1. Ngapi omu no vhura kufaturura epata lyoJakopo?

JAKOPO ogu ga kere mumbya Jesus, kwa kulilire mepata eli ngali limburukwa Jehova. * Vakurona vendi oJosefa naMaria, kwa here unene Jehova ntani kwa rugene paapa va hulira mokumukarera. Jakopo kwa haferere hena uwa umwe. Mukurwendi kwa ya kere Mesiyasa getumbwidiro. Azo kwa kere mfumwa zonene kwaJakopo mokuhamena kepata olyo!

2. Nokonda musinke deyi Jakopo ga heperere kuhuguvara mwamukurwendi?

² Jakopo ga kere nonokonda dononzi deyi ga heperere kuhuguvara mukurwendi. (Mat. 13:55) Pasihonena, apa Jesus ga kere nonomvhura 12, age kwa divire nawa Matjangwa ntani kwa tetukisire varongi womoJerusarema. (Ruk. 2:46, 47) Jakopo nampo nga rugana kumwe naJesus sirugana sokuhonga yikungu. Nsene asi yimo ngoso, eyi ngano ya mu ninkisire a dive nawa mukurwendi momunene. Nathan H. Knorr rorunzi nga uyunga asi: “Ove ngo lironga yininke yoyinzi kuhamena muntu gongandi ngomu ono kurugana kumwe nage.” * Jakopo nage ga mwene Jesus “ta kuru, ta kara nounongo wounzi, ano Karunga novantu kwa twikilire kumuhara.” (Ruk. 2:52) Morwa eyi, ose nampo kuvhura tu gazare asi Jakopo nage kwa kere gumwe govarongwa vaJesus wokuhova. Nye oyo kapisi yiyo ya horokere.

3. Yisinke ga gazarere Jakopo apa Jesus ga tamekere sirugana sendi sokuzuvhisa?

³ Apa Jesus ga kere pevhu mosirugana sendi sokuzuvhisa, Jakopo kapi ga kere gumwe govarongwa vendi. (Joh. 7:3-5) Jakopo  nampo kwa kere gumwe govanekoro vaJesus ava va gazarere asi Jesus “ana zaruka.” (Mar. 3:21) Nye kapi pwa kara umbangi ou au likida asi Jakopo kwa kere nozina Mariya apa va pamparere Jesus kositji.—Joh. 19:25-27.

4. Yirongwa musinke natu ka lironga mosirongwa esi?

⁴ Konyima, Jakopo kwa ya tulire epuro mwaJesus ntani kwa ya kere gumwe govakuronambunga womombungakriste zomosiruwo sovapositoli. Mosirongwa esi, natu ka lironga yirongwa yivali eyi natu lirongera ko kwaJakopo: (1) morwasinke natu linunupikira ntani (2) ngapi omu natu kara varongi wovawa?

5. Yisinke ga rugene Jakopo konyima zapa Jesus ga mu monekerere?

⁵ Siruwo musinke ga tamekere Jakopo kukara murongwa gwaJesus? Konyima zapa Jesus va mu vhumbwire, age kwa “ya monekere Jakopo ntani nye ga ya monekerere vapositoli navenye.” (1 Kol. 15:7) Jakopo kwa ya kere gumwe govarongwa vaJesus konyima zapa ga mu monekerere Jesus. Nage yipo ga kere apa vapositoli va ndindilire mpepo zokupongoka moJerusarema monzugo zekeguru ezi va kere. (Yirug. 1:13, 14) Ano konyima, Jakopo kwa ya kere gumwe gomoMbungagendesi zomosiruwo sovapositoli. (Yirug. 15:6, 13-22; Gar. 2:9) Komeho zomvhura 62, mpepo zokupongoka kwa mu pitisilire a tjangere mbilive koVakriste wovagwavekwa. Mbilive ozo kuvhura tu gwanene mo uwa, yikare asi ose kwa kara nehuguvaro lyokukaparukira pevhu ndi meguru. (Jak. 1:1) Mutjangi gumwe gomosiruwo sovapositoli gedina Josephus kwa tjanga asi Jakopo kwa mu dipagere morwa mpangera ezi ga geve mupristeli gomunene goMujuda Ananiyasa gomunona po. Jakopo nga limburukwa Jehova dogoro konomfa dendi.

