. (3) Sota kwijiya se o athu andatendelela o disá diwamesena kulonga ni kifika kiki. Se umona kwila kwa kubhonzo kusanga ifika yatokala, tokwesa mu divulu dyetu Índice das Publicações da Torre de Vigia. Mu mbandu “Ilustrações” wandasangamu ifika yavulu itena kukukwatekesa. Lembalala kwila o ifika yedi kala o jimicrofone, yene itena kukwatekesa o jingivwidi kwijiya kyambote o maka uwamesena kulonga. Kyenyiki, sota kuta ngó o ifika phala kujimbulula o pondo yabetakota iwamesena kulonga. Mukidi etu kitubandekesa o uhete wetu wakulonga phala kudizangeleka, kana, maji phala kukwatekesa o athu kate bhwoso bhu tutena phala eze n’a bhange mbandu ku mwiji yú wasanguluka wa Jihova.

19. Kyebhi kitulondekesa kwila twasanguluka ni mwiji wetu mu nzumbi?

¹⁹ Tiyaku wexile ni ujitu wakukudila kumbandu dya kota dyê wa yuka, maji etu kana. Maji etu twala ni ujitu wakusidivila Jihova kumoxi ni mwiji wadikota wa Jikidistá ja mala ni ja ahatu. Etu tulondekesa o henda yetu mukudilunga nawu, mukudilonga ni ene, ni mukudisivila ni ufiyele woso kumbandu yawu mu kikalakalu kya kuboka ni kya kulonga. Kyoso kitubhanga yoso phala kukayela o phangu ya Tiyaku mu ukexilu wetu, mu ibhangelu yetu, ni mu uhete wetu wakulonga, tubhana kijingu kwa Jihova anga tukwatekesa o athu ni muxima woso phala kwazukamesa kwa Tata yetu ya henda, wala kudyulu.