1. Ino mukwashi wakwe Jemusi inga mwausansulula buyani?

 JEMUSI mukwabo Yesu wakakomenena mumukwashi wakalinga uyumu lwakumushimu. Josefu alimwi a Maliya bashali bakwe, bakalinga kumusuni abuumbi Yehova alimwi bakalinga kucita nsheenga bacikonsha kwaamba ayi bamusebensele. Kuli coolwe acimwi Jemusi ncaakalinga kucite. Yesu munene wakwe wakalinga kusa mukuba Mesiya wakashomeshekwa. Jemusi wakalinga kucite coolwe cinene abuumbi cakuba mumukwashi uyu.

2. Ino nshiinshi shakalinga kweelete kupa Jemusi kulemeka munene wakwe?

² Kwakalinga sheebo shiinji shakalinga kweelete kupa Jemusi kulemeka munene wakwe. (Mate. 13:55) Kucakubonenaako, Yesu wakalinga kweeshi kabotu Malembo cakwaamba ayi ndyaakalinga kucite myaaka 12, wakakankamika bafundishi mu Jelusalemu abo bakalinga kwiite abuumbi. (Luka 2:46, 47) Jemusi alyeelete wakalinga kusebensa ncito yakubesa pomwi a Yesu. Na mboboobo, nkokwaamba ayi wakamushiba kabotu abuumbi munene wakwe. Ba Nathan H. Knorr liinji bakalinga kwaamba ayi, “Tulashiba shiinji pamuntu umwi na twasebensaakwe.” * Alimwi Jemusi alyeelete wakabona ‘Yesu mbwakalinga kukula muciimo amubusongo alimwi akuba mwaana ukondelesha Lesa abantu boonse.’ (Luka 2:52) Aboobo mpashi inga twayeeya ayi Jemusi wakalinga pa bashikwiiya bakutaanguna bakwe Yesu. Sombi ubu teshi mbocakalinga.

3. Ino nshiishi Jemusi nshaakacita Yesu ndyaakatalika kusebensa ncito yakushimikila?

³ Yesu ndyaakalinga kusebensa ncito yakushimikila pacishi, Jemusi taakwe kuba shikwiiya wakwe. (Joni 7:3-5) Alimwi Jemusi alyeelete wakalinga pabamakwabo Yesu abo bakalinga kwaamba  ayi Yesu “wacinkuka.” (Maako 3:21) Alimwi Baibo taitondeshiiwo ayi Jemusi wakalinga a banyina ba Maliya, Yesu ndyaakalinga kucaikwa pacisamu cakupenshesha.—Joni 19:25-27.

4. Ino nshiinshi nsheshi twiiye?

⁴ Mukuya kwaciindi, Jemusi wakashoma muli Yesu alimwi wakaba munene ulemekwa mulibungano lya Bwineklistu. Mumutwi uyu, tutobandika pashiiyo shobilo nsheenga tweeya kuswa kucakubonenaako cakwe Jemusi: (1) ncetuyandikila kutolelela kuba baliceesha alimwi (2) nsheenga twaciita kwaamba ayi tunokwiisha kabotu.

5. Ino Jemusi wakacita buyani Yesu ndyaakaboneka kuli nguwe pesule lyakwaamba ayi wabushikwa?

⁵ Ino ndilili Jemusi ndyaakaba shikwiiya wakwe Yesu? Yesu ndyaakabushikwa kuswa kubafu, “wakaboneka kuli Jemusi, mpeeke pesule kubatumwi boonse.” (1 Koli. 15:7) Pesule lyakwaamba ayi Jemusi wabonana a Yesu paciindi ici, wakaba shikwiiya wakwe Yesu. Alimwi wakalingawo batumwi ndyebakalinga kulindila kutambula mushimu usalashi kabali mucipinda capeculu mu Jelusalemu. (Milimo 1:13, 14) Mukuya kwaciindi, Jemusi wakaba acoolwe cakuba wamu likoto litanjilila, lya muciindi ca batumwi. (Milimo 15:6, 13-22; Gala. 2:9) Alimwi mwaaka wa 62 C.E. kootana kushika, Jemusi wakatanjililwa a mushimu usalashi kulembela nkalata Beneklistu bananikitwe. Nkalata njaakalemba ilatucafwa aswebo munshiku shino, inga caba ayi tulalangila kukala kwamuyayaya pacishi na kwiculu. (Jemu. 1:1) Kweelena anshakaamba wakeeya makani akale kale wamuciindi ca batumwi waliina lya Josephus, Jemusi wakacaikwa ceebo cakwaamba ayi mupailishi munene waba Juda waliina lya Ananiyasi mwanaakwe Anasi ngwakaamba ayi bamucaaye. Jemusi wakatolelela kushomeka kuli Yehova, kushikila ndyaakafwa.