6. Monkedi musinke Jakopo ga lisigire novampitisili womaukerelikarunga womomazuva gendi?

⁶ Jakopo nga linunupike. Morwasinke tuna kuuyungira ngoso? Tu tareni elisigo eli lyakere po pokatji komu Jakopo ga tere mbudi zaJesus ntani nomu sinzi sovampitisili womaukarelikarunga va zi tere. Apa Jakopo gaya dimbwilire asi Jesus kuna kara MunaKarunga, age kwa linunupikire nokutambura mbudi zendi. Nye oyo kapisi yiyo va rugene vapristeli wovanene womoJerusarema. Pasihonena, awo va yi divire asi Jesus ga pindwire Rasarusa koufe. Mevango lyokuyitambura asi Jehova yige ga tumine Jesus, awo kwa hetekerere ko kumudipaga kumwe naRasarusa. (Joh. 11:53; 12:9-11) Ano konyima zapa Jesus va mu vhumbwire koufe,  awo kwa hetekerere ko kuhorekera vantu mbudi ozo. (Mat. 28:11-15) Ano elinenepeko lyovampitisili owo womaukerelikarunga, kwa va ninkisire va dire kutambura Mesiyasa.

7. Morwasinke natu nyokerera po elinenepeko?

⁷ Eyi natu lirongera ko: Wa ha linenepeka ntani pulisira Jehova a ku ronge. Ngwendi moomu tupu uvera au ninkisa mutjima gu dire kurugana nawa, elinenepeko nalyo kuvhura kutuninkisa yi tu digopere kulimburukwa mavyukiso gaJehova. Vafalisayi kwa linenepekere, ano eyi kwa va ninkisire va dire kupura asi Jesus kwa kere MunaKarunga ntani age ga kere nompepo zokupongoka. (Joh. 12:37-40) Elinenepeko lyawo kwa kere siponga unene morwa eyi kwa va ninkisire va zumbanese ehuguvaro lyawo lyo ku ka gwana mwenyo gwanarunye. (Mat. 23:13, 33) Ayo ya kara nomulyo tu pulisire Nonkango daKarunga ntani nompepo zendi zokupongoka, yi rundurure yikara yetu, magazaro getu ntani matokoro getu. (Jak. 3:17) Mokumona asi Jakopo kwa linunupikire, age kwa pulisilire Jehova a mu ronge. Ntani ngomu natu ka yi mona, elinunupiko kwa mu ninkisire a kare murongi gomuwa.

8. Yisinke nayi tu vatera yipo tu kare varongi wovawa?

⁸ Jakopo kapi ga zire kelirongo lyokuzeruka. Vampitisili womaukerelikarunga womomazuva gendi, kwa mu tere ngwendi moomu va tere mupositoli Peturusa naJohanesa, ngovantu ava va dira kulironga ntani “awo kwa kere vantuuntu tupu.” (Yirug. 4:13) Nye Jakopo kwa lirongere kukara murongi gomuwa, ngamoomu tupu atu yi mono mombilive ezi ga tjenge. Ngwendi Jakopo, nampo nose kapi twa za kelirongo lyokuzeruka. Nye nampili ngoso, nevatero lyompepo zaJehova ntani nedeuro lyokutunda kombunga zendi, ose kuvhura kukara varongi wovawa. Tu zeni tu ka tare sihonena esi ga tu tulira po Jakopo ngomurongi ntani noku ka tara eyi natu lirongera ko.

9. Ngapi omu no faturura nkedi zaJakopo zokuronga?

⁹ Jakopo kapi ga ruganesere nonkango ndi mafatururo goudigu. Ngoyitundwamo, vapurakeni vendi va divire eyi va hepere kurugana ntani nomu nava yi rugana. Pasihonena, tu tareni nkedi zoureru ezi ga ruganesere Jakopo mokuronga Vakriste omu nava lididimikira va hana kukara nonkoko. Age kwa tjenge asi:  “Ose kutara ava va lididimika asi vantu woruhafo. One mwa zuvha kuhamena edidimiko lyaJoba neyi ga ya mu ruganene Jehova moruhura, eyi kwa mu ninkisire mu dimburure asi Jehova ga kara nonkenda zonene.” (Jak. 5:11) Konekeni asi Jakopo nga demenene koMatjangwa apa nga rongo. Age kwa ruganesere Nonkango daKarunga mokuvatera vapurakeni vendi va mone asi Jehova nkenye apa kurugwida kuwoko kwava ava mu limburukwa ngwendi Joba. Jakopo kwa rongere sirongwa oso pokuruganesa nonkango doureru ntani nomafatururo goureru. Monkedi ozo, age kapi tupu ga lihuguvarere mwene nye kwa huguvarere mwaJehova.