6. Ino Jemusi wakalinga kupusene buyani abamatanjilili babupailishi abo bakalingaako paciindi cilya?

⁶ Jemusi wakalinga muntu uliceesha. Ino nceebonshi nceenga twaambila boobo? Amubone Jemusi nshaakacita ndyaakabonana a Yesu mboshipusene anshobakacita bamatanjilili babupailishi baanji. Jemusi ndyaakabona bumboni bwakalinga kutondesha patuba kwaamba ayi Yesu Ngumwanaakwe Lesa, wakaliceesha akusumina. Sombi ubu teshi mbobakacita bapailishi banene mu Jelusalemu. Kucakubonenaako, bakalinga kucishi kwaamba ayi Yesu wakabusha Lasalo kuswa kubafu. Ano muciindi cakusumina kwaamba ayi Yesu wakatumwa a Yehova, bakalinga kusuni kucaya Yesu alimwi a Lasalo. (Joni 11:53; 12:9-11) Mukuya kwaciindi  Yesu ndyaakabushikwa kuswa kubafu, bakeelesha kusisa makani aya kubantu. (Mate. 28:11-15) Bamatanjilili babupailishi aba bakakaka Mesiya, ceebo cakulisumpula.

7. Ino nceebonshi tulyeelete kuleya kulisumpula?

⁷ Ncetutokwiiyawo: Amuleye kulisumpula, lyalo akuba balibambite kwiishikwa a Yehova. Bweenka bulwashi mbweenga bwapa kwaamba ayi moyo wamuntu umwi utasebensi kabotu, kulisumpula inga kwapa kwaamba ayi cibe ciyumu kulindiswe kukonkela butanjilishi bwakwe Yehova. Bafalisi bakalinga kulisumpula abuumbi, cakwaamba ayi bakakaka kushoma bumboni bwakalinga kutondesha patuba ayi Yesu wakalinga kucite mushimu wakwe Lesa alimwi wakalinga Mwanaakwe Lesa. (Joni 12:37-40) Kulisumpula kwabo takwakalinga kabotu mukwiinga kwakapa kwaamba ayi batabi acoolwe cakutambula buumi butamaani. (Mate. 23:13, 33) Aboobo cilayandika abuumbi kutolelela kusuminisha Maswi akwe Lesa a mushimu usalashi kwaalula mibo yesu akutucafwa kuyeeya pashintu shili kabotu alimwi akusala shakucita shili kabotu! (Jemu. 3:17) Mukwiinga Jemusi wakalinga kuliceesha, wakalinga kulibambite kwiishikwa a Yehova. Alimwi kweelana ambweshi twiiye, kuliceesha nkokwakapa kwaamba ayi anokwiisha kabotu.

8. Ino nshiinshi sheenga shatucafwa kushiba bwakwiisha kabotu?

⁸ Jemusi taakalinga kwiiteewo abuumbi lwakumubili. Alimwi ncakutatoonsha kwaamba ayi bamatanjilili babupailishi paciindi cilya bakalinga kumubonabo bweenka mbobakalinga kubona mutumwi Pita a Joni ayi ‘ngumuntu utaiite alimwi muntubo.’ (Milimo 4:13) Sombi Jemusi wakeeya bwakwiisha kabotu, kweelana ambotubona na twabelenga libuku lyamu Baibo liitwa liina lyakwe. Bweenka mbuli Jemusi, mpashi aswebo tatwiiteewo abuumbi lwakumubili. Nacibi boobo, kwiinda mulucafwo lwa mushimu usalashi alimwi alwiiyo ndotutambula kuswa kulibunga lyakwe Yehova, aswebo inga twashiba kabotu bwakwiisha. Amuleke tubandike cakubonenaako Jemusi ncaakatutondesha mbuli shikwiisha akubona nsheenga tweeyaako.