10. Monkedi musinke zimwe natu honena Jakopo nsene kuna kuronga?

¹⁰ Eyi natu lirongera ko: Ninka mbudi zoge zi kare zoureru ntani ronga pokuruganesa Nonkango daKarunga. Sitambo setu kapisi sikare sokuvatantera eyi twa diva, nye sokuvatantera kuhamena eyi ga diva Jehova ntani nomu a va pakere mbili. (Rom. 11:33) Ose kuvhura tu yi rugane oyo pokuruganesa Matjangwa. Pasihonena, mevango tupu lyokutantera varongwa vetu eyi va hepa kurugana, ngano tu va vatere va gazadare ko kuhamena yihonena yomoBibeli ntani noku va vatera va kwate egano omu Jehova a lizuvhu nomu a gazara. Makura awo ngava tura pasirugana eyi ava lirongo morwa va hara Jehova, nye kapisi morwa nyose.

11. Maudigu musinke va ligwanekerere nago Vakriste vamwe womomazuva gaJakopo ntani epukururo musinke ga va pere? (Jakopo 5:13-15)

¹¹ Jakopo nga kwata egano ukaro wovakwawo. Mombilive zendi, azo kulikida nawa-nawa asi Jakopo ga divire maudigu aga va ligwanekerere nago vapuli vakwawo ntani ga va pere magano kuhamena eyi va hepere kurugana. Pasihonena, Vakriste vamwe kwa va gusire siruwo sozinzi mokutura pasirugana mapukururo ogo. (Jak. 1:22) Ano vamwe kwa likidire elitondororo konongawo. (Jak. 2:1-3) Ano simpe hena, vamwe ngayi va karere udigu mokupangera mbuyungiso zawo. (Jak. 3:8-10) Vakriste owo kwa kere nomaudigu gomanene, nye Jakopo ga kere nehuguvaro asi ngava litjindja. Age kwa geve epukururo lyokuvyukilira monkedi zombili ntani kwa korangedere ava va hepere evatero mokupura vakuronambunga yipo vava vatere nokutura po malitjindjo.—Resa Jakopo 5:13-15.

12. Ngapi natu kara nomutaro gomuwa nsene kuna kuvatera varongwa vetu woBibeli?

¹² Eyi natu lirongera ko: Kwata egano ukaro wava wopeke ntani kara nomutaro gomuwa. Sinzi sovantu ava atu lirongo nawo, kuvhura nampo yi va karere udigu kutura pasirugana mapukururo gomoBibeli. (Jak. 4:1-4) Ayo kuvhura yi va guse siruwo sosire mokuhageka kurugana yininke yoyidona ntani nokutunga po yikara yoSikriste. Ngwendi Jakopo, twa hepa kukara nouradi mokutantera varongwa vetu apa nava hepa kuwapukurura. Twa hepa hena kukara nomutaro gomuwa kwawo ntani noku huguvara asi Jehova nga kokera kwendi vantu wokulinunupika ntani age ngava pa nonkondo yipo va ture po malitjindjo meparu lyawo.—Jak. 4:10.

13. Ngomu va yi likida mwaJakopo 3:2, yisinke ga dimbwilire Jakopo?

¹³ Jakopo kwa kere nomutaro gomuwa kwamwene. Jakopo kapi ga lizuvhire asi age mulyo unene morwa yeeyi ga kere mumbya Jesus ndi yitumbukira eyi ga kere nayo. Age nga tumbura Vakriste vakwawo asi “vakwetu wokuhara.” (Jak. 1:16, 19; 2:5) Age kapi ga hetekerere ko kuninkisa wopeke va gazare asi age ga sikilira mo. Nye mevango lyokuyirugana oyo, age kwa lihamesere mwene mononkango edi ga uyungire asi: “Natuvenye kulipuka yikando yoyinzi.”—Resa Jakopo 3:2.

14. Morwasinke natu tambwira mapuko getu?

 ¹⁴ Eyi natu lirongera ko: Diworoka asi natuvenye tu vananzo. Kapisi tu gazare asi ose mulyo unene kupitakana ava a tu rongo. Morwasinke? Nsene tu ninkisa murongwa gwetu a gazare asi ose kapi atu tura mapuko, ayo kuvhura ngayi mu ninkise a gazare asi kapi ngayi mu tompoka kusikisa mo nompango daKarunga. Nye nsene tu mu tantera asi ayo kapi ya tu karerere ureru nkenye apa kutura pasirugana nompango domoBibeli ntani noku mu fatwilira omu Jehova ga tu vatera yipo tu ture po malitjindjo, monkedi zangoso ose ngatu vatera murongwa gwetu a dimburure asi nage kuvhura yi mu tompoke kukarera Jehova.

15. Yifanekeso musinke ga ruganesere Jakopo? (Jakopo 3:2-6, 10-12)

¹⁵ Jakopo kwa ruganesere yifanekeso eyi ya gumine vantu konomutjima. Mpepo zokupongoka za mu vaterere, nye hena ga lirongerere ko yoyinzi koyifanekeso eyi nga ruganesa mukurwendi Jesus apa nga rongo. Jakopo kwa ruganesere yifanekeso youreru mombilive zendi ntani youreru kutura pasirugana.—Resa Jakopo 3:2-6, 10-12.

16. Morwasinke natu ruganesera yifanekeso yoyiwa?

¹⁶ Eyi natu lirongera ko: Ruganesa yifanekeso yoyiwa. Nsene o ruganesa yifanekeso yoyiwa, ove ngo vatera vantu va mone momagano eyi ono kuvaronga. Yininke eyi ngava mona momagano gawo, ngayi va vatera va diworoke mausili gomulyo gomoBibeli. Jesus yige ga divire po nawa kuruganesa yifanekeso yoyiwa, ano mumbyendi Jakopo nage kwa kweme sihonena sendi. Tu zeni tu ka tare sifanekeso simwe esi ga ruganesere Jakopo ntani noku ka tara asi morwasinke sa karera sifanekeso sosiwa.

17. Morwasinke sifanekeso esi sa kara mwaJakopo 1:22-25 sa karera sosiwa?

¹⁷ Resa Jakopo 1:22-25. Sifanekeso saJakopo sontarero kuna kara sifanekeso sosiwa unene morwa nokonda dongandi. Age kwa rongere sirongwa esi asi mokugwanena mo uwa moNonkango daKarunga, twa hepa kurugana ko yoyinzi kupitakana tupu kudiresa ntani nokutura pasirugana eyi atu resa. Jakopo kwa ruganesere sifanekeso esi va kwete egano usimbu vapurakeni vendi, sokuhamena muntu ogu ana kulitara montarero. Yisinke ga tembe apa ga ruganesere sifanekeso oso? Ayo ugova komuntu nsene a litara montarero nokumona yuma korutu  rwendi eyi ga hepa kuwapukurura, nye a dire kurugana ko yuma. Mokulifana, ayo ugova nsene tu resa Nonkango daKarunga noku dimburura yuma eyi twa hepa kutjindja kuhamena nkareso zetu, nye tu dire kurugana ko yuma.

18. Yininke musinke yitatu twa hepa kudiworoka nsene kwa kuruganesa yifanekeso?

¹⁸ Nsene kuna kuruganesa sifanekeso, kuvhura o honene sihonena saJakopo pokurugana yininke yitatu: (1) Divilisa asi sifanekeso esi ono horowora nasi ka ku vatera mokukafaturura nawa sitwa sosirongwa esi ono kukaronga. (2) Ruganesa sifanekeso esi nava kwata egano usimbu vapurakeni woge. (3) Faturura paureru omu nava tura pasirugana sitwa somosifanekeso oso. Nsene kukudigopera kugwana yifanekeso yoyiwa, tara koWatch Tower Publications Index. Tara konhi zosiparatjangwa “Yifanekeso.” Ove ngo vhura kugwana ko yifanekeso yoyinzi eyi novhura kuruganesa. Diworoka asi yifanekeso kwa fana ngwendi embako. Ayo ngayi ninkisa sitwa sosirongwa esi ono kuronga si zuvhike nawa. Ruganesa sifanekeso mokufaturura magano gomulyo aga ono hara kuronga. Konda zeyi natu wapukurwira udivi wetu wokuronga, kapisi asi yipo vantu va tu mone asi ose kuronga nawa, nye mokuvatera vantu wovanzi yipo va ya hame kepata lyaJehova.

19. Ngapi omu natu yi likida asi twa hara vanavazinyetu?

¹⁹ Jakopo kwa kere namukurwendi gokusikilira mo, nye ose kapi twa kara nagumwe. Nye nampili ngoso, ose kukarera Jehova kumwe nepata lyovanavazinyetu. Ose kulikida eharo lyetu kwawo apa atu kara kumwe nawo, pokulirongera ko koyihonena yawo ntani pokurugana kumwe nawo mosirugana sokuzuvhisa nokuronga. Apa atu kondjo paapa twa hulira tu honene Jakopo monkareso zetu, moyirugana yetu ntani monkedi omu atu zuvhisa, monkedi zangoso ose kufumadeka Jehova ntani noku vatera vantu wonomutjima donongwa va hedere pepi naGuhyetu gemeguru geharo.