9. Ino Jemusi wakalinga kwiisha buyani?

⁹ Jemusi taakalinga kusebensesha maswi ayumu na kusansulula makani munshila iyumu kunyumfwisha. Aboobo bantu mbaakalinga kwiisha,  bakalinga kushiba nshobakalinga kuyandika kucita ambweenga bacita boobo. Kucakubonenaako, amubone Jemusi mbwakaiisha munshila yuubu kwaamba ayi Beneklistu balyeelete kuba balibambite kucitilwa shintu shitaluleme kwakubula kubikila mfundilishi. Wakalemba ayi: ‘Tulaamba ayi balicite coolwe abo batakwe kuboola pesule mulushomo. Mwakanyumfwa shakutaboola pesule kwakwe Jobo asheesho Yehova nshaakamucitila kumeelelesho ceebo Yehova ngushinkumbu shiinji abuumbi.’ (Jemu. 5:11) Amubone kwaamba ayi Jemusi wakalinga kusebensesha Malembo, ndyaakalinga kwiisha bashominyina. Wakasebensesha Maswi akwe Lesa kwaamba ayi acafwe mbwaakalinga kwiisha kubona ayi lyoonse Yehova alapa shoolwe kubaabo bashomeka kuli nguwe bweenka mbuli Jobo. Jemusi wakacafwa bantu kwiiya cancine ici kwiinda mukusebensesha maswi oobu alimwi akusansulula makani munshila yuubu kunyumfwisha. Aboobo ici cakapa kwaamba ayi bantu batanoomulumbaisha, sombi banolumbaisha Yehova.

10. Ino ninshila nshi yomwi mbweenga twakonkela cakubonenaako cakwe Jemusi ndyetutokwiisha?

¹⁰ Ncetutokwiiyawo: Amusansulule makani munshila yuubu kunyumfwisha alimwi amusebenseshe Maswi akwe Lesa. Ndyetutokwiisha bantu, tatweelete kweelesha kubatondesha kufula kwashintu nshetushi, sombi tulyeelete kubacafwa kushiba kufula kwashintu Yehova nshaashi alimwi ambwaababikila maano. (Loma. 11:33) Inga twacikonsha kucita boobo na lyoonse katusebensesha Malembo ndyetutokwiisha. Kucakubonenaako, muciindi cakulwiita beshikwiiya Baibo nsheenga twaciita na katubete mubukaalo mbobabetemo, tulyeelete kubacafwa kuyeeya pashakubonenaako shamu Baibo akubacafwa kunyumfwisha Yehova mbwayeeya alimwi ambwaalinyumfwa. Lyalo balaakukonkela nshebatokwiiya ceebo cakwaamba ayi balisuni kusangalasha Yehova kuteshi ndiswe.

11. Ino ngamapensho nshi Beneklistu bamwi ngobakalinga kwiindaamo muciindi cakwe Jemusi, alimwi ino Jemusi wakabalulika buyani? (Jemusi 5:13-15)

¹¹ Jemusi wakalinga kunyumfwisha mapensho bashominyina ngobakalinga kwiindaamo. Nkalata Jemusi njaakalemba, ilatondesha patuba ayi wakalinga kucishi mapensho bashominyina ngobakalinga kwiindaamo alimwi wakabalwiita nshobakalinga kweelete kucita kwaamba ayi bakome mapensho ayo. Kucakubonenaako, Beneklistu bamwi bakalinga kucelwa kukonkela kululika. (Jemu. 1:22) Bamwi bakalinga kusuni bantu babile abuumbi. (Jemu. 2:1-3) Alimwi bamwi cakalinga kubayumina kusala kabotu shakwaamba. (Jemu. 3:8-10) Beneklistu aba bakalinga kucite lipenshi linene abuumbi, sombi Jemusi wakalinga kushoma ayi inga baaluka. Wakabalulika munshila yankumbu sombi cakuteenda mweela akuyuminisha baabo bakalinga kuyandika lucafwo kusenga bamanene kwaamba ayi babacaafwe kwaalula shimwi mubuumi.—Amubelenge Jemusi 5:13-15.

12. Ino nciinshi ceenga catucafwa kutolelela kubona shintu munshila ili kabotu ndyetutokwiisha beshikwiiya Baibo besu?

¹² Ncetutokwiiyawo: Munoobona shintu munshila ili kabotu akushoma ayi bantu inga baaluka. Bantu baanji mbotwiisha Baibo inga cababeta ciyumu kukonkela nshebatokwiiya mu Baibo. (Jemu. 4:1-4) Inga catola ciindi kwaamba ayi bacileeke mibo itabete kabotu lyalo akuba amibo ya Bwineklistu. Bweenka mbuli Jemusi, tatweelete kuloonda kulwiita beshikwiiya Baibo besu nshobeelete kusebenselawo. Alimwi tulyeelete kushoma ayi Yehova alaakucafwa bantu baliceesha kwaalula buumi bwabo akutalika kumusebensela.—Jemu. 4:10.

13. Kweelana a Jemusi 3:2, ino nshiinshi Jemusi nshaakalinga kushi?

¹³ Jemusi wakatolelela kulibona munshila yeelete. Jemusi taakalinga kuyeeya ayi wakalinga kuyandika abuumbi kwiinda Beneklistu bamwi ceebo cakwaamba ayi wakalinga mukwabo  Yesu na ceebo ca mikuli iyandika abuumbi njaakalinga kucite. Wakeeta Beneklistunyina ayi ‘bamakwesu basunikwi.’ (Jemu. 1:16, 19; 2:5) Taakwe kweelesha kupa bamwi kumubona ayi alimaninite. Sombi alakwe wakalibikaamo ndyaakaamba ayi: “Soonse tulabisha mushintu shiinji.”—Amubelenge Jemusi 3:2.

14. Ino nceebonshi tulyeelete kusumina ayi aswebo tulabisha?

¹⁴ Ncetutokwiiyawo: Munokwiibaluka kwaamba ayi soonse tulabisha. Tatweelete kunooyeeya ayi kuli nshila shimwi mbotubeenditewo abo mbotwiisha. Ino nceebonshi? Na katupa beshikwiiya Baibo besu kuyeeya ayi tatucitiiwo shilubo, inga twabapa kulefuka mukwiinga inga bayeeya ayi inga tabacikoonshi kukonkela kabotu milawo yakwe Lesa. Sombi na katubalwiita ayi teshi lyoonse ndyecitubeta cuubu kukonkela njiisho shamu Baibo alimwi akubalwiita Yehova mbwaatucafwa kwaalula shimwi mubuumi bwesu, tulaakucafwa beshikwiiya Baibo besu kushiba ayi abalo inga bacikonsha kusebensela Yehova.

15. Ino Jemusi wakalinga kusebensesha shikoshanyo shili buyani? (Jemusi 3:2-6, 10-12)

¹⁵ Jemusi wakalinga kusebensesha shikoshanyo shakalinga kushika bantu pamoyo. Ncakutatoonsha kwaamba ayi mushimu usalashi ngowakamucafwa, sombi alyeelete wakeeya shiinji pamakani abwakwiisha kwiinda mukwiiya shikoshanyo isho Yesu munene wakwe nshaakalinga kusebensesha. Shikoshanyo Jemusi nshaakasebensesha munkalata njaakalemba, nshuubu kunyumfwisha alimwi ncuubu kukonkela nshaakalinga kwaamba.—Amubelenge Jemusi 3:2-6, 10-12.

16. Ino nceebonshi tulyeelete kusebensesha shikoshanyo shisebensa kabotu?

¹⁶ Ncetutokwiiyawo: Amusebenseshe shikoshanyo shisebensa kabotu. Na mwasebensesha shikoshanyo sheelela, inga mwacaafwa bantu kuyeeyela makani ngomutokwaambawo. Shakubonenaako ishi shilacafwa bantu kwiibaluka shiteente shinene shamu Baibo. Yesu wakalinga kucishi kabotu abuumbi kusebensesha shikoshanyo shisebensa kabotu alimwi Jemusi mukwabo wakakonkela cakubonenako cakwe. Amuleke tubandike pacikoshanyo comwi Jemusi ncaakasebensesha alimwi akubona ncocisebensela kabotu.

17. Ino nceebonshi cikoshanyo ncotucana pa Jemusi 1:22-25 ncocisebensela kabotu abuumbi?

¹⁷ Amubelenge Jemusi 1:22-25. Kuli sheebo shiinji shipa kwaamba ayi cikoshanyo ca ligilasi Jemusi ncaakasebensesha, cinosebensa kabotu.  Kuli cintu comwi ncaakalinga kwiishaawo. Nkokwaamba ayi, kwaamba ayi tufubileemo mu Maswi akwe Lesa, tatweelete kweelabo pakwaabelenga sombi tulyeelete kukonkela nshotubelenga. Jemusi wakasala cikoshanyo ca muntu utolilanga muligilasi ico bantu mbaakalinga kwiisha ncobakalinga kushi kabotu. Ino nciinshi ncaakalinga kwiishawo? Na muntu walilanga muligilasi akubona mpaelete kulibotesha sombi wabula kucita boobo, inga kwaba nkubula maano. Aswebo na twabelenga Maswi akwe Lesa akubona mibo njotweelete kwaalula, sombi twabula kucita boobo, ngayi nkubula maano.

18. Ino nshintu nshi shotatwe nshotweelete kucita ndyetutosebensesha cikoshanyo?

¹⁸ Ndyemutosebensesha cikoshanyo, inga mwakonkela cakubonenaako cakwe Jemusi kwiinda mukucita shintu shotatwe: (1) Amushinishe kwaamba ayi cikoshanyo citocatana amakani ngomutobandikaawo. (2) Amusebenseshe cikoshanyo batookutika ncobeshi kabotu. (3) Amusansulule cikoshanyo mbocitocafwa batookutika kunyumfwisha nshomutokwaambaawo. Na cilamubeta ciyumu kucana shikoshanyo sheelela, inga mwabona mu Watch Tower Publications Index. Pakamutwi kaamba ayi “Shikoshanyo,” mulaakucana shikoshanyo shiinji nsheenga mwasebensesha. Sombi mutaluubi kwaamba ayi shikoshanyo shili anga ni maikilofooni—nkokwaamba ayi shilaakupa kwaamba ayi mucafwe batookutika kunyumfwisha shiteente shinene. Aboobo amushinishe kwaamba ayi mwasebenseshabo shikoshanyo ndyemutosansulula shiteente shinene. Ncakwiila kwaamba ayi cintu ciyandika abuumbi ceelete kutupa kuya panembo mukwiisha kwesu, teshi kupa kwaamba ayi bantu banootulumbaisha sombi kucafwa bantu kweelana ambweenga twacikonsha kuba lubasu lwamukwashi wakwe Yehova usangalete.

19. Ino tulatondesha buyani ayi tulibasuni bamakwesu abenankashi?

¹⁹ Jemusi wakalinga kucite munene wakwe wakalinga kumaninite, sombi swebo tatucitewo. Nacibi boobo, tulicite coolwe cakusebensela Yehova pomwi amukwashi unene wabamakwesu abenankashi. Tulatondesha ayi tulibasuni kwiinda mukucana ciindi cakubaabo pomwi, kwiinda mukwiiya kuli mbabo alimwi akutolelela kusebensela pomwi ambabo muncito yakushimikila akwiisha bantu. Na tweelesha cankusu kukonkela cakubonenaako cakwe Jemusi mumibo, mushintu nshetucita alimwi ambotwiisha, tulaakupa Yehova kulumbaishikwa akucafwa bantu bacite myoyo yakusuna kwiiya kuba abushicibusa buyumu a Ishiwesu wakwiculu shilusuno.